શ્રીમદ્વાલ્મીકીય રામાયણે બાલકાંડમ્ ।
અથ એકોનષષ્ટિતમસ્સર્ગઃ ।
ઉક્તવાક્યં તુ રાજાનં કૃપયા કુશિકાત્મજઃ ।
અબ્રવીન્મધુરં વાક્યં સાક્ષાચ્ચંડાલરૂપિણમ્ ॥ 1 ॥
ઐક્ષ્વાક સ્વાગતં વત્સ જાનામિ ત્વાં સુધાર્મિકમ્ ।
શરણં તે ભવિષ્યામિ મા ભૈષીર્નૃપપુંગવ ॥ 2 ॥
અહમામંત્રયે સર્વાન્મહર્ષીન્પુણ્યકર્મણઃ ।
યજ્ઞસાહ્યકરાન્ રાજન્ તતો યક્ષ્યસિ નિર્વૃતઃ ॥ 3 ॥
ગુરુશાપકૃતં રૂપં યદિદં ત્વયિ વર્તતે ।
અનેન સહ રૂપેણ સશરીરો ગમિષ્યસિ ॥ 4 ॥
હસ્તપ્રાપ્તમહં મન્યે સ્વર્ગં તવ નરાધિપ ।
યસ્ત્વં કૌશિકમાગમ્ય શરણ્યં શરણાગતઃ ॥ 5 ॥
એવમુક્ત્વા મહાતેજાઃ પુત્રાન્ પરમધાર્મિકાન્ ।
વ્યાદિદેશ મહાપ્રાજ્ઞાન્ યજ્ઞસંભારકારણાત્ ॥ 6 ॥
સર્વાન્ શિષ્યાન્ સમાહૂય વાક્યમેતદુવાચ હ ।
સર્વાનૃષિગણાન્વત્સા આનયધ્વં મમાજ્ઞયા ।
સશિષ્યસુહૃદશ્ચૈવ સર્ત્વિજ સ્સબહુશ્રુતાન્ ॥ 7 ॥
યદન્યો વચનં બ્રૂયાન્મદ્વાક્યબલચોદિતઃ ।
તત્સર્વમખિલેનોક્તં મમાખ્યેયમનાદૃતમ્ ॥ 8 ॥
તસ્ય તદ્વચનં શ્રુત્વા દિશો જગ્મુસ્તદાજ્ઞયા ।
આજગ્મુરથ દેશેભ્ય સ્સર્વેભ્યો બ્રહ્મવાદિનઃ ॥ 9 ॥
તે ચ શિષ્યાઃ સમાગમ્ય મુનિં જ્વલિતતેજસમ્ ।
ઊચુશ્ચવચનં સર્વે સર્વેષાં બ્રહ્મવાદિનામ્ ॥ 10 ॥
શ્રુત્વા તે વચનં સર્વે સમાયાંતિ દ્વિજાતયઃ ।
સર્વદેશેષુ ચાગચ્છન્ વર્જયિત્વા મહોદયમ્ ॥ 11 ॥
વાસિષ્ઠં તચ્છતં સર્વં ક્રોધપર્યાકુલાક્ષરમ્ ।
યદાહ વચનં સર્વં શૃણુ ત્વં મુનિપુંગવ ॥ 12 ॥
ક્ષત્રિયો યાજકો યસ્ય ચંડાલસ્ય વિશેષતઃ ।
કથં સદસિ ભોક્તારો હવિસ્તસ્ય સુરર્ષયઃ ॥ 13 ॥
બ્રાહ્મણા વા મહાત્માનો ભુક્ત્વા ચંડાલભોજનમ્ ।
કથં સ્વર્ગં ગમિષ્યંતિ વિશ્વામિત્રેણ પાલિતાઃ ॥ 14 ॥
એતદ્વચનનૈષ્ઠુર્યમૂચુ સ્સંરક્તલોચનાઃ ।
વાસિષ્ઠા મુનિશાર્દૂલ સર્વે તે સમહોદયાઃ ॥ 15 ॥
તેષાં તદ્વચનં શ્રુત્વા સર્વેષાં મુનિપુંગવઃ ।
ક્રોધસંરક્તનયન સ્સરોષમિદમબ્રવીત્ ॥ 16 ॥
યે દૂષયંત્યદુષ્ટં માં તપ ઉગ્રં સમાસ્થિતમ્ ।
ભસ્મીભૂતા દુરાત્માનો ભવિષ્યંતિ ન સંશયઃ ॥ 17 ॥
અદ્ય તે કાલપાશેન નીતા વૈવસ્વતક્ષયમ્ ।
સપ્તજાતિશતાન્યેવ મૃતપસ્સંતુ સર્વશઃ ॥ 18 ॥
શ્વમાંસનિયતાહારા મુષ્ટિકા નામ નિર્ઘૃણાઃ ।
વિકૃતાશ્ચ વિરૂપાશ્ચ લોકાનનુચરંત્વિમાન્ ॥ 19 ॥
મહોદયસ્તુ દુર્બુદ્ધિર્મામદૂષ્યં હ્યદૂષયત્ ।
દૂષિત સ્સર્વલોકેષુ નિષાદત્વં ગમિષ્યતિ ॥ 20 ॥
પ્રાણાતિપાતનિરતો નિરનુક્રોશતાં ગતઃ ।
દીર્ઘકાલં મમ ક્રોધાદ્દુર્ગતિં વર્તયિષ્યતિ ॥ 21 ॥
એતાવદુક્ત્વા વચનં વિશ્વામિત્રો મહાતપાઃ ।
વિરરામ મહાતેજા ઋષિમધ્યે મહામુનિઃ ॥ 22 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે બાલકાંડે એકોનષષ્ટિતમસ્સર્ગઃ ॥
