ଶ୍ରୀମଦ୍ଵାଲ୍ମୀକୀୟ ରାମାୟଣେ ବାଲକାଂଡମ୍ ।
ଅଥ ଏକୋନଷଷ୍ଟିତମସ୍ସର୍ଗଃ ।
ଉକ୍ତଵାକ୍ୟଂ ତୁ ରାଜାନଂ କୃପୟା କୁଶିକାତ୍ମଜଃ ।
ଅବ୍ରଵୀନ୍ମଧୁରଂ ଵାକ୍ୟଂ ସାକ୍ଷାଚ୍ଚଂଡାଲରୂପିଣମ୍ ॥ 1 ॥
ଐକ୍ଷ୍ଵାକ ସ୍ଵାଗତଂ ଵତ୍ସ ଜାନାମି ତ୍ଵାଂ ସୁଧାର୍ମିକମ୍ ।
ଶରଣଂ ତେ ଭଵିଷ୍ୟାମି ମା ଭୈଷୀର୍ନୃପପୁଂଗଵ ॥ 2 ॥
ଅହମାମଂତ୍ରୟେ ସର୍ଵାନ୍ମହର୍ଷୀନ୍ପୁଣ୍ୟକର୍ମଣଃ ।
ୟଜ୍ଞସାହ୍ୟକରାନ୍ ରାଜନ୍ ତତୋ ୟକ୍ଷ୍ୟସି ନିର୍ଵୃତଃ ॥ 3 ॥
ଗୁରୁଶାପକୃତଂ ରୂପଂ ୟଦିଦଂ ତ୍ଵୟି ଵର୍ତତେ ।
ଅନେନ ସହ ରୂପେଣ ସଶରୀରୋ ଗମିଷ୍ୟସି ॥ 4 ॥
ହସ୍ତପ୍ରାପ୍ତମହଂ ମନ୍ୟେ ସ୍ଵର୍ଗଂ ତଵ ନରାଧିପ ।
ୟସ୍ତ୍ଵଂ କୌଶିକମାଗମ୍ୟ ଶରଣ୍ୟଂ ଶରଣାଗତଃ ॥ 5 ॥
ଏଵମୁକ୍ତ୍ଵା ମହାତେଜାଃ ପୁତ୍ରାନ୍ ପରମଧାର୍ମିକାନ୍ ।
ଵ୍ୟାଦିଦେଶ ମହାପ୍ରାଜ୍ଞାନ୍ ୟଜ୍ଞସଂଭାରକାରଣାତ୍ ॥ 6 ॥
ସର୍ଵାନ୍ ଶିଷ୍ୟାନ୍ ସମାହୂୟ ଵାକ୍ୟମେତଦୁଵାଚ ହ ।
ସର୍ଵାନୃଷିଗଣାନ୍ଵତ୍ସା ଆନୟଧ୍ଵଂ ମମାଜ୍ଞୟା ।
ସଶିଷ୍ୟସୁହୃଦଶ୍ଚୈଵ ସର୍ତ୍ଵିଜ ସ୍ସବହୁଶ୍ରୁତାନ୍ ॥ 7 ॥
ୟଦନ୍ୟୋ ଵଚନଂ ବ୍ରୂୟାନ୍ମଦ୍ଵାକ୍ୟବଲଚୋଦିତଃ ।
ତତ୍ସର୍ଵମଖିଲେନୋକ୍ତଂ ମମାଖ୍ୟେୟମନାଦୃତମ୍ ॥ 8 ॥
ତସ୍ୟ ତଦ୍ଵଚନଂ ଶ୍ରୁତ୍ଵା ଦିଶୋ ଜଗ୍ମୁସ୍ତଦାଜ୍ଞୟା ।
ଆଜଗ୍ମୁରଥ ଦେଶେଭ୍ୟ ସ୍ସର୍ଵେଭ୍ୟୋ ବ୍ରହ୍ମଵାଦିନଃ ॥ 9 ॥
ତେ ଚ ଶିଷ୍ୟାଃ ସମାଗମ୍ୟ ମୁନିଂ ଜ୍ଵଲିତତେଜସମ୍ ।
ଊଚୁଶ୍ଚଵଚନଂ ସର୍ଵେ ସର୍ଵେଷାଂ ବ୍ରହ୍ମଵାଦିନାମ୍ ॥ 10 ॥
ଶ୍ରୁତ୍ଵା ତେ ଵଚନଂ ସର୍ଵେ ସମାୟାଂତି ଦ୍ଵିଜାତୟଃ ।
ସର୍ଵଦେଶେଷୁ ଚାଗଚ୍ଛନ୍ ଵର୍ଜୟିତ୍ଵା ମହୋଦୟମ୍ ॥ 11 ॥
ଵାସିଷ୍ଠଂ ତଚ୍ଛତଂ ସର୍ଵଂ କ୍ରୋଧପର୍ୟାକୁଲାକ୍ଷରମ୍ ।
ୟଦାହ ଵଚନଂ ସର୍ଵଂ ଶୃଣୁ ତ୍ଵଂ ମୁନିପୁଂଗଵ ॥ 12 ॥
କ୍ଷତ୍ରିୟୋ ୟାଜକୋ ୟସ୍ୟ ଚଂଡାଲସ୍ୟ ଵିଶେଷତଃ ।
କଥଂ ସଦସି ଭୋକ୍ତାରୋ ହଵିସ୍ତସ୍ୟ ସୁରର୍ଷୟଃ ॥ 13 ॥
ବ୍ରାହ୍ମଣା ଵା ମହାତ୍ମାନୋ ଭୁକ୍ତ୍ଵା ଚଂଡାଲଭୋଜନମ୍ ।
କଥଂ ସ୍ଵର୍ଗଂ ଗମିଷ୍ୟଂତି ଵିଶ୍ଵାମିତ୍ରେଣ ପାଲିତାଃ ॥ 14 ॥
ଏତଦ୍ଵଚନନୈଷ୍ଠୁର୍ୟମୂଚୁ ସ୍ସଂରକ୍ତଲୋଚନାଃ ।
ଵାସିଷ୍ଠା ମୁନିଶାର୍ଦୂଲ ସର୍ଵେ ତେ ସମହୋଦୟାଃ ॥ 15 ॥
ତେଷାଂ ତଦ୍ଵଚନଂ ଶ୍ରୁତ୍ଵା ସର୍ଵେଷାଂ ମୁନିପୁଂଗଵଃ ।
କ୍ରୋଧସଂରକ୍ତନୟନ ସ୍ସରୋଷମିଦମବ୍ରଵୀତ୍ ॥ 16 ॥
ୟେ ଦୂଷୟଂତ୍ୟଦୁଷ୍ଟଂ ମାଂ ତପ ଉଗ୍ରଂ ସମାସ୍ଥିତମ୍ ।
ଭସ୍ମୀଭୂତା ଦୁରାତ୍ମାନୋ ଭଵିଷ୍ୟଂତି ନ ସଂଶୟଃ ॥ 17 ॥
ଅଦ୍ୟ ତେ କାଲପାଶେନ ନୀତା ଵୈଵସ୍ଵତକ୍ଷୟମ୍ ।
ସପ୍ତଜାତିଶତାନ୍ୟେଵ ମୃତପସ୍ସଂତୁ ସର୍ଵଶଃ ॥ 18 ॥
ଶ୍ଵମାଂସନିୟତାହାରା ମୁଷ୍ଟିକା ନାମ ନିର୍ଘୃଣାଃ ।
ଵିକୃତାଶ୍ଚ ଵିରୂପାଶ୍ଚ ଲୋକାନନୁଚରଂତ୍ଵିମାନ୍ ॥ 19 ॥
ମହୋଦୟସ୍ତୁ ଦୁର୍ବୁଦ୍ଧିର୍ମାମଦୂଷ୍ୟଂ ହ୍ୟଦୂଷୟତ୍ ।
ଦୂଷିତ ସ୍ସର୍ଵଲୋକେଷୁ ନିଷାଦତ୍ଵଂ ଗମିଷ୍ୟତି ॥ 20 ॥
ପ୍ରାଣାତିପାତନିରତୋ ନିରନୁକ୍ରୋଶତାଂ ଗତଃ ।
ଦୀର୍ଘକାଲଂ ମମ କ୍ରୋଧାଦ୍ଦୁର୍ଗତିଂ ଵର୍ତୟିଷ୍ୟତି ॥ 21 ॥
ଏତାଵଦୁକ୍ତ୍ଵା ଵଚନଂ ଵିଶ୍ଵାମିତ୍ରୋ ମହାତପାଃ ।
ଵିରରାମ ମହାତେଜା ଋଷିମଧ୍ୟେ ମହାମୁନିଃ ॥ 22 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ବାଲକାଂଡେ ଏକୋନଷଷ୍ଟିତମସ୍ସର୍ଗଃ ॥
