ശ്രീമദ്വാല്മീകീയ രാമായണേ ബാലകാംഡമ് ।
അഥ ഏകോനഷഷ്ടിതമസ്സര്ഗഃ ।
ഉക്തവാക്യം തു രാജാനം കൃപയാ കുശികാത്മജഃ ।
അബ്രവീന്മധുരം വാക്യം സാക്ഷാച്ചംഡാലരൂപിണമ് ॥ 1 ॥
ഐക്ഷ്വാക സ്വാഗതം വത്സ ജാനാമി ത്വാം സുധാര്മികമ് ।
ശരണം തേ ഭവിഷ്യാമി മാ ഭൈഷീര്നൃപപുംഗവ ॥ 2 ॥
അഹമാമംത്രയേ സർവാന്മഹര്ഷീന്പുണ്യകര്മണഃ ।
യജ്ഞസാഹ്യകരാന് രാജന് തതോ യക്ഷ്യസി നിർവൃതഃ ॥ 3 ॥
ഗുരുശാപകൃതം രൂപം യദിദം ത്വയി വര്തതേ ।
അനേന സഹ രൂപേണ സശരീരോ ഗമിഷ്യസി ॥ 4 ॥
ഹസ്തപ്രാപ്തമഹം മന്യേ സ്വര്ഗം തവ നരാധിപ ।
യസ്ത്വം കൌശികമാഗമ്യ ശരണ്യം ശരണാഗതഃ ॥ 5 ॥
ഏവമുക്ത്വാ മഹാതേജാഃ പുത്രാന് പരമധാര്മികാന് ।
വ്യാദിദേശ മഹാപ്രാജ്ഞാന് യജ്ഞസംഭാരകാരണാത് ॥ 6 ॥
സർവാന് ശിഷ്യാന് സമാഹൂയ വാക്യമേതദുവാച ഹ ।
സർവാനൃഷിഗണാന്വത്സാ ആനയധ്വം മമാജ്ഞയാ ।
സശിഷ്യസുഹൃദശ്ചൈവ സര്ത്വിജ സ്സബഹുശ്രുതാന് ॥ 7 ॥
യദന്യോ വചനം ബ്രൂയാന്മദ്വാക്യബലചോദിതഃ ।
തത്സർവമഖിലേനോക്തം മമാഖ്യേയമനാദൃതമ് ॥ 8 ॥
തസ്യ തദ്വചനം ശ്രുത്വാ ദിശോ ജഗ്മുസ്തദാജ്ഞയാ ।
ആജഗ്മുരഥ ദേശേഭ്യ സ്സർവേഭ്യോ ബ്രഹ്മവാദിനഃ ॥ 9 ॥
തേ ച ശിഷ്യാഃ സമാഗമ്യ മുനിം ജ്വലിതതേജസമ് ।
ഊചുശ്ചവചനം സർവേ സർവേഷാം ബ്രഹ്മവാദിനാമ് ॥ 10 ॥
ശ്രുത്വാ തേ വചനം സർവേ സമായാംതി ദ്വിജാതയഃ ।
സർവദേശേഷു ചാഗച്ഛന് വര്ജയിത്വാ മഹോദയമ് ॥ 11 ॥
വാസിഷ്ഠം തച്ഛതം സർവം ക്രോധപര്യാകുലാക്ഷരമ് ।
യദാഹ വചനം സർവം ശൃണു ത്വം മുനിപുംഗവ ॥ 12 ॥
ക്ഷത്രിയോ യാജകോ യസ്യ ചംഡാലസ്യ വിശേഷതഃ ।
കഥം സദസി ഭോക്താരോ ഹവിസ്തസ്യ സുരര്ഷയഃ ॥ 13 ॥
ബ്രാഹ്മണാ വാ മഹാത്മാനോ ഭുക്ത്വാ ചംഡാലഭോജനമ് ।
കഥം സ്വര്ഗം ഗമിഷ്യംതി വിശ്വാമിത്രേണ പാലിതാഃ ॥ 14 ॥
ഏതദ്വചനനൈഷ്ഠുര്യമൂചു സ്സംരക്തലോചനാഃ ।
വാസിഷ്ഠാ മുനിശാര്ദൂല സർവേ തേ സമഹോദയാഃ ॥ 15 ॥
തേഷാം തദ്വചനം ശ്രുത്വാ സർവേഷാം മുനിപുംഗവഃ ।
ക്രോധസംരക്തനയന സ്സരോഷമിദമബ്രവീത് ॥ 16 ॥
യേ ദൂഷയംത്യദുഷ്ടം മാം തപ ഉഗ്രം സമാസ്ഥിതമ് ।
ഭസ്മീഭൂതാ ദുരാത്മാനോ ഭവിഷ്യംതി ന സംശയഃ ॥ 17 ॥
അദ്യ തേ കാലപാശേന നീതാ വൈവസ്വതക്ഷയമ് ।
സപ്തജാതിശതാന്യേവ മൃതപസ്സംതു സർവശഃ ॥ 18 ॥
ശ്വമാംസനിയതാഹാരാ മുഷ്ടികാ നാമ നിര്ഘൃണാഃ ।
വികൃതാശ്ച വിരൂപാശ്ച ലോകാനനുചരംത്വിമാന് ॥ 19 ॥
മഹോദയസ്തു ദുര്ബുദ്ധിര്മാമദൂഷ്യം ഹ്യദൂഷയത് ।
ദൂഷിത സ്സർവലോകേഷു നിഷാദത്വം ഗമിഷ്യതി ॥ 20 ॥
പ്രാണാതിപാതനിരതോ നിരനുക്രോശതാം ഗതഃ ।
ദീര്ഘകാലം മമ ക്രോധാദ്ദുര്ഗതിം വര്തയിഷ്യതി ॥ 21 ॥
ഏതാവദുക്ത്വാ വചനം വിശ്വാമിത്രോ മഹാതപാഃ ।
വിരരാമ മഹാതേജാ ഋഷിമധ്യേ മഹാമുനിഃ ॥ 22 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ ബാലകാംഡേ ഏകോനഷഷ്ടിതമസ്സര്ഗഃ ॥
