শ্রীমদ্বাল্মীকীয় রামাযণে বালকাংডম্ ।
অথ চতুঃসপ্ততিতমস্সর্গঃ ।
অথ রাত্র্য়াং ব্যতীতায়াং বিশ্বামিত্রো মহামুনিঃ ।
আপৃষ্ট্বা তৌ চ রাজানৌ জগামোত্তরপর্বতম্ ॥ 1 ॥
আশীর্ভিঃ পূরয়িত্বা চ কুমারাংশ্চ সরাঘবান্ ।
বিশ্বামিত্রে গতে রাজা বৈদেহং মিথিলাধিপম্ ।
আপৃষ্ট্বাঽথ জগামাশু রাজা দশরথঃ পুরীম্ ॥ 2 ॥
গচ্ছংতং তং তু রাজানমন্বগচ্ছন্নরাধিপঃ ॥ 3 ॥
অথ রাজা বিদেহানাং দদৌ কন্য়াধনং বহু ।
গবাং শতসহস্রাণি বহূনি মিথিলেশ্বরঃ ।
কংবলানাং চ মুখ্য়ানাং ক্ষৌমকোট্য়ংবরাণি চ ॥ 4 ॥
হস্ত্যশ্বরথপাদাতং দিব্যরূপং স্বলংকৃতম্ ।
দদৌ কন্য়াপিতা তাসাং দাসীদাসমনুত্তমম্ ॥ 5 ॥
হিরণ্যস্য় সুবর্ণস্য় মুক্তানাং বিদ্রুমস্য় চ ॥ 6 ॥
দদৌ পরমসংহৃষ্টঃ কন্য়াধনমনুত্তমম্ ।
দত্ত্বা বহু ধনং রাজা সমনুজ্ঞাপ্য় পার্থিবম্ ॥ 7 ॥
প্রবিবেশ স্বনিলয়ং মিথিলাং মিথিলেশ্বরঃ ।
রাজাঽপ্যয়োধ্য়াধিপতিস্সহ পুত্রৈর্মহাত্মভিঃ ।
ঋষীন্ সর্বান্ পুরস্কৃত্য় জগাম সবলানুগঃ ॥ 8 ॥
গচ্ছংতং তং নরব্য়াঘ্রং সর্ষিসংঘং সরাঘবম্ ॥ 9 ॥
ঘোরাঃ স্ম পক্ষিণো বাচো ব্য়াহরংতি ততস্ততঃ ।
ভৌমাশ্চৈব মৃগা স্সর্বে গচ্ছংতি স্ম প্রদক্ষিণম্ ॥ 10 ॥
তান্ দৃষ্ট্বা রাজশার্দূলো বসিষ্ঠং পর্যপৃচ্ছত ।
অসৌম্য়াঃ পক্ষিণো ঘোরা মৃগাশ্চাপি প্রদক্ষিণাঃ ॥ 11 ॥
কিমিদং হৃদয়োত্কংপি মনো মম বিষীদতি ।
রাজ্ঞো দশরথস্য়ৈতচ্ছ্রুত্বা বাক্য়ং মহানৃষিঃ ॥ 12 ॥
উবাচ মধুরাং বাণীং শ্রূযতামস্য় যত্ফলম্ ।
উপস্থিতং ভয়ং ঘোরং দিব্য়ং পক্ষিমুখাচ্চ্য়ুতম্ ॥ 13 ॥
মৃগাঃ প্রশময়ংত্য়েতে সংতাপস্ত্যজ্যতামযম্ ।
তেষাং সংবদতাং তত্র বায়ুঃ প্রাদুর্বভূব হ ॥ 14 ॥
কংপযন্ পৃথিবীং সর্বাং পাতয়ংশ্চ দ্রুমাংচ্ছুভান্ ।
তমসা সংবৃতস্সূর্য় স্সর্বা ন প্রবভুর্দিশ ॥ 15 ॥
ভস্মনা চাবৃতং সর্বং সংমূঢমিব তদ্বলম্ ।
বসিষ্ঠশ্চর্ষযশ্চান্য়ে রাজা চ সসুতস্তদা ॥ 16 ॥
সংসজ্ঞা ইব তত্রাসন্ সর্বমন্যদ্বিচেতনম্ ।
তস্মিংস্তমসি ঘোরে তু ভস্মচ্ছন্নেব সা চমূঃ ॥ 17 ॥
দদর্শ ভীমসংকাশং জটামংডলধারিণম্ ।
ভার্গবং জামদগ্ন্য়ং তং রাজরাজবিমর্দিনম্ ॥ 18 ॥
কৈলাসমিব দুর্ধর্ষং কালাগ্নিমিব দুস্সহম্ ।
জ্বলংতমিব তেজোভির্দুর্নিরীক্ষ্য়ং পৃথগ্জনৈঃ ॥ 19 ॥
স্কংধে চাসজ্য় পরশুং ধনুর্বিদ্য়ুদ্গণোপমম্ ।
প্রগৃহ্য় শরমুখ্য়ং চ ত্রিপুরঘ্নং যথা শিবম্ ॥ 20 ॥
তং দৃষ্ট্বা ভীমসংকাশং জ্বলংতমিব পাবকম্ ।
বসিষ্ঠপ্রমুখা বিপ্রা জপহোমপরাযণাঃ ॥ 21 ॥
সংগতা মুনযস্সর্বে সংজজল্পুরথো মিথঃ ।
কচ্চিত্পিতৃবধামর্ষী ক্ষত্রং নোত্সাদয়িষ্যতি ॥ 22 ॥
পূর্বং ক্ষত্রবধং কৃত্বা গতমন্য়ুর্গতজ্বরঃ ।
ক্ষত্রস্য়োত্সাদনং ভূয়ো ন খল্বস্য় চিকীর্ষিতম্ ॥ 23 ॥
এবমুক্ত্বাঽর্ঘ্যমাদায় ভার্গবং ভীমদর্শনম্ ।
ঋষয়ো রাম রামেতি বচো মধুরমব্রুবন্ ॥ 24 ॥
প্রতিগৃহ্য় তু তাং পূজামৃষিদত্তাং প্রতাপবান্ ।
রামং দাশরথিং রামো জামদগ্ন্য়োঽভ্যভাষত ॥ 25 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে বালকাংডে চতুঃসপ্ততিতমস্সর্গঃ ॥
