śrīmadvālmīkīya rāmāyaṇē ayōdhyākāṇḍam ।
atha ēkapañchāśassargaḥ ।
taṃ jāgratamadambhēna bhrāturarthāya lakṣmaṇam ।
guhaḥ santāpasantaptō rāghavaṃ vākyamabravīt ॥ 1 ॥
iyaṃ tāta sukhā śayyā tvadarthamupakalpitā ।
pratyāśvasihi sādhvasyāṃ rājaputra yathāsukham ॥ 2 ॥
uchitō'yaṃ janassarvaḥ klēśānāṃ tvaṃ sukhōchitaḥ ।
guptyarthaṃ jāgariṣyāmaḥ kākutsthasya vayaṃ niśām ॥ 3 ॥
na hi rāmātpriyatamō mamāsti bhuvi kaśchana ।
bravīmyētadahaṃ satyaṃ satyēnaiva cha tē śapē ॥ 4 ॥
asya prasādādāśaṃsē lōkēsmin sumuhadyaśaḥ ।
dharmāvāptiṃ cha vipulāmarthāvāptiṃ cha kēvalam ॥ 5 ॥
sō'haṃ priyasakhaṃ rāmaṃ śayānaṃ saha sītayā ।
rakṣiṣyāmi dhanuṣpāṇi ssarvatō jñātibhi ssaha ॥ 6 ॥
na hi mē'viditaṃ kiñchidvanē'smiṃścharatassadā ।
chaturaṅgaṃ hyapibalaṃ sumahatprasahēmahi ॥ 7 ॥
lakṣmaṇastaṃ tadōvācha rakṣyamāṇāstvayānagha ।
nātra bhītā vayaṃ sarvē dharmamēvānupaśyatā ॥ 8 ॥
kathaṃ daśarathau bhūmau śayānē saha sītayā ।
śakyā nidrā mayā labdhuṃ jīvitaṃ vā sukhāni vā ॥ 9 ॥
yō na dēvāsuraiḥ sarvaiḥ śakyaḥ prasahituṃ yudhi ।
taṃ paśya sukhasaṃviṣṭaṃ tṛṇēṣu saha sītayā ॥ 10 ॥
yō mantratapasā labdhō vividhaiścha parāśramaiḥ ।
ēkō daśarathasyēṣṭaḥ putraḥ sadṛśalakṣaṇaḥ ॥ 11 ॥
asmin pravrājitē rājā na chiraṃ vartayiṣyati ।
vidhavā mēdinī nūnaṃ kṣipramēva bhaviṣyati ॥ 12 ॥
vinadya sumahānādaṃ śramēṇōparatāḥ striyaḥ ।
nirghōṣōparataṃ chātō manyē rājanivēśanam ॥ 13 ॥
kauśalyā chaiva rājā cha tathaiva jananī mama ।
nāśaṃsē yadi jīvanti sarvē tē śarvarīmimām ॥ 14 ॥
jīvēdapi hi mē mātā śatrughnasyānvavēkṣayā ।
tadduḥkhaṃ yattu kauśalyā vīrasūrvinaśiṣyati ॥ 15 ॥
anuraktajanākīrṇā sukhālōkapriyāvahā ।
rājavyasanasaṃsṛṣṭā sā purī vinaśiṣyati ॥ 16 ॥
kathaṃ putraṃ mahātmānaṃ jyēṣṭhaṃ priyamapaśyataḥ ।
śarīraṃ dhārayiṣyanti prāṇā rājñō mahātmanaḥ ॥ 17 ॥
vinaṣṭē nṛpatau paśchātkausalyā vinaśiṣyati ।
anantaraṃ cha mātā'pi mama nāśamupaiṣyati ॥ 18 ॥
atikrāntamatikrāntamanavāpya manōratham ।
rājyē rāmamanikṣipya pitā mē vinaśiṣyati ॥ 19 ॥
siddhārthāḥ pitaraṃ vṛttaṃ tasminkālē'pyupasthitē ।
prētakāryēṣu sarvēṣu saṃskariṣyanti bhūmipam ॥ 20 ॥
ramyachatvarasaṃsthānāṃ suvibhaktamahāpathām ।
harmyaprāsādasampannāṃ gaṇikāvaraśōbhitām ॥ 21 ॥
rathāśvagajasambādhāṃ tūryanādavināditām ।
sarvakalyāṇasampūrṇāṃ hṛṣṭapuṣṭajanākulām ॥ 22 ॥
ārāmōdyānasampannāṃ samājōtsavaśālinīm ।
sukhitā vichariṣyanti rājadhānīṃ piturmama ॥ 23 ॥
api jīvēddaśarathō vanavāsātpunarvayam ।
pratyāgamya mahātmānamapi paśyēma suvratam ॥ 24 ॥
api satyapratijñēna sārdhaṃ kuśalinā vayam ।
nivṛttē vanavāsē'sminnayōdhyāṃ praviśēmahi ॥ 25 ॥
paridēvayamānasya dukhārtasya mahātmanaḥ ।
tiṣṭhatō rājaputrasya śarvarī sā'tyavartata ॥ 26 ॥
tathā hi satyaṃ bruvati prajāhitē narēndraputrē gurusauhṛdādguhaḥ ।
mumōcha bāṣpaṃ vyasanābhipīḍitō jvarāturō nāga iva vyathāturaḥ ॥ 27 ॥
ityārṣē śrīmadrāmāyaṇē vālmīkīya ādikāvyē ayōdhyākāṇḍē ēkapañchāśassargaḥ ॥
