𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌕𑌿𑌷𑍍𑌕𑌿𑌂𑌧𑌾𑌕𑌾𑌂𑌡𑌮𑍍 ।
𑌅𑌥 𑌤𑍍𑌰𑌿𑌂𑌶𑌸𑍍𑌸𑌰𑍍𑌗𑌃 ।
𑌗𑍁𑌹𑌂 𑌪𑍍𑌰𑌵𑌿𑌷𑍍𑌟𑍇 𑌸𑍁𑌗𑍍𑌰𑍀𑌵𑍇 𑌵𑌿𑌮𑍁𑌕𑍍𑌤𑍇 𑌗𑌗𑌨𑍇 𑌘𑌨𑍈𑌃 ।
𑌵𑌰𑍍𑌷𑌰𑌾𑌤𑍍𑌰𑍋𑌷𑌿𑌤𑍋 𑌰𑌾𑌮𑌃 𑌕𑌾𑌮𑌶𑍋𑌕𑌾𑌭𑌿𑌪𑍀𑌡𑌿𑌤𑌃 ॥ 1 ॥
𑌪𑌾𑌂𑌡𑍁𑌰𑌂 𑌗𑌗𑌨𑌂 𑌦𑍃𑌷𑍍𑌟𑍍𑌵𑌾 𑌵𑌿𑌮𑌲𑌂 𑌚𑌂𑌦𑍍𑌰𑌮𑌂𑌡𑌲𑌮𑍍 ।
𑌶𑌾𑌰𑌦𑍀𑌂 𑌰𑌜𑌨𑍀𑌂 𑌚𑍈𑌵 𑌦𑍃𑌷𑍍𑌟𑍍𑌵𑌾 𑌜𑍍𑌯𑍋𑌤𑍍𑌸𑍍𑌨𑌾𑌨𑍁𑌲𑍇𑌪𑌨𑌾𑌮𑍍 ॥ 2 ॥
𑌕𑌾𑌮𑌵𑍃𑌤𑍍𑌤𑌂 𑌚 𑌸𑍁𑌗𑍍𑌰𑍀𑌵𑌂 𑌨𑌷𑍍𑌟𑌾𑌂 𑌚 𑌜𑌨𑌕𑌾𑌤𑍍𑌮𑌜𑌾𑌮𑍍 ।
𑌬𑍁𑌦𑍍𑌧𑍍𑌵𑌾 𑌕𑌾𑌲𑌮𑌤𑍀𑌤𑌂 𑌚 𑌮𑍁𑌮𑍋𑌹 𑌪𑌰𑌮𑌾𑌤𑍁𑌰𑌃 ॥ 3 ॥
𑌸 𑌤𑍁 𑌸𑌂𑌜𑍍𑌞𑌾𑌮𑍁𑌪𑌾𑌗𑌮𑍍𑌯 𑌮𑍁𑌹𑍂𑌰𑍍𑌤𑌾𑌨𑍍𑌮𑌤𑌿𑌮𑌾𑌨𑍍𑌪𑍁𑌨𑌃 ।
𑌮𑌨𑌸𑍍𑌸𑍍𑌥𑌾𑌮𑌪𑌿 𑌵𑍈𑌦𑍇𑌹𑍀𑌂 𑌚𑌿𑌂𑌤𑌯𑌾𑌮𑌾𑌸 𑌰𑌾𑌘𑌵𑌃 ॥ 4 ॥
𑌆𑌸𑍀𑌨𑌃 𑌪𑌰𑍍𑌵𑌤𑌸𑍍𑌯𑌾𑌗𑍍𑌰𑍇 𑌹𑍇𑌮𑌧𑌾𑌤𑍁𑌵𑌿𑌭𑍂𑌷𑌿𑌤𑍇 ।
𑌶𑌾𑌰𑌦𑌂 𑌗𑌗𑌨𑌂 𑌦𑍃𑌷𑍍𑌟𑍍𑌵𑌾 𑌜𑌗𑌾𑌮 𑌮𑌨𑌸𑌾 𑌪𑍍𑌰𑌿𑌯𑌾𑌮𑍍 ॥ 5 ॥
𑌦𑍃𑌷𑍍𑌟𑍍𑌵𑌾 𑌚 𑌵𑌿𑌮𑌲𑌂 𑌵𑍍𑌯𑍋𑌮 𑌗𑌤𑌵𑌿𑌦𑍍𑌯𑍁𑌦𑍍𑌵𑌲𑌾𑌹𑌕𑌮𑍍 ।
𑌸𑌾𑌰𑌸𑌾𑌰𑌾𑌵𑌸𑌂𑌘𑍁𑌷𑍍𑌠𑌂 𑌵𑌿𑌲𑌲𑌾𑌪𑌾𑌰𑍍𑌤𑌯𑌾 𑌗𑌿𑌰𑌾 ॥ 6 ॥
𑌸𑌾𑌰𑌸𑌾𑌰𑌾𑌵𑌸𑌨𑍍𑌨𑌾𑌦𑍈𑌸𑍍𑌸𑌾𑌰𑌸𑌾𑌰𑌵𑌨𑌾𑌦𑌿𑌨𑍀 ।
𑌯𑌾𑌽𑌽𑌶𑍍𑌰𑌮𑍇 𑌰𑌮𑌤𑍇 𑌬𑌾𑌲𑌾 𑌸𑌾𑌽𑌦𑍍𑌯 𑌮𑍇 𑌰𑌮𑌤𑍇 𑌕𑌥𑌮𑍍 ॥ ॥
𑌪𑍁𑌷𑍍𑌪𑌿𑌤𑌾𑌂𑌶𑍍𑌚𑌾𑌸𑌨𑌾𑌨𑍍 𑌦𑍃𑌷𑍍𑌟𑍍𑌵𑌾 𑌕𑌾𑌂𑌚𑌨𑌾𑌨𑌿𑌵 𑌨𑌿𑌰𑍍𑌮𑌲𑌾𑌨𑍍 ।
𑌕𑌥𑌂 𑌸𑌾 𑌰𑌮𑌤𑍇 𑌬𑌾𑌲𑌾 𑌪𑌶𑍍𑌯𑌂𑌤𑍀 𑌮𑌾𑌮𑌪𑌶𑍍𑌯𑌤𑍀 ॥ ॥
𑌯𑌾 𑌪𑍁𑌰𑌾 𑌕𑌲𑌹𑌂𑌸𑌾𑌨𑌾𑌂 𑌸𑍍𑌵𑌰𑍇𑌣 𑌕𑌲𑌭𑌾𑌷𑌿𑌣𑍀 ।
𑌬𑍁𑌧𑍍𑌯𑌤𑍇 𑌚𑌾𑌰𑍁𑌸𑌰𑍍𑌵𑌾𑌂𑌗𑍀 𑌸𑌾𑌽𑌦𑍍𑌯 𑌮𑍇 𑌬𑍁𑌦𑍍𑌧𑍍𑌯𑌤𑍇 𑌕𑌥𑌮𑍍 ॥ ॥
𑌨𑌿𑌸𑍍𑌵𑌨𑌂 𑌚𑌕𑍍𑌰𑌵𑌾𑌕𑌾𑌨𑌾𑌂 𑌨𑌿𑌶𑌮𑍍𑌯 𑌨𑌹𑌚𑌾𑌰𑌿𑌣𑌾𑌮𑍍 ।
𑌪𑍁𑌂𑌡𑌰𑍀𑌕𑌵𑌿𑌶𑌾𑌲𑌾𑌕𑍍𑌷𑍀 𑌕𑌥𑌮𑍇𑌷𑌾 𑌭𑌵𑌿𑌷𑍍𑌯𑌤𑌿 ॥ 10 ॥
𑌸𑌰𑌾𑌂𑌸𑌿 𑌸𑌰𑌿𑌤𑍋 𑌵𑌾𑌪𑍀𑌃 𑌕𑌾𑌨𑌨𑌾𑌨𑌿 𑌵𑌨𑌾𑌨𑌿 𑌚 ।
𑌤𑌾𑌂 𑌵𑌿𑌨𑌾 𑌮𑍃𑌗𑌶𑌾𑌬𑌾𑌕𑍍𑌷𑍀𑌂 𑌚𑌰𑌨𑍍𑌨𑌾𑌦𑍍𑌯 𑌸𑍁𑌖𑌂 𑌲𑌭𑍇 ॥ 11 ॥
𑌅𑌪𑌿 𑌤𑌾𑌂 𑌮𑌦𑍍𑌵𑌿𑌯𑍋𑌗𑌾𑌚𑍍𑌛 𑌸𑍌𑌕𑍁𑌮𑌾𑌰𑍍𑌯𑌾𑌚𑍍𑌚 𑌭𑌾𑌮𑌿𑌨𑍀𑌮𑍍 ।
𑌸𑍁𑌦𑍂𑌰𑌂 𑌪𑍀𑌡𑌯𑍇𑌤𑍍𑌕𑌾𑌮𑌶𑍍𑌶𑌰𑌦𑍍𑌗𑍁𑌣𑌨𑌿𑌰𑌂𑌤𑌰𑌃 ॥ 12 ॥
𑌏𑌵𑌮𑌾𑌦𑌿 𑌨𑌰𑌶𑍍𑌰𑍇𑌷𑍍𑌠𑍋 𑌵𑌿𑌲𑌲𑌾𑌪 𑌨𑍃𑌪𑌾𑌤𑍍𑌮𑌜𑌃 ।
𑌵𑌿𑌹𑌂𑌗 𑌇𑌵 𑌸𑌾𑌰𑌂𑌗𑌸𑍍𑌸𑌲𑌿𑌲𑌂 𑌤𑍍𑌰𑌿𑌦𑌶𑍇𑌶𑍍𑌵𑌰𑌾𑌤𑍍 ॥ 13 ॥
𑌤𑌤𑌶𑍍𑌚𑌂𑌚𑍂𑌰𑍍𑌯 𑌰𑌮𑍍𑌯𑍇𑌷𑍁 𑌫𑌲𑌾𑌰𑍍𑌥𑍀 𑌗𑌿𑌰𑌿𑌸𑌾𑌨𑍁𑌷𑍁 ।
𑌦𑌦𑌰𑍍𑌶 𑌪𑌰𑍍𑌯𑍁𑌪𑌾𑌵𑍃𑌤𑍍𑌤𑍋 𑌲𑌕𑍍𑌷𑍍𑌮𑍀𑌵𑌾𑌨𑍍𑌲𑌕𑍍𑌷𑍍𑌮𑌣𑍋𑌽𑌗𑍍𑌰𑌜𑌮𑍍 ॥ 14 ॥
𑌤𑌂 𑌚𑌿𑌂𑌤𑌯𑌾 𑌦𑍁𑌸𑍍𑌸𑌹𑌯𑌾 𑌪𑌰𑍀𑌤𑌂 𑌵𑌿𑌸𑌂𑌜𑍍𑌞𑌮𑍇𑌕𑌂 𑌵𑌿𑌜𑌨𑍇 𑌮𑌨𑌸𑍍𑌵𑍀 ।
𑌭𑍍𑌰𑌾𑌤𑍁𑌰𑍍𑌵𑌿𑌷𑌾𑌦𑌾𑌤𑍍𑌪𑌰𑌿𑌤𑌾𑌪𑌦𑍀𑌨𑌃 𑌸𑌮𑍀𑌕𑍍𑌷𑍍𑌯 𑌸𑍌𑌮𑌿𑌤𑍍𑌰𑌿𑌰𑍁𑌵𑌾𑌚 𑌰𑌾𑌮𑌮𑍍 ॥ 15 ॥
𑌕𑌿𑌮𑌾𑌰𑍍𑌯 𑌕𑌾𑌮𑌸𑍍𑌯 𑌵𑌶𑌂𑌗𑌤𑍇𑌨 𑌕𑌿𑌮𑌾𑌤𑍍𑌮𑌪𑍌𑌰𑍁𑌷𑍍𑌯𑌪𑌰𑌾𑌭𑌵𑍇𑌨 ।
𑌅𑌯𑌂 𑌸𑌦𑌾 𑌸𑌂𑌹𑍍𑌰𑌿𑌯𑌤𑍇 𑌸𑌮𑌾𑌧𑌿𑌃 𑌕𑌿𑌮𑌤𑍍𑌰 𑌯𑍋𑌗𑍇𑌨 𑌨𑌿𑌵𑌰𑍍𑌤𑌿𑌤𑍇𑌨 ॥ 16 ॥
𑌕𑍍𑌰𑌿𑌯𑌾𑌭𑌿𑌯𑍋𑌗𑌂 𑌮𑌨𑌸𑌃 𑌪𑍍𑌰𑌸𑌾𑌦𑌂 𑌸𑌮𑌾𑌧𑌿𑌯𑍋𑌗𑌾𑌨𑍁𑌗𑌤𑌂 𑌚 𑌕𑌾𑌲𑌮𑍍 ।
𑌸𑌹𑌾𑌯𑌸𑌾𑌮𑌰𑍍𑌥𑍍𑌯𑌮𑌦𑍀𑌨𑌸𑌤𑍍𑌤𑍍𑌵𑌃 𑌸𑍍𑌵𑌕𑌰𑍍𑌮 𑌹𑍇𑌤𑍁𑌂 𑌚 𑌕𑍁𑌰𑍁𑌷𑍍𑌵 𑌹𑍇𑌤𑍁𑌮𑍍 ॥ 1 ॥
𑌨 𑌜𑌾𑌨𑌕𑍀 𑌮𑌾𑌨𑌵 𑌵𑌂𑌶𑌨𑌾𑌥 𑌤𑍍𑌵𑌯𑌾 𑌸𑌨𑌾𑌥𑌾 𑌸𑍁𑌲𑌭𑌾 𑌪𑌰𑍇𑌣 ।
𑌨 𑌚𑌾𑌗𑍍𑌨𑌿𑌚𑍂𑌡𑌾𑌂 𑌜𑍍𑌵𑌲𑌿𑌤𑌾𑌮𑍁𑌪𑍇𑌤𑍍𑌯 𑌨 𑌦𑌹𑍍𑌯𑌤𑍇 𑌵𑍀𑌰 𑌵𑌰𑌾𑌰𑍍𑌹 𑌕𑌚𑍍𑌛𑌿𑌤𑍍 ॥ 1 ॥
𑌸𑌲𑌕𑍍𑌷𑌣𑌂 𑌲𑌕𑍍𑌷𑍍𑌮𑌣𑌮𑌪𑍍𑌰𑌧𑍃𑌷𑍍𑌯𑌂 𑌸𑍍𑌵𑌭𑌾𑌵𑌜𑌂 𑌵𑌾𑌕𑍍𑌯𑌮𑍁𑌵𑌾𑌚 𑌰𑌾𑌮𑌃 ।
𑌹𑌿𑌤𑌂 𑌚 𑌪𑌥𑍍𑌯𑌂 𑌚 𑌨𑌯𑌪𑍍𑌰𑌸𑌕𑍍𑌤𑌂 𑌸𑌸𑌾𑌮 𑌧𑌰𑍍𑌮𑌾𑌰𑍍𑌥𑌸𑌮𑌾𑌹𑌿𑌤𑌂 𑌚 ॥ 1 ॥
𑌨𑌿𑌸𑍍𑌸𑌂𑌶𑌯𑌂 𑌕𑌾𑌰𑍍𑌯𑌮𑌵𑍇𑌕𑍍𑌷𑌿𑌤𑌵𑍍𑌯𑌂 𑌕𑍍𑌰𑌿𑌯𑌾𑌵𑌿𑌶𑍇𑌷𑍋𑌽𑌹𑍍𑌯𑌨𑍁𑌵𑌰𑍍𑌤𑌿𑌤𑌵𑍍𑌯𑌃 ।
𑌨𑌨𑍁 𑌪𑍍𑌰𑌵𑍃𑌤𑍍𑌤𑌸𑍍𑌯 𑌦𑍁𑌰𑌾𑌸𑌦𑌸𑍍𑌯 𑌕𑍁𑌮𑌾𑌰 𑌕𑌾𑌰𑍍𑌯𑌸𑍍𑌯 𑌫𑌲𑌂 𑌚 𑌚𑌿𑌂𑌤𑍍𑌯𑌮𑍍 ॥ 20 ॥
𑌅𑌥 𑌪𑌦𑍍𑌮𑌪𑌲𑌾𑌶𑌾𑌕𑍍𑌷𑍀𑌂 𑌮𑍈𑌥𑌿𑌲𑍀𑌮𑌨𑍁𑌚𑌿𑌂𑌤𑌯𑌨𑍍 ।
𑌉𑌵𑌾𑌚 𑌲𑌕𑍍𑌷𑍍𑌮𑌣𑌂 𑌰𑌾𑌮𑍋 𑌮𑍁𑌖𑍇𑌨 𑌪𑌰𑌿𑌶𑍁𑌷𑍍𑌯𑌤𑌾 ॥ 21 ॥
𑌤𑌰𑍍𑌪𑌯𑌿𑌤𑍍𑌵𑌾 𑌸𑌹𑌸𑍍𑌰𑌾𑌕𑍍𑌷𑌸𑍍𑌸𑌲𑌿𑌲𑍇𑌨 𑌵𑌸𑍁𑌂𑌧𑌰𑌾𑌮𑍍 ।
𑌨𑌿𑌰𑍍𑌵𑌰𑍍𑌤𑌯𑌿𑌤𑍍𑌵𑌾 𑌸𑌸𑍍𑌯𑌾𑌨𑌿 𑌕𑍃𑌤𑌕𑌰𑍍𑌮𑌾 𑌵𑍍𑌯𑌵𑌸𑍍𑌥𑌿𑌤𑌃 ॥ 22 ॥
𑌸𑍍𑌨𑌿𑌗𑍍𑌧𑌗𑌂𑌭𑍀𑌰𑌨𑌿𑌰𑍍𑌘𑍋𑌷𑌾𑌶𑍍𑌶𑍈𑌲𑌦𑍍𑌰𑍁𑌮𑌪𑍁𑌰𑍋𑌗𑌮𑌾𑌃 ।
𑌵𑌿𑌸𑍃𑌜𑍍𑌯 𑌸𑌲𑌿𑌲𑌂 𑌮𑍇𑌘𑌾𑌃 𑌪𑌰𑌿𑌶𑍍𑌰𑌾𑌂𑌤𑌾 𑌨𑍃𑌪𑌾𑌤𑍍𑌮𑌜 ॥ 23 ॥
𑌨𑍀𑌲𑍋𑌤𑍍𑌪𑌲𑌦𑌲𑌶𑍍𑌯𑌾𑌮𑌾𑌶𑍍𑌶𑍍𑌯𑌾𑌮𑍀𑌕𑍃𑌤𑍍𑌵𑌾 𑌦𑌿𑌶𑍋 𑌦𑌶 ।
𑌵𑌿𑌮𑌦𑌾 𑌇𑌵 𑌮𑌾𑌤𑌂𑌗𑌾𑌶𑍍𑌶𑌾𑌂𑌤𑌵𑍇𑌗𑌾𑌃 𑌪𑌯𑍋𑌧𑌰𑌾𑌃 ॥ 24 ॥
𑌜𑌲𑌗𑌰𑍍𑌭𑌾 𑌮𑌹𑌾𑌮𑍇𑌘𑌾 𑌕𑍁𑌟𑌜𑌾𑌰𑍍𑌜𑍁𑌨𑌗𑌂𑌧𑌿𑌨𑌃 ।
𑌚𑌰𑌿𑌤𑍍𑌵𑌾 𑌵𑌿𑌰𑌤𑌾𑌸𑍍𑌸𑍌𑌮𑍍𑌯 𑌵𑍃𑌷𑍍𑌟𑌿𑌵𑌾𑌤𑌾𑌸𑍍𑌸𑌮𑍁𑌦𑍍𑌯𑌤𑌾𑌃 ॥ 25 ॥
𑌘𑌨𑌾𑌨𑌾𑌂 𑌵𑌾𑌰𑌣𑌾𑌨𑌾𑌂 𑌚 𑌮𑌯𑍂𑌰𑌾𑌣𑌾𑌂 𑌚 𑌲𑌕𑍍𑌷𑍍𑌮𑌣 ।
𑌨𑌾𑌦𑌃 𑌪𑍍𑌰𑌸𑍍𑌰𑌵𑌣𑌾𑌨𑌾𑌂 𑌚 𑌪𑍍𑌰𑌶𑌾𑌂𑌤𑌸𑍍𑌸𑌹𑌸𑌾𑌽𑌨𑌘 ॥ 26 ॥
𑌅𑌭𑌿𑌵𑍃𑌷𑍍𑌟𑌾 𑌮𑌹𑌾𑌮𑍇𑌘𑍈𑌰𑍍𑌨𑌿𑌰𑍍𑌮𑌲𑌾𑌶𑍍𑌚𑌿𑌤𑍍𑌰𑌸𑌾𑌨𑌵𑌃 ।
𑌅𑌨𑍁𑌲𑌿𑌪𑍍𑌤𑌾 𑌇𑌵𑌾𑌽𑌭𑌾𑌂𑌤𑌿 𑌗𑌿𑌰𑌯𑌶𑍍𑌚𑌿𑌤𑍍𑌰𑌦𑍀𑌪𑍍𑌤𑌿𑌭𑌿𑌃 ॥ 2 ॥
𑌶𑌾𑌖𑌾𑌸𑍁 𑌸𑌪𑍍𑌤𑌚𑍍𑌛𑌦𑌪𑌾𑌦𑌪𑌾𑌨𑌾𑌂 𑌪𑍍𑌰𑌭𑌾𑌸𑍁 𑌤𑌾𑌰𑌾𑌰𑍍𑌕𑌨𑌿𑌶𑌾𑌕𑌰𑌾𑌣𑌾𑌮𑍍 ।
𑌲𑍀𑌲𑌾𑌸𑍁 𑌚𑍈𑌵𑍋𑌤𑍍𑌤𑌮 𑌵𑌾𑌰𑌣𑌾𑌨𑌾𑌂 𑌶𑍍𑌰𑌿𑌯𑌂 𑌵𑌿𑌭𑌜𑍍𑌯𑌾𑌦𑍍𑌯 𑌶𑌰𑌤𑍍𑌪𑍍𑌰𑌵𑍃𑌤𑍍𑌤𑌾 ॥ 2 ॥
𑌸𑌂𑌪𑍍𑌰𑌤𑍍𑌯𑌨𑍇𑌕𑌾𑌶𑍍𑌰𑌯 𑌚𑌿𑌤𑍍𑌰𑌶𑍋𑌭𑌾 𑌲𑌕𑍍𑌷𑍍𑌮𑍀𑌶𑍍𑌶𑌰𑌤𑍍𑌕𑌾𑌲𑌗𑍁𑌣𑍋𑌪𑌨𑍀𑌤𑌾 ।
𑌸𑍂𑌰𑍍𑌯𑌾𑌗𑍍𑌰𑌹𑌸𑍍𑌤𑌪𑍍𑌰𑌤𑌿𑌬𑍋𑌧𑌿𑌤𑍇𑌷𑍁 𑌪𑌦𑍍𑌮𑌾𑌕𑌰𑍇𑌷𑍍𑌵𑌭𑍍𑌯𑌧𑌿𑌕𑌂 𑌵𑌿𑌭𑌾𑌤𑌿 ॥ 2 ॥
𑌸𑌪𑍍𑌤𑌚𑍍𑌛𑌦𑌾𑌨𑌾𑌂 𑌕𑍁𑌸𑍁𑌮𑍋𑌪𑌗𑌂𑌧𑍀 𑌷𑌟𑍍𑌪𑌾𑌦𑌬𑍃𑌂𑌦𑍈𑌰𑌨𑍁𑌗𑍀𑌯𑌮𑌾𑌨𑌃 ।
𑌮𑌤𑍍𑌤𑌦𑍍𑌵𑌿𑌪𑌾𑌨𑌾𑌂 𑌪𑌵𑌨𑍋𑌽𑌨𑍁𑌸𑌾𑌰𑍀 𑌦𑌰𑍍𑌪𑌂 𑌵𑌿𑌨𑍇𑌷𑍍𑌯𑌨𑍍𑌨𑌧𑌿𑌕𑌂 𑌕𑌰𑍋𑌤𑌿 ॥ 30 ॥
𑌅𑌭𑍍𑌯𑌾𑌗𑌤𑍈𑌶𑍍𑌚𑌾𑌰𑍁𑌵𑌿𑌶𑌾𑌲𑌪𑌕𑍍𑌷𑍈 𑌸𑍍𑌸𑌰𑌃𑌪𑍍𑌰𑌿𑌯𑍈𑌃 𑌪𑌦𑍍𑌮𑌰𑌜𑍋𑌵𑌕𑍀𑌰𑍍𑌣𑍈𑌃 ।
𑌮𑌹𑌾𑌨𑌦𑍀𑌨𑌾𑌂 𑌪𑍁𑌲𑌿𑌨𑍋𑌪𑌯𑌾𑌤𑍈𑌃 𑌕𑍍𑌰𑍀𑌡𑌂𑌤𑌿 𑌹𑌂𑌸𑌾𑌸𑍍𑌸𑌹 𑌚𑌕𑍍𑌰𑌵𑌾𑌕𑍈𑌃 ॥ 31 ॥
𑌮𑌦𑌪𑍍𑌰𑌗𑌲𑍍𑌭𑍇𑌷𑍁 𑌚 𑌵𑌾𑌰𑌣𑍇𑌷𑍁 𑌗𑌵𑌾𑌂 𑌸𑌮𑍂𑌹𑍇𑌷𑍁 𑌚 𑌦𑌰𑍍𑌪𑌿𑌤𑍇𑌷𑍁 ।
𑌪𑍍𑌰𑌸𑌨𑍍𑌨𑌤𑍋𑌯𑌾𑌸𑍁 𑌚 𑌨𑌿𑌮𑍍𑌨𑌗𑌾𑌸𑍁 𑌵𑌿𑌭𑌾𑌤𑌿 𑌲𑌕𑍍𑌷𑍍𑌮𑍀𑌰𑍍𑌬𑌹𑍁𑌧𑌾 𑌵𑌿𑌭𑌕𑍍𑌤𑌾 ॥ 32 ॥
𑌨𑌭𑌸𑍍𑌸𑌮𑍀𑌕𑍍𑌷𑍍𑌯𑌾𑌂𑌬𑍁𑌧𑌰𑍈𑌰𑍍𑌵𑌿𑌮𑍁𑌕𑍍𑌤𑌂 𑌵𑌿𑌮𑍁𑌕𑍍𑌤𑌬𑌰𑍍𑌹𑌾𑌭𑌰𑌣𑌾 𑌵𑌨𑍇𑌷𑍁 ।
𑌪𑍍𑌰𑌿𑌯𑌾𑌸𑍍𑌵𑌸𑌕𑍍𑌤𑌾 𑌵𑌿𑌨𑌿𑌵𑍃𑌤𑍍𑌤𑌶𑍋𑌭𑌾 𑌗𑌤𑍋𑌤𑍍𑌸𑌵𑌾 𑌧𑍍𑌯𑌾𑌨𑌪𑌰𑌾 𑌮𑌯𑍂𑌰𑌾𑌃 ॥ 33 ॥
𑌮𑌨𑍋𑌜𑍍𑌞𑌗𑌂𑌧𑍈𑌃 𑌪𑍍𑌰𑌿𑌯𑌕𑍈𑌰𑌨𑌲𑍍𑌪𑍈𑌃 𑌪𑍁𑌷𑍍𑌪𑌾𑌤𑌿𑌭𑌾𑌰𑌾𑌵𑌨𑌤𑌾𑌗𑍍𑌰𑌶𑌾𑌖𑍈𑌃 ।
𑌸𑍁𑌵𑌰𑍍𑌣𑌗𑍌𑌰𑍈𑌰𑍍𑌨𑌯𑌨𑌾𑌭𑌿𑌰𑌾𑌮𑍈 𑌰𑍁𑌦𑍍𑌯𑍋𑌤𑌿𑌤𑌾𑌨𑍀𑌵 𑌵𑌨𑌾𑌂𑌤𑌰𑌾𑌣𑌿 ॥ 34 ॥
𑌪𑍍𑌰𑌿𑌯𑌾𑌨𑍍𑌵𑌿𑌤𑌾𑌨𑌾𑌂 𑌨𑌲𑌿𑌨𑍀𑌪𑍍𑌰𑌿𑌯𑌾𑌣𑌾𑌂 𑌵𑌨𑍇 𑌰𑌤𑌾𑌨𑌾𑌂 𑌕𑍁𑌸𑍁𑌮𑍋𑌦𑍍𑌧𑌤𑌾𑌨𑌾𑌮𑍍 ।
𑌮𑌦𑍋𑌤𑍍𑌕𑌟𑌾𑌨𑌾𑌂 𑌮𑌦𑌲𑌾𑌲𑌸𑌾𑌨𑌾𑌂 𑌗𑌜𑍋𑌤𑍍𑌤𑌮𑌾𑌨𑌾𑌂 𑌗𑌤𑌯𑍋𑌽𑌦𑍍𑌯 𑌮𑌂𑌦𑌾𑌃 ॥ 35 ॥
𑌵𑍍𑌯𑌭𑍍𑌰𑌂 𑌨𑌭𑌶𑍍𑌶𑌸𑍍𑌤𑍍𑌰𑌵𑌿𑌧𑍌𑌤𑌵𑌰𑍍𑌣𑌂 𑌕𑍃𑌶𑌪𑍍𑌰𑌵𑌾𑌹𑌾𑌨𑌿 𑌨𑌦𑍀𑌜𑌲𑌾𑌨𑌿 ।
𑌕𑌹𑍍𑌲𑌾𑌰𑌶𑍀𑌤𑌾𑌃 𑌪𑌵𑌨𑌾𑌃 𑌪𑍍𑌰𑌵𑌾𑌂𑌤𑌿 𑌤𑌮𑍋𑌵𑌿𑌮𑍁𑌕𑍍𑌤𑌾𑌶𑍍𑌚 𑌦𑌿𑌶𑌃 𑌪𑍍𑌰𑌕𑌾𑌶𑌾𑌃 ॥ 36 ॥
𑌸𑍂𑌰𑍍𑌯𑌾𑌤𑌪𑌕𑍍𑌰𑌾𑌮𑌣𑌨𑌷𑍍𑌟𑌪𑌂𑌕𑌾 𑌭𑍂𑌮𑌿𑌶𑍍𑌚𑌿𑌰𑍋𑌦𑌧𑌾𑌟𑌿𑌤𑌸𑌾𑌂𑌦𑍍𑌰𑌰𑍇𑌣𑍁𑌃 ।
𑌅𑌨𑍍𑌯𑍋𑌨𑍍𑌯𑌵𑍈𑌰𑍇𑌣𑌸𑌮𑌾𑌯𑍁𑌤𑌾𑌨𑌾 𑌮𑍁𑌦𑍍𑌯𑍋𑌗𑌕𑌾𑌲𑍋𑌽𑌦𑍍𑌯 𑌨𑌰𑌾𑌧𑌿𑌪𑌾𑌨𑌾𑌮𑍍 ॥ 3 ॥
𑌶𑌰𑌦𑍍𑌗𑍁𑌣𑌾𑌪𑍍𑌯𑌾𑌯𑌿𑌤𑌰𑍂𑌪𑌶𑍋𑌭𑌾𑌃 𑌪𑍍𑌰𑌹𑌰𑍍𑌷𑌿𑌤𑌾𑌃 𑌪𑌾𑌂𑌶𑍁𑌸𑌮𑍁𑌤𑍍𑌕𑍍𑌷𑌿𑌤𑌾𑌂𑌗𑌾𑌃 ।
𑌮𑌦𑍋𑌤𑍍𑌕𑌟𑌾𑌸𑍍𑌸𑌂𑌪𑍍𑌰𑌤𑌿 𑌯𑍁𑌦𑍍𑌧𑌲𑍁𑌬𑍍𑌧𑌾 𑌵𑍃𑌷𑌾 𑌗𑌵𑌾𑌂 𑌮𑌧𑍍𑌯𑌗𑌤𑌾 𑌨𑌦𑌂𑌤𑌿 ॥ 3 ॥
𑌸𑌮𑌨𑍍𑌮𑌥𑌂 𑌤𑍀𑌵𑍍𑌰𑌗𑌤𑌾𑌨𑍁𑌰𑌾𑌗𑌾𑌃 𑌕𑍁𑌲𑌾𑌨𑍍𑌵𑌿𑌤𑌾 𑌮𑌂𑌦𑌗𑌤𑌿𑌂 𑌕𑌰𑌿𑌣𑍍𑌯𑌃 ।
𑌮𑌦𑌾𑌨𑍍𑌵𑌿𑌤𑌂 𑌸𑌂𑌪𑌰𑌿𑌵𑌾𑌰𑍍𑌯 𑌯𑌾𑌂𑌤𑌂 𑌵𑌨𑍇𑌷𑍁 𑌭𑌰𑍍𑌤𑌾𑌰𑌮𑌨𑍁𑌪𑍍𑌰𑌯𑌾𑌂𑌤𑌿 ॥ 3 ॥
𑌤𑍍𑌯𑌕𑍍𑌤𑍍𑌵𑌾 𑌵𑌰𑌾𑌣𑍍𑌯𑌾𑌤𑍍𑌮𑌵𑌿𑌭𑍂𑌷𑌣𑌾𑌨𑌿 𑌬𑌰𑍍𑌹𑌾𑌣𑌿 𑌤𑍀𑌰𑍋𑌪𑌗𑌤𑌾 𑌨𑌦𑍀𑌨𑌾𑌮𑍍 ।
𑌨𑌿𑌰𑍍𑌭𑌰𑍍𑌤𑍍𑌸𑍍𑌯𑌮𑌾𑌨𑌾 𑌇𑌵 𑌸𑌾𑌰𑌸𑍌𑌘𑍈𑌃 𑌪𑍍𑌰𑌯𑌾𑌂𑌤𑌿 𑌦𑍀𑌨𑌾 𑌵𑌿𑌮𑌦𑌾 𑌮𑌯𑍂𑌰𑌾𑌃 ॥ 40 ॥
𑌵𑌿𑌤𑍍𑌰𑌾𑌸𑍍𑌯 𑌕𑌾𑌰𑌂𑌡𑌵𑌚𑌕𑍍𑌰𑌵𑌾𑌕𑌾 𑌨𑍍𑌮𑌹𑌾𑌰𑌵𑍈𑌰𑍍𑌭𑌿𑌨𑍍𑌨𑌕𑌟𑌾 𑌗𑌜𑍇𑌂𑌦𑍍𑌰𑌾𑌃 ।
𑌸𑌰𑌸𑍍𑌸𑍁 𑌬𑌦𑍍𑌧𑌾𑌂𑌬𑍁𑌜𑌭𑍂𑌷𑌣𑍇𑌷𑍁 𑌵𑌿𑌕𑍍𑌷𑍋𑌭𑍍𑌯 𑌵𑌿𑌕𑍍𑌷𑍋𑌭𑍍𑌯 𑌜𑌲𑌂 𑌪𑌿𑌬𑌂𑌤𑌿 ॥ 41 ॥
𑌵𑍍𑌯𑌪𑍇𑌤𑌪𑌂𑌕𑌾𑌸𑍁 𑌸𑌵𑌾𑌲𑍁𑌕𑌾𑌸𑍁 𑌪𑍍𑌰𑌸𑌨𑍍𑌨𑌤𑍋𑌯𑌾𑌸𑍁 𑌸𑌗𑍋𑌕𑍁𑌲𑌾𑌸𑍁 ।
𑌸𑌸𑌾𑌰𑌸𑌾𑌰𑌾𑌵𑌨𑌿𑌨𑌾𑌦𑌿𑌤𑌾𑌸𑍁 𑌨𑌦𑍀𑌷𑍁 𑌹𑍃𑌷𑍍𑌟𑌾 𑌨𑌿𑌪𑌤𑌂𑌤𑌿 𑌹𑌂𑌸𑌾𑌃 ॥ 42 ॥
𑌨𑌦𑍀𑌘𑌨𑌪𑍍𑌰𑌸𑍍𑌰𑌵𑌣𑍋𑌦𑌕𑌾𑌨𑌾 𑌮𑌤𑌿𑌪𑍍𑌰𑌵𑍃𑌦𑍍𑌧𑌾𑌨𑌿𑌲𑌬𑌰𑍍𑌹𑌿𑌣𑌾𑌨𑌾𑌮𑍍 ।
𑌪𑍍𑌲𑌵𑌂𑌗𑌮𑌾𑌨𑌾𑌂 𑌚 𑌗𑌤𑍋𑌤𑍍𑌸𑌵𑌾𑌨𑌾𑌂 𑌦𑍍𑌰𑍁𑌤𑌂 𑌰𑌵𑌾𑌸𑍍𑌸𑌂𑌪𑍍𑌰𑌤𑌿 𑌸𑌂𑌪𑍍𑌰𑌣𑌷𑍍𑌟𑌾𑌃 ॥ 43 ॥
𑌅𑌨𑍇𑌕𑌵𑌰𑍍𑌣𑌾𑌸𑍍𑌸𑍁𑌵𑌿𑌨𑌷𑍍𑌟𑌕𑌾𑌯𑌾 𑌨𑌵𑍋𑌦𑌿𑌤𑍇𑌷𑍍𑌵𑌂𑌬𑍁𑌧𑌰𑍇𑌷𑍁 𑌨𑌷𑍍𑌟𑌾𑌃 ।
𑌕𑍍𑌷𑍁𑌧𑌾𑌰𑍍𑌦𑌿𑌤𑌾 𑌘𑍋𑌰𑌵𑌿𑌷𑌾 𑌬𑌿𑌲𑍇𑌭𑍍𑌯 𑌶𑍍𑌚𑌿𑌰𑍋𑌷𑌿𑌤𑌾 𑌵𑌿𑌪𑍍𑌰𑌸𑌰𑌂𑌤𑌿 𑌸𑌰𑍍𑌪𑌾𑌃 ॥ 44 ॥
𑌚𑌂𑌚𑌚𑍍𑌚𑌂𑌦𑍍𑌰𑌕𑌰𑌸𑍍𑌪𑌰𑍍𑌶𑌹𑌰𑍍𑌷𑍋𑌨𑍍𑌮𑍀𑌲𑌿𑌤𑌤𑌾𑌰𑌕𑌾 ।
𑌅𑌹𑍋 𑌰𑌾𑌗𑌵𑌤𑍀 𑌸𑌂𑌧𑍍𑌯𑌾 𑌜𑌹𑌾𑌤𑌿 𑌸𑍍𑌵𑌯𑌮𑌂𑌬𑌰𑌮𑍍 ॥ 45 ॥
𑌰𑌾𑌤𑍍𑌰𑌿𑌶𑍍𑌶𑌶𑌾𑌂𑌕𑍋𑌦𑌿𑌤𑌸𑍌𑌮𑍍𑌯𑌵𑌕𑍍𑌤𑍍𑌰𑌾 𑌤𑌾𑌰𑌾𑌗𑌣𑍋𑌨𑍍𑌮𑍀𑌲𑌿𑌤𑌚𑌾𑌰𑍁𑌨𑍇𑌤𑍍𑌰𑌾 ।
𑌜𑍍𑌯𑍋𑌤𑍍𑌸𑍍𑌨𑌾𑌂𑌶𑍁𑌕𑌪𑍍𑌰𑌾𑌵𑌰𑌣𑌾 𑌵𑌿𑌭𑌾𑌤𑌿 𑌨𑌾𑌰𑍀𑌵 𑌶𑍁𑌕𑍍𑌲𑌾𑌂𑌶𑍁𑌕𑌸𑌂𑌵𑍃𑌤𑌾𑌂𑌗𑍀 ॥ 46 ॥
𑌵𑌿𑌪𑌕𑍍𑌵𑌶𑌾𑌲𑌿𑌪𑍍𑌰𑌸𑌵𑌾𑌨𑌿 𑌭𑍁𑌕𑍍𑌤𑍍𑌵𑌾 𑌪𑍍𑌰𑌹𑌰𑍍𑌷𑌿𑌤𑌾 𑌸𑌾𑌰𑌸𑌚𑌾𑌰𑍁𑌪𑌂𑌕𑍍𑌤𑌿𑌃 ।
𑌨𑌭𑌸𑍍𑌸𑌮𑌾𑌕𑍍𑌰𑌾𑌮𑌤𑌿 𑌶𑍀𑌘𑍍𑌰𑌵𑍇𑌗𑌾𑌃 𑌵𑌾𑌤𑌾𑌵𑌧𑍂𑌤𑌾 𑌗𑍍𑌰𑌥𑌿𑌤𑍇𑌵 𑌮𑌾𑌲𑌾 ॥ 4 ॥
𑌸𑍁𑌪𑍍𑌤𑍈𑌕𑌹𑌂𑌸𑌂 𑌕𑍁𑌮𑍁𑌦𑍈𑌰𑍁𑌪𑍇𑌤𑌂 𑌮𑌹𑌾𑌹𑍍𑌰𑌦𑌸𑍍𑌥𑌂 𑌸𑌲𑌿𑌲𑌂 𑌵𑌿𑌭𑌾𑌤𑌿 ।
𑌘𑌨𑍈𑌰𑍍𑌵𑌿𑌮𑍁𑌕𑍍𑌤𑌂 𑌨𑌿𑌶𑌿 𑌪𑍂𑌰𑍍𑌣𑌚𑌂𑌦𑍍𑌰𑌂 𑌤𑌾𑌰𑌾𑌗𑌣𑌾𑌕𑍀𑌰𑍍𑌣𑌮𑌿𑌵𑌾𑌂𑌤𑌰𑌿𑌕𑍍𑌷𑌮𑍍 ॥ 4 ॥
𑌪𑍍𑌰𑌕𑍀𑌰𑍍𑌣𑌹𑌂𑌸𑌾𑌕𑍁𑌲𑌮𑍇𑌖𑌲𑌾𑌨𑌾𑌂 𑌪𑍍𑌰𑌬𑍁𑌦𑍍𑌧𑌪𑌦𑍍𑌮𑍋𑌤𑍍𑌪𑌲𑌮𑌾𑌲𑌿𑌨𑍀𑌨𑌾𑌮𑍍 ।
𑌵𑌾𑌪𑍍𑌯𑍁𑌤𑍍𑌤𑌮𑌾𑌨𑌾𑌮𑌧𑌿𑌕𑌾𑌽𑌦𑍍𑌯 𑌲𑌕𑍍𑌷𑍍𑌮𑍀 𑌰𑍍𑌵𑌰𑌾𑌂𑌗𑌨𑌾𑌨𑌾𑌮𑌿𑌵 𑌭𑍂𑌷𑌿𑌤𑌾𑌨𑌾𑌮𑍍 ॥ 4 ॥
𑌵𑍇𑌣𑍁𑌸𑍍𑌵𑌨𑌵𑍍𑌯𑌂𑌜𑌿𑌤𑌤𑍂𑌰𑍍𑌯𑌮𑌿𑌶𑍍𑌰𑌃 𑌪𑍍𑌰𑌤𑍍𑌯𑍂𑌷𑌕𑌾𑌲𑌾𑌨𑌿𑌲𑌸𑌂𑌪𑍍𑌰𑌵𑍃𑌦𑍍𑌧𑌃 ।
𑌸𑌮𑍍𑌮𑍂𑌰𑍍𑌛𑌿𑌤𑍋 𑌗𑌰𑍍𑌗𑌰𑌗𑍋𑌵𑍃𑌷𑌾𑌣𑌾 𑌮𑌨𑍍𑌯𑍋𑌨𑍍𑌯𑌮𑌾𑌪𑍂𑌰𑌯𑌤𑍀𑌵 𑌶𑌬𑍍𑌦𑌃 ॥ 50 ॥
𑌨𑌵𑍈𑌰𑍍𑌨𑌦𑍀𑌨𑌾𑌂 𑌕𑍁𑌸𑍁𑌮𑌪𑍍𑌰𑌭𑌾𑌸𑍈 𑌰𑍍𑌵𑍍𑌯𑌾𑌧𑍂𑌯𑌮𑌾𑌨𑍈𑌰𑍍𑌮𑍃𑌦𑍁𑌮𑌾𑌰𑍁𑌤𑍇𑌨 ।
𑌧𑍌𑌤𑌾𑌮𑌲𑌕𑍍𑌷𑍌𑌮𑌪𑌟𑌪𑍍𑌰𑌕𑌾𑌶𑍈𑌃 𑌕𑍂𑌲𑌾𑌨𑌿 𑌕𑌾𑌶𑍈𑌰𑍁𑌪𑌶𑍋𑌭𑌿𑌤𑌾𑌨𑌿 ॥ 51 ॥
𑌵𑌨𑌪𑍍𑌰𑌚𑌂𑌡𑌾 𑌮𑌧𑍁𑌪𑌾𑌨𑌶𑍌𑌂𑌡𑌾𑌃 𑌪𑍍𑌰𑌿𑌯𑌾𑌨𑍍𑌵𑌿𑌤𑌾𑌷𑍍𑌷𑌟𑍍𑌚𑌰𑌣𑌾𑌃 𑌪𑍍𑌰𑌹𑍍𑌰𑍃𑌷𑍍𑌟𑌾𑌃 ।
𑌵𑌨𑍇𑌷𑍁 𑌮𑌤𑍍𑌤𑌾𑌃 𑌪𑌵𑌨𑌾𑌨𑍁𑌯𑌾𑌤𑍍𑌰𑌾𑌂 𑌕𑍁𑌰𑍍𑌵𑌂𑌤𑌿 𑌪𑌦𑍍𑌮𑌾𑌸𑌨𑌰𑍇𑌣𑍁𑌗𑍌𑌰𑌾𑌃 ॥ 52 ॥
𑌜𑌲𑌂 𑌪𑍍𑌰𑌸𑌨𑍍𑌨𑌂 𑌕𑍁𑌮𑍁𑌦𑌂 𑌪𑍍𑌰𑌭𑌾𑌸𑌂 𑌕𑍍𑌰𑍌𑌂𑌚𑌸𑍍𑌵𑌨𑌶𑍍𑌶𑌾𑌲𑌿𑌵𑌨𑌂 𑌵𑌿𑌪𑌕𑍍𑌵𑌮𑍍 ।
𑌮𑍃𑌦𑍁𑌶𑍍𑌚 𑌵𑌾𑌯𑍁𑌰𑍍𑌵𑌿𑌮𑌲𑌶𑍍𑌚 𑌚𑌂𑌦𑍍𑌰 𑌶𑍍𑌶𑌂𑌸𑌂𑌤𑌿 𑌵𑌰𑍍𑌷𑌵𑍍𑌯𑌪𑌨𑍀𑌤𑌕𑌾𑌲𑌮𑍍 ॥ 53 ॥
𑌮𑍀𑌨𑍋𑌪𑌸𑌂𑌦𑌰𑍍𑌶𑌿𑌤𑌮𑍇𑌖𑌲𑌾𑌨𑌾𑌂 𑌨𑌦𑍀𑌵𑌧𑍂𑌨𑌾𑌂 𑌗𑌤𑌯𑍋𑌽𑌦𑍍𑌯 𑌮𑌂𑌦𑌾𑌃 ।
𑌕𑌾𑌂𑌤𑍋𑌪𑌭𑍁𑌕𑍍𑌤𑌾𑌲𑌸𑌗𑌾𑌮𑌿𑌨𑍀𑌨𑌾𑌂 𑌪𑍍𑌰𑌭𑌾𑌤𑌕𑌾𑌲𑍇𑌷𑍍𑌵𑌿𑌵 𑌕𑌾𑌮𑌿𑌨𑍀𑌨𑌾𑌮𑍍 ॥ 54 ॥
𑌸𑌚𑌕𑍍𑌰𑌵𑌾𑌕𑌾𑌨𑌿 𑌸𑌶𑍈𑌵𑌲𑌾𑌨𑌿 𑌕𑌾𑌶𑍈𑌰𑍍𑌦𑍁𑌕𑍂𑌲𑍈𑌰𑌿𑌵 𑌸𑌂𑌵𑍃𑌤𑌾𑌨𑌿 ।
𑌸𑌪𑌤𑍍𑌰𑌲𑍇𑌖𑌾𑌨𑌿 𑌸𑌰𑍋𑌚𑌨𑌾𑌨𑌿 𑌵𑌧𑍂𑌮𑍁𑌖𑌾𑌨𑍀𑌵 𑌨𑌦𑍀𑌮𑍁𑌖𑌾𑌨𑌿 ॥ 55 ॥
𑌪𑍍𑌰𑌫𑍁𑌲𑍍𑌲𑌬𑌾𑌣𑌾𑌸𑌨𑌚𑌿𑌤𑍍𑌰𑌿𑌤𑍇𑌷𑍁 𑌪𑍍𑌰𑌹𑍃𑌷𑍍𑌟𑌷𑌟𑍍𑌪𑌾𑌦𑌨𑌿𑌕𑍂𑌜𑌿𑌤𑍇𑌷𑍁 ।
𑌗𑍃𑌹𑍀𑌤𑌚𑌾𑌪𑍋𑌦𑍍𑌯𑌤𑌚𑌂𑌡𑌦𑌂𑌡𑌃 𑌪𑍍𑌰𑌚𑌂𑌡𑌚𑌾𑌰𑍋𑌽𑌦𑍍𑌯 𑌵𑌨𑍇𑌷𑍁 𑌕𑌾𑌮𑌃 ॥ 56 ॥
𑌲𑍋𑌕𑌂 𑌸𑍁𑌵𑍃𑌷𑍍𑌟𑍍𑌯𑌾 𑌪𑌰𑌿𑌤𑍋𑌷𑌯𑌿𑌤𑍍𑌵𑌾 𑌨𑌦𑍀𑌸𑍍𑌤𑌟𑌾𑌕𑌾𑌨𑌿 𑌚 𑌪𑍂𑌰𑌯𑌿𑌤𑍍𑌵𑌾 ।
𑌨𑌿𑌷𑍍𑌪𑌨𑍍𑌨𑌸𑌸𑍍𑌯𑌾𑌂 𑌵𑌸𑍁𑌧𑌾𑌂 𑌚 𑌕𑍃𑌤𑍍𑌵𑌾 𑌤𑍍𑌯𑌕𑍍𑌤𑍍𑌵𑌾 𑌨𑌭𑌸𑍍𑌤𑍋𑌯𑌧𑌰𑌾𑌃 𑌪𑍍𑌰𑌣𑌷𑍍𑌟𑌾𑌃 ॥ 5 ॥
𑌦𑌰𑍍𑌶𑌯𑌂𑌤𑌿 𑌶𑌰𑌨𑍍𑌨𑌦𑍍𑌯𑌃 𑌪𑍁𑌲𑌿𑌨𑌾𑌨𑌿 𑌶𑌨𑍈𑌃 𑌶𑌨𑍈𑌃 ।
𑌨𑌵𑌸𑌂𑌗𑌮𑌸𑌵𑍍𑌰𑍀𑌡𑌾 𑌜𑌘𑌨𑌾𑌨𑍀𑌵 𑌯𑍋𑌷𑌿𑌤𑌃 ॥ 5 ॥
𑌪𑍍𑌰𑌸𑌨𑍍𑌨𑌸𑌲𑌿𑌲𑌾𑌸𑍍𑌸𑍌𑌮𑍍𑌯 𑌕𑍁𑌰𑌰𑍀𑌭𑌿𑌰𑍍𑌵𑌿𑌨𑌾𑌦𑌿𑌤𑌾𑌃 ।
𑌚𑌕𑍍𑌰𑌵𑌾𑌕𑌗𑌣𑌾𑌕𑍀𑌰𑍍𑌣𑌾 𑌵𑌿𑌭𑌾𑌂𑌤𑌿 𑌸𑌲𑌿𑌲𑌾𑌶𑌯𑌾𑌃 ॥ 5 ॥
𑌅𑌸𑌨𑌾𑌸𑍍𑌸𑌪𑍍𑌤𑌪𑌰𑍍𑌣𑌾𑌶𑍍𑌚 𑌕𑍋𑌵𑌿𑌦𑌾𑌰𑌾𑌶𑍍𑌚 𑌪𑍁𑌷𑍍𑌪𑌿𑌤𑌾𑌃 ।
𑌦𑍃𑌶𑍍𑌯𑌂𑌤𑍇 𑌬𑌂𑌧𑍁𑌜𑍀𑌵𑌾𑌶𑍍𑌚 𑌶𑍍𑌯𑌾𑌮𑌾𑌶𑍍𑌚 𑌗𑌿𑌰𑌿𑌸𑌾𑌨𑍁𑌷𑍁 ॥ 60 ॥
𑌹𑌂𑌸𑌸𑌾𑌰𑌸𑌚𑌕𑍍𑌰𑌾𑌹𑍍𑌵𑍈𑌃 𑌕𑍁𑌰𑌰𑍈𑌶𑍍𑌚 𑌸𑌮𑌂𑌤𑌤𑌃 ।
𑌪𑍁𑌲𑌿𑌨𑌾𑌨𑍍𑌯𑌵𑌕𑍀𑌰𑍍𑌣𑌾𑌨𑌿 𑌨𑌦𑍀𑌨𑌾𑌂 𑌪𑌶𑍍𑌯 𑌲𑌕𑍍𑌷𑍍𑌮𑌣 ॥ 61 ॥
𑌅𑌨𑍍𑌯𑍋𑌨𑍍𑌯𑌬𑌦𑍍𑌧𑌵𑍈𑌰𑌾𑌣𑌾𑌂 𑌜𑌿𑌗𑍀𑌷𑍂𑌣𑌾𑌂 𑌨𑍃𑌪𑌾𑌤𑍍𑌮𑌜 ।
𑌉𑌦𑍍𑌯𑍋𑌗𑌸𑌮𑌯𑌸𑍍𑌸𑍌𑌮𑍍𑌯 𑌪𑌾𑌰𑍍𑌥𑌿𑌵𑌾𑌨𑌾𑌮𑍁𑌪𑌸𑍍𑌥𑌿𑌤𑌃 ॥ 62 ॥
𑌇𑌯𑌂 𑌸𑌾 𑌪𑍍𑌰𑌥𑌮𑌾 𑌯𑌾𑌤𑍍𑌰𑌾 𑌪𑌾𑌰𑍍𑌥𑌿𑌵𑌾𑌨𑌾𑌂 𑌨𑍃𑌪𑌾𑌤𑍍𑌮𑌜 𑌨 𑌚 𑌪𑌶𑍍𑌯𑌾𑌮𑌿 𑌸𑍁𑌗𑍍𑌰𑍀𑌵𑌮𑍁𑌦𑍍𑌯𑍋𑌗𑌂 𑌵𑌾 𑌤𑌥𑌾𑌵𑌿𑌧𑌮𑍍 ॥ 63 ॥
𑌚𑌤𑍍𑌵𑌾𑌰𑍋 𑌵𑌾𑌰𑍍𑌷𑌿𑌕𑌾 𑌮𑌾𑌸𑌾 𑌗𑌤𑌾 𑌵𑌰𑍍𑌷𑌶𑌤𑍋𑌪𑌮𑌾𑌃 ।
𑌮𑌮 𑌶𑍋𑌕𑌾𑌭𑌿𑌭𑍂𑌤𑌸𑍍𑌯 𑌸𑍌𑌮𑍍𑌯 𑌸𑍀𑌤𑌾𑌮𑌪𑌶𑍍𑌯𑌤𑌃 ॥ 64 ॥
𑌚𑌕𑍍𑌰𑌵𑌾𑌕𑍀𑌵 𑌭𑌰𑍍𑌤𑌾𑌰𑌂 𑌪𑍃𑌷𑍍𑌠𑌤𑍋𑌽𑌨𑍁𑌗𑌤𑌾 𑌵𑌨𑌮𑍍 ।
𑌵𑌿𑌷𑌮𑌂 𑌦𑌂𑌡𑌕𑌾𑌰𑌣𑍍𑌯𑌮𑍁𑌦𑍍𑌯𑌾𑌨𑌮𑌿𑌵 𑌯𑌾𑌽𑌗𑌤𑌾 ॥ 65 ॥
𑌪𑍍𑌰𑌿𑌯𑌾𑌵𑌿𑌹𑍀𑌨𑍇 𑌦𑍁𑌃𑌖𑌾𑌰𑍍𑌤𑍇 𑌹𑍃𑌤𑌰𑌾𑌜𑍍𑌯𑍇 𑌵𑌿𑌵𑌾𑌸𑌿𑌤𑍇 ।
𑌕𑍃𑌪𑌾𑌂 𑌨 𑌕𑍁𑌰𑍁𑌤𑍇 𑌰𑌾𑌜𑌾 𑌸𑍁𑌗𑍍𑌰𑍀𑌵𑍋 𑌮𑌯𑌿 𑌲𑌕𑍍𑌷𑍍𑌮𑌣 ॥ 66 ॥
𑌅𑌨𑌾𑌥𑍋 𑌹𑍃𑌤𑌰𑌾𑌜𑍍𑌯𑍋𑌽𑌯𑌂 𑌰𑌾𑌵𑌣𑍇𑌨 𑌚 𑌧𑌰𑍍𑌷𑌿𑌤𑌃 ।
𑌦𑍀𑌨𑍋 𑌦𑍂𑌰𑌗𑍃𑌹𑌃 𑌕𑌾𑌮𑍀 𑌮𑌾𑌂 𑌚𑍈𑌵 𑌶𑌰𑌣𑌂 𑌗𑌤𑌃 ॥ 6 ॥
𑌇𑌤𑍍𑌯𑍇𑌤𑍈𑌃 𑌕𑌾𑌰𑌣𑍈𑌸𑍍𑌸𑍌𑌮𑍍𑌯 𑌸𑍁𑌗𑍍𑌰𑍀𑌵𑌸𑍍𑌯 𑌦𑍁𑌰𑌾𑌤𑍍𑌮𑌨𑌃 ।
𑌅𑌹𑌂 𑌵𑌾𑌨𑌰𑌰𑌾𑌜𑌸𑍍𑌯 𑌪𑌰𑌿𑌭𑍂𑌤𑌃 𑌪𑌰𑌂𑌤𑌪 ॥ 6 ॥
𑌸 𑌕𑌾𑌲𑌂 𑌪𑌰𑌿𑌸𑌂𑌖𑍍𑌯𑌾𑌯 𑌸𑍀𑌤𑌾𑌯𑌾𑌃 𑌪𑌰𑌿𑌮𑌾𑌰𑍍𑌗𑌣𑍇 ।
𑌕𑍃𑌤𑌾𑌰𑍍𑌥𑌸𑍍𑌸𑌮𑌯𑌂 𑌕𑍃𑌤𑍍𑌵𑌾 𑌦𑍁𑌰𑍍𑌮𑌤𑌿𑌰𑍍𑌨𑌾𑌵𑌬𑍁𑌧𑍍𑌯𑌤𑍇 ॥ 6 ॥
𑌤𑍍𑌵𑌂 𑌚 𑌕𑌿𑌷𑍍𑌕𑌿𑌂𑌧𑌾𑌂 𑌪𑍍𑌰𑌵𑌿𑌶𑍍𑌯 𑌬𑍍𑌰𑍂𑌹𑌿 𑌵𑌾𑌨𑌰𑌪𑍁𑌂𑌗𑌵𑌮𑍍 ।
𑌮𑍂𑌰𑍍𑌖𑌂 𑌗𑍍𑌰𑌾𑌮𑍍𑌯𑌸𑍁𑌖𑍇 𑌸𑌕𑍍𑌤𑌂 𑌸𑍁𑌗𑍍𑌰𑍀𑌵𑌂 𑌵𑌚𑌨𑌾𑌨𑍍𑌮𑌮 ॥ 0 ॥
𑌅𑌰𑍍𑌥𑌿𑌨𑌾𑌮𑍁𑌪𑌪𑌨𑍍𑌨𑌾𑌨𑌾𑌂 𑌪𑍂𑌰𑍍𑌵𑌂 𑌚𑌾𑌪𑍍𑌯𑍁𑌪𑌕𑌾𑌰𑌿𑌣𑌾𑌮𑍍 ।
𑌆𑌶𑌾𑌂 𑌸𑌂𑌶𑍍𑌰𑍁𑌤𑍍𑌯 𑌯𑍋 𑌹𑌂𑌤𑌿 𑌸 𑌲𑍋𑌕𑍇 𑌪𑍁𑌰𑍁𑌷𑌾𑌧𑌮𑌃 ॥ 1 ॥
𑌶𑍁𑌭𑌂 𑌵𑌾 𑌯𑌦𑌿 𑌵𑌾 𑌪𑌾𑌪𑌂 𑌯𑍋 𑌹𑌿 𑌵𑌾𑌕𑍍𑌯𑌮𑍁𑌦𑍀𑌰𑌿𑌤𑌮𑍍 ।
𑌸𑌤𑍍𑌯𑍇𑌨 𑌪𑍍𑌰𑌤𑌿𑌗𑍃𑌹𑍍𑌣𑌾𑌤𑌿 𑌸 𑌵𑍀𑌰𑌃 𑌪𑍁𑌰𑍁𑌷𑍋𑌤𑍍𑌤𑌮𑌃 ॥ 2 ॥
𑌕𑍃𑌤𑌾𑌰𑍍𑌥𑌾 𑌹𑍍𑌯𑌕𑍃𑌤𑌾𑌰𑍍𑌥𑌾𑌨𑌾𑌂 𑌮𑌿𑌤𑍍𑌰𑌾𑌣𑌾𑌂 𑌨 𑌭𑌵𑌂𑌤𑌿 𑌯𑍇 ।
𑌤𑌾𑌨𑍍𑌮𑍃𑌤𑌾𑌨𑌪𑌿 𑌕𑍍𑌰𑌵𑍍𑌯𑌾𑌦𑌾𑌃 𑌕𑍃𑌤𑌘𑍍𑌨𑌾𑌨𑍍𑌨𑍋𑌪𑌭𑍁𑌂𑌜𑌤𑍇 ॥ 3 ॥
𑌨𑍂𑌨𑌂 𑌕𑌾𑌂𑌚𑌨𑌪𑍃𑌷𑍍𑌠𑌸𑍍𑌯 𑌵𑌿𑌕𑍃𑌷𑍍𑌟𑌸𑍍𑌯 𑌮𑌯𑌾 𑌰𑌣𑍇 ।
𑌦𑍍𑌰𑌷𑍍𑌟𑍁𑌮𑌿𑌚𑍍𑌛𑌤𑌿 𑌚𑌾𑌪𑌸𑍍𑌯 𑌰𑍂𑌪𑌂 𑌵𑌿𑌦𑍍𑌯𑍁𑌦𑍍𑌗𑌣𑍋𑌪𑌮𑌮𑍍 ॥ 4 ॥
𑌘𑍋𑌰𑌂 𑌜𑍍𑌯𑌾𑌤𑌲𑌨𑌿𑌰𑍍𑌘𑍋𑌷𑌂 𑌕𑍍𑌰𑍁𑌦𑍍𑌧𑌸𑍍𑌯 𑌮𑌮 𑌸𑌂𑌯𑍁𑌗𑍇 ।
𑌨𑌿𑌰𑍍𑌘𑍋𑌷𑌮𑌿𑌵 𑌵𑌜𑍍𑌰𑌸𑍍𑌯 𑌪𑍁𑌨𑌸𑍍𑌸𑌂𑌶𑍍𑌰𑍋𑌤𑍁𑌮𑌿𑌚𑍍𑌛𑌸𑌿 ॥ 5 ॥
𑌕𑌾𑌮𑌮𑍇𑌵𑌂𑌗𑌤𑍇𑌽𑌪𑍍𑌯𑌸𑍍𑌯 𑌪𑌰𑌿𑌜𑍍𑌞𑌾𑌤𑍇 𑌪𑌰𑌾𑌕𑍍𑌰𑌮𑍇 ।
𑌤𑍍𑌵𑌤𑍍𑌸𑌹𑌾𑌯𑌸𑍍𑌯 𑌮𑍇 𑌵𑍀𑌰 𑌨 𑌚𑌿𑌂𑌤𑌾 𑌸𑍍𑌯𑌾𑌨𑍍𑌨𑍃𑌪𑌾𑌤𑍍𑌮𑌜 ॥ 6 ॥
𑌯𑌦𑌰𑍍𑌥𑌮𑌯𑌮𑌾𑌰𑌂𑌭𑌃 𑌕𑍃𑌤𑌃 𑌪𑌰𑌪𑍁𑌰𑌂𑌜𑌯𑌃 ।
𑌸𑌮𑌯𑌂 𑌨𑌾𑌭𑌿𑌜𑌾𑌨𑌾𑌤𑌿 𑌕𑍃𑌤𑌾𑌰𑍍𑌥𑌃 𑌪𑍍𑌲𑌵𑌗𑍇𑌶𑍍𑌵𑌰𑌃 ॥ ॥
𑌵𑌰𑍍𑌷𑌾𑌸𑌮𑌯𑌕𑌾𑌲𑌂 𑌤𑍁 𑌪𑍍𑌰𑌤𑌿𑌜𑍍𑌞𑌾𑌯 𑌹𑌰𑍀𑌶𑍍𑌵𑌰𑌃 ।
𑌵𑍍𑌯𑌤𑍀𑌤𑌾𑌂𑌶𑍍𑌚𑌤𑍁𑌰𑍋 𑌮𑌾𑌸𑌾𑌨𑍍𑌵𑌿𑌹𑌰𑌨𑍍𑌨𑌾𑌵𑌬𑍁𑌧𑍍𑌯𑌤𑍇 ॥ ॥
𑌸𑌾𑌮𑌾𑌤𑍍𑌯𑌪𑌰𑌿𑌷𑌤𑍍𑌕𑍍𑌰𑍀𑌡𑌨𑍍𑌪𑌾𑌨𑌮𑍇𑌵𑍋𑌪𑌸𑍇𑌵𑌤𑍇 ।
𑌶𑍋𑌕𑌦𑍀𑌨𑍇𑌷𑍁 𑌨𑌾𑌸𑍍𑌮𑌾𑌸𑍁 𑌸𑍁𑌗𑍍𑌰𑍀𑌵𑌃 𑌕𑍁𑌰𑍁𑌤𑍇 𑌦𑌯𑌾𑌮𑍍 ॥ ॥
𑌉𑌚𑍍𑌯𑌤𑌾𑌂 𑌗𑌚𑍍𑌛 𑌸𑍁𑌗𑍍𑌰𑍀𑌵𑌸𑍍𑌤𑍍𑌵𑌯𑌾 𑌵𑌤𑍍𑌸 𑌮𑌹𑌾𑌬𑌲 ।
𑌮𑌮 𑌰𑍋𑌷𑌸𑍍𑌯 𑌯𑌦𑍍𑌰𑍂𑌪𑌂 𑌬𑍍𑌰𑍂𑌯𑌾𑌶𑍍𑌚𑍈𑌵𑌮𑌿𑌦𑌂 𑌵𑌚𑌃 ॥ 0 ॥
𑌨 𑌚 𑌸𑌂𑌕𑍁𑌚𑌿𑌤𑌃 𑌪𑌂𑌥𑌾 𑌯𑍇𑌨 𑌵𑌾𑌲𑍀 𑌹𑌤𑍋 𑌗𑌤𑌃 ।
𑌸𑌮𑌯𑍇 𑌤𑌿𑌷𑍍𑌠 𑌸𑍁𑌗𑍍𑌰𑍀𑌵 𑌮𑌾 𑌵𑌾𑌲𑌿𑌪𑌥𑌮𑌨𑍍𑌵𑌗𑌾𑌃 ॥ 1 ॥
𑌏𑌕 𑌏𑌵 𑌰𑌣𑍇 𑌵𑌾𑌲𑍀 𑌶𑌰𑍇𑌣 𑌨𑌿𑌹𑌤𑍋 𑌮𑌯𑌾 ।
𑌤𑍍𑌵𑌾𑌂 𑌤𑍁 𑌸𑌤𑍍𑌯𑌾𑌦𑌤𑌿𑌕𑍍𑌰𑌾𑌂𑌤𑌂 𑌹𑌨𑌿𑌷𑍍𑌯𑌾𑌮𑌿 𑌸𑌬𑌾𑌂𑌧𑌵𑌮𑍍 ॥ 2 ॥
𑌤𑌦𑍇𑌵𑌂 𑌵𑌿𑌹𑌿𑌤𑍇 𑌕𑌾𑌰𑍍𑌯𑍇 𑌯𑌦𑍍𑌧𑌿𑌤𑌂 𑌪𑍁𑌰𑍁𑌷𑌰𑍍𑌷𑌭 ।
𑌤𑌤𑍍𑌤𑌦𑍍𑌭𑍍𑌰𑍂𑌹𑌿 𑌨𑌰𑌶𑍍𑌰𑍇𑌷𑍍𑌠𑌤𑍍𑌵𑌰 𑌕𑌾𑌲𑌵𑍍𑌯𑌤𑌿𑌕𑍍𑌰𑌮𑌃 ॥ 3 ॥
𑌕𑍁𑌰𑍁𑌷𑍍𑌵 𑌸𑌤𑍍𑌯𑌂 𑌮𑌯𑌿 𑌵𑌾𑌨𑌰𑍇𑌶𑍍𑌵𑌰 𑌪𑍍𑌰𑌤𑌿𑌶𑍍𑌰𑍁𑌤𑌂 𑌧𑌰𑍍𑌮𑌮𑌵𑍇𑌕𑍍𑌷𑍍𑌯 𑌶𑌾𑌶𑍍𑌵𑌤𑌮𑍍 ।
𑌮𑌾 𑌵𑌾𑌲𑌿𑌨𑌂 𑌪𑍍𑌰𑍇𑌤𑍍𑌯 𑌗𑌤𑍋 𑌯𑌮𑌕𑍍𑌷𑌯𑌂 𑌤𑍍𑌵𑌮𑌦𑍍𑌯 𑌪𑌶𑍍𑌯𑍇𑌰𑍍𑌮𑌮 𑌚𑍋𑌦𑌿𑌤𑍈𑌶𑍍𑌶𑌰𑍈𑌃 ॥ 4 ॥
𑌸 𑌪𑍂𑌰𑍍𑌵𑌜𑌂 𑌤𑍀𑌵𑍍𑌰𑌵𑌿𑌵𑍃𑌦𑍍𑌧𑌕𑍋𑌪𑌂 𑌲𑌾𑌲𑌪𑍍𑌯𑌮𑌾𑌨𑌂 𑌪𑍍𑌰𑌸𑌮𑍀𑌕𑍍𑌷𑍍𑌯 𑌦𑍀𑌨𑌮𑍍 ।
𑌚𑌕𑌾𑌰 𑌤𑍀𑌵𑍍𑌰𑌾𑌂 𑌮𑌤𑌿𑌮𑍁𑌗𑍍𑌰𑌤𑍇𑌜𑌾 𑌹𑌰𑍀𑌶𑍍𑌵𑌰𑍇 𑌮𑌾𑌨𑌵𑌵𑌂𑌶𑌨𑌾𑌥𑌃 ॥ 5 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌕𑌿𑌷𑍍𑌕𑌿𑌂𑌧𑌾𑌕𑌾𑌂𑌡𑍇 𑌤𑍍𑌰𑌿𑌂𑌶𑌸𑍍𑌸𑌰𑍍𑌗𑌃 ॥
