śrīmadvālmīkīya rāmāyaṇē bālakāṇḍam ।
atha aṣṭachatvāriṃśassargaḥ ।
pṛṣṭvā tu kuśalaṃ tatra parasparasamāgamē ।
kathāntē sumatirvākyaṃ vyājahāra mahāmunim ॥ 1 ॥
imau kumārau bhadraṃ tē dēvatulyaparākramau ।
gajasiṃhagatī vīrau śārdūlavṛṣabhōpamau ॥ 2 ॥
padmapatraviśālākṣau khaḍgatūṇī dhanurdharau ।
aśvināviva rūpēṇa samupasthitayauvanau ॥ 3 ॥
yadṛchChayaiva gāṃ prāptau dēvalōkādivāmarau ।
kathaṃ padbhyāmiha prāptau kimarthaṃ kasya vā munē ॥ 4 ॥
bhūṣayantāvimaṃ dēśaṃ chandrasūryāvivāmbaram ।
parasparasya sadṛśau pramāṇēṅgitachēṣṭitaiḥ ॥ 5 ॥
kimarthaṃ cha muniśrēṣṭha samprāptau durgamē pathi ।
varāyudhadharau vīrau śrōtumichChāmi tattvataḥ ॥ 6 ॥
tasya tadvachanaṃ śrutvā yathāvṛttaṃ nyavēdayat ।
siddhāśramanivāsaṃ cha rākṣasānāṃ vadhaṃ tathā ॥ 7 ॥
viśvāmitravachaśśrutvā rājā paramaharṣitaḥ ।
atithī paramau prāptau putrau daśarathasya tau ॥ 8 ॥
pūjayāmāsa vidhivatsatkārārhau mahābalau ।
tataḥ paramasatkāraṃ sumatēḥ prāpya rāghavau ॥ 9 ॥
uṣya tatra niśāmēkāṃ jagmaturmithilāṃ tataḥ ।
tān dṛṣṭvā munayassarvē janakasya purīṃ śubhām ॥ 10 ॥
sādhu sādhviti śaṃsantō mithilāṃ samapūjayan ।
mithilōpavanē śūnyamāśramaṃ dṛśya rāghavaḥ ॥ 11 ॥
purāṇaṃ nirjanaṃ ramyaṃ paprachCha munipuṅgavam ।
śrīmadāśramasaṅkāśaṃ kinnvidaṃ munivarjitam ॥ 12 ॥
jñātumichChāmi bhagavan kasyāyaṃ pūrvamāśramaḥ ।
tachChrutvā rāghavēṇōktaṃ vākyaṃ vākyaviśāradaḥ ॥ 13 ॥
pratyuvācha mahātējā viśvāmitrō mahāmuniḥ ।
hanta tē kathayiṣyāmi śruṇu tattvēna rāghava ॥ 14 ॥
yasyēdamāśramapadaṃ śaptaṃ kōpānmahātmanā ।
gautamasya naraśrēṣṭha pūrvamāsīnmahātmanaḥ ॥ 15 ॥
āśramō divyasaṅkāśassurairapi supūjitaḥ ।
sa chēha tapa ātiṣṭhadahalyāsahitaḥ purā ॥ 16 ॥
varṣapūgānanēkāṃścha rājaputra mahāyaśaḥ ।
tasyāntaraṃ viditvā tu sahasrākṣaśśachīpatiḥ ॥ 17 ॥
munivēṣadharō'halyāmidaṃ vachanamabravīt ।
ṛtukālaṃ pratīkṣantē nārthinassusamāhitē ॥ 18 ॥
saṅgamaṃ tvahamichChāmi tvayā saha sumadhyamē ।
munivēṣaṃ sahasrākṣaṃ vijñāya raghunandana ॥ 19 ॥
matiṃ chakāra durmēdhā dēvarājakutūhalāt ।
athābravīt naraśrēṣṭha kṛtārthēnāntarātmanā ॥ 20 ॥
kṛtārthā'smi suraśrēṣṭha gachCha śīghramitaḥ prabhō ।
ātmānaṃ māṃ cha dēvēśa sarvadā rakṣa gautamāt ॥ 21 ॥
indrastu prahasan vākyamahalyāmidamabravīt ।
suśrōṇi parituṣṭō'smi gamiṣyāmi yathā'gatam ॥ 22 ॥
ēvaṃ saṅgamya tu tayā niśchakrāmōṭajāttataḥ ।
sa sambhramāttvaran rāma śaṅkitō gautamaṃ prati ॥ 23 ॥
gautamaṃ taṃ dadarśātha praviśantaṃ mahāmunim ।
dēvadānavadurdharṣaṃ tapōbalasamanvitam ॥ 24 ॥
tīrthēndakapariklinnaṃ dīpyamānamivānalam ।
gṛhītasamidhaṃ tatra sakuśaṃ munipuṅgavam ॥ 25 ॥
dṛṣṭvā surapatistrastō vivarṇavadanō'bhavat ।
atha dṛṣṭvā sahasrākṣaṃ munivēṣadharaṃ muniḥ ॥ 26 ॥
durvṛttaṃ vṛttasampannō rōṣādvachanamabravīt ।
mama rūpaṃ samāsthāya kṛtavānasi durmatē ॥ 27 ॥
akartavyamidaṃ tasmādviphalastvaṃ bhaviṣyasi ।
gautamēnaivamuktasya sarōṣēṇa mahātmanā ॥ 28 ॥
pētaturvṛṣaṇai bhūmau sahasrākṣasya tatkṣaṇāt ।
tathā śaptvā sa vai śakramahalyāmapi śaptavān ॥ 29 ॥
iha varṣasahasrāṇi bahūni tvaṃ nivatsyasi ।
vāyubhakṣā nirāhārā tapyantī bhasmaśāyinī ॥ 30 ॥
adṛśyā sarvabhūtānāṃ āśramē'sminnivatsyasi ।
yadā chaitadvanaṃ ghōraṃ rāmō daśarathātmajaḥ ॥ 31 ॥
āgamiṣyati durdharṣastadā pūtā bhaviṣyasi ।
tasyātithyēna durvuttē lōbhamōhavivarjitā ॥ 32 ॥
matsakāśē mudā yuktā svaṃ vapurdhārayiṣyasi ।
ēvamuktvā mahātējā gautamō duṣṭachāriṇīm ॥ 33 ॥
imamāśramamutsṛjya siddhachāraṇasēvitē ।
himavachChikharē puṇyē tapastēpē mahātapāḥ ॥ 34 ॥
ityārṣē śrīmadrāmāyaṇē vālmīkīya ādikāvyē bālakāṇḍē aṣṭachatvāriṃśassargaḥ ॥
