ଶ୍ରୀମଦ୍ଵାଲ୍ମୀକୀୟ ରାମାୟଣେ ବାଲକାଂଡମ୍ ।
ଅଥ ଅଷ୍ଟଚତ୍ଵାରିଂଶସ୍ସର୍ଗଃ ।
ପୃଷ୍ଟ୍ଵା ତୁ କୁଶଲଂ ତତ୍ର ପରସ୍ପରସମାଗମେ ।
କଥାଂତେ ସୁମତିର୍ଵାକ୍ୟଂ ଵ୍ୟାଜହାର ମହାମୁନିମ୍ ॥ 1 ॥
ଇମୌ କୁମାରୌ ଭଦ୍ରଂ ତେ ଦେଵତୁଲ୍ୟପରାକ୍ରମୌ ।
ଗଜସିଂହଗତୀ ଵୀରୌ ଶାର୍ଦୂଲଵୃଷଭୋପମୌ ॥ 2 ॥
ପଦ୍ମପତ୍ରଵିଶାଲାକ୍ଷୌ ଖଡ୍ଗତୂଣୀ ଧନୁର୍ଧରୌ ।
ଅଶ୍ଵିନାଵିଵ ରୂପେଣ ସମୁପସ୍ଥିତୟୌଵନୌ ॥ 3 ॥
ୟଦୃଚ୍ଛୟୈଵ ଗାଂ ପ୍ରାପ୍ତୌ ଦେଵଲୋକାଦିଵାମରୌ ।
କଥଂ ପଦ୍ଭ୍ୟାମିହ ପ୍ରାପ୍ତୌ କିମର୍ଥଂ କସ୍ୟ ଵା ମୁନେ ॥ 4 ॥
ଭୂଷୟଂତାଵିମଂ ଦେଶଂ ଚଂଦ୍ରସୂର୍ୟାଵିଵାଂବରମ୍ ।
ପରସ୍ପରସ୍ୟ ସଦୃଶୌ ପ୍ରମାଣେଂଗିତଚେଷ୍ଟିତୈଃ ॥ 5 ॥
କିମର୍ଥଂ ଚ ମୁନିଶ୍ରେଷ୍ଠ ସଂପ୍ରାପ୍ତୌ ଦୁର୍ଗମେ ପଥି ।
ଵରାୟୁଧଧରୌ ଵୀରୌ ଶ୍ରୋତୁମିଚ୍ଛାମି ତତ୍ତ୍ଵତଃ ॥ 6 ॥
ତସ୍ୟ ତଦ୍ଵଚନଂ ଶ୍ରୁତ୍ଵା ୟଥାଵୃତ୍ତଂ ନ୍ୟଵେଦୟତ୍ ।
ସିଦ୍ଧାଶ୍ରମନିଵାସଂ ଚ ରାକ୍ଷସାନାଂ ଵଧଂ ତଥା ॥ 7 ॥
ଵିଶ୍ଵାମିତ୍ରଵଚଶ୍ଶ୍ରୁତ୍ଵା ରାଜା ପରମହର୍ଷିତଃ ।
ଅତିଥୀ ପରମୌ ପ୍ରାପ୍ତୌ ପୁତ୍ରୌ ଦଶରଥସ୍ୟ ତୌ ॥ 8 ॥
ପୂଜୟାମାସ ଵିଧିଵତ୍ସତ୍କାରାର୍ହୌ ମହାବଲୌ ।
ତତଃ ପରମସତ୍କାରଂ ସୁମତେଃ ପ୍ରାପ୍ୟ ରାଘଵୌ ॥ 9 ॥
ଉଷ୍ୟ ତତ୍ର ନିଶାମେକାଂ ଜଗ୍ମତୁର୍ମିଥିଲାଂ ତତଃ ।
ତାନ୍ ଦୃଷ୍ଟ୍ଵା ମୁନୟସ୍ସର୍ଵେ ଜନକସ୍ୟ ପୁରୀଂ ଶୁଭାମ୍ ॥ 10 ॥
ସାଧୁ ସାଧ୍ଵିତି ଶଂସଂତୋ ମିଥିଲାଂ ସମପୂଜୟନ୍ ।
ମିଥିଲୋପଵନେ ଶୂନ୍ୟମାଶ୍ରମଂ ଦୃଶ୍ୟ ରାଘଵଃ ॥ 11 ॥
ପୁରାଣଂ ନିର୍ଜନଂ ରମ୍ୟଂ ପପ୍ରଚ୍ଛ ମୁନିପୁଂଗଵମ୍ ।
ଶ୍ରୀମଦାଶ୍ରମସଂକାଶଂ କିନ୍ନ୍ଵିଦଂ ମୁନିଵର୍ଜିତମ୍ ॥ 12 ॥
ଜ୍ଞାତୁମିଚ୍ଛାମି ଭଗଵନ୍ କସ୍ୟାୟଂ ପୂର୍ଵମାଶ୍ରମଃ ।
ତଚ୍ଛ୍ରୁତ୍ଵା ରାଘଵେଣୋକ୍ତଂ ଵାକ୍ୟଂ ଵାକ୍ୟଵିଶାରଦଃ ॥ 13 ॥
ପ୍ରତ୍ୟୁଵାଚ ମହାତେଜା ଵିଶ୍ଵାମିତ୍ରୋ ମହାମୁନିଃ ।
ହଂତ ତେ କଥୟିଷ୍ୟାମି ଶ୍ରୁଣୁ ତତ୍ତ୍ଵେନ ରାଘଵ ॥ 14 ॥
ୟସ୍ୟେଦମାଶ୍ରମପଦଂ ଶପ୍ତଂ କୋପାନ୍ମହାତ୍ମନା ।
ଗୌତମସ୍ୟ ନରଶ୍ରେଷ୍ଠ ପୂର୍ଵମାସୀନ୍ମହାତ୍ମନଃ ॥ 15 ॥
ଆଶ୍ରମୋ ଦିଵ୍ୟସଂକାଶସ୍ସୁରୈରପି ସୁପୂଜିତଃ ।
ସ ଚେହ ତପ ଆତିଷ୍ଠଦହଲ୍ୟାସହିତଃ ପୁରା ॥ 16 ॥
ଵର୍ଷପୂଗାନନେକାଂଶ୍ଚ ରାଜପୁତ୍ର ମହାୟଶଃ ।
ତସ୍ୟାଂତରଂ ଵିଦିତ୍ଵା ତୁ ସହସ୍ରାକ୍ଷଶ୍ଶଚୀପତିଃ ॥ 17 ॥
ମୁନିଵେଷଧରୋଽହଲ୍ୟାମିଦଂ ଵଚନମବ୍ରଵୀତ୍ ।
ଋତୁକାଲଂ ପ୍ରତୀକ୍ଷଂତେ ନାର୍ଥିନସ୍ସୁସମାହିତେ ॥ 18 ॥
ସଂଗମଂ ତ୍ଵହମିଚ୍ଛାମି ତ୍ଵୟା ସହ ସୁମଧ୍ୟମେ ।
ମୁନିଵେଷଂ ସହସ୍ରାକ୍ଷଂ ଵିଜ୍ଞାୟ ରଘୁନଂଦନ ॥ 19 ॥
ମତିଂ ଚକାର ଦୁର୍ମେଧା ଦେଵରାଜକୁତୂହଲାତ୍ ।
ଅଥାବ୍ରଵୀତ୍ ନରଶ୍ରେଷ୍ଠ କୃତାର୍ଥେନାଂତରାତ୍ମନା ॥ 20 ॥
କୃତାର୍ଥାଽସ୍ମି ସୁରଶ୍ରେଷ୍ଠ ଗଚ୍ଛ ଶୀଘ୍ରମିତଃ ପ୍ରଭୋ ।
ଆତ୍ମାନଂ ମାଂ ଚ ଦେଵେଶ ସର୍ଵଦା ରକ୍ଷ ଗୌତମାତ୍ ॥ 21 ॥
ଇଂଦ୍ରସ୍ତୁ ପ୍ରହସନ୍ ଵାକ୍ୟମହଲ୍ୟାମିଦମବ୍ରଵୀତ୍ ।
ସୁଶ୍ରୋଣି ପରିତୁଷ୍ଟୋଽସ୍ମି ଗମିଷ୍ୟାମି ୟଥାଽଗତମ୍ ॥ 22 ॥
ଏଵଂ ସଂଗମ୍ୟ ତୁ ତୟା ନିଶ୍ଚକ୍ରାମୋଟଜାତ୍ତତଃ ।
ସ ସଂଭ୍ରମାତ୍ତ୍ଵରନ୍ ରାମ ଶଂକିତୋ ଗୌତମଂ ପ୍ରତି ॥ 23 ॥
ଗୌତମଂ ତଂ ଦଦର୍ଶାଥ ପ୍ରଵିଶଂତଂ ମହାମୁନିମ୍ ।
ଦେଵଦାନଵଦୁର୍ଧର୍ଷଂ ତପୋବଲସମନ୍ଵିତମ୍ ॥ 24 ॥
ତୀର୍ଥେଂଦକପରିକ୍ଲିନ୍ନଂ ଦୀପ୍ୟମାନମିଵାନଲମ୍ ।
ଗୃହୀତସମିଧଂ ତତ୍ର ସକୁଶଂ ମୁନିପୁଂଗଵମ୍ ॥ 25 ॥
ଦୃଷ୍ଟ୍ଵା ସୁରପତିସ୍ତ୍ରସ୍ତୋ ଵିଵର୍ଣଵଦନୋଽଭଵତ୍ ।
ଅଥ ଦୃଷ୍ଟ୍ଵା ସହସ୍ରାକ୍ଷଂ ମୁନିଵେଷଧରଂ ମୁନିଃ ॥ 26 ॥
ଦୁର୍ଵୃତ୍ତଂ ଵୃତ୍ତସଂପନ୍ନୋ ରୋଷାଦ୍ଵଚନମବ୍ରଵୀତ୍ ।
ମମ ରୂପଂ ସମାସ୍ଥାୟ କୃତଵାନସି ଦୁର୍ମତେ ॥ 27 ॥
ଅକର୍ତଵ୍ୟମିଦଂ ତସ୍ମାଦ୍ଵିଫଲସ୍ତ୍ଵଂ ଭଵିଷ୍ୟସି ।
ଗୌତମେନୈଵମୁକ୍ତସ୍ୟ ସରୋଷେଣ ମହାତ୍ମନା ॥ 28 ॥
ପେତତୁର୍ଵୃଷଣୈ ଭୂମୌ ସହସ୍ରାକ୍ଷସ୍ୟ ତତ୍କ୍ଷଣାତ୍ ।
ତଥା ଶପ୍ତ୍ଵା ସ ଵୈ ଶକ୍ରମହଲ୍ୟାମପି ଶପ୍ତଵାନ୍ ॥ 29 ॥
ଇହ ଵର୍ଷସହସ୍ରାଣି ବହୂନି ତ୍ଵଂ ନିଵତ୍ସ୍ୟସି ।
ଵାୟୁଭକ୍ଷା ନିରାହାରା ତପ୍ୟଂତୀ ଭସ୍ମଶାୟିନୀ ॥ 30 ॥
ଅଦୃଶ୍ୟା ସର୍ଵଭୂତାନାଂ ଆଶ୍ରମେଽସ୍ମିନ୍ନିଵତ୍ସ୍ୟସି ।
ୟଦା ଚୈତଦ୍ଵନଂ ଘୋରଂ ରାମୋ ଦଶରଥାତ୍ମଜଃ ॥ 31 ॥
ଆଗମିଷ୍ୟତି ଦୁର୍ଧର୍ଷସ୍ତଦା ପୂତା ଭଵିଷ୍ୟସି ।
ତସ୍ୟାତିଥ୍ୟେନ ଦୁର୍ଵୁତ୍ତେ ଲୋଭମୋହଵିଵର୍ଜିତା ॥ 32 ॥
ମତ୍ସକାଶେ ମୁଦା ୟୁକ୍ତା ସ୍ଵଂ ଵପୁର୍ଧାରୟିଷ୍ୟସି ।
ଏଵମୁକ୍ତ୍ଵା ମହାତେଜା ଗୌତମୋ ଦୁଷ୍ଟଚାରିଣୀମ୍ ॥ 33 ॥
ଇମମାଶ୍ରମମୁତ୍ସୃଜ୍ୟ ସିଦ୍ଧଚାରଣସେଵିତେ ।
ହିମଵଚ୍ଛିଖରେ ପୁଣ୍ୟେ ତପସ୍ତେପେ ମହାତପାଃ ॥ 34 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ବାଲକାଂଡେ ଅଷ୍ଟଚତ୍ଵାରିଂଶସ୍ସର୍ଗଃ ॥
