ശ്രീമദ്വാല്മീകീയ രാമായണേ ബാലകാംഡമ് ।
അഥ പംചഷഷ്ടിതമസ്സര്ഗഃ ।
അഥ ഹൈമവതീം രാമ ദിശം ത്യക്ത്വാ മഹാമുനിഃ ।
പൂർവാം ദിശമനുപ്രാപ്യ തപസ്തേപേ സുദാരുണമ് ॥ 1 ॥
മൌനം വര്ഷസഹസ്രസ്യ കൃത്വാ വ്രതമനുത്തമമ് ।
ചകാരാപ്രതിമം രാമ തപഃ പരമദുഷ്കരമ് ॥ 2 ॥
പൂര്ണേ വര്ഷസഹസ്രേ തു കാഷ്ഠഭൂതം മഹാമുനിമ് ।
വിഘ്നൈര്ബഹുഭിരാധൂതം ക്രോധോ നാംതര ആവിശത് ॥ 3 ॥
സ കൃത്വാ നിശ്ചയം രാമ തപ ആതിഷ്ടദവ്യയമ് ।
തസ്യ വര്ഷസഹസ്രസ്യ വ്രതേ പൂര്ണേ മഹാവ്രതഃ ॥ 4 ॥
ഭോക്തുമാരബ്ധവാനന്നം തസ്മിന് കാലേ രഘൂത്തമ ।
ഇംദ്രോ ദ്വിജാതിര്ഭൂത്വാ തം സിദ്ധമന്നമയാചത ॥ 5 ॥
തസ്മൈ ദത്വാ തദാ സിദ്ധം സർവം വിപ്രായ നിശ്ചിതഃ ।
നിശ്ശേഷിതേഽന്നേ ഭഗവാനഭുക്തൈവ മഹാതപാഃ ॥ 6 ॥
ന കിംചിദവദദ്വിപ്രം മൌനവ്രതമുപസ്ഥിതഃ ।
അഥ വര്ഷസഹസ്രം വൈ നോച്ഛ്വസന്മുനിപുംഗവഃ ॥ 7 ॥
തസ്യാനുച്ഛ്വസമാനസ്യ മൂര്ധ്നി ധൂമോ വ്യജായത ।
ത്രൈലോക്യം യേന സംഭ്രാംതമാദീപിതമിവാഭവത് ॥ 8 ॥
തതോ ദേവാസ്സഗംധർവാഃ പന്നഗോരഗരാക്ഷസാഃ ।
മോഹിതാസ്തേജസാ തസ്യ തപസാ മംദരശ്മയഃ ॥ 9 ॥
കശ്മലോപഹതാ സ്സർവേ പിതാമഹമഥാബ്രുവന് ।
ബഹുഭിഃ കാരണൈര്ദേവ വിശ്വാമിത്രോ മഹാമുനിഃ ॥ 10 ॥
ലോഭിതഃ ക്രോധിതശ്ചൈവ തപസാ ചാഭിവര്ധതേ ।
ന ഹ്യസ്യ വൃജിനം കിംചിദ്ദൃശ്യതേ സൂക്ഷ്മമപ്യഥ ॥ 11 ॥
ന ദീയതേ യദി ത്വസ്യ മനസാ യദഭീപ്സിതമ് ।
വിനാശയതി ത്രൈലോക്യം തപസാ സചരാചരമ് ॥ 12 ॥
വ്യാകുലാശ്ച ദിശസ്സർവാ ന ച കിംചിത്പ്രകാശതേ ।
സാഗരാഃ ക്ഷുഭിതാസ്സർവേ വിശീര്യംതേ ച പർവതാഃ ॥ 13 ॥
പ്രകംപതേ ച പൃഥിവീ വായുർവാതി ഭൃശാകുലഃ ।
ബൃഹ്മന്ന പ്രതിജാനീമോനാസ്തികോ ജായതേ ജനഃ ॥ 14 ॥
സമ്മൂഢമിവ ത്രൈലോക്യം സംപ്രക്ഷുഭിതമാനസമ് ।
ഭാസ്കരോ നിഷ്പ്രഭശ്ചൈവ മഹര്ഷേസ്തസ്യ തേജസാ ॥ 15 ॥
ബുദ്ധിം ന കുരുതേ യാവന്നാശേ ദേവ മഹാമുനിഃ ।
താവത്പ്രസാദ്യോ ഭഗവാ നഗ്നിരൂപോമഹാദ്യുതിഃ ॥ 16 ॥
കാലാഗ്നിനാ യഥാപൂർവം ത്രൈലോക്യം ദഹ്യതേഽഖിലമ് ।
ദേവരാജ്യം ചികീര്ഷേത ദീയതാമസ്യ യന്മതമ് ॥ 17 ॥
തതസ്സുരഗണാസ്സർവേ പിതാമഹപുരോഗമാഃ ।
വിശ്വാമിത്രം മഹാത്മാനം മധുരം വാക്യമബ്രുവന് ॥ 18 ॥
ബ്രഹ്മര്ഷേ സ്വാഗതം തേഽസ്തു തപസാ സ്മ സുതോഷിതാഃ ।
ബ്രാഹ്മണ്യം തപസോഗ്രേണ പ്രാപ്തവാനസി കൌശിക ॥ 19 ॥
ദീര്ഘമായുശ്ച തേ ബ്രഹ്മന് ദദാമി സമരുദ്ഗണഃ ।
സ്വസ്തി പ്രാപ്നുഹി ഭദ്രം തേ ഗച്ഛ സൌമ്യ യഥാസുഖമ് ॥ 20 ॥
പിതാമഹവചശ്ശൃത്വാ സർവേഷാം ച ദിവൌകസാമ് ।
കൃത്വാ പ്രണാമം മുദിതോ വ്യാജഹാര മഹാമുനിഃ ॥ 21 ॥
ബ്രാഹ്മണ്യം യദി മേ പ്രാപ്തം ദീര്ഘമായുസ്തഥൈവ ച ।
ഓംകാരശ്ച വഷട്കാരോ വേദാശ്ച വരയംതു മാമ് ॥ 22 ॥
ക്ഷത്രവേദവിദാം ശ്രേഷ്ഠോ ബ്രഹ്മവേദവിദാമപി ।
ബ്രഹ്മപുത്രോ വസിഷ്ഠോ മാമേവം വദതു ദേവതാഃ ॥ 23 ॥
യദ്യയം പരമഃ കാമഃ കൃതോ യാംതു സുരര്ഷഭാഃ ।
തതഃ പ്രസാദിതോ ദേവൈർവസിഷ്ഠോ ജപതാം വരഃ ॥ 24 ॥
സഖ്യം ചകാര ബ്രഹ്മര്ഷിരേവമസ്ത്വിതി ചാബ്രവീത് ।
ബ്രഹ്മര്ഷിസ്ത്വം ന സംദേഹസ്സർവം സംപത്സ്യതേ തവ ॥ 25 ॥
ഇത്യുക്ത്വാ ദേവതാശ്ചാപി സർവാ ജഗ്മുര്യഥാഗതമ് ।
വിശ്വാമിത്രോഽപി ധര്മാത്മാ ലബ്ധ്വാ ബ്രാഹ്മണ്യമുത്തമമ് ॥ 26 ॥
പൂജയാമാസ ബ്രഹ്മര്ഷിം വസിഷ്ഠം ജപതാം വരമ് ।
കൃതകാമോ മഹീം സർവാം ചചാര തപസി സ്ഥിതഃ ॥ 27 ॥
ഏവം ത്വനേന ബ്രാഹ്മണ്യം പ്രാപ്തം രാമ മഹാത്മനാ ।
ഏഷ രാമ മുനിശ്രേഷ്ഠ ഏഷ വിഗ്രഹവാംസ്തപഃ ॥ 28 ॥
ഏഷ ധര്മപരോ നിത്യം വീര്യസ്യൈഷ പരായണമ് ।
ഏവമുക്ത്വാ മഹാതേജാ വിരരാമ ദ്വിജോത്തമഃ ॥ 29 ॥
ശതാനംദവചഃ ശ്രുത്വാ രാമലക്ഷ്മണസന്നിധൌ ।
ജനകഃ പ്രാംജലിർവാക്യമുവാച കുശികാത്മജമ് ॥ 30 ॥
ധന്യോഽസ്മ്യനുഗൃഹീതോഽസ്മി യസ്യ മേ മുനിപുംഗവ ।
യജ്ഞം കാകുത്സ്ഥസഹിതഃ പ്രാപ്തവാനസി ധാര്മിക ॥ 31 ॥
പാവിതോഽഹം ത്വയാ ബ്രഹ്മന് ദര്ശനേന മഹാമുനേ ।
ഗുണാ ബഹുവിധാഃ പ്രാപ്താസ്തവ സംദര്ശനാന്മയാ ॥ 32 ॥
വിസ്തരേണ ച തേ ബ്രഹ്മന് കീര്ത്യമാനം മഹത്തപഃ ।
ശ്രുതം മയാ മഹാതേജോ രാമേണ ച മഹാത്മനാ ॥ 33 ॥
സദസ്യൈഃ പ്രാപ്യ ച സദഃ ശ്രുതാസ്തേ ബഹവോ ഗുണാഃ ।
അപ്രമേയം തപസ്തുഭ്യമപ്രമേയം ച തേ ബലമ് ॥ 34 ॥
അപ്രമേയാ ഗുണാശ്ചൈവ നിത്യം തേ കുശികാത്മജ ।
തൃപ്തിരാശ്ചര്യഭൂതാനാം കഥാനാം നാസ്തി മേ വിഭോ ॥ 35 ॥
കര്മകാലോ മുനിശ്രേഷ്ഠ ലംബതേ രവിമംഡലമ് ।
ശ്വഃ പ്രഭാതേ മഹാതേജോ ദ്രഷ്ടുമര്ഹസി മാം പുനഃ ॥ 36 ॥
സ്വാഗതം തപതാം ശ്രേഷ്ഠ മാമനുജ്ഞാതുമര്ഹസി ।
ഏവമുക്തോ മുനിവരഃ പ്രശസ്യ പുരുഷര്ഷഭമ് ॥ 37 ॥
വിസസര്ജാശു ജനകം പ്രീതം പ്രീതമനാസ്തദാ ।
ഏവമുക്ത്വാ മുനിശ്രേഷ്ഠം വൈദേഹോ മിഥിലാധിപഃ ॥ 38 ॥
പ്രദക്ഷിണം ചകാരാശു സോപാധ്യായസ്സബാംധവഃ ।
വിശ്വാമിത്രോഽപി ധര്മാത്മാ സഹരാമസ്സലക്ഷ്മണഃ ॥ 39 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ ബാലകാംഡേ പംചഷഷ്ടിതമസ്സര്ഗഃ ॥
