শ্রীমদ্বাল্মীকীয় রামাযণে বালকাংডম্ ।
অথ পংচষষ্টিতমস্সর্গঃ ।
অথ হৈমবতীং রাম দিশং ত্যক্ত্বা মহামুনিঃ ।
পূর্বাং দিশমনুপ্রাপ্য় তপস্তেপে সুদারুণম্ ॥ 1 ॥
মৌনং বর্ষসহস্রস্য় কৃত্বা ব্রতমনুত্তমম্ ।
চকারাপ্রতিমং রাম তপঃ পরমদুষ্করম্ ॥ 2 ॥
পূর্ণে বর্ষসহস্রে তু কাষ্ঠভূতং মহামুনিম্ ।
বিঘ্নৈর্বহুভিরাধূতং ক্রোধো নাংতর আবিশত্ ॥ 3 ॥
স কৃত্বা নিশ্চয়ং রাম তপ আতিষ্টদব্যযম্ ।
তস্য় বর্ষসহস্রস্য় ব্রতে পূর্ণে মহাব্রতঃ ॥ 4 ॥
ভোক্তুমারব্ধবানন্নং তস্মিন্ কালে রঘূত্তম ।
ইংদ্রো দ্বিজাতির্ভূত্বা তং সিদ্ধমন্নময়াচত ॥ 5 ॥
তস্মৈ দত্বা তদা সিদ্ধং সর্বং বিপ্রায় নিশ্চিতঃ ।
নিশ্শেষিতেঽন্নে ভগবানভুক্তৈব মহাতপাঃ ॥ 6 ॥
ন কিংচিদবদদ্বিপ্রং মৌনব্রতমুপস্থিতঃ ।
অথ বর্ষসহস্রং বৈ নোচ্ছ্বসন্মুনিপুংগবঃ ॥ 7 ॥
তস্য়ানুচ্ছ্বসমানস্য় মূর্ধ্নি ধূমো ব্যজাযত ।
ত্রৈলোক্য়ং যেন সংভ্রাংতমাদীপিতমিবাভবত্ ॥ 8 ॥
ততো দেবাস্সগংধর্বাঃ পন্নগোরগরাক্ষসাঃ ।
মোহিতাস্তেজসা তস্য় তপসা মংদরশ্ময়ঃ ॥ 9 ॥
কশ্মলোপহতা স্সর্বে পিতামহমথাব্রুবন্ ।
বহুভিঃ কারণৈর্দেব বিশ্বামিত্রো মহামুনিঃ ॥ 10 ॥
লোভিতঃ ক্রোধিতশ্চৈব তপসা চাভিবর্ধতে ।
ন হ্যস্য় বৃজিনং কিংচিদ্দৃশ্যতে সূক্ষ্মমপ্যথ ॥ 11 ॥
ন দীযতে যদি ত্বস্য় মনসা যদভীপ্সিতম্ ।
বিনাশযতি ত্রৈলোক্য়ং তপসা সচরাচরম্ ॥ 12 ॥
ব্য়াকুলাশ্চ দিশস্সর্বা ন চ কিংচিত্প্রকাশতে ।
সাগরাঃ ক্ষুভিতাস্সর্বে বিশীর্য়ংতে চ পর্বতাঃ ॥ 13 ॥
প্রকংপতে চ পৃথিবী বায়ুর্বাতি ভৃশাকুলঃ ।
বৃহ্মন্ন প্রতিজানীমোনাস্তিকো জাযতে জনঃ ॥ 14 ॥
সম্মূঢমিব ত্রৈলোক্য়ং সংপ্রক্ষুভিতমানসম্ ।
ভাস্করো নিষ্প্রভশ্চৈব মহর্ষেস্তস্য় তেজসা ॥ 15 ॥
বুদ্ধিং ন কুরুতে যাবন্নাশে দেব মহামুনিঃ ।
তাবত্প্রসাদ্য়ো ভগবা নগ্নিরূপোমহাদ্য়ুতিঃ ॥ 16 ॥
কালাগ্নিনা যথাপূর্বং ত্রৈলোক্য়ং দহ্যতেঽখিলম্ ।
দেবরাজ্য়ং চিকীর্ষেত দীযতামস্য় যন্মতম্ ॥ 17 ॥
ততস্সুরগণাস্সর্বে পিতামহপুরোগমাঃ ।
বিশ্বামিত্রং মহাত্মানং মধুরং বাক্যমব্রুবন্ ॥ 18 ॥
ব্রহ্মর্ষে স্বাগতং তেঽস্তু তপসা স্ম সুতোষিতাঃ ।
ব্রাহ্মণ্য়ং তপসোগ্রেণ প্রাপ্তবানসি কৌশিক ॥ 19 ॥
দীর্ঘমায়ুশ্চ তে ব্রহ্মন্ দদামি সমরুদ্গণঃ ।
স্বস্তি প্রাপ্নুহি ভদ্রং তে গচ্ছ সৌম্য় যথাসুখম্ ॥ 20 ॥
পিতামহবচশ্শৃত্বা সর্বেষাং চ দিবৌকসাম্ ।
কৃত্বা প্রণামং মুদিতো ব্য়াজহার মহামুনিঃ ॥ 21 ॥
ব্রাহ্মণ্য়ং যদি মে প্রাপ্তং দীর্ঘমায়ুস্তথৈব চ ।
ওংকারশ্চ বষট্কারো বেদাশ্চ বরয়ংতু মাম্ ॥ 22 ॥
ক্ষত্রবেদবিদাং শ্রেষ্ঠো ব্রহ্মবেদবিদামপি ।
ব্রহ্মপুত্রো বসিষ্ঠো মামেবং বদতু দেবতাঃ ॥ 23 ॥
যদ্যয়ং পরমঃ কামঃ কৃতো যাংতু সুরর্ষভাঃ ।
ততঃ প্রসাদিতো দেবৈর্বসিষ্ঠো জপতাং বরঃ ॥ 24 ॥
সখ্য়ং চকার ব্রহ্মর্ষিরেবমস্ত্বিতি চাব্রবীত্ ।
ব্রহ্মর্ষিস্ত্বং ন সংদেহস্সর্বং সংপত্স্যতে তব ॥ 25 ॥
ইত্য়ুক্ত্বা দেবতাশ্চাপি সর্বা জগ্মুর্যথাগতম্ ।
বিশ্বামিত্রোঽপি ধর্মাত্মা লব্ধ্বা ব্রাহ্মণ্যমুত্তমম্ ॥ 26 ॥
পূজয়ামাস ব্রহ্মর্ষিং বসিষ্ঠং জপতাং বরম্ ।
কৃতকামো মহীং সর্বাং চচার তপসি স্থিতঃ ॥ 27 ॥
এবং ত্বনেন ব্রাহ্মণ্য়ং প্রাপ্তং রাম মহাত্মনা ।
এষ রাম মুনিশ্রেষ্ঠ এষ বিগ্রহবাংস্তপঃ ॥ 28 ॥
এষ ধর্মপরো নিত্য়ং বীর্যস্য়ৈষ পরাযণম্ ।
এবমুক্ত্বা মহাতেজা বিররাম দ্বিজোত্তমঃ ॥ 29 ॥
শতানংদবচঃ শ্রুত্বা রামলক্ষ্মণসন্নিধৌ ।
জনকঃ প্রাংজলির্বাক্যমুবাচ কুশিকাত্মজম্ ॥ 30 ॥
ধন্য়োঽস্ম্যনুগৃহীতোঽস্মি যস্য় মে মুনিপুংগব ।
যজ্ঞং কাকুত্স্থসহিতঃ প্রাপ্তবানসি ধার্মিক ॥ 31 ॥
পাবিতোঽহং ত্বয়া ব্রহ্মন্ দর্শনেন মহামুনে ।
গুণা বহুবিধাঃ প্রাপ্তাস্তব সংদর্শনান্ময়া ॥ 32 ॥
বিস্তরেণ চ তে ব্রহ্মন্ কীর্ত্যমানং মহত্তপঃ ।
শ্রুতং ময়া মহাতেজো রামেণ চ মহাত্মনা ॥ 33 ॥
সদস্য়ৈঃ প্রাপ্য় চ সদঃ শ্রুতাস্তে বহবো গুণাঃ ।
অপ্রমেয়ং তপস্তুভ্যমপ্রমেয়ং চ তে বলম্ ॥ 34 ॥
অপ্রমেয়া গুণাশ্চৈব নিত্য়ং তে কুশিকাত্মজ ।
তৃপ্তিরাশ্চর্যভূতানাং কথানাং নাস্তি মে বিভো ॥ 35 ॥
কর্মকালো মুনিশ্রেষ্ঠ লংবতে রবিমংডলম্ ।
শ্বঃ প্রভাতে মহাতেজো দ্রষ্টুমর্হসি মাং পুনঃ ॥ 36 ॥
স্বাগতং তপতাং শ্রেষ্ঠ মামনুজ্ঞাতুমর্হসি ।
এবমুক্তো মুনিবরঃ প্রশস্য় পুরুষর্ষভম্ ॥ 37 ॥
বিসসর্জাশু জনকং প্রীতং প্রীতমনাস্তদা ।
এবমুক্ত্বা মুনিশ্রেষ্ঠং বৈদেহো মিথিলাধিপঃ ॥ 38 ॥
প্রদক্ষিণং চকারাশু সোপাধ্য়াযস্সবাংধবঃ ।
বিশ্বামিত্রোঽপি ধর্মাত্মা সহরামস্সলক্ষ্মণঃ ॥ 39 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে বালকাংডে পংচষষ্টিতমস্সর্গঃ ॥
