শ্রীমদ্বাল্মীকীয় রামাযণে বালকাংডম্ ।
অথ দ্বিচত্বারিংশস্সর্গঃ ।
কালধর্মং গতে রাম সগরে প্রকৃতীজনাঃ ।
রাজানং রোচয়ামাসুরংশুমংতং সুধার্মিকম্ ॥ 1 ॥
স রাজা সুমহানাসীদংশুমান্ রঘুনংদন ।
তস্য় পুত্রো মহানাসীদ্দিলীপ ইতি বিশ্রুতঃ ॥ 2 ॥
তস্মিন্ রাজ্য়ং সমাবেশ্য় দিলীপে রঘুনংদন ।
হিমবচ্ছিখরে পুণ্য়ে তপস্তেপে সুদারুণম্ ॥ 3 ॥
দ্বাত্রিংশচ্চ সহস্রাণি বর্ষাণি সুমহাযশাঃ ।
তপোবনং গতো রাম স্বর্গং লেভে তপোধনঃ ॥ 4 ॥
দিলীপস্তু মহাতেজাশ্শ্রুত্বা পৈতামহং বধম্ ।
দুঃখোপহতয়া বুদ্ধ্য়া নিশ্চয়ং নাধ্যগচ্ছত ॥ 5 ॥
কথং গংগাবতরণং কথং তেষাং জলক্রিয়া ।
তারয়েয়ং কথং চৈতানিতি চিংতাপরোঽভবত্ ॥ 6 ॥
তস্য় চিংতযতো নিত্য়ং ধর্মেণ বিদিতাত্মনঃ ।
পুত্রো ভগীরথো নাম জজ্ঞে পরমধার্মিকঃ ॥ 7 ॥
দিলীপস্তু মহাতেজা যজ্ঞৈর্বহুভিরিষ্টবান্ ।
ত্রিংশদ্বর্ষসহস্রাণি রাজা রাজ্যমকারযত্ ॥ 8 ॥
অগত্বা নিশ্চয়ং রাজা তেষামুদ্ধরণং প্রতি ।
ব্য়াধিনা নরশার্দূল কালধর্মমুপেয়িবান্ ॥ 9 ॥
ইংদ্রলোকং গতো রাজা স্বার্জিতেনৈব কর্মণা ।
রাজ্য়ে ভগীরথং পুত্রমভিষিচ্য় নরর্ষভঃ ॥ 10 ॥
ভগীরথস্তু রাজর্ষির্ধার্মিকো রঘুনংদন ।
অনপত্য়ো মহাতেজাঃ প্রজাকামস্স চাপ্রজঃ ॥ 11 ॥
মংত্রিষ্বাধায় তদ্রাজ্য়ং গংগাবতরণে রতঃ ।
স তপো দীর্ঘমাতিষ্ঠদ্গোকর্ণে রঘুনংদন ॥ 12 ॥
ঊর্ধ্ববাহুঃ পংচতপা মাসাহারো জিতেংদ্রিয়ঃ ।
তস্য় বর্ষসহস্রাণি ঘোরে তপসি তিষ্ঠতঃ ॥ 13 ॥
অতীতানি মহাবাহো তস্য় রাজ্ঞো মহাত্মনঃ ।
সুপ্রীতো ভগবান্ ব্রহ্মা প্রজানাং পতিরীশ্বরঃ ॥ 14 ॥
ততস্সুরগণৈস্সার্ধমুপাগম্য় পিতামহঃ ।
ভগীরথং মহাত্মানং তপ্যমানমথাব্রবীত্ ॥ 15 ॥
ভগীরথ মহাভাগ প্রীতস্তেঽহং জনেশ্বর ।
তপসা চ সুতপ্তেন বরং বরয় সুব্রত ॥ 16 ॥
তমুবাচ মহাতেজাঃ সর্বলোকপিতামহম্ ।
ভগীরথো মহাভাগঃ কৃতাংজলিরুপস্থিতঃ ॥ 17 ॥
যদি মে ভগবন্ প্রীতো যদ্যস্তি তপসঃ ফলম্ ।
সগরস্য়াত্মজাস্সর্বে মত্তস্সলিলমাপ্নুয়ুঃ ॥ 18 ॥
গংগায়াস্সলিলক্লিন্নে ভস্মন্য়েষাং মহাত্মনাম্ ।
স্বর্গং গচ্ছেয়ুরত্য়ংতং সর্বে মে প্রপিতামহাঃ ॥ 19 ॥
দেয়া চ সংততির্দেব নাবসীদেত্কুলং চ নঃ ।
ইক্ষ্বাকূণাং কুলে দেব এষ মেঽস্তু বরঃপরঃ ॥ 20 ॥
উক্তবাক্য়ং তু রাজানং সর্বলোকপিতামহঃ ।
প্রত্য়ুবাচ শুভাং বাণীং মধুরাং মধুরাক্ষরাম্ ॥ 21 ॥
মনোরথো মহানেষ ভগীরথ মহারথ ।
এবং ভবতু ভদ্রং তে ইক্ষ্বাকুকুলবর্ধন ॥ 22 ॥
ইয়ং হৈমবতী গংগা জ্য়েষ্ঠা হিমবতস্সুতা ।
তাং বৈ ধারয়িতুং শক্তো হরস্তত্র নিয়ুজ্যতাম্ ॥ 23 ॥
গংগায়াঃ পতনং রাজন্ পৃথিবী ন সহিষ্যতি ।
তাং বৈ ধারয়িতুং বীর নান্য়ং পশ্য়ামি শূলিনঃ ॥ 24 ॥
তমেবমুক্ত্বা রাজানং গংগাং চাভাষ্য় লোককৃত্ ।
জগাম ত্রিদিবং দেবস্সহদেবৈর্মরুদ্গণৈঃ ॥ 25 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে বালকাংডে দ্বিচত্বারিংশস্সর্গঃ ॥
