শ্রীমদ্বাল্মীকীয় রামাযণে বালকাংডম্ ।
অথ একোনষষ্টিতমস্সর্গঃ ।
উক্তবাক্য়ং তু রাজানং কৃপয়া কুশিকাত্মজঃ ।
অব্রবীন্মধুরং বাক্য়ং সাক্ষাচ্চংডালরূপিণম্ ॥ 1 ॥
ঐক্ষ্বাক স্বাগতং বত্স জানামি ত্বাং সুধার্মিকম্ ।
শরণং তে ভবিষ্য়ামি মা ভৈষীর্নৃপপুংগব ॥ 2 ॥
অহমামংত্রয়ে সর্বান্মহর্ষীন্পুণ্যকর্মণঃ ।
যজ্ঞসাহ্যকরান্ রাজন্ ততো যক্ষ্যসি নির্বৃতঃ ॥ 3 ॥
গুরুশাপকৃতং রূপং যদিদং ত্বয়ি বর্ততে ।
অনেন সহ রূপেণ সশরীরো গমিষ্যসি ॥ 4 ॥
হস্তপ্রাপ্তমহং মন্য়ে স্বর্গং তব নরাধিপ ।
যস্ত্বং কৌশিকমাগম্য় শরণ্য়ং শরণাগতঃ ॥ 5 ॥
এবমুক্ত্বা মহাতেজাঃ পুত্রান্ পরমধার্মিকান্ ।
ব্য়াদিদেশ মহাপ্রাজ্ঞান্ যজ্ঞসংভারকারণাত্ ॥ 6 ॥
সর্বান্ শিষ্য়ান্ সমাহূয় বাক্যমেতদুবাচ হ ।
সর্বানৃষিগণান্বত্সা আনযধ্বং মমাজ্ঞয়া ।
সশিষ্যসুহৃদশ্চৈব সর্ত্বিজ স্সবহুশ্রুতান্ ॥ 7 ॥
যদন্য়ো বচনং ব্রূয়ান্মদ্বাক্যবলচোদিতঃ ।
তত্সর্বমখিলেনোক্তং মমাখ্য়েযমনাদৃতম্ ॥ 8 ॥
তস্য় তদ্বচনং শ্রুত্বা দিশো জগ্মুস্তদাজ্ঞয়া ।
আজগ্মুরথ দেশেভ্য় স্সর্বেভ্য়ো ব্রহ্মবাদিনঃ ॥ 9 ॥
তে চ শিষ্য়াঃ সমাগম্য় মুনিং জ্বলিততেজসম্ ।
ঊচুশ্চবচনং সর্বে সর্বেষাং ব্রহ্মবাদিনাম্ ॥ 10 ॥
শ্রুত্বা তে বচনং সর্বে সমায়াংতি দ্বিজাতয়ঃ ।
সর্বদেশেষু চাগচ্ছন্ বর্জয়িত্বা মহোদযম্ ॥ 11 ॥
বাসিষ্ঠং তচ্ছতং সর্বং ক্রোধপর্য়াকুলাক্ষরম্ ।
যদাহ বচনং সর্বং শৃণু ত্বং মুনিপুংগব ॥ 12 ॥
ক্ষত্রিয়ো যাজকো যস্য় চংডালস্য় বিশেষতঃ ।
কথং সদসি ভোক্তারো হবিস্তস্য় সুরর্ষয়ঃ ॥ 13 ॥
ব্রাহ্মণা বা মহাত্মানো ভুক্ত্বা চংডালভোজনম্ ।
কথং স্বর্গং গমিষ্য়ংতি বিশ্বামিত্রেণ পালিতাঃ ॥ 14 ॥
এতদ্বচননৈষ্ঠুর্যমূচু স্সংরক্তলোচনাঃ ।
বাসিষ্ঠা মুনিশার্দূল সর্বে তে সমহোদয়াঃ ॥ 15 ॥
তেষাং তদ্বচনং শ্রুত্বা সর্বেষাং মুনিপুংগবঃ ।
ক্রোধসংরক্তনযন স্সরোষমিদমব্রবীত্ ॥ 16 ॥
যে দূষয়ংত্যদুষ্টং মাং তপ উগ্রং সমাস্থিতম্ ।
ভস্মীভূতা দুরাত্মানো ভবিষ্য়ংতি ন সংশয়ঃ ॥ 17 ॥
অদ্য় তে কালপাশেন নীতা বৈবস্বতক্ষযম্ ।
সপ্তজাতিশতান্য়েব মৃতপস্সংতু সর্বশঃ ॥ 18 ॥
শ্বমাংসনিযতাহারা মুষ্টিকা নাম নির্ঘৃণাঃ ।
বিকৃতাশ্চ বিরূপাশ্চ লোকাননুচরংত্বিমান্ ॥ 19 ॥
মহোদযস্তু দুর্বুদ্ধির্মামদূষ্য়ং হ্যদূষযত্ ।
দূষিত স্সর্বলোকেষু নিষাদত্বং গমিষ্যতি ॥ 20 ॥
প্রাণাতিপাতনিরতো নিরনুক্রোশতাং গতঃ ।
দীর্ঘকালং মম ক্রোধাদ্দুর্গতিং বর্তয়িষ্যতি ॥ 21 ॥
এতাবদুক্ত্বা বচনং বিশ্বামিত্রো মহাতপাঃ ।
বিররাম মহাতেজা ঋষিমধ্য়ে মহামুনিঃ ॥ 22 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে বালকাংডে একোনষষ্টিতমস্সর্গঃ ॥
