ශ්රීමද්වාල්මීකීය රාමායණේ බාලකාංඩම් ।
අථ ඒකෝනෂෂ්ටිතමස්සර්ගඃ ।
උක්තවාක්යං තු රාජානං කෘපයා කුශිකාත්මජඃ ।
අබ්රවීන්මධුරං වාක්යං සාක්ෂාච්චංඩාලරූපිණම් ॥ 1 ॥
ඓක්ෂ්වාක ස්වාගතං වත්ස ජානාමි ත්වාං සුධාර්මිකම් ।
ශරණං තේ භවිෂ්යාමි මා භෛෂීර්නෘපපුංගව ॥ 2 ॥
අහමාමංත්රයේ සර්වාන්මහර්ෂීන්පුණ්යකර්මණඃ ।
යජ්ඤසාහ්යකරාන් රාජන් තතෝ යක්ෂ්යසි නිර්වෘතඃ ॥ 3 ॥
ගුරුශාපකෘතං රූපං යදිදං ත්වයි වර්තතේ ।
අනේන සහ රූපේණ සශරීරෝ ගමිෂ්යසි ॥ 4 ॥
හස්තප්රාප්තමහං මන්යේ ස්වර්ගං තව නරාධිප ।
යස්ත්වං කෞශිකමාගම්ය ශරණ්යං ශරණාගතඃ ॥ 5 ॥
ඒවමුක්ත්වා මහාතේජාඃ පුත්රාන් පරමධාර්මිකාන් ।
ව්යාදිදේශ මහාප්රාජ්ඤාන් යජ්ඤසංභාරකාරණාත් ॥ 6 ॥
සර්වාන් ශිෂ්යාන් සමාහූය වාක්යමේතදුවාච හ ।
සර්වානෘෂිගණාන්වත්සා ආනයධ්වං මමාජ්ඤයා ।
සශිෂ්යසුහෘදශ්චෛව සර්ත්විජ ස්සබහුශ්රුතාන් ॥ 7 ॥
යදන්යෝ වචනං බ්රූයාන්මද්වාක්යබලචෝදිතඃ ।
තත්සර්වමඛිලේනෝක්තං මමාඛ්යේයමනාදෘතම් ॥ 8 ॥
තස්ය තද්වචනං ශ්රුත්වා දිශෝ ජග්මුස්තදාජ්ඤයා ।
ආජග්මුරථ දේශේභ්ය ස්සර්වේභ්යෝ බ්රහ්මවාදිනඃ ॥ 9 ॥
තේ ච ශිෂ්යාඃ සමාගම්ය මුනිං ජ්වලිතතේජසම් ।
ඌචුශ්චවචනං සර්වේ සර්වේෂාං බ්රහ්මවාදිනාම් ॥ 10 ॥
ශ්රුත්වා තේ වචනං සර්වේ සමායාංති ද්විජාතයඃ ।
සර්වදේශේෂු චාගච්ඡන් වර්ජයිත්වා මහෝදයම් ॥ 11 ॥
වාසිෂ්ඨං තච්ඡතං සර්වං ක්රෝධපර්යාකුලාක්ෂරම් ।
යදාහ වචනං සර්වං ශෘණු ත්වං මුනිපුංගව ॥ 12 ॥
ක්ෂත්රියෝ යාජකෝ යස්ය චංඩාලස්ය විශේෂතඃ ।
කථං සදසි භෝක්තාරෝ හවිස්තස්ය සුරර්ෂයඃ ॥ 13 ॥
බ්රාහ්මණා වා මහාත්මානෝ භුක්ත්වා චංඩාලභෝජනම් ।
කථං ස්වර්ගං ගමිෂ්යංති විශ්වාමිත්රේණ පාලිතාඃ ॥ 14 ॥
ඒතද්වචනනෛෂ්ඨුර්යමූචු ස්සංරක්තලෝචනාඃ ।
වාසිෂ්ඨා මුනිශාර්දූල සර්වේ තේ සමහෝදයාඃ ॥ 15 ॥
තේෂාං තද්වචනං ශ්රුත්වා සර්වේෂාං මුනිපුංගවඃ ।
ක්රෝධසංරක්තනයන ස්සරෝෂමිදමබ්රවීත් ॥ 16 ॥
යේ දූෂයංත්යදුෂ්ටං මාං තප උග්රං සමාස්ථිතම් ।
භස්මීභූතා දුරාත්මානෝ භවිෂ්යංති න සංශයඃ ॥ 17 ॥
අද්ය තේ කාලපාශේන නීතා වෛවස්වතක්ෂයම් ।
සප්තජාතිශතාන්යේව මෘතපස්සංතු සර්වශඃ ॥ 18 ॥
ශ්වමාංසනියතාහාරා මුෂ්ටිකා නාම නිර්ඝෘණාඃ ।
විකෘතාශ්ච විරූපාශ්ච ලෝකානනුචරංත්විමාන් ॥ 19 ॥
මහෝදයස්තු දුර්බුද්ධිර්මාමදූෂ්යං හ්යදූෂයත් ।
දූෂිත ස්සර්වලෝකේෂු නිෂාදත්වං ගමිෂ්යති ॥ 20 ॥
ප්රාණාතිපාතනිරතෝ නිරනුක්රෝශතාං ගතඃ ।
දීර්ඝකාලං මම ක්රෝධාද්දුර්ගතිං වර්තයිෂ්යති ॥ 21 ॥
ඒතාවදුක්ත්වා වචනං විශ්වාමිත්රෝ මහාතපාඃ ।
විරරාම මහාතේජා ඍෂිමධ්යේ මහාමුනිඃ ॥ 22 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ බාලකාංඩේ ඒකෝනෂෂ්ටිතමස්සර්ගඃ ॥
