ශ්රීමද්වාල්මීකීය රාමායණේ බාලකාංඩම් ।
අථ චතුඃසප්තතිතමස්සර්ගඃ ।
අථ රාත්ර්යාං ව්යතීතායාං විශ්වාමිත්රෝ මහාමුනිඃ ।
ආපෘෂ්ට්වා තෞ ච රාජානෞ ජගාමෝත්තරපර්වතම් ॥ 1 ॥
ආශීර්භිඃ පූරයිත්වා ච කුමාරාංශ්ච සරාඝවාන් ।
විශ්වාමිත්රේ ගතේ රාජා වෛදේහං මිථිලාධිපම් ।
ආපෘෂ්ට්වාऽථ ජගාමාශු රාජා දශරථඃ පුරීම් ॥ 2 ॥
ගච්ඡංතං තං තු රාජානමන්වගච්ඡන්නරාධිපඃ ॥ 3 ॥
අථ රාජා විදේහානාං දදෞ කන්යාධනං බහු ।
ගවාං ශතසහස්රාණි බහූනි මිථිලේශ්වරඃ ।
කංබලානාං ච මුඛ්යානාං ක්ෂෞමකෝට්යංබරාණි ච ॥ 4 ॥
හස්ත්යශ්වරථපාදාතං දිව්යරූපං ස්වලංකෘතම් ।
දදෞ කන්යාපිතා තාසාං දාසීදාසමනුත්තමම් ॥ 5 ॥
හිරණ්යස්ය සුවර්ණස්ය මුක්තානාං විද්රුමස්ය ච ॥ 6 ॥
දදෞ පරමසංහෘෂ්ටඃ කන්යාධනමනුත්තමම් ।
දත්ත්වා බහු ධනං රාජා සමනුජ්ඤාප්ය පාර්ථිවම් ॥ 7 ॥
ප්රවිවේශ ස්වනිලයං මිථිලාං මිථිලේශ්වරඃ ।
රාජාऽප්යයෝධ්යාධිපතිස්සහ පුත්රෛර්මහාත්මභිඃ ।
ඍෂීන් සර්වාන් පුරස්කෘත්ය ජගාම සබලානුගඃ ॥ 8 ॥
ගච්ඡංතං තං නරව්යාඝ්රං සර්ෂිසංඝං සරාඝවම් ॥ 9 ॥
ඝෝරාඃ ස්ම පක්ෂිණෝ වාචෝ ව්යාහරංති තතස්තතඃ ।
භෞමාශ්චෛව මෘගා ස්සර්වේ ගච්ඡංති ස්ම ප්රදක්ෂිණම් ॥ 10 ॥
තාන් දෘෂ්ට්වා රාජශාර්දූලෝ වසිෂ්ඨං පර්යපෘච්ඡත ।
අසෞම්යාඃ පක්ෂිණෝ ඝෝරා මෘගාශ්චාපි ප්රදක්ෂිණාඃ ॥ 11 ॥
කිමිදං හෘදයෝත්කංපි මනෝ මම විෂීදති ।
රාජ්ඤෝ දශරථස්යෛතච්ඡ්රුත්වා වාක්යං මහානෘෂිඃ ॥ 12 ॥
උවාච මධුරාං වාණීං ශ්රූයතාමස්ය යත්ඵලම් ।
උපස්ථිතං භයං ඝෝරං දිව්යං පක්ෂිමුඛාච්ච්යුතම් ॥ 13 ॥
මෘගාඃ ප්රශමයංත්යේතේ සංතාපස්ත්යජ්යතාමයම් ।
තේෂාං සංවදතාං තත්ර වායුඃ ප්රාදුර්බභූව හ ॥ 14 ॥
කංපයන් පෘථිවීං සර්වාං පාතයංශ්ච ද්රුමාංච්ඡුභාන් ।
තමසා සංවෘතස්සූර්ය ස්සර්වා න ප්රබභුර්දිශ ॥ 15 ॥
භස්මනා චාවෘතං සර්වං සංමූඪමිව තද්බලම් ।
වසිෂ්ඨශ්චර්ෂයශ්චාන්යේ රාජා ච සසුතස්තදා ॥ 16 ॥
සංසජ්ඤා ඉව තත්රාසන් සර්වමන්යද්විචේතනම් ।
තස්මිංස්තමසි ඝෝරේ තු භස්මච්ඡන්නේව සා චමූඃ ॥ 17 ॥
දදර්ශ භීමසංකාශං ජටාමංඩලධාරිණම් ।
භාර්ගවං ජාමදග්න්යං තං රාජරාජවිමර්දිනම් ॥ 18 ॥
කෛලාසමිව දුර්ධර්ෂං කාලාග්නිමිව දුස්සහම් ।
ජ්වලංතමිව තේජෝභිර්දුර්නිරීක්ෂ්යං පෘථග්ජනෛඃ ॥ 19 ॥
ස්කංධේ චාසජ්ය පරශුං ධනුර්විද්යුද්ගණෝපමම් ।
ප්රගෘහ්ය ශරමුඛ්යං ච ත්රිපුරඝ්නං යථා ශිවම් ॥ 20 ॥
තං දෘෂ්ට්වා භීමසංකාශං ජ්වලංතමිව පාවකම් ।
වසිෂ්ඨප්රමුඛා විප්රා ජපහෝමපරායණාඃ ॥ 21 ॥
සංගතා මුනයස්සර්වේ සංජජල්පුරථෝ මිථඃ ।
කච්චිත්පිතෘවධාමර්ෂී ක්ෂත්රං නෝත්සාදයිෂ්යති ॥ 22 ॥
පූර්වං ක්ෂත්රවධං කෘත්වා ගතමන්යුර්ගතජ්වරඃ ।
ක්ෂත්රස්යෝත්සාදනං භූයෝ න ඛල්වස්ය චිකීර්ෂිතම් ॥ 23 ॥
ඒවමුක්ත්වාऽර්ඝ්යමාදාය භාර්ගවං භීමදර්ශනම් ।
ඍෂයෝ රාම රාමේති වචෝ මධුරමබ්රුවන් ॥ 24 ॥
ප්රතිගෘහ්ය තු තාං පූජාමෘෂිදත්තාං ප්රතාපවාන් ।
රාමං දාශරථිං රාමෝ ජාමදග්න්යෝऽභ්යභාෂත ॥ 25 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ බාලකාංඩේ චතුඃසප්තතිතමස්සර්ගඃ ॥
