ශ්රීමද්වාල්මීකීය රාමායණේ බාලකාංඩම් ।
අථ ද්විචත්වාරිංශස්සර්ගඃ ।
කාලධර්මං ගතේ රාම සගරේ ප්රකෘතීජනාඃ ।
රාජානං රෝචයාමාසුරංශුමංතං සුධාර්මිකම් ॥ 1 ॥
ස රාජා සුමහානාසීදංශුමාන් රඝුනංදන ।
තස්ය පුත්රෝ මහානාසීද්දිලීප ඉති විශ්රුතඃ ॥ 2 ॥
තස්මින් රාජ්යං සමාවේශ්ය දිලීපේ රඝුනංදන ।
හිමවච්ඡිඛරේ පුණ්යේ තපස්තේපේ සුදාරුණම් ॥ 3 ॥
ද්වාත්රිංශච්ච සහස්රාණි වර්ෂාණි සුමහායශාඃ ।
තපෝවනං ගතෝ රාම ස්වර්ගං ලේභේ තපෝධනඃ ॥ 4 ॥
දිලීපස්තු මහාතේජාශ්ශ්රුත්වා පෛතාමහං වධම් ।
දුඃඛෝපහතයා බුද්ධ්යා නිශ්චයං නාධ්යගච්ඡත ॥ 5 ॥
කථං ගංගාවතරණං කථං තේෂාං ජලක්රියා ।
තාරයේයං කථං චෛතානිති චිංතාපරෝऽභවත් ॥ 6 ॥
තස්ය චිංතයතෝ නිත්යං ධර්මේණ විදිතාත්මනඃ ।
පුත්රෝ භගීරථෝ නාම ජජ්ඤේ පරමධාර්මිකඃ ॥ 7 ॥
දිලීපස්තු මහාතේජා යජ්ඤෛර්බහුභිරිෂ්ටවාන් ।
ත්රිංශද්වර්ෂසහස්රාණි රාජා රාජ්යමකාරයත් ॥ 8 ॥
අගත්වා නිශ්චයං රාජා තේෂාමුද්ධරණං ප්රති ।
ව්යාධිනා නරශාර්දූල කාලධර්මමුපේයිවාන් ॥ 9 ॥
ඉංද්රලෝකං ගතෝ රාජා ස්වාර්ජිතේනෛව කර්මණා ।
රාජ්යේ භගීරථං පුත්රමභිෂිච්ය නරර්ෂභඃ ॥ 10 ॥
භගීරථස්තු රාජර්ෂිර්ධාර්මිකෝ රඝුනංදන ।
අනපත්යෝ මහාතේජාඃ ප්රජාකාමස්ස චාප්රජඃ ॥ 11 ॥
මංත්රිෂ්වාධාය තද්රාජ්යං ගංගාවතරණේ රතඃ ।
ස තපෝ දීර්ඝමාතිෂ්ඨද්ගෝකර්ණේ රඝුනංදන ॥ 12 ॥
ඌර්ධ්වබාහුඃ පංචතපා මාසාහාරෝ ජිතේංද්රියඃ ।
තස්ය වර්ෂසහස්රාණි ඝෝරේ තපසි තිෂ්ඨතඃ ॥ 13 ॥
අතීතානි මහාබාහෝ තස්ය රාජ්ඤෝ මහාත්මනඃ ।
සුප්රීතෝ භගවාන් බ්රහ්මා ප්රජානාං පතිරීශ්වරඃ ॥ 14 ॥
තතස්සුරගණෛස්සාර්ධමුපාගම්ය පිතාමහඃ ।
භගීරථං මහාත්මානං තප්යමානමථාබ්රවීත් ॥ 15 ॥
භගීරථ මහාභාග ප්රීතස්තේऽහං ජනේශ්වර ।
තපසා ච සුතප්තේන වරං වරය සුව්රත ॥ 16 ॥
තමුවාච මහාතේජාඃ සර්වලෝකපිතාමහම් ।
භගීරථෝ මහාභාගඃ කෘතාංජලිරුපස්ථිතඃ ॥ 17 ॥
යදි මේ භගවන් ප්රීතෝ යද්යස්ති තපසඃ ඵලම් ।
සගරස්යාත්මජාස්සර්වේ මත්තස්සලිලමාප්නුයුඃ ॥ 18 ॥
ගංගායාස්සලිලක්ලින්නේ භස්මන්යේෂාං මහාත්මනාම් ।
ස්වර්ගං ගච්ඡේයුරත්යංතං සර්වේ මේ ප්රපිතාමහාඃ ॥ 19 ॥
දේයා ච සංතතිර්දේව නාවසීදේත්කුලං ච නඃ ।
ඉක්ෂ්වාකූණාං කුලේ දේව ඒෂ මේऽස්තු වරඃපරඃ ॥ 20 ॥
උක්තවාක්යං තු රාජානං සර්වලෝකපිතාමහඃ ।
ප්රත්යුවාච ශුභාං වාණීං මධුරාං මධුරාක්ෂරාම් ॥ 21 ॥
මනෝරථෝ මහානේෂ භගීරථ මහාරථ ।
ඒවං භවතු භද්රං තේ ඉක්ෂ්වාකුකුලවර්ධන ॥ 22 ॥
ඉයං හෛමවතී ගංගා ජ්යේෂ්ඨා හිමවතස්සුතා ।
තාං වෛ ධාරයිතුං ශක්තෝ හරස්තත්ර නියුජ්යතාම් ॥ 23 ॥
ගංගායාඃ පතනං රාජන් පෘථිවී න සහිෂ්යති ।
තාං වෛ ධාරයිතුං වීර නාන්යං පශ්යාමි ශූලිනඃ ॥ 24 ॥
තමේවමුක්ත්වා රාජානං ගංගාං චාභාෂ්ය ලෝකකෘත් ।
ජගාම ත්රිදිවං දේවස්සහදේවෛර්මරුද්ගණෛඃ ॥ 25 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ බාලකාංඩේ ද්විචත්වාරිංශස්සර්ගඃ ॥
