śrīmadvālmīkīya rāmāyaṇē sundarakāṇḍam ।
atha pañchachatvāriṃśassargaḥ ।
tatastē rākṣasēndrēṇa chōditā mantriṇassutāḥ ।
niryayurbhavanāttasmātsaptasaptārchivarchasaḥ ॥ 1 ॥
mahābalaparīvārā dhanuṣmantō mahābalāḥ ।
kṛtāstrāstravidāṃ śrēṣṭhāḥ parasparajayaiṣiṇaḥ ॥ 2 ॥
hēmajālaparikṣiptairdhvajavadbhiḥ patākibhiḥ ।
tōyadasvananirghōṣairvājiyuktairmahārathaiḥ ॥ 3 ॥
taptakāñchanachitrāṇi chāpānyamitavikramāḥ ।
visphārayantassaṃhṛṣṭāstaṭitvanta ivāmbudāḥ ॥ 4 ॥
jananyastu tatastēṣāṃ viditvā kiṅkarānhatān ।
babhūvuśśōkasambhrāntāssabāndhavasuhṛjjanāḥ ॥ 5 ॥
tē parasparasaṅgharṣāttaptakāñchanabhūṣaṇāḥ ।
abhipēturhanūmantaṃ tōraṇasthamavasthitam ॥ 6 ॥
sṛjantō bāṇavṛṣṭiṃ tē rathagarjitanissvanāḥ ।
vṛṣṭimanta ivāmbhōdā vichērurnaiṛtāmbudāḥ ॥ 7 ॥
avakīrṇastatastābhirhanumānśaravṛṣṭibhiḥ ।
abhavatsaṃvṛtākāraśśailarāḍiva vṛṣṭibhiḥ ॥ 8 ॥
sa śarānmōghayāmāsa tēṣāmāśucharaḥ kapiḥ ।
rathavēgaṃ cha vīrāṇāṃ vicharanvimalē'mbarē ॥ 9 ॥
sa taiḥ krīḍandhanuṣmadbhirvyōmni vīraḥ prakāśatē ।
dhanuṣmadbhiryathā mēghairmārutaḥ prabhurambarē ॥ 10 ॥
sa kṛtvā ninadaṃ ghōraṃ trāsayaṃstāṃ mahāchamūm ।
chakāra hanumānvēgaṃ tēṣu rakṣassu vīryavān ॥ 11 ॥
talēnābhyahanatkāṃśchitpādaiḥ kāṃśchitparantapaḥ ।
muṣṭinābhyahanatkāṃśchinnakhaiḥ kāṃśchidvyadārayat ॥ 12 ॥
pramamāthōrasā kāṃśchidūrubhyāmaparānkapiḥ ।
kēchittasya ninādēna tatraiva patitā bhuvi ॥ 13 ॥
tatastēṣvavasannēṣu bhūmau nipatitēṣu cha ।
tatsainyamagamatsarvaṃ diśōdaśa bhayārditam ॥ 14 ॥
vinēdurvisvaraṃ nāgā nipēturbhuvi vājinaḥ ।
bhagnanīḍadhvajachChatrairbhūścha kīrṇā'bhavadrathaiḥ ॥ 15 ॥
sravatā rudhirēṇātha sravantyō darśitāḥ pathi ।
vividhaiścha svarairlaṅkā nanāda vikṛtaṃ tadā ॥ 16 ॥
sa tānpravṛddhānvinihatya rākṣasān mahābalaśchaṇḍaparākramaḥ kapiḥ ।
yuyutsuranyaiḥ punarēva rākṣasai stamēva vīrō'bhijagāma tōraṇam ॥ 17 ॥
ityārṣē śrīmadrāmāyaṇē vālmīkīya ādikāvyē sundarakāṇḍē pañchachatvāriṃśassargaḥ ॥
