ශ්රීමද්වාල්මීකීය රාමායණේ බාලකාංඩම් ।
අථ අෂ්ටචත්වාරිංශස්සර්ගඃ ।
පෘෂ්ට්වා තු කුශලං තත්ර පරස්පරසමාගමේ ।
කථාංතේ සුමතිර්වාක්යං ව්යාජහාර මහාමුනිම් ॥ 1 ॥
ඉමෞ කුමාරෞ භද්රං තේ දේවතුල්යපරාක්රමෞ ।
ගජසිංහගතී වීරෞ ශාර්දූලවෘෂභෝපමෞ ॥ 2 ॥
පද්මපත්රවිශාලාක්ෂෞ ඛඩ්ගතූණී ධනුර්ධරෞ ।
අශ්විනාවිව රූපේණ සමුපස්ථිතයෞවනෞ ॥ 3 ॥
යදෘච්ඡයෛව ගාං ප්රාප්තෞ දේවලෝකාදිවාමරෞ ।
කථං පද්භ්යාමිහ ප්රාප්තෞ කිමර්ථං කස්ය වා මුනේ ॥ 4 ॥
භූෂයංතාවිමං දේශං චංද්රසූර්යාවිවාංබරම් ।
පරස්පරස්ය සදෘශෞ ප්රමාණේංගිතචේෂ්ටිතෛඃ ॥ 5 ॥
කිමර්ථං ච මුනිශ්රේෂ්ඨ සංප්රාප්තෞ දුර්ගමේ පථි ।
වරායුධධරෞ වීරෞ ශ්රෝතුමිච්ඡාමි තත්ත්වතඃ ॥ 6 ॥
තස්ය තද්වචනං ශ්රුත්වා යථාවෘත්තං න්යවේදයත් ।
සිද්ධාශ්රමනිවාසං ච රාක්ෂසානාං වධං තථා ॥ 7 ॥
විශ්වාමිත්රවචශ්ශ්රුත්වා රාජා පරමහර්ෂිතඃ ।
අතිථී පරමෞ ප්රාප්තෞ පුත්රෞ දශරථස්ය තෞ ॥ 8 ॥
පූජයාමාස විධිවත්සත්කාරාර්හෞ මහාබලෞ ।
තතඃ පරමසත්කාරං සුමතේඃ ප්රාප්ය රාඝවෞ ॥ 9 ॥
උෂ්ය තත්ර නිශාමේකාං ජග්මතුර්මිථිලාං තතඃ ।
තාන් දෘෂ්ට්වා මුනයස්සර්වේ ජනකස්ය පුරීං ශුභාම් ॥ 10 ॥
සාධු සාධ්විති ශංසංතෝ මිථිලාං සමපූජයන් ।
මිථිලෝපවනේ ශූන්යමාශ්රමං දෘශ්ය රාඝවඃ ॥ 11 ॥
පුරාණං නිර්ජනං රම්යං පප්රච්ඡ මුනිපුංගවම් ।
ශ්රීමදාශ්රමසංකාශං කින්න්විදං මුනිවර්ජිතම් ॥ 12 ॥
ජ්ඤාතුමිච්ඡාමි භගවන් කස්යායං පූර්වමාශ්රමඃ ।
තච්ඡ්රුත්වා රාඝවේණෝක්තං වාක්යං වාක්යවිශාරදඃ ॥ 13 ॥
ප්රත්යුවාච මහාතේජා විශ්වාමිත්රෝ මහාමුනිඃ ।
හංත තේ කථයිෂ්යාමි ශ්රුණු තත්ත්වේන රාඝව ॥ 14 ॥
යස්යේදමාශ්රමපදං ශප්තං කෝපාන්මහාත්මනා ।
ගෞතමස්ය නරශ්රේෂ්ඨ පූර්වමාසීන්මහාත්මනඃ ॥ 15 ॥
ආශ්රමෝ දිව්යසංකාශස්සුරෛරපි සුපූජිතඃ ।
ස චේහ තප ආතිෂ්ඨදහල්යාසහිතඃ පුරා ॥ 16 ॥
වර්ෂපූගානනේකාංශ්ච රාජපුත්ර මහායශඃ ।
තස්යාංතරං විදිත්වා තු සහස්රාක්ෂශ්ශචීපතිඃ ॥ 17 ॥
මුනිවේෂධරෝऽහල්යාමිදං වචනමබ්රවීත් ।
ඍතුකාලං ප්රතීක්ෂංතේ නාර්ථිනස්සුසමාහිතේ ॥ 18 ॥
සංගමං ත්වහමිච්ඡාමි ත්වයා සහ සුමධ්යමේ ।
මුනිවේෂං සහස්රාක්ෂං විජ්ඤාය රඝුනංදන ॥ 19 ॥
මතිං චකාර දුර්මේධා දේවරාජකුතූහලාත් ।
අථාබ්රවීත් නරශ්රේෂ්ඨ කෘතාර්ථේනාංතරාත්මනා ॥ 20 ॥
කෘතාර්ථාऽස්මි සුරශ්රේෂ්ඨ ගච්ඡ ශීඝ්රමිතඃ ප්රභෝ ।
ආත්මානං මාං ච දේවේශ සර්වදා රක්ෂ ගෞතමාත් ॥ 21 ॥
ඉංද්රස්තු ප්රහසන් වාක්යමහල්යාමිදමබ්රවීත් ।
සුශ්රෝණි පරිතුෂ්ටෝऽස්මි ගමිෂ්යාමි යථාऽගතම් ॥ 22 ॥
ඒවං සංගම්ය තු තයා නිශ්චක්රාමෝටජාත්තතඃ ।
ස සංභ්රමාත්ත්වරන් රාම ශංකිතෝ ගෞතමං ප්රති ॥ 23 ॥
ගෞතමං තං දදර්ශාථ ප්රවිශංතං මහාමුනිම් ।
දේවදානවදුර්ධර්ෂං තපෝබලසමන්විතම් ॥ 24 ॥
තීර්ථේංදකපරික්ලින්නං දීප්යමානමිවානලම් ।
ගෘහීතසමිධං තත්ර සකුශං මුනිපුංගවම් ॥ 25 ॥
දෘෂ්ට්වා සුරපතිස්ත්රස්තෝ විවර්ණවදනෝऽභවත් ।
අථ දෘෂ්ට්වා සහස්රාක්ෂං මුනිවේෂධරං මුනිඃ ॥ 26 ॥
දුර්වෘත්තං වෘත්තසංපන්නෝ රෝෂාද්වචනමබ්රවීත් ।
මම රූපං සමාස්ථාය කෘතවානසි දුර්මතේ ॥ 27 ॥
අකර්තව්යමිදං තස්මාද්විඵලස්ත්වං භවිෂ්යසි ।
ගෞතමේනෛවමුක්තස්ය සරෝෂේණ මහාත්මනා ॥ 28 ॥
පේතතුර්වෘෂණෛ භූමෞ සහස්රාක්ෂස්ය තත්ක්ෂණාත් ।
තථා ශප්ත්වා ස වෛ ශක්රමහල්යාමපි ශප්තවාන් ॥ 29 ॥
ඉහ වර්ෂසහස්රාණි බහූනි ත්වං නිවත්ස්යසි ।
වායුභක්ෂා නිරාහාරා තප්යංතී භස්මශායිනී ॥ 30 ॥
අදෘශ්යා සර්වභූතානාං ආශ්රමේऽස්මින්නිවත්ස්යසි ।
යදා චෛතද්වනං ඝෝරං රාමෝ දශරථාත්මජඃ ॥ 31 ॥
ආගමිෂ්යති දුර්ධර්ෂස්තදා පූතා භවිෂ්යසි ।
තස්යාතිථ්යේන දුර්වුත්තේ ලෝභමෝහවිවර්ජිතා ॥ 32 ॥
මත්සකාශේ මුදා යුක්තා ස්වං වපුර්ධාරයිෂ්යසි ।
ඒවමුක්ත්වා මහාතේජා ගෞතමෝ දුෂ්ටචාරිණීම් ॥ 33 ॥
ඉමමාශ්රමමුත්සෘජ්ය සිද්ධචාරණසේවිතේ ।
හිමවච්ඡිඛරේ පුණ්යේ තපස්තේපේ මහාතපාඃ ॥ 34 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ බාලකාංඩේ අෂ්ටචත්වාරිංශස්සර්ගඃ ॥
