ශ්රීමද්වාල්මීකීය රාමායණේ බාලකාංඩම් ।
අථ පංචෂෂ්ටිතමස්සර්ගඃ ।
අථ හෛමවතීං රාම දිශං ත්යක්ත්වා මහාමුනිඃ ।
පූර්වාං දිශමනුප්රාප්ය තපස්තේපේ සුදාරුණම් ॥ 1 ॥
මෞනං වර්ෂසහස්රස්ය කෘත්වා ව්රතමනුත්තමම් ।
චකාරාප්රතිමං රාම තපඃ පරමදුෂ්කරම් ॥ 2 ॥
පූර්ණේ වර්ෂසහස්රේ තු කාෂ්ඨභූතං මහාමුනිම් ।
විඝ්නෛර්බහුභිරාධූතං ක්රෝධෝ නාංතර ආවිශත් ॥ 3 ॥
ස කෘත්වා නිශ්චයං රාම තප ආතිෂ්ටදව්යයම් ।
තස්ය වර්ෂසහස්රස්ය ව්රතේ පූර්ණේ මහාව්රතඃ ॥ 4 ॥
භෝක්තුමාරබ්ධවානන්නං තස්මින් කාලේ රඝූත්තම ।
ඉංද්රෝ ද්විජාතිර්භූත්වා තං සිද්ධමන්නමයාචත ॥ 5 ॥
තස්මෛ දත්වා තදා සිද්ධං සර්වං විප්රාය නිශ්චිතඃ ।
නිශ්ශේෂිතේऽන්නේ භගවානභුක්තෛව මහාතපාඃ ॥ 6 ॥
න කිංචිදවදද්විප්රං මෞනව්රතමුපස්ථිතඃ ।
අථ වර්ෂසහස්රං වෛ නෝච්ඡ්වසන්මුනිපුංගවඃ ॥ 7 ॥
තස්යානුච්ඡ්වසමානස්ය මූර්ධ්නි ධූමෝ ව්යජායත ।
ත්රෛලෝක්යං යේන සංභ්රාංතමාදීපිතමිවාභවත් ॥ 8 ॥
තතෝ දේවාස්සගංධර්වාඃ පන්නගෝරගරාක්ෂසාඃ ।
මෝහිතාස්තේජසා තස්ය තපසා මංදරශ්මයඃ ॥ 9 ॥
කශ්මලෝපහතා ස්සර්වේ පිතාමහමථාබ්රුවන් ।
බහුභිඃ කාරණෛර්දේව විශ්වාමිත්රෝ මහාමුනිඃ ॥ 10 ॥
ලෝභිතඃ ක්රෝධිතශ්චෛව තපසා චාභිවර්ධතේ ।
න හ්යස්ය වෘජිනං කිංචිද්දෘශ්යතේ සූක්ෂ්මමප්යථ ॥ 11 ॥
න දීයතේ යදි ත්වස්ය මනසා යදභීප්සිතම් ।
විනාශයති ත්රෛලෝක්යං තපසා සචරාචරම් ॥ 12 ॥
ව්යාකුලාශ්ච දිශස්සර්වා න ච කිංචිත්ප්රකාශතේ ।
සාගරාඃ ක්ෂුභිතාස්සර්වේ විශීර්යංතේ ච පර්වතාඃ ॥ 13 ॥
ප්රකංපතේ ච පෘථිවී වායුර්වාති භෘශාකුලඃ ।
බෘහ්මන්න ප්රතිජානීමෝනාස්තිකෝ ජායතේ ජනඃ ॥ 14 ॥
සම්මූඪමිව ත්රෛලෝක්යං සංප්රක්ෂුභිතමානසම් ।
භාස්කරෝ නිෂ්ප්රභශ්චෛව මහර්ෂේස්තස්ය තේජසා ॥ 15 ॥
බුද්ධිං න කුරුතේ යාවන්නාශේ දේව මහාමුනිඃ ।
තාවත්ප්රසාද්යෝ භගවා නග්නිරූපෝමහාද්යුතිඃ ॥ 16 ॥
කාලාග්නිනා යථාපූර්වං ත්රෛලෝක්යං දහ්යතේऽඛිලම් ।
දේවරාජ්යං චිකීර්ෂේත දීයතාමස්ය යන්මතම් ॥ 17 ॥
තතස්සුරගණාස්සර්වේ පිතාමහපුරෝගමාඃ ।
විශ්වාමිත්රං මහාත්මානං මධුරං වාක්යමබ්රුවන් ॥ 18 ॥
බ්රහ්මර්ෂේ ස්වාගතං තේऽස්තු තපසා ස්ම සුතෝෂිතාඃ ।
බ්රාහ්මණ්යං තපසෝග්රේණ ප්රාප්තවානසි කෞශික ॥ 19 ॥
දීර්ඝමායුශ්ච තේ බ්රහ්මන් දදාමි සමරුද්ගණඃ ।
ස්වස්ති ප්රාප්නුහි භද්රං තේ ගච්ඡ සෞම්ය යථාසුඛම් ॥ 20 ॥
පිතාමහවචශ්ශෘත්වා සර්වේෂාං ච දිවෞකසාම් ।
කෘත්වා ප්රණාමං මුදිතෝ ව්යාජහාර මහාමුනිඃ ॥ 21 ॥
බ්රාහ්මණ්යං යදි මේ ප්රාප්තං දීර්ඝමායුස්තථෛව ච ।
ඕංකාරශ්ච වෂට්කාරෝ වේදාශ්ච වරයංතු මාම් ॥ 22 ॥
ක්ෂත්රවේදවිදාං ශ්රේෂ්ඨෝ බ්රහ්මවේදවිදාමපි ।
බ්රහ්මපුත්රෝ වසිෂ්ඨෝ මාමේවං වදතු දේවතාඃ ॥ 23 ॥
යද්යයං පරමඃ කාමඃ කෘතෝ යාංතු සුරර්ෂභාඃ ।
තතඃ ප්රසාදිතෝ දේවෛර්වසිෂ්ඨෝ ජපතාං වරඃ ॥ 24 ॥
සඛ්යං චකාර බ්රහ්මර්ෂිරේවමස්ත්විති චාබ්රවීත් ।
බ්රහ්මර්ෂිස්ත්වං න සංදේහස්සර්වං සංපත්ස්යතේ තව ॥ 25 ॥
ඉත්යුක්ත්වා දේවතාශ්චාපි සර්වා ජග්මුර්යථාගතම් ।
විශ්වාමිත්රෝऽපි ධර්මාත්මා ලබ්ධ්වා බ්රාහ්මණ්යමුත්තමම් ॥ 26 ॥
පූජයාමාස බ්රහ්මර්ෂිං වසිෂ්ඨං ජපතාං වරම් ।
කෘතකාමෝ මහීං සර්වාං චචාර තපසි ස්ථිතඃ ॥ 27 ॥
ඒවං ත්වනේන බ්රාහ්මණ්යං ප්රාප්තං රාම මහාත්මනා ।
ඒෂ රාම මුනිශ්රේෂ්ඨ ඒෂ විග්රහවාංස්තපඃ ॥ 28 ॥
ඒෂ ධර්මපරෝ නිත්යං වීර්යස්යෛෂ පරායණම් ।
ඒවමුක්ත්වා මහාතේජා විරරාම ද්විජෝත්තමඃ ॥ 29 ॥
ශතානංදවචඃ ශ්රුත්වා රාමලක්ෂ්මණසන්නිධෞ ।
ජනකඃ ප්රාංජලිර්වාක්යමුවාච කුශිකාත්මජම් ॥ 30 ॥
ධන්යෝऽස්ම්යනුගෘහීතෝऽස්මි යස්ය මේ මුනිපුංගව ।
යජ්ඤං කාකුත්ස්ථසහිතඃ ප්රාප්තවානසි ධාර්මික ॥ 31 ॥
පාවිතෝऽහං ත්වයා බ්රහ්මන් දර්ශනේන මහාමුනේ ।
ගුණා බහුවිධාඃ ප්රාප්තාස්තව සංදර්ශනාන්මයා ॥ 32 ॥
විස්තරේණ ච තේ බ්රහ්මන් කීර්ත්යමානං මහත්තපඃ ।
ශ්රුතං මයා මහාතේජෝ රාමේණ ච මහාත්මනා ॥ 33 ॥
සදස්යෛඃ ප්රාප්ය ච සදඃ ශ්රුතාස්තේ බහවෝ ගුණාඃ ।
අප්රමේයං තපස්තුභ්යමප්රමේයං ච තේ බලම් ॥ 34 ॥
අප්රමේයා ගුණාශ්චෛව නිත්යං තේ කුශිකාත්මජ ।
තෘප්තිරාශ්චර්යභූතානාං කථානාං නාස්ති මේ විභෝ ॥ 35 ॥
කර්මකාලෝ මුනිශ්රේෂ්ඨ ලංබතේ රවිමංඩලම් ।
ශ්වඃ ප්රභාතේ මහාතේජෝ ද්රෂ්ටුමර්හසි මාං පුනඃ ॥ 36 ॥
ස්වාගතං තපතාං ශ්රේෂ්ඨ මාමනුජ්ඤාතුමර්හසි ।
ඒවමුක්තෝ මුනිවරඃ ප්රශස්ය පුරුෂර්ෂභම් ॥ 37 ॥
විසසර්ජාශු ජනකං ප්රීතං ප්රීතමනාස්තදා ।
ඒවමුක්ත්වා මුනිශ්රේෂ්ඨං වෛදේහෝ මිථිලාධිපඃ ॥ 38 ॥
ප්රදක්ෂිණං චකාරාශු සෝපාධ්යායස්සබාංධවඃ ।
විශ්වාමිත්රෝऽපි ධර්මාත්මා සහරාමස්සලක්ෂ්මණඃ ॥ 39 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ බාලකාංඩේ පංචෂෂ්ටිතමස්සර්ගඃ ॥
