ശ്രീമദ്വാല്മീകീയ രാമായണേ ബാലകാംഡമ് ।
അഥ ദ്വിചത്വാരിംശസ്സര്ഗഃ ।
കാലധര്മം ഗതേ രാമ സഗരേ പ്രകൃതീജനാഃ ।
രാജാനം രോചയാമാസുരംശുമംതം സുധാര്മികമ് ॥ 1 ॥
സ രാജാ സുമഹാനാസീദംശുമാന് രഘുനംദന ।
തസ്യ പുത്രോ മഹാനാസീദ്ദിലീപ ഇതി വിശ്രുതഃ ॥ 2 ॥
തസ്മിന് രാജ്യം സമാവേശ്യ ദിലീപേ രഘുനംദന ।
ഹിമവച്ഛിഖരേ പുണ്യേ തപസ്തേപേ സുദാരുണമ് ॥ 3 ॥
ദ്വാത്രിംശച്ച സഹസ്രാണി വര്ഷാണി സുമഹായശാഃ ।
തപോവനം ഗതോ രാമ സ്വര്ഗം ലേഭേ തപോധനഃ ॥ 4 ॥
ദിലീപസ്തു മഹാതേജാശ്ശ്രുത്വാ പൈതാമഹം വധമ് ।
ദുഃഖോപഹതയാ ബുദ്ധ്യാ നിശ്ചയം നാധ്യഗച്ഛത ॥ 5 ॥
കഥം ഗംഗാവതരണം കഥം തേഷാം ജലക്രിയാ ।
താരയേയം കഥം ചൈതാനിതി ചിംതാപരോഽഭവത് ॥ 6 ॥
തസ്യ ചിംതയതോ നിത്യം ധര്മേണ വിദിതാത്മനഃ ।
പുത്രോ ഭഗീരഥോ നാമ ജജ്ഞേ പരമധാര്മികഃ ॥ 7 ॥
ദിലീപസ്തു മഹാതേജാ യജ്ഞൈര്ബഹുഭിരിഷ്ടവാന് ।
ത്രിംശദ്വര്ഷസഹസ്രാണി രാജാ രാജ്യമകാരയത് ॥ 8 ॥
അഗത്വാ നിശ്ചയം രാജാ തേഷാമുദ്ധരണം പ്രതി ।
വ്യാധിനാ നരശാര്ദൂല കാലധര്മമുപേയിവാന് ॥ 9 ॥
ഇംദ്രലോകം ഗതോ രാജാ സ്വാര്ജിതേനൈവ കര്മണാ ।
രാജ്യേ ഭഗീരഥം പുത്രമഭിഷിച്യ നരര്ഷഭഃ ॥ 10 ॥
ഭഗീരഥസ്തു രാജര്ഷിര്ധാര്മികോ രഘുനംദന ।
അനപത്യോ മഹാതേജാഃ പ്രജാകാമസ്സ ചാപ്രജഃ ॥ 11 ॥
മംത്രിഷ്വാധായ തദ്രാജ്യം ഗംഗാവതരണേ രതഃ ।
സ തപോ ദീര്ഘമാതിഷ്ഠദ്ഗോകര്ണേ രഘുനംദന ॥ 12 ॥
ഊര്ധ്വബാഹുഃ പംചതപാ മാസാഹാരോ ജിതേംദ്രിയഃ ।
തസ്യ വര്ഷസഹസ്രാണി ഘോരേ തപസി തിഷ്ഠതഃ ॥ 13 ॥
അതീതാനി മഹാബാഹോ തസ്യ രാജ്ഞോ മഹാത്മനഃ ।
സുപ്രീതോ ഭഗവാന് ബ്രഹ്മാ പ്രജാനാം പതിരീശ്വരഃ ॥ 14 ॥
തതസ്സുരഗണൈസ്സാര്ധമുപാഗമ്യ പിതാമഹഃ ।
ഭഗീരഥം മഹാത്മാനം തപ്യമാനമഥാബ്രവീത് ॥ 15 ॥
ഭഗീരഥ മഹാഭാഗ പ്രീതസ്തേഽഹം ജനേശ്വര ।
തപസാ ച സുതപ്തേന വരം വരയ സുവ്രത ॥ 16 ॥
തമുവാച മഹാതേജാഃ സർവലോകപിതാമഹമ് ।
ഭഗീരഥോ മഹാഭാഗഃ കൃതാംജലിരുപസ്ഥിതഃ ॥ 17 ॥
യദി മേ ഭഗവന് പ്രീതോ യദ്യസ്തി തപസഃ ഫലമ് ।
സഗരസ്യാത്മജാസ്സർവേ മത്തസ്സലിലമാപ്നുയുഃ ॥ 18 ॥
ഗംഗായാസ്സലിലക്ലിന്നേ ഭസ്മന്യേഷാം മഹാത്മനാമ് ।
സ്വര്ഗം ഗച്ഛേയുരത്യംതം സർവേ മേ പ്രപിതാമഹാഃ ॥ 19 ॥
ദേയാ ച സംതതിര്ദേവ നാവസീദേത്കുലം ച നഃ ।
ഇക്ഷ്വാകൂണാം കുലേ ദേവ ഏഷ മേഽസ്തു വരഃപരഃ ॥ 20 ॥
ഉക്തവാക്യം തു രാജാനം സർവലോകപിതാമഹഃ ।
പ്രത്യുവാച ശുഭാം വാണീം മധുരാം മധുരാക്ഷരാമ് ॥ 21 ॥
മനോരഥോ മഹാനേഷ ഭഗീരഥ മഹാരഥ ।
ഏവം ഭവതു ഭദ്രം തേ ഇക്ഷ്വാകുകുലവര്ധന ॥ 22 ॥
ഇയം ഹൈമവതീ ഗംഗാ ജ്യേഷ്ഠാ ഹിമവതസ്സുതാ ।
താം വൈ ധാരയിതും ശക്തോ ഹരസ്തത്ര നിയുജ്യതാമ് ॥ 23 ॥
ഗംഗായാഃ പതനം രാജന് പൃഥിവീ ന സഹിഷ്യതി ।
താം വൈ ധാരയിതും വീര നാന്യം പശ്യാമി ശൂലിനഃ ॥ 24 ॥
തമേവമുക്ത്വാ രാജാനം ഗംഗാം ചാഭാഷ്യ ലോകകൃത് ।
ജഗാമ ത്രിദിവം ദേവസ്സഹദേവൈര്മരുദ്ഗണൈഃ ॥ 25 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ ബാലകാംഡേ ദ്വിചത്വാരിംശസ്സര്ഗഃ ॥
