ଶ୍ରୀମଦ୍ଵାଲ୍ମୀକୀୟ ରାମାୟଣେ ଅୟୋଧ୍ୟାକାଂଡମ୍ ।
ଅଥ ଷଷ୍ଠସ୍ସର୍ଗଃ ।
ଗତେ ପୁରୋହିତେ ରାମଃ ସ୍ନାତୋ ନିୟତମାନସଃ ।
ସହ ପତ୍ନ୍ୟା ଵିଶାଲାକ୍ଷ୍ୟା ନାରାୟଣମୁପାଗମତ୍ ॥ 1 ॥
ପ୍ରଗୃହ୍ୟ ଶିରସା ପାତ୍ରୀଂ ହଵିଷୋ ଵିଧିଵତ୍ତଦା ।
ମହତେ ଦୈଵତାୟାଜ୍ୟଂ ଜୁହାଵ ଜ୍ଵଲିତେଽନଲେ ॥ 2 ॥
ଶେଷଂ ଚ ହଵିଷସ୍ତସ୍ୟ ପ୍ରାଶ୍ୟାଶାସ୍ୟାତ୍ମନଃ ପ୍ରିୟମ୍ ।
ଧ୍ୟାୟନ୍ନାରାୟଣଂ ଦେଵଂ ସ୍ଵାସ୍ତୀର୍ଣେ କୁଶସଂସ୍ତରେ ॥ 3 ॥
ଵାଗ୍ୟତ ସ୍ସହ ଵୈଦେହ୍ୟା ଭୂତ୍ଵା ନିୟତମାନସଃ ।
ଶ୍ରୀମତ୍ୟାୟତନେ ଵିଷ୍ଣୋ ଶ୍ଶିଶ୍ୟେ ନରଵରାତ୍ମଜଃ ॥ 4 ॥
ଏକୟାମାଵଶିଷ୍ଟାୟାଂ ରାତ୍ର୍ୟାଂ ପ୍ରତିଵିବୁଦ୍ଧ୍ୟ ସଃ ।
ଅଲଂକାରଵିଧିଂ କୃତ୍ସ୍ନଂ କାରୟାମାସ ଵେଶ୍ମନଃ ॥ 5 ॥
ତତ୍ର ଶ୍ରୃଣ୍ଵନ୍ସୁଖା ଵାଚ ସ୍ସୂତମାଗଧଵଂଦିନାମ୍ ।
ପୂର୍ଵାଂ ସଧ୍ୟାମୁପାସୀନୋ ଜଜାପ ୟତମାନସଃ ॥ 6 ॥
ତୁଷ୍ଟାଵ ପ୍ରଣତଶ୍ଚୈଵ ଶିରସା ମଧୁସୂଦନମ୍ ।
ଵିମଲକ୍ଷୌମସଂଵୀତୋ ଵାଚୟାମାସ ସ ଦ୍ଵିଜାନ୍ ॥ 7 ॥
ତେଷାଂ ପୁଣ୍ୟାହଘୋଷୋଽଥ ଗଂଭୀରମଧୁରସ୍ତଦା ।
ଅୟୋଧ୍ୟାଂ ପୂରୟାମାସ ତୂର୍ୟଘୋଷାନୁନାଦିତଃ ॥ 8 ॥
କୃତୋପଵାସଂ ତୁ ତଦା ଵୈଦେହ୍ୟା ସହ ରାଘଵମ୍ ।
ଅୟୋଧ୍ୟାନିଲୟଶ୍ଶ୍ରୁତ୍ଵା ସର୍ଵଃ ପ୍ରମୁଦିତୋ ଜନଃ ॥ 9 ॥
ତତଃ ପୌରଜନସ୍ସର୍ଵଶ୍ଶ୍ରୁତ୍ଵା ରାମାଭିଷେଚନମ୍ ।
ପ୍ରଭାତାଂ ରଜନୀଂ ଦୃଷ୍ଟ୍ଵା ଚକ୍ରେ ଶୋଭୟିତୁଂ ପୁରୀମ୍ ॥ 10 ॥
ସିତାଭ୍ରଶିଖରାଭେଷୁ ଦେଵତାୟତନେଷୁ ଚ ।
ଚତୁଷ୍ପଥେଷୁ ରଥ୍ୟାସୁ ଚୈତ୍ୟେଷ୍ଵଟ୍ଟାଲକେଷୁ ଚ ॥ 11 ॥
ନାନାପଣ୍ୟସମୃଦ୍ଧେଷୁ ଵଣିଜାମାପଣେଷୁ ଚ ।
କୁଟୁଂବିନାଂ ସମୃଦ୍ଧେଷୁ ଶ୍ରୀମତ୍ସୁ ଭଵନେଷୁ ଚ ॥ 12 ॥
ସଭାସୁ ଚୈଵ ସର୍ଵାସୁ ଵୃକ୍ଷେଷ୍ଵାଲକ୍ଷିତେଷୁ ଚ ।
ଧ୍ଵଜା ସ୍ସମୁଚ୍ଛ୍ରିତାଶ୍ଚିତ୍ରାଃ ପତାକାଶ୍ଚାଭଵଂସ୍ତଦା ॥ 13 ॥
ନଟନର୍ତକସଂଘାନାଂ ଗାୟକାନାଂ ଚ ଗାୟତାମ୍ ।
ମନଃ କର୍ଣସୁଖା ଵାଚ ଶ୍ଶୁଶୃଵୁଶ୍ଚ ତତସ୍ତତଃ ॥ 14 ॥
ରାମାଭିଷେକୟୁକ୍ତାଶ୍ଚ କଥାଶ୍ଚକ୍ରୁର୍ମିଥୋ ଜନାଃ ।
ରାମାଭିଷେକେ ସଂପ୍ରାପ୍ତେ ଚତ୍ଵରେଷୁ ଗୃହେଷୁ ଚ ॥ 15 ॥
ବାଲା ଅପି କ୍ରୀଡମାନା ଗୃହଦ୍ଵାରେଷୁ ସଂଘଶଃ ।
ରାମାଭିଷଵସଂୟୁକ୍ତାଶ୍ଚକ୍ରୁରେଵଂ ମିଥଃ କଥାଃ ॥ 16 ॥
କୃତପୁଷ୍ପୋପହାରଶ୍ଚ ଧୂପଗଂଧାଧିଵାସିତଃ ।
ରାଜମାର୍ଗଃ କୃତଃ ଶ୍ରୀମାନ୍ପୌରୈ ରାମାଭିଷେଚନେ ॥ 17 ॥
ପ୍ରକାଶକରଣାର୍ଥଂ ଚ ନିଶାଗମନଶଂକୟା ।
ଦୀପଵୃକ୍ଷାଂ ସ୍ତଥା ଚକ୍ରୁରନୁ ରଥ୍ୟାସୁ ସର୍ଵଶଃ ॥ 18 ॥
ଅଲଂକାରଂ ପୁରସ୍ୟୈଵଂ କୃତ୍ଵା ତତ୍ପୁରଵାସିନଃ ।
ଆକାଂକ୍ଷମାଣା ରାମସ୍ୟ ୟୌଵରାଜ୍ୟାଭିଷେଚନମ୍ ॥ 19 ॥
ସମେତ୍ୟ ସଂଘଶସ୍ସର୍ଵେ ଚତ୍ଵରେଷୁ ସଭାସୁ ଚ ।
କଥୟଂତୋ ମିଥସ୍ତତ୍ର ପ୍ରଶଶଂସୁର୍ଜନାଧିପମ୍ ॥ 20 ॥
ଅହୋ ମହାତ୍ମା ରାଜାଽୟମିକ୍ଷ୍ଵାକୁକୁଲନଂଦନଃ ।
ଜ୍ଞାତ୍ଵା ୟୋ ଵୃଦ୍ଧମାତ୍ମାନଂ ରାମଂ ରାଜ୍ୟେଽଭିଷେକ୍ଷ୍ୟତି ॥ 21 ॥
ସର୍ଵେପ୍ୟନୁଗୃହୀତା ସ୍ମୋ ୟନ୍ନୋ ରାମୋ ମହୀପତିଃ ।
ଚିରାୟ ଭଵିତା ଗୋପ୍ତା ଦୃଷ୍ଟଲୋକପରାଵରଃ ॥ 22 ॥
ଅନୁଦ୍ଧତମନାଃ ଵିଦ୍ଵାଂଧର୍ମାତ୍ମା ଭ୍ରାତୃଵତ୍ସଲଃ ।
ୟଥା ଚ ଭ୍ରାତୃଷୁ ସ୍ନିଗ୍ଧସ୍ତଥାଽସ୍ମାସ୍ଵପି ରାଘଵଃ ॥ 23 ॥
ଚିରଂ ଜୀଵତୁ ଧର୍ମାତ୍ମା ରାଜା ଦଶରଥୋଽନଘଃ ।
ୟତ୍ପ୍ରସାଦୋନଭିଷିକ୍ତଂ ତୁ ରାମଂ ଦ୍ରକ୍ଷ୍ୟାମହେ ଵୟମ୍ ॥ 24 ॥
ଏଵଂଵିଧଂ କଥୟତାଂ ପୌରାଣାଂ ଶୁଶ୍ରୁଵୁ ସ୍ତଦା ।
ଦିଗ୍ଭ୍ୟୋପି ଶ୍ରୁତଵୃତ୍ତାଂତାଃ ପ୍ରାପ୍ତା ଜାନପଦା ଜନାଃ ॥ 25 ॥
ତେ ତୁ ଦିଗ୍ଭ୍ୟଃ ପୁରୀଂ ପ୍ରାପ୍ତା ଦ୍ରଷ୍ଟୁଂ ରାମାଭିଷେଚନମ୍ ।
ରାମସ୍ୟ ପୂରୟାମାସୁଃ ପୁରୀଂ ଜାନପଦା ଜନାଃ ॥ 26 ॥
ଜନୌଘୈସ୍ତୈର୍ଵିସର୍ପଦ୍ଭିଃ ଶୁଶ୍ରୁଵେ ତତ୍ର ନିସ୍ଵନଃ ।
ପର୍ଵସୂଦୀର୍ଣଵେଗସ୍ୟ ସାଗରସ୍ୟେଵ ନିସ୍ଵନଃ ॥ 27 ॥
ତତସ୍ତଦିଂଦ୍ରକ୍ଷୟସନ୍ନିଭଂ ପୁରଂ ଦିଦୃକ୍ଷୁଭିର୍ଜାନପଦୈରୁପାଗତୈଃ ।
ସମଂତତ ସ୍ସସ୍ଵନମାକୁଲଂ ବଭୌ ସମୁଦ୍ରୟାଦୋଭିରିଵାର୍ଣଵୋଦକମ୍ ॥ 28 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ଅୟୋଧ୍ୟାକାଂଡେ ଷଷ୍ଠସ୍ସର୍ଗଃ ॥
