ଶ୍ରୀମଦ୍ଵାଲ୍ମୀକୀୟ ରାମାୟଣେ ବାଲକାଂଡମ୍ ।
ଅଥ ଚତୁଃସପ୍ତତିତମସ୍ସର୍ଗଃ ।
ଅଥ ରାତ୍ର୍ୟାଂ ଵ୍ୟତୀତାୟାଂ ଵିଶ୍ଵାମିତ୍ରୋ ମହାମୁନିଃ ।
ଆପୃଷ୍ଟ୍ଵା ତୌ ଚ ରାଜାନୌ ଜଗାମୋତ୍ତରପର୍ଵତମ୍ ॥ 1 ॥
ଆଶୀର୍ଭିଃ ପୂରୟିତ୍ଵା ଚ କୁମାରାଂଶ୍ଚ ସରାଘଵାନ୍ ।
ଵିଶ୍ଵାମିତ୍ରେ ଗତେ ରାଜା ଵୈଦେହଂ ମିଥିଲାଧିପମ୍ ।
ଆପୃଷ୍ଟ୍ଵାଽଥ ଜଗାମାଶୁ ରାଜା ଦଶରଥଃ ପୁରୀମ୍ ॥ 2 ॥
ଗଚ୍ଛଂତଂ ତଂ ତୁ ରାଜାନମନ୍ଵଗଚ୍ଛନ୍ନରାଧିପଃ ॥ 3 ॥
ଅଥ ରାଜା ଵିଦେହାନାଂ ଦଦୌ କନ୍ୟାଧନଂ ବହୁ ।
ଗଵାଂ ଶତସହସ୍ରାଣି ବହୂନି ମିଥିଲେଶ୍ଵରଃ ।
କଂବଲାନାଂ ଚ ମୁଖ୍ୟାନାଂ କ୍ଷୌମକୋଟ୍ୟଂବରାଣି ଚ ॥ 4 ॥
ହସ୍ତ୍ୟଶ୍ଵରଥପାଦାତଂ ଦିଵ୍ୟରୂପଂ ସ୍ଵଲଂକୃତମ୍ ।
ଦଦୌ କନ୍ୟାପିତା ତାସାଂ ଦାସୀଦାସମନୁତ୍ତମମ୍ ॥ 5 ॥
ହିରଣ୍ୟସ୍ୟ ସୁଵର୍ଣସ୍ୟ ମୁକ୍ତାନାଂ ଵିଦ୍ରୁମସ୍ୟ ଚ ॥ 6 ॥
ଦଦୌ ପରମସଂହୃଷ୍ଟଃ କନ୍ୟାଧନମନୁତ୍ତମମ୍ ।
ଦତ୍ତ୍ଵା ବହୁ ଧନଂ ରାଜା ସମନୁଜ୍ଞାପ୍ୟ ପାର୍ଥିଵମ୍ ॥ 7 ॥
ପ୍ରଵିଵେଶ ସ୍ଵନିଲୟଂ ମିଥିଲାଂ ମିଥିଲେଶ୍ଵରଃ ।
ରାଜାଽପ୍ୟୟୋଧ୍ୟାଧିପତିସ୍ସହ ପୁତ୍ରୈର୍ମହାତ୍ମଭିଃ ।
ଋଷୀନ୍ ସର୍ଵାନ୍ ପୁରସ୍କୃତ୍ୟ ଜଗାମ ସବଲାନୁଗଃ ॥ 8 ॥
ଗଚ୍ଛଂତଂ ତଂ ନରଵ୍ୟାଘ୍ରଂ ସର୍ଷିସଂଘଂ ସରାଘଵମ୍ ॥ 9 ॥
ଘୋରାଃ ସ୍ମ ପକ୍ଷିଣୋ ଵାଚୋ ଵ୍ୟାହରଂତି ତତସ୍ତତଃ ।
ଭୌମାଶ୍ଚୈଵ ମୃଗା ସ୍ସର୍ଵେ ଗଚ୍ଛଂତି ସ୍ମ ପ୍ରଦକ୍ଷିଣମ୍ ॥ 10 ॥
ତାନ୍ ଦୃଷ୍ଟ୍ଵା ରାଜଶାର୍ଦୂଲୋ ଵସିଷ୍ଠଂ ପର୍ୟପୃଚ୍ଛତ ।
ଅସୌମ୍ୟାଃ ପକ୍ଷିଣୋ ଘୋରା ମୃଗାଶ୍ଚାପି ପ୍ରଦକ୍ଷିଣାଃ ॥ 11 ॥
କିମିଦଂ ହୃଦୟୋତ୍କଂପି ମନୋ ମମ ଵିଷୀଦତି ।
ରାଜ୍ଞୋ ଦଶରଥସ୍ୟୈତଚ୍ଛ୍ରୁତ୍ଵା ଵାକ୍ୟଂ ମହାନୃଷିଃ ॥ 12 ॥
ଉଵାଚ ମଧୁରାଂ ଵାଣୀଂ ଶ୍ରୂୟତାମସ୍ୟ ୟତ୍ଫଲମ୍ ।
ଉପସ୍ଥିତଂ ଭୟଂ ଘୋରଂ ଦିଵ୍ୟଂ ପକ୍ଷିମୁଖାଚ୍ଚ୍ୟୁତମ୍ ॥ 13 ॥
ମୃଗାଃ ପ୍ରଶମୟଂତ୍ୟେତେ ସଂତାପସ୍ତ୍ୟଜ୍ୟତାମୟମ୍ ।
ତେଷାଂ ସଂଵଦତାଂ ତତ୍ର ଵାୟୁଃ ପ୍ରାଦୁର୍ବଭୂଵ ହ ॥ 14 ॥
କଂପୟନ୍ ପୃଥିଵୀଂ ସର୍ଵାଂ ପାତୟଂଶ୍ଚ ଦ୍ରୁମାଂଚ୍ଛୁଭାନ୍ ।
ତମସା ସଂଵୃତସ୍ସୂର୍ୟ ସ୍ସର୍ଵା ନ ପ୍ରବଭୁର୍ଦିଶ ॥ 15 ॥
ଭସ୍ମନା ଚାଵୃତଂ ସର୍ଵଂ ସଂମୂଢମିଵ ତଦ୍ବଲମ୍ ।
ଵସିଷ୍ଠଶ୍ଚର୍ଷୟଶ୍ଚାନ୍ୟେ ରାଜା ଚ ସସୁତସ୍ତଦା ॥ 16 ॥
ସଂସଜ୍ଞା ଇଵ ତତ୍ରାସନ୍ ସର୍ଵମନ୍ୟଦ୍ଵିଚେତନମ୍ ।
ତସ୍ମିଂସ୍ତମସି ଘୋରେ ତୁ ଭସ୍ମଚ୍ଛନ୍ନେଵ ସା ଚମୂଃ ॥ 17 ॥
ଦଦର୍ଶ ଭୀମସଂକାଶଂ ଜଟାମଂଡଲଧାରିଣମ୍ ।
ଭାର୍ଗଵଂ ଜାମଦଗ୍ନ୍ୟଂ ତଂ ରାଜରାଜଵିମର୍ଦିନମ୍ ॥ 18 ॥
କୈଲାସମିଵ ଦୁର୍ଧର୍ଷଂ କାଲାଗ୍ନିମିଵ ଦୁସ୍ସହମ୍ ।
ଜ୍ଵଲଂତମିଵ ତେଜୋଭିର୍ଦୁର୍ନିରୀକ୍ଷ୍ୟଂ ପୃଥଗ୍ଜନୈଃ ॥ 19 ॥
ସ୍କଂଧେ ଚାସଜ୍ୟ ପରଶୁଂ ଧନୁର୍ଵିଦ୍ୟୁଦ୍ଗଣୋପମମ୍ ।
ପ୍ରଗୃହ୍ୟ ଶରମୁଖ୍ୟଂ ଚ ତ୍ରିପୁରଘ୍ନଂ ୟଥା ଶିଵମ୍ ॥ 20 ॥
ତଂ ଦୃଷ୍ଟ୍ଵା ଭୀମସଂକାଶଂ ଜ୍ଵଲଂତମିଵ ପାଵକମ୍ ।
ଵସିଷ୍ଠପ୍ରମୁଖା ଵିପ୍ରା ଜପହୋମପରାୟଣାଃ ॥ 21 ॥
ସଂଗତା ମୁନୟସ୍ସର୍ଵେ ସଂଜଜଲ୍ପୁରଥୋ ମିଥଃ ।
କଚ୍ଚିତ୍ପିତୃଵଧାମର୍ଷୀ କ୍ଷତ୍ରଂ ନୋତ୍ସାଦୟିଷ୍ୟତି ॥ 22 ॥
ପୂର୍ଵଂ କ୍ଷତ୍ରଵଧଂ କୃତ୍ଵା ଗତମନ୍ୟୁର୍ଗତଜ୍ଵରଃ ।
କ୍ଷତ୍ରସ୍ୟୋତ୍ସାଦନଂ ଭୂୟୋ ନ ଖଲ୍ଵସ୍ୟ ଚିକୀର୍ଷିତମ୍ ॥ 23 ॥
ଏଵମୁକ୍ତ୍ଵାଽର୍ଘ୍ୟମାଦାୟ ଭାର୍ଗଵଂ ଭୀମଦର୍ଶନମ୍ ।
ଋଷୟୋ ରାମ ରାମେତି ଵଚୋ ମଧୁରମବ୍ରୁଵନ୍ ॥ 24 ॥
ପ୍ରତିଗୃହ୍ୟ ତୁ ତାଂ ପୂଜାମୃଷିଦତ୍ତାଂ ପ୍ରତାପଵାନ୍ ।
ରାମଂ ଦାଶରଥିଂ ରାମୋ ଜାମଦଗ୍ନ୍ୟୋଽଭ୍ୟଭାଷତ ॥ 25 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ବାଲକାଂଡେ ଚତୁଃସପ୍ତତିତମସ୍ସର୍ଗଃ ॥
