শ্রীমদ্বাল্মীকীয় রামাযণে সুংদরকাংডম্ ।
অথ পংচচত্বারিংশস্সর্গঃ ।
ততস্তে রাক্ষসেংদ্রেণ চোদিতা মংত্রিণস্সুতাঃ ।
নির্যয়ুর্ভবনাত্তস্মাত্সপ্তসপ্তার্চিবর্চসঃ ॥ 1 ॥
মহাবলপরীবারা ধনুষ্মংতো মহাবলাঃ ।
কৃতাস্ত্রাস্ত্রবিদাং শ্রেষ্ঠাঃ পরস্পরজয়ৈষিণঃ ॥ 2 ॥
হেমজালপরিক্ষিপ্তৈর্ধ্বজবদ্ভিঃ পতাকিভিঃ ।
তোযদস্বননির্ঘোষৈর্বাজিয়ুক্তৈর্মহারথৈঃ ॥ 3 ॥
তপ্তকাংচনচিত্রাণি চাপান্যমিতবিক্রমাঃ ।
বিস্ফারয়ংতস্সংহৃষ্টাস্তটিত্বংত ইবাংবুদাঃ ॥ 4 ॥
জনন্যস্তু ততস্তেষাং বিদিত্বা কিংকরান্হতান্ ।
বভূবুশ্শোকসংভ্রাংতাস্সবাংধবসুহৃজ্জনাঃ ॥ 5 ॥
তে পরস্পরসংঘর্ষাত্তপ্তকাংচনভূষণাঃ ।
অভিপেতুর্হনূমংতং তোরণস্থমবস্থিতম্ ॥ 6 ॥
সৃজংতো বাণবৃষ্টিং তে রথগর্জিতনিস্স্বনাঃ ।
বৃষ্টিমংত ইবাংভোদা বিচেরুর্নৈঋতাংবুদাঃ ॥ 7 ॥
অবকীর্ণস্ততস্তাভির্হনুমান্শরবৃষ্টিভিঃ ।
অভবত্সংবৃতাকারশ্শৈলরাডিব বৃষ্টিভিঃ ॥ 8 ॥
স শরান্মোঘয়ামাস তেষামাশুচরঃ কপিঃ ।
রথবেগং চ বীরাণাং বিচরন্বিমলেঽংবরে ॥ 9 ॥
স তৈঃ ক্রীডংধনুষ্মদ্ভির্ব্য়োম্নি বীরঃ প্রকাশতে ।
ধনুষ্মদ্ভির্যথা মেঘৈর্মারুতঃ প্রভুরংবরে ॥ 10 ॥
স কৃত্বা নিনদং ঘোরং ত্রাসয়ংস্তাং মহাচমূম্ ।
চকার হনুমান্বেগং তেষু রক্ষস্সু বীর্যবান্ ॥ 11 ॥
তলেনাভ্যহনত্কাংশ্চিত্পাদৈঃ কাংশ্চিত্পরংতপঃ ।
মুষ্টিনাভ্যহনত্কাংশ্চিন্নখৈঃ কাংশ্চিদ্ব্যদারযত্ ॥ 12 ॥
প্রমমাথোরসা কাংশ্চিদূরুভ্য়ামপরান্কপিঃ ।
কেচিত্তস্য় নিনাদেন তত্রৈব পতিতা ভুবি ॥ 13 ॥
ততস্তেষ্ববসন্নেষু ভূমৌ নিপতিতেষু চ ।
তত্সৈন্যমগমত্সর্বং দিশোদশ ভয়ার্দিতম্ ॥ 14 ॥
বিনেদুর্বিস্বরং নাগা নিপেতুর্ভুবি বাজিনঃ ।
ভগ্ননীডধ্বজচ্ছত্রৈর্ভূশ্চ কীর্ণাঽভবদ্রথৈঃ ॥ 15 ॥
স্রবতা রুধিরেণাথ স্রবংত্য়ো দর্শিতাঃ পথি ।
বিবিধৈশ্চ স্বরৈর্লংকা ননাদ বিকৃতং তদা ॥ 16 ॥
স তান্প্রবৃদ্ধান্বিনিহত্য় রাক্ষসান্ মহাবলশ্চংডপরাক্রমঃ কপিঃ ।
যুয়ুত্সুরন্য়ৈঃ পুনরেব রাক্ষসৈ স্তমেব বীরোঽভিজগাম তোরণম্ ॥ 17 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে সুংদরকাংডে পংচচত্বারিংশস্সর্গঃ ॥
