ଶ୍ରୀମଦ୍ଵାଲ୍ମୀକୀୟ ରାମାୟଣେ ସୁଂଦରକାଂଡମ୍ ।
ଅଥ ପଂଚଚତ୍ଵାରିଂଶସ୍ସର୍ଗଃ ।
ତତସ୍ତେ ରାକ୍ଷସେଂଦ୍ରେଣ ଚୋଦିତା ମଂତ୍ରିଣସ୍ସୁତାଃ ।
ନିର୍ୟୟୁର୍ଭଵନାତ୍ତସ୍ମାତ୍ସପ୍ତସପ୍ତାର୍ଚିଵର୍ଚସଃ ॥ 1 ॥
ମହାବଲପରୀଵାରା ଧନୁଷ୍ମଂତୋ ମହାବଲାଃ ।
କୃତାସ୍ତ୍ରାସ୍ତ୍ରଵିଦାଂ ଶ୍ରେଷ୍ଠାଃ ପରସ୍ପରଜୟୈଷିଣଃ ॥ 2 ॥
ହେମଜାଲପରିକ୍ଷିପ୍ତୈର୍ଧ୍ଵଜଵଦ୍ଭିଃ ପତାକିଭିଃ ।
ତୋୟଦସ୍ଵନନିର୍ଘୋଷୈର୍ଵାଜିୟୁକ୍ତୈର୍ମହାରଥୈଃ ॥ 3 ॥
ତପ୍ତକାଂଚନଚିତ୍ରାଣି ଚାପାନ୍ୟମିତଵିକ୍ରମାଃ ।
ଵିସ୍ଫାରୟଂତସ୍ସଂହୃଷ୍ଟାସ୍ତଟିତ୍ଵଂତ ଇଵାଂବୁଦାଃ ॥ 4 ॥
ଜନନ୍ୟସ୍ତୁ ତତସ୍ତେଷାଂ ଵିଦିତ୍ଵା କିଂକରାନ୍ହତାନ୍ ।
ବଭୂଵୁଶ୍ଶୋକସଂଭ୍ରାଂତାସ୍ସବାଂଧଵସୁହୃଜ୍ଜନାଃ ॥ 5 ॥
ତେ ପରସ୍ପରସଂଘର୍ଷାତ୍ତପ୍ତକାଂଚନଭୂଷଣାଃ ।
ଅଭିପେତୁର୍ହନୂମଂତଂ ତୋରଣସ୍ଥମଵସ୍ଥିତମ୍ ॥ 6 ॥
ସୃଜଂତୋ ବାଣଵୃଷ୍ଟିଂ ତେ ରଥଗର୍ଜିତନିସ୍ସ୍ଵନାଃ ।
ଵୃଷ୍ଟିମଂତ ଇଵାଂଭୋଦା ଵିଚେରୁର୍ନୈଋତାଂବୁଦାଃ ॥ 7 ॥
ଅଵକୀର୍ଣସ୍ତତସ୍ତାଭିର୍ହନୁମାନ୍ଶରଵୃଷ୍ଟିଭିଃ ।
ଅଭଵତ୍ସଂଵୃତାକାରଶ୍ଶୈଲରାଡିଵ ଵୃଷ୍ଟିଭିଃ ॥ 8 ॥
ସ ଶରାନ୍ମୋଘୟାମାସ ତେଷାମାଶୁଚରଃ କପିଃ ।
ରଥଵେଗଂ ଚ ଵୀରାଣାଂ ଵିଚରନ୍ଵିମଲେଽଂବରେ ॥ 9 ॥
ସ ତୈଃ କ୍ରୀଡଂଧନୁଷ୍ମଦ୍ଭିର୍ଵ୍ୟୋମ୍ନି ଵୀରଃ ପ୍ରକାଶତେ ।
ଧନୁଷ୍ମଦ୍ଭିର୍ୟଥା ମେଘୈର୍ମାରୁତଃ ପ୍ରଭୁରଂବରେ ॥ 10 ॥
ସ କୃତ୍ଵା ନିନଦଂ ଘୋରଂ ତ୍ରାସୟଂସ୍ତାଂ ମହାଚମୂମ୍ ।
ଚକାର ହନୁମାନ୍ଵେଗଂ ତେଷୁ ରକ୍ଷସ୍ସୁ ଵୀର୍ୟଵାନ୍ ॥ 11 ॥
ତଲେନାଭ୍ୟହନତ୍କାଂଶ୍ଚିତ୍ପାଦୈଃ କାଂଶ୍ଚିତ୍ପରଂତପଃ ।
ମୁଷ୍ଟିନାଭ୍ୟହନତ୍କାଂଶ୍ଚିନ୍ନଖୈଃ କାଂଶ୍ଚିଦ୍ଵ୍ୟଦାରୟତ୍ ॥ 12 ॥
ପ୍ରମମାଥୋରସା କାଂଶ୍ଚିଦୂରୁଭ୍ୟାମପରାନ୍କପିଃ ।
କେଚିତ୍ତସ୍ୟ ନିନାଦେନ ତତ୍ରୈଵ ପତିତା ଭୁଵି ॥ 13 ॥
ତତସ୍ତେଷ୍ଵଵସନ୍ନେଷୁ ଭୂମୌ ନିପତିତେଷୁ ଚ ।
ତତ୍ସୈନ୍ୟମଗମତ୍ସର୍ଵଂ ଦିଶୋଦଶ ଭୟାର୍ଦିତମ୍ ॥ 14 ॥
ଵିନେଦୁର୍ଵିସ୍ଵରଂ ନାଗା ନିପେତୁର୍ଭୁଵି ଵାଜିନଃ ।
ଭଗ୍ନନୀଡଧ୍ଵଜଚ୍ଛତ୍ରୈର୍ଭୂଶ୍ଚ କୀର୍ଣାଽଭଵଦ୍ରଥୈଃ ॥ 15 ॥
ସ୍ରଵତା ରୁଧିରେଣାଥ ସ୍ରଵଂତ୍ୟୋ ଦର୍ଶିତାଃ ପଥି ।
ଵିଵିଧୈଶ୍ଚ ସ୍ଵରୈର୍ଲଂକା ନନାଦ ଵିକୃତଂ ତଦା ॥ 16 ॥
ସ ତାନ୍ପ୍ରଵୃଦ୍ଧାନ୍ଵିନିହତ୍ୟ ରାକ୍ଷସାନ୍ ମହାବଲଶ୍ଚଂଡପରାକ୍ରମଃ କପିଃ ।
ୟୁୟୁତ୍ସୁରନ୍ୟୈଃ ପୁନରେଵ ରାକ୍ଷସୈ ସ୍ତମେଵ ଵୀରୋଽଭିଜଗାମ ତୋରଣମ୍ ॥ 17 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ସୁଂଦରକାଂଡେ ପଂଚଚତ୍ଵାରିଂଶସ୍ସର୍ଗଃ ॥
