𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌸𑍁𑌂𑌦𑌰𑌕𑌾𑌂𑌡𑌮𑍍 ।
𑌅𑌥 𑌷𑌟𑍍𑌚𑌤𑍍𑌵𑌾𑌰𑌿𑌂𑌶𑌸𑍍𑌸𑌰𑍍𑌗𑌃 ।
𑌹𑌤𑌾𑌨𑍍𑌮𑌂𑌤𑍍𑌰𑌿𑌸𑍁𑌤𑌾𑌨𑍍 𑌬𑍁𑌦𑍍𑌧𑍍𑌵𑌾 𑌵𑌾𑌨𑌰𑍇𑌣 𑌮𑌹𑌾𑌤𑍍𑌮𑌨𑌾 ।
𑌰𑌾𑌵𑌣𑌸𑍍𑌸𑌂𑌵𑍃𑌤𑌾𑌕𑌾𑌰𑌶𑍍𑌚𑌕𑌾𑌰 𑌮𑌤𑌿𑌮𑍁𑌤𑍍𑌤𑌮𑌾𑌮𑍍 ॥ 1 ॥
𑌸 𑌵𑌿𑌰𑍂𑌪𑌾𑌕𑍍𑌷𑌯𑍂𑌪𑌾𑌕𑍍𑌷𑍌 𑌦𑍁𑌰𑍍𑌧𑌰𑌂 𑌚𑍈𑌵 𑌰𑌾𑌕𑍍𑌷𑌸𑌮𑍍 ।
𑌪𑍍𑌰𑌘𑌸𑌂 𑌭𑌾𑌸𑌕𑌰𑍍𑌣𑌂 𑌚 𑌪𑌂𑌚𑌸𑍇𑌨𑌾𑌗𑍍𑌰𑌨𑌾𑌯𑌕𑌾𑌨𑍍 ॥ 2 ॥
𑌸𑌂𑌦𑌿𑌦𑍇𑌶 𑌦𑌶𑌗𑍍𑌰𑍀𑌵𑍋 𑌵𑍀𑌰𑌾𑌨𑍍𑌨𑌯𑌵𑌿𑌶𑌾𑌰𑌦𑌾𑌨𑍍 ।
𑌹𑌨𑍁𑌮𑌦𑍍𑌗𑍍𑌰𑌹𑌣𑌵𑍍𑌯𑌗𑍍𑌰𑌾𑌨𑍍𑌵𑌾𑌯𑍁𑌵𑍇𑌗𑌸𑌮𑌾𑌨𑍍𑌯𑍁𑌧𑌿 ॥ 3 ॥
𑌯𑌾𑌤 𑌸𑍇𑌨𑌾𑌗𑍍𑌰𑌗𑌾𑌸𑍍𑌸𑌰𑍍𑌵𑍇 𑌮𑌹𑌾𑌬𑌲𑌪𑌰𑌿𑌗𑍍𑌰𑌹𑌾𑌃 ।
𑌸𑌵𑌾𑌜𑌿𑌰𑌥𑌮𑌾𑌤𑌂𑌗𑌾𑌸𑍍𑌸 𑌕𑌪𑌿𑌶𑍍𑌶𑌾𑌸𑍍𑌯𑌤𑌾𑌮𑌿𑌤𑌿 ॥ 4 ॥
𑌯𑌤𑍍𑌨𑍈𑌶𑍍𑌚 𑌖𑌲𑍁 𑌭𑌾𑌵𑍍𑌯𑌂 𑌸𑍍𑌯𑌾𑌤𑍍𑌤𑌮𑌾𑌸𑌾𑌦𑍍𑌯 𑌵𑌨𑌾𑌲𑌯𑌮𑍍 ।
𑌕𑌰𑍍𑌮 𑌚𑌾𑌪𑌿 𑌸𑌮𑌾𑌧𑍇𑌯𑌂 𑌦𑍇𑌶𑌕𑌾𑌲𑌾𑌵𑌿𑌰𑍋𑌧𑌿𑌨𑌮𑍍 ॥ 5 ॥
𑌨 𑌹𑍍𑌯𑌹𑌂 𑌤𑌂 𑌕𑌪𑌿𑌂 𑌮𑌨𑍍𑌯𑍇 𑌕𑌰𑍍𑌮𑌣𑌾 𑌪𑍍𑌰𑌤𑌿𑌤𑌰𑍍𑌕𑌯𑌨𑍍 ।
𑌸𑌰𑍍𑌵𑌥𑌾 𑌤𑌨𑍍𑌮𑌹𑌦𑍍𑌭𑍂𑌤𑌂 𑌮𑌹𑌾𑌬𑌲𑌪𑌰𑌿𑌗𑍍𑌰𑌹𑌮𑍍 ॥ 6 ॥
𑌭𑌵𑍇𑌦𑌿𑌂𑌦𑍍𑌰𑍇𑌣 𑌵𑌾 𑌸𑍃𑌷𑍍𑌟𑌮𑌸𑍍𑌮𑌦𑌰𑍍𑌥𑌂 𑌤𑌪𑍋𑌬𑌲𑌾𑌤𑍍 ।
𑌸𑌨𑌾𑌗𑌯𑌕𑍍𑌷𑌗𑌂𑌧𑌰𑍍𑌵𑌾 𑌦𑍇𑌵𑌾𑌸𑍁𑌰𑌮𑌹𑌰𑍍𑌷𑌯𑌃 ॥ ॥
𑌯𑍁𑌷𑍍𑌮𑌾𑌭𑌿𑌸𑍍𑌸𑌹𑌿𑌤𑍈𑌸𑍍𑌸𑌰𑍍𑌵𑍈𑌰𑍍𑌮𑌯𑌾 𑌸𑌹 𑌵𑌿𑌨𑌿𑌰𑍍𑌜𑌿𑌤𑌾𑌃 ।
𑌤𑍈𑌰𑌵𑌶𑍍𑌯𑌂 𑌵𑌿𑌧𑌾𑌤𑌵𑍍𑌯𑌂 𑌵𑍍𑌯𑌲𑍀𑌕𑌂 𑌕𑌿𑌂𑌚𑌿𑌦𑍇𑌵 𑌨𑌃 ॥ ॥
𑌤𑌦𑍇𑌵 𑌨𑌾𑌤𑍍𑌰 𑌸𑌂𑌦𑍇𑌹𑌃 𑌪𑍍𑌰𑌸𑌹𑍍𑌯 𑌪𑌰𑌿𑌗𑍃𑌹𑍍𑌯𑌤𑌾𑌮𑍍 ।
𑌨𑌾𑌵𑌮𑌾𑌨𑍍𑌯𑍋 𑌭𑌵𑌦𑍍𑌭𑌿𑌶𑍍𑌚 𑌹𑌰𑌿𑌰𑍍𑌧𑍀𑌰𑌪𑌰𑌾𑌕𑍍𑌰𑌮𑌃 ॥ ॥
𑌦𑍃𑌷𑍍𑌟𑌾 𑌹𑌿 𑌹𑌰𑌯𑌃 𑌪𑍂𑌰𑍍𑌵𑌂 𑌮𑌯𑌾 𑌵𑌿𑌪𑍁𑌲𑌵𑌿𑌕𑍍𑌰𑌮𑌾𑌃 ।
𑌵𑌾𑌲𑍀 𑌚 𑌸𑌹𑌸𑍁𑌗𑍍𑌰𑍀𑌵𑍋 𑌜𑌾𑌂𑌬𑌵𑌾𑌂𑌶𑍍𑌚 𑌮𑌹𑌾𑌬𑌲𑌃 ॥ 10 ॥
𑌨𑍀𑌲𑌸𑍍𑌸𑍇𑌨𑌾𑌪𑌤𑌿𑌶𑍍𑌚𑍈𑌵 𑌯𑍇 𑌚𑌾𑌨𑍍𑌯𑍇 𑌦𑍍𑌵𑌿𑌵𑌿𑌦𑌾𑌦𑌯𑌃 ।
𑌨𑍈𑌵𑌂 𑌤𑍇𑌷𑌾𑌂 𑌗𑌤𑌿𑌰𑍍𑌭𑍀𑌮𑌾 𑌨 𑌤𑍇𑌜𑍋 𑌨 𑌪𑌰𑌾𑌕𑍍𑌰𑌮𑌃 ॥ 11 ॥
𑌨 𑌮𑌤𑌿𑌰𑍍𑌨 𑌬𑌲𑍋𑌤𑍍𑌸𑌾𑌹𑍌 𑌨 𑌰𑍂𑌪𑌪𑌰𑌿𑌕𑌲𑍍𑌪𑌨𑌮𑍍 ।
𑌮𑌹𑌤𑍍𑌸𑌤𑍍𑌤𑍍𑌵𑌮𑌿𑌦𑌂 𑌜𑍍𑌞𑍇𑌯𑌂 𑌕𑌪𑌿𑌰𑍂𑌪𑌂 𑌵𑍍𑌯𑌵𑌸𑍍𑌥𑌿𑌤𑌮𑍍 ॥ 12 ॥
𑌪𑍍𑌰𑌯𑌤𑍍𑌨𑌂 𑌮𑌹𑌦𑌾𑌸𑍍𑌥𑌾𑌯 𑌕𑍍𑌰𑌿𑌯𑌤𑌾𑌮𑌸𑍍𑌯 𑌨𑌿𑌗𑍍𑌰𑌹𑌃 ।
𑌕𑌾𑌮𑌂 𑌲𑍋𑌕𑌾𑌸𑍍𑌤𑍍𑌰𑌯𑌸𑍍𑌸𑍇𑌂𑌦𑍍𑌰𑌾𑌸𑍍𑌸𑌸𑍁𑌰𑌾𑌸𑍁𑌰𑌮𑌾𑌨𑌵𑌾𑌃 ॥ 13 ॥
𑌭𑌵𑌤𑌾𑌮𑌗𑍍𑌰𑌤𑌃 𑌸𑍍𑌥𑌾𑌤𑍁𑌂 𑌨 𑌪𑌰𑍍𑌯𑌾𑌪𑍍𑌤𑌾 𑌰𑌣𑌾𑌜𑌿𑌰𑍇 ।
𑌤𑌥𑌾𑌪𑌿 𑌤𑍁 𑌨𑌯𑌜𑍍𑌞𑍇𑌨 𑌜𑌯𑌮𑌾𑌕𑌾𑌂𑌕𑍍𑌷𑌤𑌾 𑌰𑌣𑍇 ॥ 14 ॥
𑌆𑌤𑍍𑌮𑌾 𑌰𑌕𑍍𑌷𑍍𑌯𑌃 𑌪𑍍𑌰𑌯𑌤𑍍𑌨𑍇𑌨 𑌯𑍁𑌦𑍍𑌧𑌸𑌿𑌦𑍍𑌧𑌿𑌰𑍍𑌹𑌿 𑌚𑌂𑌚𑌲𑌾 ।
𑌤𑍇 𑌸𑍍𑌵𑌾𑌮𑌿𑌵𑌚𑌨𑌂 𑌸𑌰𑍍𑌵𑍇 𑌪𑍍𑌰𑌤𑌿𑌗𑍃𑌹𑍍𑌯 𑌮𑌹𑍌𑌜𑌸𑌃 ॥ 15 ॥
𑌸𑌮𑍁𑌤𑍍𑌪𑍇𑌤𑍁𑌰𑍍𑌮𑌹𑌾𑌵𑍇𑌗𑌾 𑌹𑍁𑌤𑌾𑌶𑌸𑌮𑌤𑍇𑌜𑌸𑌃 ।
𑌰𑌥𑍈𑌰𑍍𑌮𑌤𑍍𑌤𑍈𑌶𑍍𑌚 𑌮𑌾𑌤𑌂𑌗𑍈𑌰𑍍𑌵𑌾𑌜𑌿𑌭𑌿𑌶𑍍𑌚 𑌮𑌹𑌾𑌜𑌵𑍈𑌃 ॥ 16 ॥
𑌶𑌸𑍍𑌤𑍍𑌰𑍈𑌶𑍍𑌚 𑌵𑌿𑌵𑌿𑌧𑍈𑌸𑍍𑌤𑍀𑌕𑍍𑌷𑍍𑌣𑍈𑌸𑍍𑌸𑌰𑍍𑌵𑍈𑌶𑍍𑌚𑍋𑌪𑌚𑌿𑌤𑌾 𑌬𑌲𑍈𑌃 ।
𑌤𑌤𑌸𑍍𑌤𑌂 𑌦𑌦𑍃𑌶𑍁𑌰𑍍𑌵𑍀𑌰𑌾 𑌦𑍀𑌪𑍍𑌯𑌮𑌾𑌨𑌂 𑌮𑌹𑌾𑌕𑌪𑌿𑌮𑍍 ॥ 1 ॥
𑌰𑌶𑍍𑌮𑌿𑌮𑌂𑌤𑌮𑌿𑌵𑍋𑌦𑍍𑌯𑌂𑌤𑌂 𑌸𑍍𑌵𑌤𑍇𑌜𑍋𑌰𑌶𑍍𑌮𑌿𑌮𑌾𑌲𑌿𑌨𑌮𑍍 ।
𑌤𑍋𑌰𑌣𑌸𑍍𑌥𑌂 𑌮𑌹𑍋𑌤𑍍𑌸𑌾𑌹𑌂 𑌮𑌹𑌾𑌸𑌤𑍍𑌤𑍍𑌵𑌂 𑌮𑌹𑌾𑌬𑌲𑌮𑍍 ॥ 1 ॥
𑌮𑌹𑌾𑌮𑌤𑌿𑌂 𑌮𑌹𑌾𑌵𑍇𑌗𑌂 𑌮𑌹𑌾𑌕𑌾𑌯𑌂 𑌮𑌹𑌾𑌬𑌲𑌮𑍍 ।
𑌤𑌂 𑌸𑌮𑍀𑌕𑍍𑌷𑍍𑌯𑍈𑌵 𑌤𑍇 𑌸𑌰𑍍𑌵𑍇 𑌦𑌿𑌕𑍍𑌷𑍁 𑌸𑌰𑍍𑌵𑌾𑌸𑍍𑌵𑌵𑌸𑍍𑌥𑌿𑌤𑌾𑌃 ॥ 1 ॥
𑌤𑍈 𑌸𑍍𑌤𑍈𑌃 𑌪𑍍𑌰𑌹𑌰𑌣𑍈𑌰𑍍𑌭𑍀𑌮𑍈𑌰𑌭𑌿𑌪𑍇𑌤𑍁𑌸𑍍𑌤𑌤𑌸𑍍𑌤𑌤𑌃 ।
𑌤𑌸𑍍𑌯 𑌪𑌂𑌚𑌾𑌯𑌸𑌾𑌸𑍍𑌤𑍀𑌕𑍍𑌷𑍍𑌣𑌾𑌶𑍍𑌶𑌿𑌤𑌾𑌃 𑌪𑍀𑌤𑌮𑍁𑌖𑌾𑌶𑍍𑌶𑌰𑌾𑌃 ॥ 20 ॥
𑌶𑌿𑌰𑌸𑍍𑌯𑍁𑌤𑍍𑌪𑌲𑌪𑌤𑍍𑌰𑌾𑌭𑌾 𑌦𑍁𑌰𑍍𑌧𑌰𑍇𑌣 𑌨𑌿𑌪𑌾𑌤𑌿𑌤𑌾𑌃 ।
𑌸 𑌤𑍈𑌃 𑌪𑌂𑌚𑌭𑌿𑌰𑌾𑌵𑌿𑌦𑍍𑌧𑌶𑍍𑌶𑌰𑍈𑌶𑍍𑌶𑌿𑌰𑌸𑌿 𑌵𑌾𑌨𑌰𑌃 ॥ 21 ॥
𑌉𑌤𑍍𑌪𑌪𑌾𑌤 𑌨𑌦𑌨𑍍 𑌵𑍍𑌯𑍋𑌮𑍍𑌨𑌿 𑌦𑌿𑌶𑍋 𑌦𑌶 𑌵𑌿𑌨𑌾𑌦𑌯𑌨𑍍 ।
𑌤𑌤𑌸𑍍𑌤𑍁 𑌦𑍁𑌰𑍍𑌧𑌰𑍋 𑌵𑍀𑌰𑌸𑍍𑌸𑌰𑌥𑌸𑍍𑌸𑌜𑍍𑌯𑌕𑌾𑌰𑍍𑌮𑍁𑌕𑌃 ॥ 22 ॥
𑌕𑌿𑌰𑌨𑍍 𑌶𑌰𑌶𑌤𑍈𑌸𑍍𑌤𑍀𑌕𑍍𑌷𑍍𑌣𑍈𑌰𑌭𑌿𑌪𑍇𑌦𑍇 𑌮𑌹𑌾𑌬𑌲𑌃 ।
𑌸 𑌕𑌪𑌿𑌰𑍍𑌵𑌾𑌰𑌯𑌾𑌮𑌾𑌸 𑌤𑌂 𑌵𑍍𑌯𑍋𑌮𑍍𑌨𑌿 𑌶𑌰𑌵𑌰𑍍𑌷𑌿𑌣𑌮𑍍 ॥ 23 ॥
𑌵𑍃𑌷𑍍𑌟𑌿𑌮𑌂𑌤𑌂 𑌪𑌯𑍋𑌦𑌾𑌂𑌤𑍇 𑌪𑌯𑍋𑌦𑌮𑌿𑌵 𑌮𑌾𑌰𑍁𑌤𑌃 ।
𑌅𑌰𑍍𑌧𑍍𑌯𑌮𑌾𑌨𑌸𑍍𑌤𑌤𑌸𑍍𑌤𑍇𑌨 𑌦𑍁𑌰𑍍𑌧𑌰𑍇𑌣𑌾𑌨𑌿𑌲𑌾𑌤𑍍𑌮𑌜𑌃 ॥ 24 ॥
𑌚𑌕𑌾𑌰 𑌕𑌦𑌨𑌂 𑌭𑍂𑌯𑍋 𑌵𑍍𑌯𑌵𑌰𑍍𑌧𑌤 𑌚 𑌵𑍇𑌗𑌵𑌾𑌨𑍍 ।
𑌸 𑌦𑍂𑌰𑌂 𑌸𑌹𑌸𑍋𑌤𑍍𑌪𑌤𑍍𑌯 𑌦𑍁𑌰𑍍𑌧𑌰𑌸𑍍𑌯 𑌰𑌥𑍇 𑌹𑌰𑌿𑌃 ॥ 25 ॥
𑌨𑌿𑌪𑌪𑌾𑌤 𑌮𑌹𑌾𑌵𑍇𑌗𑍋 𑌵𑌿𑌦𑍍𑌯𑍁𑌦𑍍𑌰𑌾𑌶𑌿𑌰𑍍𑌗𑌿𑌰𑌾𑌵𑌿𑌵 ।
𑌤𑌤𑌸𑍍𑌸 𑌮𑌥𑌿𑌤𑌾𑌷𑍍𑌟𑌾𑌶𑍍𑌵𑌂 𑌰𑌥𑌂 𑌭𑌗𑍍𑌨𑌾𑌕𑍍𑌷𑌕𑍂𑌬𑌰𑌮𑍍 ॥ 26 ॥
𑌵𑌿𑌹𑌾𑌯 𑌨𑍍𑌯𑌪𑌤𑌦𑍍𑌭𑍂𑌮𑍌 𑌦𑍁𑌰𑍍𑌧𑌰𑌸𑍍𑌤𑍍𑌯𑌕𑍍𑌤𑌜𑍀𑌵𑌿𑌤𑌃 ।
𑌤𑌂 𑌵𑌿𑌰𑍂𑌪𑌾𑌕𑍍𑌷𑌯𑍂𑌪𑌾𑌕𑍍𑌷𑍌 𑌦𑍃𑌷𑍍𑌟𑍍𑌵𑌾 𑌨𑌿𑌪𑌤𑌿𑌤𑌂 𑌭𑍁𑌵𑌿 ॥ 2 ॥
𑌸𑌂𑌜𑌾𑌤𑌰𑍋𑌷𑍌 𑌦𑍁𑌰𑍍𑌧𑌰𑍍𑌷𑌾𑌵𑍁𑌤𑍍𑌪𑍇𑌤𑍁𑌰𑌰𑌿𑌂𑌦𑌮𑍌 ।
𑌸 𑌤𑌾𑌭𑍍𑌯𑌾𑌂 𑌸𑌹𑌸𑍋𑌤𑍍𑌪𑌤𑍍𑌯 𑌵𑌿𑌷𑍍𑌠𑌿𑌤𑍋 𑌵𑌿𑌮𑌲𑍇𑌽𑌂𑌬𑌰𑍇 ॥ 2 ॥
𑌮𑍁𑌦𑍍𑌗𑌰𑌾𑌭𑍍𑌯𑌾𑌂 𑌮𑌹𑌾𑌬𑌾𑌹𑍁𑌰𑍍𑌵𑌕𑍍𑌷𑌸𑍍𑌯𑌭𑌿𑌹𑌤𑌃 𑌕𑌪𑌿𑌃 ।
𑌤𑌯𑍋𑌰𑍍𑌵𑍇𑌗𑌵𑌤𑍋𑌰𑍍𑌵𑍇𑌗𑌂 𑌵𑌿𑌨𑌿𑌹𑌤𑍍𑌯 𑌮𑌹𑌾𑌬𑌲𑌃 ॥ 2 ॥
𑌨𑌿𑌪𑌪𑌾𑌤 𑌪𑍁𑌨𑌰𑍍𑌭𑍂𑌮𑍌 𑌸𑍁𑌪𑌰𑍍𑌣𑌸𑌮𑌵𑌿𑌕𑍍𑌰𑌮𑌃 ।
𑌸 𑌸𑌾𑌲𑌵𑍃𑌕𑍍𑌷𑌮𑌾𑌸𑌾𑌦𑍍𑌯 𑌤𑌮𑍁𑌤𑍍𑌪𑌾𑌟𑍍𑌯 𑌚 𑌵𑌾𑌨𑌰𑌃 ॥ 30 ॥
𑌤𑌾𑌵𑍁𑌭𑍌 𑌰𑌾𑌕𑍍𑌷𑌸𑍌 𑌵𑍀𑌰𑍌 𑌜𑌘𑌾𑌨 𑌪𑌵𑌨𑌾𑌤𑍍𑌮𑌜𑌃 ।
𑌤𑌤𑌸𑍍𑌤𑌾𑌂𑌸𑍍𑌤𑍍𑌰𑍀𑌨𑍍𑌹𑌤𑌾𑌨𑍍𑌜𑍍𑌞𑌾𑌤𑍍𑌵𑌾 𑌵𑌾𑌨𑌰𑍇𑌣 𑌤𑌰𑌸𑍍𑌵𑌿𑌨𑌾 ॥ 31 ॥
𑌅𑌭𑌿𑌪𑍇𑌦𑍇 𑌮𑌹𑌾𑌵𑍇𑌗𑌃 𑌪𑍍𑌰𑌸𑌹𑍍𑌯 𑌪𑍍𑌰𑌘𑌸𑍋 𑌹𑌰𑌿𑌮𑍍 ।
𑌭𑌾𑌸𑌕𑌰𑍍𑌣𑌶𑍍𑌚 𑌸𑌂𑌕𑍃𑌦𑍍𑌧𑌶𑍍𑌶𑍂𑌲𑌮𑌾𑌦𑌾𑌯 𑌵𑍀𑌰𑍍𑌯𑌵𑌾𑌨𑍍 ॥ 32 ॥
𑌏𑌕𑌤𑌃 𑌕𑌪𑌿𑌶𑌾𑌰𑍍𑌦𑍂𑌲𑌂 𑌯𑌶𑌸𑍍𑌵𑌿𑌨𑌮𑌵𑌸𑍍𑌥𑌿𑌤𑌮𑍍 ।
𑌪𑌟𑍍𑌟𑌿𑌸𑍇𑌨 𑌶𑌿𑌤𑌾𑌗𑍍𑌰𑍇𑌣 𑌪𑍍𑌰𑌘𑌸𑌃 𑌪𑍍𑌰𑌤𑍍𑌯𑌯𑍋𑌧𑌯𑌤𑍍 ॥ 33 ॥
𑌭𑌾𑌸𑌕𑌰𑍍𑌣𑌶𑍍𑌚 𑌶𑍂𑌲𑍇𑌨 𑌰𑌾𑌕𑍍𑌷𑌸𑌃 𑌕𑌪𑌿𑌸𑌤𑍍𑌤𑌮𑌮𑍍 ।
𑌸 𑌤𑌾𑌭𑍍𑌯𑌾𑌂 𑌵𑌿𑌕𑍍𑌷𑌤𑍈𑌰𑍍𑌗𑌾𑌤𑍍𑌰𑍈𑌰𑌸𑍃𑌗𑍍𑌦𑌿𑌗𑍍𑌧𑌤𑌨𑍂𑌰𑍁𑌹𑌃 ॥ 34 ॥
𑌅𑌭𑌵𑌦𑍍𑌵𑌾𑌨𑌰𑌃 𑌕𑍍𑌰𑍁𑌦𑍍𑌧𑍋 𑌬𑌾𑌲𑌸𑍂𑌰𑍍𑌯𑌸𑌮𑌪𑍍𑌰𑌭𑌃 ।
𑌸𑌮𑍁𑌤𑍍𑌪𑌾𑌟𑍍𑌯 𑌗𑌿𑌰𑍇𑌶𑍍𑌶𑍃𑌂𑌗𑌂 𑌸𑌮𑍃𑌗𑌵𑍍𑌯𑌾𑌲𑌪𑌾𑌦𑌪𑌮𑍍 ॥ 35 ॥
𑌜𑌘𑌾𑌨 𑌹𑌨𑍁𑌮𑌾𑌨𑍍 𑌵𑍀𑌰𑍋 𑌰𑌾𑌕𑍍𑌷𑌸𑍌 𑌕𑌪𑌿𑌕𑍁𑌂𑌜𑌰𑌃 ।
𑌤𑌤𑌸𑍍𑌤𑍇𑌷𑍍𑌵𑌵𑌸𑌨𑍍𑌨𑍇𑌷𑍁 𑌸𑍇𑌨𑌾𑌪𑌤𑌿𑌷𑍁 𑌪𑌂𑌚𑌸𑍁 ॥ 36 ॥
𑌬𑌲𑌂 𑌤𑌦𑌵𑌶𑍇𑌷𑌂 𑌚 𑌨𑌾𑌶𑌯𑌾𑌮𑌾𑌸 𑌵𑌾𑌨𑌰𑌃 ।
𑌅𑌶𑍍𑌵𑍈𑌰𑌶𑍍𑌵𑌾𑌨𑍍 𑌗𑌜𑍈𑌰𑍍𑌨𑌾𑌗𑌾𑌨𑍍 𑌯𑍋𑌧𑍈𑌰𑍍𑌯𑍋𑌧𑌾𑌨𑍍 𑌰𑌥𑍈𑌰𑌥𑌾𑌨𑍍 ॥ 3 ॥
𑌸 𑌕𑌪𑌿𑌰𑍍𑌨𑌾𑌶𑌯𑌾𑌮𑌾𑌸 𑌸𑌹𑌸𑍍𑌰𑌾𑌕𑍍𑌷 𑌇𑌵𑌾𑌸𑍁𑌰𑌾𑌨𑍍 ।
𑌹𑌤𑍈𑌰𑍍𑌨𑌾𑌗𑍈𑌶𑍍𑌚 𑌤𑍁𑌰𑌗𑍈𑌰𑍍𑌭𑌗𑍍𑌨𑌾𑌕𑍍𑌷𑍈𑌶𑍍𑌚 𑌮𑌹𑌾𑌰𑌥𑍈𑌃 ॥ 3 ॥
𑌹𑌤𑍈𑌶𑍍𑌚 𑌰𑌾𑌕𑍍𑌷𑌸𑍈𑌰𑍍𑌭𑍂𑌮𑍀 𑌰𑍁𑌦𑍍𑌧𑌮𑌾𑌰𑍍𑌗𑌾 𑌸𑌮𑌂𑌤𑌤𑌃 ।
𑌤𑌤𑌃 𑌕𑌪𑌿𑌸𑍍𑌤𑌾𑌂𑌧𑍍𑌵𑌜𑌿𑌨𑍀𑌪𑌤𑍀𑌨𑍍 𑌰𑌣𑍇 𑌨𑌿𑌹𑌤𑍍𑌯 𑌵𑍀𑌰𑌾𑌨𑍍𑌸𑌬𑌲𑌾𑌨𑍍𑌸𑌵𑌾𑌹𑌨𑌾𑌨𑍍 ।
𑌸𑌮𑍀𑌕𑍍𑌷𑍍𑌯 𑌵𑍀𑌰𑌃 𑌪𑌰𑌿𑌗𑍃𑌹𑍍𑌯 𑌤𑍋𑌰𑌣𑌂 𑌕𑍃𑌤𑌕𑍍𑌷𑌣𑌃 𑌕𑌾𑌲 𑌇𑌵 𑌪𑍍𑌰𑌜𑌾𑌕𑍍𑌷𑌯𑍇 ॥ 3 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌸𑍁𑌂𑌦𑌰𑌕𑌾𑌂𑌡𑍇 𑌷𑌟𑍍𑌚𑌤𑍍𑌵𑌾𑌰𑌿𑌂𑌶𑌸𑍍𑌸𑌰𑍍𑌗𑌃 ॥
