ശ്രീമദ്വാല്മീകീയ രാമായണേ ബാലകാംഡമ് ।
അഥ അഷ്ടചത്വാരിംശസ്സര്ഗഃ ।
പൃഷ്ട്വാ തു കുശലം തത്ര പരസ്പരസമാഗമേ ।
കഥാംതേ സുമതിർവാക്യം വ്യാജഹാര മഹാമുനിമ് ॥ 1 ॥
ഇമൌ കുമാരൌ ഭദ്രം തേ ദേവതുല്യപരാക്രമൌ ।
ഗജസിംഹഗതീ വീരൌ ശാര്ദൂലവൃഷഭോപമൌ ॥ 2 ॥
പദ്മപത്രവിശാലാക്ഷൌ ഖഡ്ഗതൂണീ ധനുര്ധരൌ ।
അശ്വിനാവിവ രൂപേണ സമുപസ്ഥിതയൌവനൌ ॥ 3 ॥
യദൃച്ഛയൈവ ഗാം പ്രാപ്തൌ ദേവലോകാദിവാമരൌ ।
കഥം പദ്ഭ്യാമിഹ പ്രാപ്തൌ കിമര്ഥം കസ്യ വാ മുനേ ॥ 4 ॥
ഭൂഷയംതാവിമം ദേശം ചംദ്രസൂര്യാവിവാംബരമ് ।
പരസ്പരസ്യ സദൃശൌ പ്രമാണേംഗിതചേഷ്ടിതൈഃ ॥ 5 ॥
കിമര്ഥം ച മുനിശ്രേഷ്ഠ സംപ്രാപ്തൌ ദുര്ഗമേ പഥി ।
വരായുധധരൌ വീരൌ ശ്രോതുമിച്ഛാമി തത്ത്വതഃ ॥ 6 ॥
തസ്യ തദ്വചനം ശ്രുത്വാ യഥാവൃത്തം ന്യവേദയത് ।
സിദ്ധാശ്രമനിവാസം ച രാക്ഷസാനാം വധം തഥാ ॥ 7 ॥
വിശ്വാമിത്രവചശ്ശ്രുത്വാ രാജാ പരമഹര്ഷിതഃ ।
അതിഥീ പരമൌ പ്രാപ്തൌ പുത്രൌ ദശരഥസ്യ തൌ ॥ 8 ॥
പൂജയാമാസ വിധിവത്സത്കാരാര്ഹൌ മഹാബലൌ ।
തതഃ പരമസത്കാരം സുമതേഃ പ്രാപ്യ രാഘവൌ ॥ 9 ॥
ഉഷ്യ തത്ര നിശാമേകാം ജഗ്മതുര്മിഥിലാം തതഃ ।
താന് ദൃഷ്ട്വാ മുനയസ്സർവേ ജനകസ്യ പുരീം ശുഭാമ് ॥ 10 ॥
സാധു സാധ്വിതി ശംസംതോ മിഥിലാം സമപൂജയന് ।
മിഥിലോപവനേ ശൂന്യമാശ്രമം ദൃശ്യ രാഘവഃ ॥ 11 ॥
പുരാണം നിര്ജനം രമ്യം പപ്രച്ഛ മുനിപുംഗവമ് ।
ശ്രീമദാശ്രമസംകാശം കിന്ന്വിദം മുനിവര്ജിതമ് ॥ 12 ॥
ജ്ഞാതുമിച്ഛാമി ഭഗവന് കസ്യായം പൂർവമാശ്രമഃ ।
തച്ഛ്രുത്വാ രാഘവേണോക്തം വാക്യം വാക്യവിശാരദഃ ॥ 13 ॥
പ്രത്യുവാച മഹാതേജാ വിശ്വാമിത്രോ മഹാമുനിഃ ।
ഹംത തേ കഥയിഷ്യാമി ശ്രുണു തത്ത്വേന രാഘവ ॥ 14 ॥
യസ്യേദമാശ്രമപദം ശപ്തം കോപാന്മഹാത്മനാ ।
ഗൌതമസ്യ നരശ്രേഷ്ഠ പൂർവമാസീന്മഹാത്മനഃ ॥ 15 ॥
ആശ്രമോ ദിവ്യസംകാശസ്സുരൈരപി സുപൂജിതഃ ।
സ ചേഹ തപ ആതിഷ്ഠദഹല്യാസഹിതഃ പുരാ ॥ 16 ॥
വര്ഷപൂഗാനനേകാംശ്ച രാജപുത്ര മഹായശഃ ।
തസ്യാംതരം വിദിത്വാ തു സഹസ്രാക്ഷശ്ശചീപതിഃ ॥ 17 ॥
മുനിവേഷധരോഽഹല്യാമിദം വചനമബ്രവീത് ।
ഋതുകാലം പ്രതീക്ഷംതേ നാര്ഥിനസ്സുസമാഹിതേ ॥ 18 ॥
സംഗമം ത്വഹമിച്ഛാമി ത്വയാ സഹ സുമധ്യമേ ।
മുനിവേഷം സഹസ്രാക്ഷം വിജ്ഞായ രഘുനംദന ॥ 19 ॥
മതിം ചകാര ദുര്മേധാ ദേവരാജകുതൂഹലാത് ।
അഥാബ്രവീത് നരശ്രേഷ്ഠ കൃതാര്ഥേനാംതരാത്മനാ ॥ 20 ॥
കൃതാര്ഥാഽസ്മി സുരശ്രേഷ്ഠ ഗച്ഛ ശീഘ്രമിതഃ പ്രഭോ ।
ആത്മാനം മാം ച ദേവേശ സർവദാ രക്ഷ ഗൌതമാത് ॥ 21 ॥
ഇംദ്രസ്തു പ്രഹസന് വാക്യമഹല്യാമിദമബ്രവീത് ।
സുശ്രോണി പരിതുഷ്ടോഽസ്മി ഗമിഷ്യാമി യഥാഽഗതമ് ॥ 22 ॥
ഏവം സംഗമ്യ തു തയാ നിശ്ചക്രാമോടജാത്തതഃ ।
സ സംഭ്രമാത്ത്വരന് രാമ ശംകിതോ ഗൌതമം പ്രതി ॥ 23 ॥
ഗൌതമം തം ദദര്ശാഥ പ്രവിശംതം മഹാമുനിമ് ।
ദേവദാനവദുര്ധര്ഷം തപോബലസമന്വിതമ് ॥ 24 ॥
തീര്ഥേംദകപരിക്ലിന്നം ദീപ്യമാനമിവാനലമ് ।
ഗൃഹീതസമിധം തത്ര സകുശം മുനിപുംഗവമ് ॥ 25 ॥
ദൃഷ്ട്വാ സുരപതിസ്ത്രസ്തോ വിവര്ണവദനോഽഭവത് ।
അഥ ദൃഷ്ട്വാ സഹസ്രാക്ഷം മുനിവേഷധരം മുനിഃ ॥ 26 ॥
ദുർവൃത്തം വൃത്തസംപന്നോ രോഷാദ്വചനമബ്രവീത് ।
മമ രൂപം സമാസ്ഥായ കൃതവാനസി ദുര്മതേ ॥ 27 ॥
അകര്തവ്യമിദം തസ്മാദ്വിഫലസ്ത്വം ഭവിഷ്യസി ।
ഗൌതമേനൈവമുക്തസ്യ സരോഷേണ മഹാത്മനാ ॥ 28 ॥
പേതതുർവൃഷണൈ ഭൂമൌ സഹസ്രാക്ഷസ്യ തത്ക്ഷണാത് ।
തഥാ ശപ്ത്വാ സ വൈ ശക്രമഹല്യാമപി ശപ്തവാന് ॥ 29 ॥
ഇഹ വര്ഷസഹസ്രാണി ബഹൂനി ത്വം നിവത്സ്യസി ।
വായുഭക്ഷാ നിരാഹാരാ തപ്യംതീ ഭസ്മശായിനീ ॥ 30 ॥
അദൃശ്യാ സർവഭൂതാനാം ആശ്രമേഽസ്മിന്നിവത്സ്യസി ।
യദാ ചൈതദ്വനം ഘോരം രാമോ ദശരഥാത്മജഃ ॥ 31 ॥
ആഗമിഷ്യതി ദുര്ധര്ഷസ്തദാ പൂതാ ഭവിഷ്യസി ।
തസ്യാതിഥ്യേന ദുർവുത്തേ ലോഭമോഹവിവര്ജിതാ ॥ 32 ॥
മത്സകാശേ മുദാ യുക്താ സ്വം വപുര്ധാരയിഷ്യസി ।
ഏവമുക്ത്വാ മഹാതേജാ ഗൌതമോ ദുഷ്ടചാരിണീമ് ॥ 33 ॥
ഇമമാശ്രമമുത്സൃജ്യ സിദ്ധചാരണസേവിതേ ।
ഹിമവച്ഛിഖരേ പുണ്യേ തപസ്തേപേ മഹാതപാഃ ॥ 34 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ ബാലകാംഡേ അഷ്ടചത്വാരിംശസ്സര്ഗഃ ॥
