ശ്രീമദ്വാല്മീകീയ രാമായണേ ബാലകാംഡമ് ।
അഥ ചതുഃസപ്തതിതമസ്സര്ഗഃ ।
അഥ രാത്ര്യാം വ്യതീതായാം വിശ്വാമിത്രോ മഹാമുനിഃ ।
ആപൃഷ്ട്വാ തൌ ച രാജാനൌ ജഗാമോത്തരപർവതമ് ॥ 1 ॥
ആശീര്ഭിഃ പൂരയിത്വാ ച കുമാരാംശ്ച സരാഘവാന് ।
വിശ്വാമിത്രേ ഗതേ രാജാ വൈദേഹം മിഥിലാധിപമ് ।
ആപൃഷ്ട്വാഽഥ ജഗാമാശു രാജാ ദശരഥഃ പുരീമ് ॥ 2 ॥
ഗച്ഛംതം തം തു രാജാനമന്വഗച്ഛന്നരാധിപഃ ॥ 3 ॥
അഥ രാജാ വിദേഹാനാം ദദൌ കന്യാധനം ബഹു ।
ഗവാം ശതസഹസ്രാണി ബഹൂനി മിഥിലേശ്വരഃ ।
കംബലാനാം ച മുഖ്യാനാം ക്ഷൌമകോട്യംബരാണി ച ॥ 4 ॥
ഹസ്ത്യശ്വരഥപാദാതം ദിവ്യരൂപം സ്വലംകൃതമ് ।
ദദൌ കന്യാപിതാ താസാം ദാസീദാസമനുത്തമമ് ॥ 5 ॥
ഹിരണ്യസ്യ സുവര്ണസ്യ മുക്താനാം വിദ്രുമസ്യ ച ॥ 6 ॥
ദദൌ പരമസംഹൃഷ്ടഃ കന്യാധനമനുത്തമമ് ।
ദത്ത്വാ ബഹു ധനം രാജാ സമനുജ്ഞാപ്യ പാര്ഥിവമ് ॥ 7 ॥
പ്രവിവേശ സ്വനിലയം മിഥിലാം മിഥിലേശ്വരഃ ।
രാജാഽപ്യയോധ്യാധിപതിസ്സഹ പുത്രൈര്മഹാത്മഭിഃ ।
ഋഷീന് സർവാന് പുരസ്കൃത്യ ജഗാമ സബലാനുഗഃ ॥ 8 ॥
ഗച്ഛംതം തം നരവ്യാഘ്രം സര്ഷിസംഘം സരാഘവമ് ॥ 9 ॥
ഘോരാഃ സ്മ പക്ഷിണോ വാചോ വ്യാഹരംതി തതസ്തതഃ ।
ഭൌമാശ്ചൈവ മൃഗാ സ്സർവേ ഗച്ഛംതി സ്മ പ്രദക്ഷിണമ് ॥ 10 ॥
താന് ദൃഷ്ട്വാ രാജശാര്ദൂലോ വസിഷ്ഠം പര്യപൃച്ഛത ।
അസൌമ്യാഃ പക്ഷിണോ ഘോരാ മൃഗാശ്ചാപി പ്രദക്ഷിണാഃ ॥ 11 ॥
കിമിദം ഹൃദയോത്കംപി മനോ മമ വിഷീദതി ।
രാജ്ഞോ ദശരഥസ്യൈതച്ഛ്രുത്വാ വാക്യം മഹാനൃഷിഃ ॥ 12 ॥
ഉവാച മധുരാം വാണീം ശ്രൂയതാമസ്യ യത്ഫലമ് ।
ഉപസ്ഥിതം ഭയം ഘോരം ദിവ്യം പക്ഷിമുഖാച്ച്യുതമ് ॥ 13 ॥
മൃഗാഃ പ്രശമയംത്യേതേ സംതാപസ്ത്യജ്യതാമയമ് ।
തേഷാം സംവദതാം തത്ര വായുഃ പ്രാദുര്ബഭൂവ ഹ ॥ 14 ॥
കംപയന് പൃഥിവീം സർവാം പാതയംശ്ച ദ്രുമാംച്ഛുഭാന് ।
തമസാ സംവൃതസ്സൂര്യ സ്സർവാ ന പ്രബഭുര്ദിശ ॥ 15 ॥
ഭസ്മനാ ചാവൃതം സർവം സംമൂഢമിവ തദ്ബലമ് ।
വസിഷ്ഠശ്ചര്ഷയശ്ചാന്യേ രാജാ ച സസുതസ്തദാ ॥ 16 ॥
സംസജ്ഞാ ഇവ തത്രാസന് സർവമന്യദ്വിചേതനമ് ।
തസ്മിംസ്തമസി ഘോരേ തു ഭസ്മച്ഛന്നേവ സാ ചമൂഃ ॥ 17 ॥
ദദര്ശ ഭീമസംകാശം ജടാമംഡലധാരിണമ് ।
ഭാര്ഗവം ജാമദഗ്ന്യം തം രാജരാജവിമര്ദിനമ് ॥ 18 ॥
കൈലാസമിവ ദുര്ധര്ഷം കാലാഗ്നിമിവ ദുസ്സഹമ് ।
ജ്വലംതമിവ തേജോഭിര്ദുര്നിരീക്ഷ്യം പൃഥഗ്ജനൈഃ ॥ 19 ॥
സ്കംധേ ചാസജ്യ പരശും ധനുർവിദ്യുദ്ഗണോപമമ് ।
പ്രഗൃഹ്യ ശരമുഖ്യം ച ത്രിപുരഘ്നം യഥാ ശിവമ് ॥ 20 ॥
തം ദൃഷ്ട്വാ ഭീമസംകാശം ജ്വലംതമിവ പാവകമ് ।
വസിഷ്ഠപ്രമുഖാ വിപ്രാ ജപഹോമപരായണാഃ ॥ 21 ॥
സംഗതാ മുനയസ്സർവേ സംജജല്പുരഥോ മിഥഃ ।
കച്ചിത്പിതൃവധാമര്ഷീ ക്ഷത്രം നോത്സാദയിഷ്യതി ॥ 22 ॥
പൂർവം ക്ഷത്രവധം കൃത്വാ ഗതമന്യുര്ഗതജ്വരഃ ।
ക്ഷത്രസ്യോത്സാദനം ഭൂയോ ന ഖല്വസ്യ ചികീര്ഷിതമ് ॥ 23 ॥
ഏവമുക്ത്വാഽര്ഘ്യമാദായ ഭാര്ഗവം ഭീമദര്ശനമ് ।
ഋഷയോ രാമ രാമേതി വചോ മധുരമബ്രുവന് ॥ 24 ॥
പ്രതിഗൃഹ്യ തു താം പൂജാമൃഷിദത്താം പ്രതാപവാന് ।
രാമം ദാശരഥിം രാമോ ജാമദഗ്ന്യോഽഭ്യഭാഷത ॥ 25 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ ബാലകാംഡേ ചതുഃസപ്തതിതമസ്സര്ഗഃ ॥
