ଶ୍ରୀମଦ୍ଵାଲ୍ମୀକୀୟ ରାମାୟଣେ ବାଲକାଂଡମ୍ ।
ଅଥ ଦ୍ଵିଚତ୍ଵାରିଂଶସ୍ସର୍ଗଃ ।
କାଲଧର୍ମଂ ଗତେ ରାମ ସଗରେ ପ୍ରକୃତୀଜନାଃ ।
ରାଜାନଂ ରୋଚୟାମାସୁରଂଶୁମଂତଂ ସୁଧାର୍ମିକମ୍ ॥ 1 ॥
ସ ରାଜା ସୁମହାନାସୀଦଂଶୁମାନ୍ ରଘୁନଂଦନ ।
ତସ୍ୟ ପୁତ୍ରୋ ମହାନାସୀଦ୍ଦିଲୀପ ଇତି ଵିଶ୍ରୁତଃ ॥ 2 ॥
ତସ୍ମିନ୍ ରାଜ୍ୟଂ ସମାଵେଶ୍ୟ ଦିଲୀପେ ରଘୁନଂଦନ ।
ହିମଵଚ୍ଛିଖରେ ପୁଣ୍ୟେ ତପସ୍ତେପେ ସୁଦାରୁଣମ୍ ॥ 3 ॥
ଦ୍ଵାତ୍ରିଂଶଚ୍ଚ ସହସ୍ରାଣି ଵର୍ଷାଣି ସୁମହାୟଶାଃ ।
ତପୋଵନଂ ଗତୋ ରାମ ସ୍ଵର୍ଗଂ ଲେଭେ ତପୋଧନଃ ॥ 4 ॥
ଦିଲୀପସ୍ତୁ ମହାତେଜାଶ୍ଶ୍ରୁତ୍ଵା ପୈତାମହଂ ଵଧମ୍ ।
ଦୁଃଖୋପହତୟା ବୁଦ୍ଧ୍ୟା ନିଶ୍ଚୟଂ ନାଧ୍ୟଗଚ୍ଛତ ॥ 5 ॥
କଥଂ ଗଂଗାଵତରଣଂ କଥଂ ତେଷାଂ ଜଲକ୍ରିୟା ।
ତାରୟେୟଂ କଥଂ ଚୈତାନିତି ଚିଂତାପରୋଽଭଵତ୍ ॥ 6 ॥
ତସ୍ୟ ଚିଂତୟତୋ ନିତ୍ୟଂ ଧର୍ମେଣ ଵିଦିତାତ୍ମନଃ ।
ପୁତ୍ରୋ ଭଗୀରଥୋ ନାମ ଜଜ୍ଞେ ପରମଧାର୍ମିକଃ ॥ 7 ॥
ଦିଲୀପସ୍ତୁ ମହାତେଜା ୟଜ୍ଞୈର୍ବହୁଭିରିଷ୍ଟଵାନ୍ ।
ତ୍ରିଂଶଦ୍ଵର୍ଷସହସ୍ରାଣି ରାଜା ରାଜ୍ୟମକାରୟତ୍ ॥ 8 ॥
ଅଗତ୍ଵା ନିଶ୍ଚୟଂ ରାଜା ତେଷାମୁଦ୍ଧରଣଂ ପ୍ରତି ।
ଵ୍ୟାଧିନା ନରଶାର୍ଦୂଲ କାଲଧର୍ମମୁପେୟିଵାନ୍ ॥ 9 ॥
ଇଂଦ୍ରଲୋକଂ ଗତୋ ରାଜା ସ୍ଵାର୍ଜିତେନୈଵ କର୍ମଣା ।
ରାଜ୍ୟେ ଭଗୀରଥଂ ପୁତ୍ରମଭିଷିଚ୍ୟ ନରର୍ଷଭଃ ॥ 10 ॥
ଭଗୀରଥସ୍ତୁ ରାଜର୍ଷିର୍ଧାର୍ମିକୋ ରଘୁନଂଦନ ।
ଅନପତ୍ୟୋ ମହାତେଜାଃ ପ୍ରଜାକାମସ୍ସ ଚାପ୍ରଜଃ ॥ 11 ॥
ମଂତ୍ରିଷ୍ଵାଧାୟ ତଦ୍ରାଜ୍ୟଂ ଗଂଗାଵତରଣେ ରତଃ ।
ସ ତପୋ ଦୀର୍ଘମାତିଷ୍ଠଦ୍ଗୋକର୍ଣେ ରଘୁନଂଦନ ॥ 12 ॥
ଊର୍ଧ୍ଵବାହୁଃ ପଂଚତପା ମାସାହାରୋ ଜିତେଂଦ୍ରିୟଃ ।
ତସ୍ୟ ଵର୍ଷସହସ୍ରାଣି ଘୋରେ ତପସି ତିଷ୍ଠତଃ ॥ 13 ॥
ଅତୀତାନି ମହାବାହୋ ତସ୍ୟ ରାଜ୍ଞୋ ମହାତ୍ମନଃ ।
ସୁପ୍ରୀତୋ ଭଗଵାନ୍ ବ୍ରହ୍ମା ପ୍ରଜାନାଂ ପତିରୀଶ୍ଵରଃ ॥ 14 ॥
ତତସ୍ସୁରଗଣୈସ୍ସାର୍ଧମୁପାଗମ୍ୟ ପିତାମହଃ ।
ଭଗୀରଥଂ ମହାତ୍ମାନଂ ତପ୍ୟମାନମଥାବ୍ରଵୀତ୍ ॥ 15 ॥
ଭଗୀରଥ ମହାଭାଗ ପ୍ରୀତସ୍ତେଽହଂ ଜନେଶ୍ଵର ।
ତପସା ଚ ସୁତପ୍ତେନ ଵରଂ ଵରୟ ସୁଵ୍ରତ ॥ 16 ॥
ତମୁଵାଚ ମହାତେଜାଃ ସର୍ଵଲୋକପିତାମହମ୍ ।
ଭଗୀରଥୋ ମହାଭାଗଃ କୃତାଂଜଲିରୁପସ୍ଥିତଃ ॥ 17 ॥
ୟଦି ମେ ଭଗଵନ୍ ପ୍ରୀତୋ ୟଦ୍ୟସ୍ତି ତପସଃ ଫଲମ୍ ।
ସଗରସ୍ୟାତ୍ମଜାସ୍ସର୍ଵେ ମତ୍ତସ୍ସଲିଲମାପ୍ନୁୟୁଃ ॥ 18 ॥
ଗଂଗାୟାସ୍ସଲିଲକ୍ଲିନ୍ନେ ଭସ୍ମନ୍ୟେଷାଂ ମହାତ୍ମନାମ୍ ।
ସ୍ଵର୍ଗଂ ଗଚ୍ଛେୟୁରତ୍ୟଂତଂ ସର୍ଵେ ମେ ପ୍ରପିତାମହାଃ ॥ 19 ॥
ଦେୟା ଚ ସଂତତିର୍ଦେଵ ନାଵସୀଦେତ୍କୁଲଂ ଚ ନଃ ।
ଇକ୍ଷ୍ଵାକୂଣାଂ କୁଲେ ଦେଵ ଏଷ ମେଽସ୍ତୁ ଵରଃପରଃ ॥ 20 ॥
ଉକ୍ତଵାକ୍ୟଂ ତୁ ରାଜାନଂ ସର୍ଵଲୋକପିତାମହଃ ।
ପ୍ରତ୍ୟୁଵାଚ ଶୁଭାଂ ଵାଣୀଂ ମଧୁରାଂ ମଧୁରାକ୍ଷରାମ୍ ॥ 21 ॥
ମନୋରଥୋ ମହାନେଷ ଭଗୀରଥ ମହାରଥ ।
ଏଵଂ ଭଵତୁ ଭଦ୍ରଂ ତେ ଇକ୍ଷ୍ଵାକୁକୁଲଵର୍ଧନ ॥ 22 ॥
ଇୟଂ ହୈମଵତୀ ଗଂଗା ଜ୍ୟେଷ୍ଠା ହିମଵତସ୍ସୁତା ।
ତାଂ ଵୈ ଧାରୟିତୁଂ ଶକ୍ତୋ ହରସ୍ତତ୍ର ନିୟୁଜ୍ୟତାମ୍ ॥ 23 ॥
ଗଂଗାୟାଃ ପତନଂ ରାଜନ୍ ପୃଥିଵୀ ନ ସହିଷ୍ୟତି ।
ତାଂ ଵୈ ଧାରୟିତୁଂ ଵୀର ନାନ୍ୟଂ ପଶ୍ୟାମି ଶୂଲିନଃ ॥ 24 ॥
ତମେଵମୁକ୍ତ୍ଵା ରାଜାନଂ ଗଂଗାଂ ଚାଭାଷ୍ୟ ଲୋକକୃତ୍ ।
ଜଗାମ ତ୍ରିଦିଵଂ ଦେଵସ୍ସହଦେଵୈର୍ମରୁଦ୍ଗଣୈଃ ॥ 25 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ବାଲକାଂଡେ ଦ୍ଵିଚତ୍ଵାରିଂଶସ୍ସର୍ଗଃ ॥
