ശ്രീമദ്വാല്മീകീയ രാമായണേ സുംദരകാംഡമ് ।
അഥ പംചചത്വാരിംശസ്സര്ഗഃ ।
തതസ്തേ രാക്ഷസേംദ്രേണ ചോദിതാ മംത്രിണസ്സുതാഃ ।
നിര്യയുര്ഭവനാത്തസ്മാത്സപ്തസപ്താര്ചിവര്ചസഃ ॥ 1 ॥
മഹാബലപരീവാരാ ധനുഷ്മംതോ മഹാബലാഃ ।
കൃതാസ്ത്രാസ്ത്രവിദാം ശ്രേഷ്ഠാഃ പരസ്പരജയൈഷിണഃ ॥ 2 ॥
ഹേമജാലപരിക്ഷിപ്തൈര്ധ്വജവദ്ഭിഃ പതാകിഭിഃ ।
തോയദസ്വനനിര്ഘോഷൈർവാജിയുക്തൈര്മഹാരഥൈഃ ॥ 3 ॥
തപ്തകാംചനചിത്രാണി ചാപാന്യമിതവിക്രമാഃ ।
വിസ്ഫാരയംതസ്സംഹൃഷ്ടാസ്തടിത്വംത ഇവാംബുദാഃ ॥ 4 ॥
ജനന്യസ്തു തതസ്തേഷാം വിദിത്വാ കിംകരാന്ഹതാന് ।
ബഭൂവുശ്ശോകസംഭ്രാംതാസ്സബാംധവസുഹൃജ്ജനാഃ ॥ 5 ॥
തേ പരസ്പരസംഘര്ഷാത്തപ്തകാംചനഭൂഷണാഃ ।
അഭിപേതുര്ഹനൂമംതം തോരണസ്ഥമവസ്ഥിതമ് ॥ 6 ॥
സൃജംതോ ബാണവൃഷ്ടിം തേ രഥഗര്ജിതനിസ്സ്വനാഃ ।
വൃഷ്ടിമംത ഇവാംഭോദാ വിചേരുര്നൈഋതാംബുദാഃ ॥ 7 ॥
അവകീര്ണസ്തതസ്താഭിര്ഹനുമാന്ശരവൃഷ്ടിഭിഃ ।
അഭവത്സംവൃതാകാരശ്ശൈലരാഡിവ വൃഷ്ടിഭിഃ ॥ 8 ॥
സ ശരാന്മോഘയാമാസ തേഷാമാശുചരഃ കപിഃ ।
രഥവേഗം ച വീരാണാം വിചരന്വിമലേഽംബരേ ॥ 9 ॥
സ തൈഃ ക്രീഡംധനുഷ്മദ്ഭിർവ്യോമ്നി വീരഃ പ്രകാശതേ ।
ധനുഷ്മദ്ഭിര്യഥാ മേഘൈര്മാരുതഃ പ്രഭുരംബരേ ॥ 10 ॥
സ കൃത്വാ നിനദം ഘോരം ത്രാസയംസ്താം മഹാചമൂമ് ।
ചകാര ഹനുമാന്വേഗം തേഷു രക്ഷസ്സു വീര്യവാന് ॥ 11 ॥
തലേനാഭ്യഹനത്കാംശ്ചിത്പാദൈഃ കാംശ്ചിത്പരംതപഃ ।
മുഷ്ടിനാഭ്യഹനത്കാംശ്ചിന്നഖൈഃ കാംശ്ചിദ്വ്യദാരയത് ॥ 12 ॥
പ്രമമാഥോരസാ കാംശ്ചിദൂരുഭ്യാമപരാന്കപിഃ ।
കേചിത്തസ്യ നിനാദേന തത്രൈവ പതിതാ ഭുവി ॥ 13 ॥
തതസ്തേഷ്വവസന്നേഷു ഭൂമൌ നിപതിതേഷു ച ।
തത്സൈന്യമഗമത്സർവം ദിശോദശ ഭയാര്ദിതമ് ॥ 14 ॥
വിനേദുർവിസ്വരം നാഗാ നിപേതുര്ഭുവി വാജിനഃ ।
ഭഗ്നനീഡധ്വജച്ഛത്രൈര്ഭൂശ്ച കീര്ണാഽഭവദ്രഥൈഃ ॥ 15 ॥
സ്രവതാ രുധിരേണാഥ സ്രവംത്യോ ദര്ശിതാഃ പഥി ।
വിവിധൈശ്ച സ്വരൈര്ലംകാ നനാദ വികൃതം തദാ ॥ 16 ॥
സ താന്പ്രവൃദ്ധാന്വിനിഹത്യ രാക്ഷസാന് മഹാബലശ്ചംഡപരാക്രമഃ കപിഃ ।
യുയുത്സുരന്യൈഃ പുനരേവ രാക്ഷസൈ സ്തമേവ വീരോഽഭിജഗാമ തോരണമ് ॥ 17 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ സുംദരകാംഡേ പംചചത്വാരിംശസ്സര്ഗഃ ॥
