ശ്രീമദ്വാല്മീകീയ രാമായണേ അയോധ്യാകാംഡമ് ।
അഥ ഏകപംചാശസ്സര്ഗഃ ।
തം ജാഗ്രതമദംഭേന ഭ്രാതുരര്ഥായ ലക്ഷ്മണമ് ।
ഗുഹഃ സംതാപസംതപ്തോ രാഘവം വാക്യമബ്രവീത് ॥ 1 ॥
ഇയം താത സുഖാ ശയ്യാ ത്വദര്ഥമുപകല്പിതാ ।
പ്രത്യാശ്വസിഹി സാധ്വസ്യാം രാജപുത്ര യഥാസുഖമ് ॥ 2 ॥
ഉചിതോഽയം ജനസ്സർവഃ ക്ലേശാനാം ത്വം സുഖോചിതഃ ।
ഗുപ്ത്യര്ഥം ജാഗരിഷ്യാമഃ കാകുത്സ്ഥസ്യ വയം നിശാമ് ॥ 3 ॥
ന ഹി രാമാത്പ്രിയതമോ മമാസ്തി ഭുവി കശ്ചന ।
ബ്രവീമ്യേതദഹം സത്യം സത്യേനൈവ ച തേ ശപേ ॥ 4 ॥
അസ്യ പ്രസാദാദാശംസേ ലോകേസ്മിന് സുമുഹദ്യശഃ ।
ധര്മാവാപ്തിം ച വിപുലാമര്ഥാവാപ്തിം ച കേവലമ് ॥ 5 ॥
സോഽഹം പ്രിയസഖം രാമം ശയാനം സഹ സീതയാ ।
രക്ഷിഷ്യാമി ധനുഷ്പാണി സ്സർവതോ ജ്ഞാതിഭി സ്സഹ ॥ 6 ॥
ന ഹി മേഽവിദിതം കിംചിദ്വനേഽസ്മിംശ്ചരതസ്സദാ ।
ചതുരംഗം ഹ്യപിബലം സുമഹത്പ്രസഹേമഹി ॥ 7 ॥
ലക്ഷ്മണസ്തം തദോവാച രക്ഷ്യമാണാസ്ത്വയാനഘ ।
നാത്ര ഭീതാ വയം സർവേ ധര്മമേവാനുപശ്യതാ ॥ 8 ॥
കഥം ദശരഥൌ ഭൂമൌ ശയാനേ സഹ സീതയാ ।
ശക്യാ നിദ്രാ മയാ ലബ്ധും ജീവിതം വാ സുഖാനി വാ ॥ 9 ॥
യോ ന ദേവാസുരൈഃ സർവൈഃ ശക്യഃ പ്രസഹിതും യുധി ।
തം പശ്യ സുഖസംവിഷ്ടം തൃണേഷു സഹ സീതയാ ॥ 10 ॥
യോ മംത്രതപസാ ലബ്ധോ വിവിധൈശ്ച പരാശ്രമൈഃ ।
ഏകോ ദശരഥസ്യേഷ്ടഃ പുത്രഃ സദൃശലക്ഷണഃ ॥ 11 ॥
അസ്മിന് പ്രവ്രാജിതേ രാജാ ന ചിരം വര്തയിഷ്യതി ।
വിധവാ മേദിനീ നൂനം ക്ഷിപ്രമേവ ഭവിഷ്യതി ॥ 12 ॥
വിനദ്യ സുമഹാനാദം ശ്രമേണോപരതാഃ സ്ത്രിയഃ ।
നിര്ഘോഷോപരതം ചാതോ മന്യേ രാജനിവേശനമ് ॥ 13 ॥
കൌശല്യാ ചൈവ രാജാ ച തഥൈവ ജനനീ മമ ।
നാശംസേ യദി ജീവംതി സർവേ തേ ശർവരീമിമാമ് ॥ 14 ॥
ജീവേദപി ഹി മേ മാതാ ശത്രുഘ്നസ്യാന്വവേക്ഷയാ ।
തദ്ദുഃഖം യത്തു കൌശല്യാ വീരസൂർവിനശിഷ്യതി ॥ 15 ॥
അനുരക്തജനാകീര്ണാ സുഖാലോകപ്രിയാവഹാ ।
രാജവ്യസനസംസൃഷ്ടാ സാ പുരീ വിനശിഷ്യതി ॥ 16 ॥
കഥം പുത്രം മഹാത്മാനം ജ്യേഷ്ഠം പ്രിയമപശ്യതഃ ।
ശരീരം ധാരയിഷ്യംതി പ്രാണാ രാജ്ഞോ മഹാത്മനഃ ॥ 17 ॥
വിനഷ്ടേ നൃപതൌ പശ്ചാത്കൌസല്യാ വിനശിഷ്യതി ।
അനംതരം ച മാതാഽപി മമ നാശമുപൈഷ്യതി ॥ 18 ॥
അതിക്രാംതമതിക്രാംതമനവാപ്യ മനോരഥമ് ।
രാജ്യേ രാമമനിക്ഷിപ്യ പിതാ മേ വിനശിഷ്യതി ॥ 19 ॥
സിദ്ധാര്ഥാഃ പിതരം വൃത്തം തസ്മിന്കാലേഽപ്യുപസ്ഥിതേ ।
പ്രേതകാര്യേഷു സർവേഷു സംസ്കരിഷ്യംതി ഭൂമിപമ് ॥ 20 ॥
രമ്യചത്വരസംസ്ഥാനാം സുവിഭക്തമഹാപഥാമ് ।
ഹര്മ്യപ്രാസാദസംപന്നാം ഗണികാവരശോഭിതാമ് ॥ 21 ॥
രഥാശ്വഗജസംബാധാം തൂര്യനാദവിനാദിതാമ് ।
സർവകല്യാണസംപൂര്ണാം ഹൃഷ്ടപുഷ്ടജനാകുലാമ് ॥ 22 ॥
ആരാമോദ്യാനസംപന്നാം സമാജോത്സവശാലിനീമ് ।
സുഖിതാ വിചരിഷ്യംതി രാജധാനീം പിതുര്മമ ॥ 23 ॥
അപി ജീവേദ്ദശരഥോ വനവാസാത്പുനർവയമ് ।
പ്രത്യാഗമ്യ മഹാത്മാനമപി പശ്യേമ സുവ്രതമ് ॥ 24 ॥
അപി സത്യപ്രതിജ്ഞേന സാര്ധം കുശലിനാ വയമ് ।
നിവൃത്തേ വനവാസേഽസ്മിന്നയോധ്യാം പ്രവിശേമഹി ॥ 25 ॥
പരിദേവയമാനസ്യ ദുഖാര്തസ്യ മഹാത്മനഃ ।
തിഷ്ഠതോ രാജപുത്രസ്യ ശർവരീ സാഽത്യവര്തത ॥ 26 ॥
തഥാ ഹി സത്യം ബ്രുവതി പ്രജാഹിതേ നരേംദ്രപുത്രേ ഗുരുസൌഹൃദാദ്ഗുഹഃ ।
മുമോച ബാഷ്പം വ്യസനാഭിപീഡിതോ ജ്വരാതുരോ നാഗ ഇവ വ്യഥാതുരഃ ॥ 27 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ അയോധ്യാകാംഡേ ഏകപംചാശസ്സര്ഗഃ ॥
