śrīmadvālmīkīya rāmāyaṇē bālakāṇḍam ।
atha dvichatvāriṃśassargaḥ ।
kāladharmaṃ gatē rāma sagarē prakṛtījanāḥ ।
rājānaṃ rōchayāmāsuraṃśumantaṃ sudhārmikam ॥ 1 ॥
sa rājā sumahānāsīdaṃśumān raghunandana ।
tasya putrō mahānāsīddilīpa iti viśrutaḥ ॥ 2 ॥
tasmin rājyaṃ samāvēśya dilīpē raghunandana ।
himavachChikharē puṇyē tapastēpē sudāruṇam ॥ 3 ॥
dvātriṃśachcha sahasrāṇi varṣāṇi sumahāyaśāḥ ।
tapōvanaṃ gatō rāma svargaṃ lēbhē tapōdhanaḥ ॥ 4 ॥
dilīpastu mahātējāśśrutvā paitāmahaṃ vadham ।
duḥkhōpahatayā buddhyā niśchayaṃ nādhyagachChata ॥ 5 ॥
kathaṃ gaṅgāvataraṇaṃ kathaṃ tēṣāṃ jalakriyā ।
tārayēyaṃ kathaṃ chaitāniti chintāparō'bhavat ॥ 6 ॥
tasya chintayatō nityaṃ dharmēṇa viditātmanaḥ ।
putrō bhagīrathō nāma jajñē paramadhārmikaḥ ॥ 7 ॥
dilīpastu mahātējā yajñairbahubhiriṣṭavān ।
triṃśadvarṣasahasrāṇi rājā rājyamakārayat ॥ 8 ॥
agatvā niśchayaṃ rājā tēṣāmuddharaṇaṃ prati ।
vyādhinā naraśārdūla kāladharmamupēyivān ॥ 9 ॥
indralōkaṃ gatō rājā svārjitēnaiva karmaṇā ।
rājyē bhagīrathaṃ putramabhiṣichya nararṣabhaḥ ॥ 10 ॥
bhagīrathastu rājarṣirdhārmikō raghunandana ।
anapatyō mahātējāḥ prajākāmassa chāprajaḥ ॥ 11 ॥
mantriṣvādhāya tadrājyaṃ gaṅgāvataraṇē rataḥ ।
sa tapō dīrghamātiṣṭhadgōkarṇē raghunandana ॥ 12 ॥
ūrdhvabāhuḥ pañchatapā māsāhārō jitēndriyaḥ ।
tasya varṣasahasrāṇi ghōrē tapasi tiṣṭhataḥ ॥ 13 ॥
atītāni mahābāhō tasya rājñō mahātmanaḥ ।
suprītō bhagavān brahmā prajānāṃ patirīśvaraḥ ॥ 14 ॥
tatassuragaṇaissārdhamupāgamya pitāmahaḥ ।
bhagīrathaṃ mahātmānaṃ tapyamānamathābravīt ॥ 15 ॥
bhagīratha mahābhāga prītastē'haṃ janēśvara ।
tapasā cha sutaptēna varaṃ varaya suvrata ॥ 16 ॥
tamuvācha mahātējāḥ sarvalōkapitāmaham ।
bhagīrathō mahābhāgaḥ kṛtāñjalirupasthitaḥ ॥ 17 ॥
yadi mē bhagavan prītō yadyasti tapasaḥ phalam ।
sagarasyātmajāssarvē mattassalilamāpnuyuḥ ॥ 18 ॥
gaṅgāyāssalilaklinnē bhasmanyēṣāṃ mahātmanām ।
svargaṃ gachChēyuratyantaṃ sarvē mē prapitāmahāḥ ॥ 19 ॥
dēyā cha santatirdēva nāvasīdētkulaṃ cha naḥ ।
ikṣvākūṇāṃ kulē dēva ēṣa mē'stu varaḥparaḥ ॥ 20 ॥
uktavākyaṃ tu rājānaṃ sarvalōkapitāmahaḥ ।
pratyuvācha śubhāṃ vāṇīṃ madhurāṃ madhurākṣarām ॥ 21 ॥
manōrathō mahānēṣa bhagīratha mahāratha ।
ēvaṃ bhavatu bhadraṃ tē ikṣvākukulavardhana ॥ 22 ॥
iyaṃ haimavatī gaṅgā jyēṣṭhā himavatassutā ।
tāṃ vai dhārayituṃ śaktō harastatra niyujyatām ॥ 23 ॥
gaṅgāyāḥ patanaṃ rājan pṛthivī na sahiṣyati ।
tāṃ vai dhārayituṃ vīra nānyaṃ paśyāmi śūlinaḥ ॥ 24 ॥
tamēvamuktvā rājānaṃ gaṅgāṃ chābhāṣya lōkakṛt ।
jagāma tridivaṃ dēvassahadēvairmarudgaṇaiḥ ॥ 25 ॥
ityārṣē śrīmadrāmāyaṇē vālmīkīya ādikāvyē bālakāṇḍē dvichatvāriṃśassargaḥ ॥
