śrīmadvālmīkīya rāmāyaṇē ayōdhyākāṇḍam ।
atha ṣaṣṭhassargaḥ ।
gatē purōhitē rāmaḥ snātō niyatamānasaḥ ।
saha patnyā viśālākṣyā nārāyaṇamupāgamat ॥ 1 ॥
pragṛhya śirasā pātrīṃ haviṣō vidhivattadā ।
mahatē daivatāyājyaṃ juhāva jvalitē'nalē ॥ 2 ॥
śēṣaṃ cha haviṣastasya prāśyāśāsyātmanaḥ priyam ।
dhyāyannārāyaṇaṃ dēvaṃ svāstīrṇē kuśasaṃstarē ॥ 3 ॥
vāgyata ssaha vaidēhyā bhūtvā niyatamānasaḥ ।
śrīmatyāyatanē viṣṇō śśiśyē naravarātmajaḥ ॥ 4 ॥
ēkayāmāvaśiṣṭāyāṃ rātryāṃ prativibuddhya saḥ ।
alaṅkāravidhiṃ kṛtsnaṃ kārayāmāsa vēśmanaḥ ॥ 5 ॥
tatra śrṛṇvansukhā vācha ssūtamāgadhavandinām ।
pūrvāṃ sadhyāmupāsīnō jajāpa yatamānasaḥ ॥ 6 ॥
tuṣṭāva praṇataśchaiva śirasā madhusūdanam ।
vimalakṣaumasaṃvītō vāchayāmāsa sa dvijān ॥ 7 ॥
tēṣāṃ puṇyāhaghōṣō'tha gambhīramadhurastadā ।
ayōdhyāṃ pūrayāmāsa tūryaghōṣānunāditaḥ ॥ 8 ॥
kṛtōpavāsaṃ tu tadā vaidēhyā saha rāghavam ।
ayōdhyānilayaśśrutvā sarvaḥ pramuditō janaḥ ॥ 9 ॥
tataḥ paurajanassarvaśśrutvā rāmābhiṣēchanam ।
prabhātāṃ rajanīṃ dṛṣṭvā chakrē śōbhayituṃ purīm ॥ 10 ॥
sitābhraśikharābhēṣu dēvatāyatanēṣu cha ।
chatuṣpathēṣu rathyāsu chaityēṣvaṭṭālakēṣu cha ॥ 11 ॥
nānāpaṇyasamṛddhēṣu vaṇijāmāpaṇēṣu cha ।
kuṭumbināṃ samṛddhēṣu śrīmatsu bhavanēṣu cha ॥ 12 ॥
sabhāsu chaiva sarvāsu vṛkṣēṣvālakṣitēṣu cha ।
dhvajā ssamuchChritāśchitrāḥ patākāśchābhavaṃstadā ॥ 13 ॥
naṭanartakasaṅghānāṃ gāyakānāṃ cha gāyatām ।
manaḥ karṇasukhā vācha śśuśṛvuścha tatastataḥ ॥ 14 ॥
rāmābhiṣēkayuktāścha kathāśchakrurmithō janāḥ ।
rāmābhiṣēkē samprāptē chatvarēṣu gṛhēṣu cha ॥ 15 ॥
bālā api krīḍamānā gṛhadvārēṣu saṅghaśaḥ ।
rāmābhiṣavasaṃyuktāśchakrurēvaṃ mithaḥ kathāḥ ॥ 16 ॥
kṛtapuṣpōpahāraścha dhūpagandhādhivāsitaḥ ।
rājamārgaḥ kṛtaḥ śrīmānpaurai rāmābhiṣēchanē ॥ 17 ॥
prakāśakaraṇārthaṃ cha niśāgamanaśaṅkayā ।
dīpavṛkṣāṃ stathā chakruranu rathyāsu sarvaśaḥ ॥ 18 ॥
alaṅkāraṃ purasyaivaṃ kṛtvā tatpuravāsinaḥ ।
ākāṅkṣamāṇā rāmasya yauvarājyābhiṣēchanam ॥ 19 ॥
samētya saṅghaśassarvē chatvarēṣu sabhāsu cha ।
kathayantō mithastatra praśaśaṃsurjanādhipam ॥ 20 ॥
ahō mahātmā rājā'yamikṣvākukulanandanaḥ ।
jñātvā yō vṛddhamātmānaṃ rāmaṃ rājyē'bhiṣēkṣyati ॥ 21 ॥
sarvēpyanugṛhītā smō yannō rāmō mahīpatiḥ ।
chirāya bhavitā gōptā dṛṣṭalōkaparāvaraḥ ॥ 22 ॥
anuddhatamanāḥ vidvāndharmātmā bhrātṛvatsalaḥ ।
yathā cha bhrātṛṣu snigdhastathā'smāsvapi rāghavaḥ ॥ 23 ॥
chiraṃ jīvatu dharmātmā rājā daśarathō'naghaḥ ।
yatprasādōnabhiṣiktaṃ tu rāmaṃ drakṣyāmahē vayam ॥ 24 ॥
ēvaṃvidhaṃ kathayatāṃ paurāṇāṃ śuśruvu stadā ।
digbhyōpi śrutavṛttāntāḥ prāptā jānapadā janāḥ ॥ 25 ॥
tē tu digbhyaḥ purīṃ prāptā draṣṭuṃ rāmābhiṣēchanam ।
rāmasya pūrayāmāsuḥ purīṃ jānapadā janāḥ ॥ 26 ॥
janaughaistairvisarpadbhiḥ śuśruvē tatra nisvanaḥ ।
parvasūdīrṇavēgasya sāgarasyēva nisvanaḥ ॥ 27 ॥
tatastadindrakṣayasannibhaṃ puraṃ didṛkṣubhirjānapadairupāgataiḥ ।
samantata ssasvanamākulaṃ babhau samudrayādōbhirivārṇavōdakam ॥ 28 ॥
ityārṣē śrīmadrāmāyaṇē vālmīkīya ādikāvyē ayōdhyākāṇḍē ṣaṣṭhassargaḥ ॥
