ଶ୍ରୀମଦ୍ଵାଲ୍ମୀକୀୟ ରାମାୟଣେ ବାଲକାଂଡମ୍ ।
ଅଥ ପଂଚଷଷ୍ଟିତମସ୍ସର୍ଗଃ ।
ଅଥ ହୈମଵତୀଂ ରାମ ଦିଶଂ ତ୍ୟକ୍ତ୍ଵା ମହାମୁନିଃ ।
ପୂର୍ଵାଂ ଦିଶମନୁପ୍ରାପ୍ୟ ତପସ୍ତେପେ ସୁଦାରୁଣମ୍ ॥ 1 ॥
ମୌନଂ ଵର୍ଷସହସ୍ରସ୍ୟ କୃତ୍ଵା ଵ୍ରତମନୁତ୍ତମମ୍ ।
ଚକାରାପ୍ରତିମଂ ରାମ ତପଃ ପରମଦୁଷ୍କରମ୍ ॥ 2 ॥
ପୂର୍ଣେ ଵର୍ଷସହସ୍ରେ ତୁ କାଷ୍ଠଭୂତଂ ମହାମୁନିମ୍ ।
ଵିଘ୍ନୈର୍ବହୁଭିରାଧୂତଂ କ୍ରୋଧୋ ନାଂତର ଆଵିଶତ୍ ॥ 3 ॥
ସ କୃତ୍ଵା ନିଶ୍ଚୟଂ ରାମ ତପ ଆତିଷ୍ଟଦଵ୍ୟୟମ୍ ।
ତସ୍ୟ ଵର୍ଷସହସ୍ରସ୍ୟ ଵ୍ରତେ ପୂର୍ଣେ ମହାଵ୍ରତଃ ॥ 4 ॥
ଭୋକ୍ତୁମାରବ୍ଧଵାନନ୍ନଂ ତସ୍ମିନ୍ କାଲେ ରଘୂତ୍ତମ ।
ଇଂଦ୍ରୋ ଦ୍ଵିଜାତିର୍ଭୂତ୍ଵା ତଂ ସିଦ୍ଧମନ୍ନମୟାଚତ ॥ 5 ॥
ତସ୍ମୈ ଦତ୍ଵା ତଦା ସିଦ୍ଧଂ ସର୍ଵଂ ଵିପ୍ରାୟ ନିଶ୍ଚିତଃ ।
ନିଶ୍ଶେଷିତେଽନ୍ନେ ଭଗଵାନଭୁକ୍ତୈଵ ମହାତପାଃ ॥ 6 ॥
ନ କିଂଚିଦଵଦଦ୍ଵିପ୍ରଂ ମୌନଵ୍ରତମୁପସ୍ଥିତଃ ।
ଅଥ ଵର୍ଷସହସ୍ରଂ ଵୈ ନୋଚ୍ଛ୍ଵସନ୍ମୁନିପୁଂଗଵଃ ॥ 7 ॥
ତସ୍ୟାନୁଚ୍ଛ୍ଵସମାନସ୍ୟ ମୂର୍ଧ୍ନି ଧୂମୋ ଵ୍ୟଜାୟତ ।
ତ୍ରୈଲୋକ୍ୟଂ ୟେନ ସଂଭ୍ରାଂତମାଦୀପିତମିଵାଭଵତ୍ ॥ 8 ॥
ତତୋ ଦେଵାସ୍ସଗଂଧର୍ଵାଃ ପନ୍ନଗୋରଗରାକ୍ଷସାଃ ।
ମୋହିତାସ୍ତେଜସା ତସ୍ୟ ତପସା ମଂଦରଶ୍ମୟଃ ॥ 9 ॥
କଶ୍ମଲୋପହତା ସ୍ସର୍ଵେ ପିତାମହମଥାବ୍ରୁଵନ୍ ।
ବହୁଭିଃ କାରଣୈର୍ଦେଵ ଵିଶ୍ଵାମିତ୍ରୋ ମହାମୁନିଃ ॥ 10 ॥
ଲୋଭିତଃ କ୍ରୋଧିତଶ୍ଚୈଵ ତପସା ଚାଭିଵର୍ଧତେ ।
ନ ହ୍ୟସ୍ୟ ଵୃଜିନଂ କିଂଚିଦ୍ଦୃଶ୍ୟତେ ସୂକ୍ଷ୍ମମପ୍ୟଥ ॥ 11 ॥
ନ ଦୀୟତେ ୟଦି ତ୍ଵସ୍ୟ ମନସା ୟଦଭୀପ୍ସିତମ୍ ।
ଵିନାଶୟତି ତ୍ରୈଲୋକ୍ୟଂ ତପସା ସଚରାଚରମ୍ ॥ 12 ॥
ଵ୍ୟାକୁଲାଶ୍ଚ ଦିଶସ୍ସର୍ଵା ନ ଚ କିଂଚିତ୍ପ୍ରକାଶତେ ।
ସାଗରାଃ କ୍ଷୁଭିତାସ୍ସର୍ଵେ ଵିଶୀର୍ୟଂତେ ଚ ପର୍ଵତାଃ ॥ 13 ॥
ପ୍ରକଂପତେ ଚ ପୃଥିଵୀ ଵାୟୁର୍ଵାତି ଭୃଶାକୁଲଃ ।
ବୃହ୍ମନ୍ନ ପ୍ରତିଜାନୀମୋନାସ୍ତିକୋ ଜାୟତେ ଜନଃ ॥ 14 ॥
ସମ୍ମୂଢମିଵ ତ୍ରୈଲୋକ୍ୟଂ ସଂପ୍ରକ୍ଷୁଭିତମାନସମ୍ ।
ଭାସ୍କରୋ ନିଷ୍ପ୍ରଭଶ୍ଚୈଵ ମହର୍ଷେସ୍ତସ୍ୟ ତେଜସା ॥ 15 ॥
ବୁଦ୍ଧିଂ ନ କୁରୁତେ ୟାଵନ୍ନାଶେ ଦେଵ ମହାମୁନିଃ ।
ତାଵତ୍ପ୍ରସାଦ୍ୟୋ ଭଗଵା ନଗ୍ନିରୂପୋମହାଦ୍ୟୁତିଃ ॥ 16 ॥
କାଲାଗ୍ନିନା ୟଥାପୂର୍ଵଂ ତ୍ରୈଲୋକ୍ୟଂ ଦହ୍ୟତେଽଖିଲମ୍ ।
ଦେଵରାଜ୍ୟଂ ଚିକୀର୍ଷେତ ଦୀୟତାମସ୍ୟ ୟନ୍ମତମ୍ ॥ 17 ॥
ତତସ୍ସୁରଗଣାସ୍ସର୍ଵେ ପିତାମହପୁରୋଗମାଃ ।
ଵିଶ୍ଵାମିତ୍ରଂ ମହାତ୍ମାନଂ ମଧୁରଂ ଵାକ୍ୟମବ୍ରୁଵନ୍ ॥ 18 ॥
ବ୍ରହ୍ମର୍ଷେ ସ୍ଵାଗତଂ ତେଽସ୍ତୁ ତପସା ସ୍ମ ସୁତୋଷିତାଃ ।
ବ୍ରାହ୍ମଣ୍ୟଂ ତପସୋଗ୍ରେଣ ପ୍ରାପ୍ତଵାନସି କୌଶିକ ॥ 19 ॥
ଦୀର୍ଘମାୟୁଶ୍ଚ ତେ ବ୍ରହ୍ମନ୍ ଦଦାମି ସମରୁଦ୍ଗଣଃ ।
ସ୍ଵସ୍ତି ପ୍ରାପ୍ନୁହି ଭଦ୍ରଂ ତେ ଗଚ୍ଛ ସୌମ୍ୟ ୟଥାସୁଖମ୍ ॥ 20 ॥
ପିତାମହଵଚଶ୍ଶୃତ୍ଵା ସର୍ଵେଷାଂ ଚ ଦିଵୌକସାମ୍ ।
କୃତ୍ଵା ପ୍ରଣାମଂ ମୁଦିତୋ ଵ୍ୟାଜହାର ମହାମୁନିଃ ॥ 21 ॥
ବ୍ରାହ୍ମଣ୍ୟଂ ୟଦି ମେ ପ୍ରାପ୍ତଂ ଦୀର୍ଘମାୟୁସ୍ତଥୈଵ ଚ ।
ଓଂକାରଶ୍ଚ ଵଷଟ୍କାରୋ ଵେଦାଶ୍ଚ ଵରୟଂତୁ ମାମ୍ ॥ 22 ॥
କ୍ଷତ୍ରଵେଦଵିଦାଂ ଶ୍ରେଷ୍ଠୋ ବ୍ରହ୍ମଵେଦଵିଦାମପି ।
ବ୍ରହ୍ମପୁତ୍ରୋ ଵସିଷ୍ଠୋ ମାମେଵଂ ଵଦତୁ ଦେଵତାଃ ॥ 23 ॥
ୟଦ୍ୟୟଂ ପରମଃ କାମଃ କୃତୋ ୟାଂତୁ ସୁରର୍ଷଭାଃ ।
ତତଃ ପ୍ରସାଦିତୋ ଦେଵୈର୍ଵସିଷ୍ଠୋ ଜପତାଂ ଵରଃ ॥ 24 ॥
ସଖ୍ୟଂ ଚକାର ବ୍ରହ୍ମର୍ଷିରେଵମସ୍ତ୍ଵିତି ଚାବ୍ରଵୀତ୍ ।
ବ୍ରହ୍ମର୍ଷିସ୍ତ୍ଵଂ ନ ସଂଦେହସ୍ସର୍ଵଂ ସଂପତ୍ସ୍ୟତେ ତଵ ॥ 25 ॥
ଇତ୍ୟୁକ୍ତ୍ଵା ଦେଵତାଶ୍ଚାପି ସର୍ଵା ଜଗ୍ମୁର୍ୟଥାଗତମ୍ ।
ଵିଶ୍ଵାମିତ୍ରୋଽପି ଧର୍ମାତ୍ମା ଲବ୍ଧ୍ଵା ବ୍ରାହ୍ମଣ୍ୟମୁତ୍ତମମ୍ ॥ 26 ॥
ପୂଜୟାମାସ ବ୍ରହ୍ମର୍ଷିଂ ଵସିଷ୍ଠଂ ଜପତାଂ ଵରମ୍ ।
କୃତକାମୋ ମହୀଂ ସର୍ଵାଂ ଚଚାର ତପସି ସ୍ଥିତଃ ॥ 27 ॥
ଏଵଂ ତ୍ଵନେନ ବ୍ରାହ୍ମଣ୍ୟଂ ପ୍ରାପ୍ତଂ ରାମ ମହାତ୍ମନା ।
ଏଷ ରାମ ମୁନିଶ୍ରେଷ୍ଠ ଏଷ ଵିଗ୍ରହଵାଂସ୍ତପଃ ॥ 28 ॥
ଏଷ ଧର୍ମପରୋ ନିତ୍ୟଂ ଵୀର୍ୟସ୍ୟୈଷ ପରାୟଣମ୍ ।
ଏଵମୁକ୍ତ୍ଵା ମହାତେଜା ଵିରରାମ ଦ୍ଵିଜୋତ୍ତମଃ ॥ 29 ॥
ଶତାନଂଦଵଚଃ ଶ୍ରୁତ୍ଵା ରାମଲକ୍ଷ୍ମଣସନ୍ନିଧୌ ।
ଜନକଃ ପ୍ରାଂଜଲିର୍ଵାକ୍ୟମୁଵାଚ କୁଶିକାତ୍ମଜମ୍ ॥ 30 ॥
ଧନ୍ୟୋଽସ୍ମ୍ୟନୁଗୃହୀତୋଽସ୍ମି ୟସ୍ୟ ମେ ମୁନିପୁଂଗଵ ।
ୟଜ୍ଞଂ କାକୁତ୍ସ୍ଥସହିତଃ ପ୍ରାପ୍ତଵାନସି ଧାର୍ମିକ ॥ 31 ॥
ପାଵିତୋଽହଂ ତ୍ଵୟା ବ୍ରହ୍ମନ୍ ଦର୍ଶନେନ ମହାମୁନେ ।
ଗୁଣା ବହୁଵିଧାଃ ପ୍ରାପ୍ତାସ୍ତଵ ସଂଦର୍ଶନାନ୍ମୟା ॥ 32 ॥
ଵିସ୍ତରେଣ ଚ ତେ ବ୍ରହ୍ମନ୍ କୀର୍ତ୍ୟମାନଂ ମହତ୍ତପଃ ।
ଶ୍ରୁତଂ ମୟା ମହାତେଜୋ ରାମେଣ ଚ ମହାତ୍ମନା ॥ 33 ॥
ସଦସ୍ୟୈଃ ପ୍ରାପ୍ୟ ଚ ସଦଃ ଶ୍ରୁତାସ୍ତେ ବହଵୋ ଗୁଣାଃ ।
ଅପ୍ରମେୟଂ ତପସ୍ତୁଭ୍ୟମପ୍ରମେୟଂ ଚ ତେ ବଲମ୍ ॥ 34 ॥
ଅପ୍ରମେୟା ଗୁଣାଶ୍ଚୈଵ ନିତ୍ୟଂ ତେ କୁଶିକାତ୍ମଜ ।
ତୃପ୍ତିରାଶ୍ଚର୍ୟଭୂତାନାଂ କଥାନାଂ ନାସ୍ତି ମେ ଵିଭୋ ॥ 35 ॥
କର୍ମକାଲୋ ମୁନିଶ୍ରେଷ୍ଠ ଲଂବତେ ରଵିମଂଡଲମ୍ ।
ଶ୍ଵଃ ପ୍ରଭାତେ ମହାତେଜୋ ଦ୍ରଷ୍ଟୁମର୍ହସି ମାଂ ପୁନଃ ॥ 36 ॥
ସ୍ଵାଗତଂ ତପତାଂ ଶ୍ରେଷ୍ଠ ମାମନୁଜ୍ଞାତୁମର୍ହସି ।
ଏଵମୁକ୍ତୋ ମୁନିଵରଃ ପ୍ରଶସ୍ୟ ପୁରୁଷର୍ଷଭମ୍ ॥ 37 ॥
ଵିସସର୍ଜାଶୁ ଜନକଂ ପ୍ରୀତଂ ପ୍ରୀତମନାସ୍ତଦା ।
ଏଵମୁକ୍ତ୍ଵା ମୁନିଶ୍ରେଷ୍ଠଂ ଵୈଦେହୋ ମିଥିଲାଧିପଃ ॥ 38 ॥
ପ୍ରଦକ୍ଷିଣଂ ଚକାରାଶୁ ସୋପାଧ୍ୟାୟସ୍ସବାଂଧଵଃ ।
ଵିଶ୍ଵାମିତ୍ରୋଽପି ଧର୍ମାତ୍ମା ସହରାମସ୍ସଲକ୍ଷ୍ମଣଃ ॥ 39 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ବାଲକାଂଡେ ପଂଚଷଷ୍ଟିତମସ୍ସର୍ଗଃ ॥
