શ્રીમદ્વાલ્મીકીય રામાયણે સુંદરકાંડમ્ ।
અથ પંચચત્વારિંશસ્સર્ગઃ ।
તતસ્તે રાક્ષસેંદ્રેણ ચોદિતા મંત્રિણસ્સુતાઃ ।
નિર્યયુર્ભવનાત્તસ્માત્સપ્તસપ્તાર્ચિવર્ચસઃ ॥ 1 ॥
મહાબલપરીવારા ધનુષ્મંતો મહાબલાઃ ।
કૃતાસ્ત્રાસ્ત્રવિદાં શ્રેષ્ઠાઃ પરસ્પરજયૈષિણઃ ॥ 2 ॥
હેમજાલપરિક્ષિપ્તૈર્ધ્વજવદ્ભિઃ પતાકિભિઃ ।
તોયદસ્વનનિર્ઘોષૈર્વાજિયુક્તૈર્મહારથૈઃ ॥ 3 ॥
તપ્તકાંચનચિત્રાણિ ચાપાન્યમિતવિક્રમાઃ ।
વિસ્ફારયંતસ્સંહૃષ્ટાસ્તટિત્વંત ઇવાંબુદાઃ ॥ 4 ॥
જનન્યસ્તુ તતસ્તેષાં વિદિત્વા કિંકરાન્હતાન્ ।
બભૂવુશ્શોકસંભ્રાંતાસ્સબાંધવસુહૃજ્જનાઃ ॥ 5 ॥
તે પરસ્પરસંઘર્ષાત્તપ્તકાંચનભૂષણાઃ ।
અભિપેતુર્હનૂમંતં તોરણસ્થમવસ્થિતમ્ ॥ 6 ॥
સૃજંતો બાણવૃષ્ટિં તે રથગર્જિતનિસ્સ્વનાઃ ।
વૃષ્ટિમંત ઇવાંભોદા વિચેરુર્નૈઋતાંબુદાઃ ॥ 7 ॥
અવકીર્ણસ્તતસ્તાભિર્હનુમાન્શરવૃષ્ટિભિઃ ।
અભવત્સંવૃતાકારશ્શૈલરાડિવ વૃષ્ટિભિઃ ॥ 8 ॥
સ શરાન્મોઘયામાસ તેષામાશુચરઃ કપિઃ ।
રથવેગં ચ વીરાણાં વિચરન્વિમલેઽંબરે ॥ 9 ॥
સ તૈઃ ક્રીડંધનુષ્મદ્ભિર્વ્યોમ્નિ વીરઃ પ્રકાશતે ।
ધનુષ્મદ્ભિર્યથા મેઘૈર્મારુતઃ પ્રભુરંબરે ॥ 10 ॥
સ કૃત્વા નિનદં ઘોરં ત્રાસયંસ્તાં મહાચમૂમ્ ।
ચકાર હનુમાન્વેગં તેષુ રક્ષસ્સુ વીર્યવાન્ ॥ 11 ॥
તલેનાભ્યહનત્કાંશ્ચિત્પાદૈઃ કાંશ્ચિત્પરંતપઃ ।
મુષ્ટિનાભ્યહનત્કાંશ્ચિન્નખૈઃ કાંશ્ચિદ્વ્યદારયત્ ॥ 12 ॥
પ્રમમાથોરસા કાંશ્ચિદૂરુભ્યામપરાન્કપિઃ ।
કેચિત્તસ્ય નિનાદેન તત્રૈવ પતિતા ભુવિ ॥ 13 ॥
તતસ્તેષ્વવસન્નેષુ ભૂમૌ નિપતિતેષુ ચ ।
તત્સૈન્યમગમત્સર્વં દિશોદશ ભયાર્દિતમ્ ॥ 14 ॥
વિનેદુર્વિસ્વરં નાગા નિપેતુર્ભુવિ વાજિનઃ ।
ભગ્નનીડધ્વજચ્છત્રૈર્ભૂશ્ચ કીર્ણાઽભવદ્રથૈઃ ॥ 15 ॥
સ્રવતા રુધિરેણાથ સ્રવંત્યો દર્શિતાઃ પથિ ।
વિવિધૈશ્ચ સ્વરૈર્લંકા નનાદ વિકૃતં તદા ॥ 16 ॥
સ તાન્પ્રવૃદ્ધાન્વિનિહત્ય રાક્ષસાન્ મહાબલશ્ચંડપરાક્રમઃ કપિઃ ।
યુયુત્સુરન્યૈઃ પુનરેવ રાક્ષસૈ સ્તમેવ વીરોઽભિજગામ તોરણમ્ ॥ 17 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે સુંદરકાંડે પંચચત્વારિંશસ્સર્ગઃ ॥
