ශ්රීමද්වාල්මීකීය රාමායණේ අයෝධ්යාකාංඩම් ।
අථ ඒකපංචාශස්සර්ගඃ ।
තං ජාග්රතමදංභේන භ්රාතුරර්ථාය ලක්ෂ්මණම් ।
ගුහඃ සංතාපසංතප්තෝ රාඝවං වාක්යමබ්රවීත් ॥ 1 ॥
ඉයං තාත සුඛා ශය්යා ත්වදර්ථමුපකල්පිතා ।
ප්රත්යාශ්වසිහි සාධ්වස්යාං රාජපුත්ර යථාසුඛම් ॥ 2 ॥
උචිතෝऽයං ජනස්සර්වඃ ක්ලේශානාං ත්වං සුඛෝචිතඃ ।
ගුප්ත්යර්ථං ජාගරිෂ්යාමඃ කාකුත්ස්ථස්ය වයං නිශාම් ॥ 3 ॥
න හි රාමාත්ප්රියතමෝ මමාස්ති භුවි කශ්චන ।
බ්රවීම්යේතදහං සත්යං සත්යේනෛව ච තේ ශපේ ॥ 4 ॥
අස්ය ප්රසාදාදාශංසේ ලෝකේස්මින් සුමුහද්යශඃ ।
ධර්මාවාප්තිං ච විපුලාමර්ථාවාප්තිං ච කේවලම් ॥ 5 ॥
සෝऽහං ප්රියසඛං රාමං ශයානං සහ සීතයා ।
රක්ෂිෂ්යාමි ධනුෂ්පාණි ස්සර්වතෝ ජ්ඤාතිභි ස්සහ ॥ 6 ॥
න හි මේऽවිදිතං කිංචිද්වනේऽස්මිංශ්චරතස්සදා ।
චතුරංගං හ්යපිබලං සුමහත්ප්රසහේමහි ॥ 7 ॥
ලක්ෂ්මණස්තං තදෝවාච රක්ෂ්යමාණාස්ත්වයානඝ ।
නාත්ර භීතා වයං සර්වේ ධර්මමේවානුපශ්යතා ॥ 8 ॥
කථං දශරථෞ භූමෞ ශයානේ සහ සීතයා ।
ශක්යා නිද්රා මයා ලබ්ධුං ජීවිතං වා සුඛානි වා ॥ 9 ॥
යෝ න දේවාසුරෛඃ සර්වෛඃ ශක්යඃ ප්රසහිතුං යුධි ।
තං පශ්ය සුඛසංවිෂ්ටං තෘණේෂු සහ සීතයා ॥ 10 ॥
යෝ මංත්රතපසා ලබ්ධෝ විවිධෛශ්ච පරාශ්රමෛඃ ।
ඒකෝ දශරථස්යේෂ්ටඃ පුත්රඃ සදෘශලක්ෂණඃ ॥ 11 ॥
අස්මින් ප්රව්රාජිතේ රාජා න චිරං වර්තයිෂ්යති ।
විධවා මේදිනී නූනං ක්ෂිප්රමේව භවිෂ්යති ॥ 12 ॥
විනද්ය සුමහානාදං ශ්රමේණෝපරතාඃ ස්ත්රියඃ ।
නිර්ඝෝෂෝපරතං චාතෝ මන්යේ රාජනිවේශනම් ॥ 13 ॥
කෞශල්යා චෛව රාජා ච තථෛව ජනනී මම ।
නාශංසේ යදි ජීවංති සර්වේ තේ ශර්වරීමිමාම් ॥ 14 ॥
ජීවේදපි හි මේ මාතා ශත්රුඝ්නස්යාන්වවේක්ෂයා ।
තද්දුඃඛං යත්තු කෞශල්යා වීරසූර්විනශිෂ්යති ॥ 15 ॥
අනුරක්තජනාකීර්ණා සුඛාලෝකප්රියාවහා ।
රාජව්යසනසංසෘෂ්ටා සා පුරී විනශිෂ්යති ॥ 16 ॥
කථං පුත්රං මහාත්මානං ජ්යේෂ්ඨං ප්රියමපශ්යතඃ ।
ශරීරං ධාරයිෂ්යංති ප්රාණා රාජ්ඤෝ මහාත්මනඃ ॥ 17 ॥
විනෂ්ටේ නෘපතෞ පශ්චාත්කෞසල්යා විනශිෂ්යති ।
අනංතරං ච මාතාऽපි මම නාශමුපෛෂ්යති ॥ 18 ॥
අතික්රාංතමතික්රාංතමනවාප්ය මනෝරථම් ।
රාජ්යේ රාමමනික්ෂිප්ය පිතා මේ විනශිෂ්යති ॥ 19 ॥
සිද්ධාර්ථාඃ පිතරං වෘත්තං තස්මින්කාලේऽප්යුපස්ථිතේ ।
ප්රේතකාර්යේෂු සර්වේෂු සංස්කරිෂ්යංති භූමිපම් ॥ 20 ॥
රම්යචත්වරසංස්ථානාං සුවිභක්තමහාපථාම් ।
හර්ම්යප්රාසාදසංපන්නාං ගණිකාවරශෝභිතාම් ॥ 21 ॥
රථාශ්වගජසංබාධාං තූර්යනාදවිනාදිතාම් ।
සර්වකල්යාණසංපූර්ණාං හෘෂ්ටපුෂ්ටජනාකුලාම් ॥ 22 ॥
ආරාමෝද්යානසංපන්නාං සමාජෝත්සවශාලිනීම් ।
සුඛිතා විචරිෂ්යංති රාජධානීං පිතුර්මම ॥ 23 ॥
අපි ජීවේද්දශරථෝ වනවාසාත්පුනර්වයම් ।
ප්රත්යාගම්ය මහාත්මානමපි පශ්යේම සුව්රතම් ॥ 24 ॥
අපි සත්යප්රතිජ්ඤේන සාර්ධං කුශලිනා වයම් ।
නිවෘත්තේ වනවාසේऽස්මින්නයෝධ්යාං ප්රවිශේමහි ॥ 25 ॥
පරිදේවයමානස්ය දුඛාර්තස්ය මහාත්මනඃ ।
තිෂ්ඨතෝ රාජපුත්රස්ය ශර්වරී සාऽත්යවර්තත ॥ 26 ॥
තථා හි සත්යං බ්රුවති ප්රජාහිතේ නරේංද්රපුත්රේ ගුරුසෞහෘදාද්ගුහඃ ।
මුමෝච බාෂ්පං ව්යසනාභිපීඩිතෝ ජ්වරාතුරෝ නාග ඉව ව්යථාතුරඃ ॥ 27 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අයෝධ්යාකාංඩේ ඒකපංචාශස්සර්ගඃ ॥
