శ్రీమద్వాల్మీకీయ రామాయణే బాలకాండమ్ ।
అథ చతుఃసప్తతితమస్సర్గః ।
అథ రాత్ర్యాం వ్యతీతాయాం విశ్వామిత్రో మహామునిః ।
ఆపృష్ట్వా తౌ చ రాజానౌ జగామోత్తరపర్వతమ్ ॥ 1 ॥
ఆశీర్భిః పూరయిత్వా చ కుమారాంశ్చ సరాఘవాన్ ।
విశ్వామిత్రే గతే రాజా వైదేహం మిథిలాధిపమ్ ।
ఆపృష్ట్వాఽథ జగామాశు రాజా దశరథః పురీమ్ ॥ 2 ॥
గచ్ఛంతం తం తు రాజానమన్వగచ్ఛన్నరాధిపః ॥ 3 ॥
అథ రాజా విదేహానాం దదౌ కన్యాధనం బహు ।
గవాం శతసహస్రాణి బహూని మిథిలేశ్వరః ।
కంబలానాం చ ముఖ్యానాం క్షౌమకోట్యంబరాణి చ ॥ 4 ॥
హస్త్యశ్వరథపాదాతం దివ్యరూపం స్వలంకృతమ్ ।
దదౌ కన్యాపితా తాసాం దాసీదాసమనుత్తమమ్ ॥ 5 ॥
హిరణ్యస్య సువర్ణస్య ముక్తానాం విద్రుమస్య చ ॥ 6 ॥
దదౌ పరమసంహృష్టః కన్యాధనమనుత్తమమ్ ।
దత్త్వా బహు ధనం రాజా సమనుజ్ఞాప్య పార్థివమ్ ॥ 7 ॥
ప్రవివేశ స్వనిలయం మిథిలాం మిథిలేశ్వరః ।
రాజాఽప్యయోధ్యాధిపతిస్సహ పుత్రైర్మహాత్మభిః ।
ఋషీన్ సర్వాన్ పురస్కృత్య జగామ సబలానుగః ॥ 8 ॥
గచ్ఛంతం తం నరవ్యాఘ్రం సర్షిసంఘం సరాఘవమ్ ॥ 9 ॥
ఘోరాః స్మ పక్షిణో వాచో వ్యాహరంతి తతస్తతః ।
భౌమాశ్చైవ మృగా స్సర్వే గచ్ఛంతి స్మ ప్రదక్షిణమ్ ॥ 10 ॥
తాన్ దృష్ట్వా రాజశార్దూలో వసిష్ఠం పర్యపృచ్ఛత ।
అసౌమ్యాః పక్షిణో ఘోరా మృగాశ్చాపి ప్రదక్షిణాః ॥ 11 ॥
కిమిదం హృదయోత్కంపి మనో మమ విషీదతి ।
రాజ్ఞో దశరథస్యైతచ్ఛ్రుత్వా వాక్యం మహానృషిః ॥ 12 ॥
ఉవాచ మధురాం వాణీం శ్రూయతామస్య యత్ఫలమ్ ।
ఉపస్థితం భయం ఘోరం దివ్యం పక్షిముఖాచ్చ్యుతమ్ ॥ 13 ॥
మృగాః ప్రశమయంత్యేతే సంతాపస్త్యజ్యతామయమ్ ।
తేషాం సంవదతాం తత్ర వాయుః ప్రాదుర్బభూవ హ ॥ 14 ॥
కంపయన్ పృథివీం సర్వాం పాతయంశ్చ ద్రుమాంచ్ఛుభాన్ ।
తమసా సంవృతస్సూర్య స్సర్వా న ప్రబభుర్దిశ ॥ 15 ॥
భస్మనా చావృతం సర్వం సంమూఢమివ తద్బలమ్ ।
వసిష్ఠశ్చర్షయశ్చాన్యే రాజా చ ససుతస్తదా ॥ 16 ॥
సంసజ్ఞా ఇవ తత్రాసన్ సర్వమన్యద్విచేతనమ్ ।
తస్మింస్తమసి ఘోరే తు భస్మచ్ఛన్నేవ సా చమూః ॥ 17 ॥
దదర్శ భీమసంకాశం జటామండలధారిణమ్ ।
భార్గవం జామదగ్న్యం తం రాజరాజవిమర్దినమ్ ॥ 18 ॥
కైలాసమివ దుర్ధర్షం కాలాగ్నిమివ దుస్సహమ్ ।
జ్వలంతమివ తేజోభిర్దుర్నిరీక్ష్యం పృథగ్జనైః ॥ 19 ॥
స్కంధే చాసజ్య పరశుం ధనుర్విద్యుద్గణోపమమ్ ।
ప్రగృహ్య శరముఖ్యం చ త్రిపురఘ్నం యథా శివమ్ ॥ 20 ॥
తం దృష్ట్వా భీమసంకాశం జ్వలంతమివ పావకమ్ ।
వసిష్ఠప్రముఖా విప్రా జపహోమపరాయణాః ॥ 21 ॥
సంగతా మునయస్సర్వే సంజజల్పురథో మిథః ।
కచ్చిత్పితృవధామర్షీ క్షత్రం నోత్సాదయిష్యతి ॥ 22 ॥
పూర్వం క్షత్రవధం కృత్వా గతమన్యుర్గతజ్వరః ।
క్షత్రస్యోత్సాదనం భూయో న ఖల్వస్య చికీర్షితమ్ ॥ 23 ॥
ఏవముక్త్వాఽర్ఘ్యమాదాయ భార్గవం భీమదర్శనమ్ ।
ఋషయో రామ రామేతి వచో మధురమబ్రువన్ ॥ 24 ॥
ప్రతిగృహ్య తు తాం పూజామృషిదత్తాం ప్రతాపవాన్ ।
రామం దాశరథిం రామో జామదగ్న్యోఽభ్యభాషత ॥ 25 ॥
ఇత్యార్షే శ్రీమద్రామాయణే వాల్మీకీయ ఆదికావ్యే బాలకాండే చతుఃసప్తతితమస్సర్గః ॥
