śrīmadvālmīkīya rāmāyaṇē bālakāṇḍam ।
atha chatuḥsaptatitamassargaḥ ।
atha rātryāṃ vyatītāyāṃ viśvāmitrō mahāmuniḥ ।
āpṛṣṭvā tau cha rājānau jagāmōttaraparvatam ॥ 1 ॥
āśīrbhiḥ pūrayitvā cha kumārāṃścha sarāghavān ।
viśvāmitrē gatē rājā vaidēhaṃ mithilādhipam ।
āpṛṣṭvā'tha jagāmāśu rājā daśarathaḥ purīm ॥ 2 ॥
gachChantaṃ taṃ tu rājānamanvagachChannarādhipaḥ ॥ 3 ॥
atha rājā vidēhānāṃ dadau kanyādhanaṃ bahu ।
gavāṃ śatasahasrāṇi bahūni mithilēśvaraḥ ।
kambalānāṃ cha mukhyānāṃ kṣaumakōṭyambarāṇi cha ॥ 4 ॥
hastyaśvarathapādātaṃ divyarūpaṃ svalaṅkṛtam ।
dadau kanyāpitā tāsāṃ dāsīdāsamanuttamam ॥ 5 ॥
hiraṇyasya suvarṇasya muktānāṃ vidrumasya cha ॥ 6 ॥
dadau paramasaṃhṛṣṭaḥ kanyādhanamanuttamam ।
dattvā bahu dhanaṃ rājā samanujñāpya pārthivam ॥ 7 ॥
pravivēśa svanilayaṃ mithilāṃ mithilēśvaraḥ ।
rājā'pyayōdhyādhipatissaha putrairmahātmabhiḥ ।
ṛṣīn sarvān puraskṛtya jagāma sabalānugaḥ ॥ 8 ॥
gachChantaṃ taṃ naravyāghraṃ sarṣisaṅghaṃ sarāghavam ॥ 9 ॥
ghōrāḥ sma pakṣiṇō vāchō vyāharanti tatastataḥ ।
bhaumāśchaiva mṛgā ssarvē gachChanti sma pradakṣiṇam ॥ 10 ॥
tān dṛṣṭvā rājaśārdūlō vasiṣṭhaṃ paryapṛchChata ।
asaumyāḥ pakṣiṇō ghōrā mṛgāśchāpi pradakṣiṇāḥ ॥ 11 ॥
kimidaṃ hṛdayōtkampi manō mama viṣīdati ।
rājñō daśarathasyaitachChrutvā vākyaṃ mahānṛṣiḥ ॥ 12 ॥
uvācha madhurāṃ vāṇīṃ śrūyatāmasya yatphalam ।
upasthitaṃ bhayaṃ ghōraṃ divyaṃ pakṣimukhāchchyutam ॥ 13 ॥
mṛgāḥ praśamayantyētē santāpastyajyatāmayam ।
tēṣāṃ saṃvadatāṃ tatra vāyuḥ prādurbabhūva ha ॥ 14 ॥
kampayan pṛthivīṃ sarvāṃ pātayaṃścha drumāñchChubhān ।
tamasā saṃvṛtassūrya ssarvā na prababhurdiśa ॥ 15 ॥
bhasmanā chāvṛtaṃ sarvaṃ sammūḍhamiva tadbalam ।
vasiṣṭhaścharṣayaśchānyē rājā cha sasutastadā ॥ 16 ॥
saṃsajñā iva tatrāsan sarvamanyadvichētanam ।
tasmiṃstamasi ghōrē tu bhasmachChannēva sā chamūḥ ॥ 17 ॥
dadarśa bhīmasaṅkāśaṃ jaṭāmaṇḍaladhāriṇam ।
bhārgavaṃ jāmadagnyaṃ taṃ rājarājavimardinam ॥ 18 ॥
kailāsamiva durdharṣaṃ kālāgnimiva dussaham ।
jvalantamiva tējōbhirdurnirīkṣyaṃ pṛthagjanaiḥ ॥ 19 ॥
skandhē chāsajya paraśuṃ dhanurvidyudgaṇōpamam ।
pragṛhya śaramukhyaṃ cha tripuraghnaṃ yathā śivam ॥ 20 ॥
taṃ dṛṣṭvā bhīmasaṅkāśaṃ jvalantamiva pāvakam ।
vasiṣṭhapramukhā viprā japahōmaparāyaṇāḥ ॥ 21 ॥
saṅgatā munayassarvē sañjajalpurathō mithaḥ ।
kachchitpitṛvadhāmarṣī kṣatraṃ nōtsādayiṣyati ॥ 22 ॥
pūrvaṃ kṣatravadhaṃ kṛtvā gatamanyurgatajvaraḥ ।
kṣatrasyōtsādanaṃ bhūyō na khalvasya chikīrṣitam ॥ 23 ॥
ēvamuktvā'rghyamādāya bhārgavaṃ bhīmadarśanam ।
ṛṣayō rāma rāmēti vachō madhuramabruvan ॥ 24 ॥
pratigṛhya tu tāṃ pūjāmṛṣidattāṃ pratāpavān ।
rāmaṃ dāśarathiṃ rāmō jāmadagnyō'bhyabhāṣata ॥ 25 ॥
ityārṣē śrīmadrāmāyaṇē vālmīkīya ādikāvyē bālakāṇḍē chatuḥsaptatitamassargaḥ ॥
