śrīmadvālmīkīya rāmāyaṇē bālakāṇḍam ।
atha ēkōnaṣaṣṭitamassargaḥ ।
uktavākyaṃ tu rājānaṃ kṛpayā kuśikātmajaḥ ।
abravīnmadhuraṃ vākyaṃ sākṣāchchaṇḍālarūpiṇam ॥ 1 ॥
aikṣvāka svāgataṃ vatsa jānāmi tvāṃ sudhārmikam ।
śaraṇaṃ tē bhaviṣyāmi mā bhaiṣīrnṛpapuṅgava ॥ 2 ॥
ahamāmantrayē sarvānmaharṣīnpuṇyakarmaṇaḥ ।
yajñasāhyakarān rājan tatō yakṣyasi nirvṛtaḥ ॥ 3 ॥
guruśāpakṛtaṃ rūpaṃ yadidaṃ tvayi vartatē ।
anēna saha rūpēṇa saśarīrō gamiṣyasi ॥ 4 ॥
hastaprāptamahaṃ manyē svargaṃ tava narādhipa ।
yastvaṃ kauśikamāgamya śaraṇyaṃ śaraṇāgataḥ ॥ 5 ॥
ēvamuktvā mahātējāḥ putrān paramadhārmikān ।
vyādidēśa mahāprājñān yajñasambhārakāraṇāt ॥ 6 ॥
sarvān śiṣyān samāhūya vākyamētaduvācha ha ।
sarvānṛṣigaṇānvatsā ānayadhvaṃ mamājñayā ।
saśiṣyasuhṛdaśchaiva sartvija ssabahuśrutān ॥ 7 ॥
yadanyō vachanaṃ brūyānmadvākyabalachōditaḥ ।
tatsarvamakhilēnōktaṃ mamākhyēyamanādṛtam ॥ 8 ॥
tasya tadvachanaṃ śrutvā diśō jagmustadājñayā ।
ājagmuratha dēśēbhya ssarvēbhyō brahmavādinaḥ ॥ 9 ॥
tē cha śiṣyāḥ samāgamya muniṃ jvalitatējasam ।
ūchuśchavachanaṃ sarvē sarvēṣāṃ brahmavādinām ॥ 10 ॥
śrutvā tē vachanaṃ sarvē samāyānti dvijātayaḥ ।
sarvadēśēṣu chāgachChan varjayitvā mahōdayam ॥ 11 ॥
vāsiṣṭhaṃ tachChataṃ sarvaṃ krōdhaparyākulākṣaram ।
yadāha vachanaṃ sarvaṃ śṛṇu tvaṃ munipuṅgava ॥ 12 ॥
kṣatriyō yājakō yasya chaṇḍālasya viśēṣataḥ ।
kathaṃ sadasi bhōktārō havistasya surarṣayaḥ ॥ 13 ॥
brāhmaṇā vā mahātmānō bhuktvā chaṇḍālabhōjanam ।
kathaṃ svargaṃ gamiṣyanti viśvāmitrēṇa pālitāḥ ॥ 14 ॥
ētadvachananaiṣṭhuryamūchu ssaṃraktalōchanāḥ ।
vāsiṣṭhā muniśārdūla sarvē tē samahōdayāḥ ॥ 15 ॥
tēṣāṃ tadvachanaṃ śrutvā sarvēṣāṃ munipuṅgavaḥ ।
krōdhasaṃraktanayana ssarōṣamidamabravīt ॥ 16 ॥
yē dūṣayantyaduṣṭaṃ māṃ tapa ugraṃ samāsthitam ।
bhasmībhūtā durātmānō bhaviṣyanti na saṃśayaḥ ॥ 17 ॥
adya tē kālapāśēna nītā vaivasvatakṣayam ।
saptajātiśatānyēva mṛtapassantu sarvaśaḥ ॥ 18 ॥
śvamāṃsaniyatāhārā muṣṭikā nāma nirghṛṇāḥ ।
vikṛtāścha virūpāścha lōkānanucharantvimān ॥ 19 ॥
mahōdayastu durbuddhirmāmadūṣyaṃ hyadūṣayat ।
dūṣita ssarvalōkēṣu niṣādatvaṃ gamiṣyati ॥ 20 ॥
prāṇātipātaniratō niranukrōśatāṃ gataḥ ।
dīrghakālaṃ mama krōdhāddurgatiṃ vartayiṣyati ॥ 21 ॥
ētāvaduktvā vachanaṃ viśvāmitrō mahātapāḥ ।
virarāma mahātējā ṛṣimadhyē mahāmuniḥ ॥ 22 ॥
ityārṣē śrīmadrāmāyaṇē vālmīkīya ādikāvyē bālakāṇḍē ēkōnaṣaṣṭitamassargaḥ ॥
