ශ්රීමද්වාල්මීකීය රාමායණේ බාලකාංඩම් ।
අථ ද්වාත්රිංශස්සර්ගඃ ।
බ්රහ්මයෝනිර්මහානාසීත් කුශෝ නාම මහාතපාඃ ।
අක්ලිෂ්ටව්රතධර්මජ්ඤඃ සජ්ජනප්රතිපූජකඃ ॥ 1 ॥
ස මහාත්මා කුලීනායාං යුක්තායාං සුගුණෝල්බණාන් ।
වෛදර්භ්යාං ජනයාමාස චතුරස්සදෘශාන් සුතාන් ॥ 2 ॥
කුශාංබං කුශනාභං ච අධූර්තරජසං වසුම් ।
දීප්තියුක්තාන් මහෝත්සාහාන් ක්ෂත්රධර්මචිකීර්ෂයා ॥ 3 ॥
තානුවාච කුශඃ පුත්රාන් ධර්මිෂ්ඨාන් සත්යවාදිනඃ ।
ක්රියතාං පාලනං පුත්රාඃ ධර්මං ප්රාප්ස්යථ පුෂ්කලම් ॥ 4 ॥
ඍෂේස්තු වචනං ශ්රුත්වා චත්වාරෝ ලෝකසම්මතාඃ ।
නිවේශං චක්රිරේ සර්වේ පුරාණාං නෘවරාස්තදා ॥ 5 ॥
කුශාංබස්තු මහාතේජාඃ කෞශාංබීමකරෝත්පුරීම් ।
කුශනාභස්තු ධර්මාත්මා පුරං චක්රේ මහෝදයම් ॥ 6 ॥
අධූර්තරජසෝ රාම ධර්මාරණ්යං මහීපතිඃ ।
චක්රේ පුරවරං රාජා වසුශ්චක්රේ ගිරිව්රජම් ॥ 7 ॥
ඒෂා වසුමතී රාම වසෝස්තස්ය මහාත්මනඃ ।
ඒතේ ශෛලවරාඃ පංච ප්රකාශංතේ සමංතතඃ ॥ 8 ॥
සුමාගධී නදී රම්යා මගධාන් විශ්රුතායයෞ ।
පංචානාං ශෛලමුඛ්යානාං මධ්යේ මාලේව ශෝභතේ ॥ 9 ॥
සෛෂා හි මාගධී රාම වසෝස්තස්ය මහාත්මනඃ ।
පූර්වාභිචරිතා රාම සුක්ෂේත්රා සස්යමාලිනී ॥ 10 ॥
කුශනාභස්තු රාජර්ෂිඃ කන්යාශතමනුත්තමම් ।
ජනයාමාස ධර්මාත්මා ඝෘතාච්යාං රඝුනංදන ॥ 11 ॥
තාස්තු යෞවනශාලින්යෝ රූපවත්ය ස්ස්වලංකෘතාඃ ।
උද්යානභූමිමාගම්ය ප්රාවෘෂීව ශතහ්රදාඃ ॥ 12 ॥
ගායංත්යෝ නෘත්යමානාශ්ච වාදයංත්යශ්ච සර්වශඃ ।
ආමෝදං පරමං ජග්මුර්වරාභරණභූෂිතාඃ ॥ 13 ॥
අථ තාශ්චාරුසර්වාංග්යෝ රූපේණාප්රතිමා භුවි ।
උද්යානභූමිමාගම්ය තාරා ඉව ඝනාංතරේ ॥ 14 ॥
තාස්සර්වගුණසංපන්නා රූපයෞවනසංයුතාඃ ।
දෘෂ්ට්වා සර්වාත්මකෝ වායුරිදං වචනමබ්රවීත් ॥ 15 ॥
අහං වඃ කාමයේ සර්වා භාර්යා මම භවිෂ්යථ ।
මානුෂස්ත්යජ්යතාං භාවඃ දීර්ඝමායුරවාප්ස්යථ ॥ 16 ॥
චලං හි යෞවනං නිත්යං මානුෂේෂු විශේෂතඃ ।
අක්ෂය්යං යෞවනං ප්රාප්තාඃ අමර්යශ්ච භවිෂ්යථ ॥ 17 ॥
තස්ය තද්වචනං ශ්රුත්වා වායෝරක්ලිෂ්ටකර්මණඃ ।
අපහාස්ය තතෝ වාක්යං කන්යාශතමථාබ්රවීත් ॥ 18 ॥
අංතශ්චරසි භූතානාං සර්වේෂාං ත්වං සුරෝත්තම ।
ප්රභාවජ්ඤාඃ ස්ම තේ සර්වාඃ කිමස්මානවමන්යසේ ॥ 19 ॥
කුශනාභසුතාස්සර්වාඃ සමර්ථාස්ත්වාං සුරෝත්තම ।
ස්ථානාච්ච්යාවයිතුං දේවං රක්ෂාමස්තු තපෝ වයම් ॥ 20 ॥
මාභූත්ස කාලෝ දුර්මේධඃ පිතරං සත්යවාදිනම් ।
නාවමන්යස්ව ධර්මේණ ස්වයං වරමුපාස්මහේ ॥ 21 ॥
පිතා හි ප්රභුරස්මාකං දෛවතං පරමං හි නඃ ।
යස්ය නෝ දාස්යති පිතා ස නෝ භර්තා භවිෂ්යති ॥ 22 ॥
තාසාං තද්වචනං ශ්රුත්වා වායුඃ පරමකෝපනඃ ।
ප්රවිශ්ය සර්වගාත්රාණි බභංජ භගවාන් ප්රභුඃ ॥ 23 ॥
තාඃ කන්යා වායුනා භග්නා විවිශුර්නෘපතේර්ගෘහම් ।
ප්රාපතන් භුවි සංභ්රාංතාස්සලජ්ජා ස්සාස්රලෝචනාඃ ॥ 24 ॥
ස ච තා දයිතා දීනාඃ කන්යාඃ පරමශෝභනාඃ ।
දෘෂ්ට්වා භග්නාස්තදා රාජා සංභ්රාංත ඉදමබ්රවීත් ॥ 25 ॥
කිමිදං කථ්යතාං පුත්ර්යඃ කෝ ධර්මමවමන්යතේ ।
කුබ්ජාඃ කේන කෘතාඃ සර්වා වේෂ්ටංත්යෝ නාභිභාෂථ ।
ඒවං රාජා විනිශ්ශ්වස්ය සමාධිං සංදධේ තතඃ ॥ 26 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ බාලකාංඩේ ද්වාත්රිංශස්සර්ගඃ ॥
