శ్రీమద్వాల్మీకీయ రామాయణే అయోధ్యాకాండమ్ ।
అథ షష్ఠస్సర్గః ।
గతే పురోహితే రామః స్నాతో నియతమానసః ।
సహ పత్న్యా విశాలాక్ష్యా నారాయణముపాగమత్ ॥ 1 ॥
ప్రగృహ్య శిరసా పాత్రీం హవిషో విధివత్తదా ।
మహతే దైవతాయాజ్యం జుహావ జ్వలితేఽనలే ॥ 2 ॥
శేషం చ హవిషస్తస్య ప్రాశ్యాశాస్యాత్మనః ప్రియమ్ ।
ధ్యాయన్నారాయణం దేవం స్వాస్తీర్ణే కుశసంస్తరే ॥ 3 ॥
వాగ్యత స్సహ వైదేహ్యా భూత్వా నియతమానసః ।
శ్రీమత్యాయతనే విష్ణో శ్శిశ్యే నరవరాత్మజః ॥ 4 ॥
ఏకయామావశిష్టాయాం రాత్ర్యాం ప్రతివిబుద్ధ్య సః ।
అలంకారవిధిం కృత్స్నం కారయామాస వేశ్మనః ॥ 5 ॥
తత్ర శ్రృణ్వన్సుఖా వాచ స్సూతమాగధవందినామ్ ।
పూర్వాం సధ్యాముపాసీనో జజాప యతమానసః ॥ 6 ॥
తుష్టావ ప్రణతశ్చైవ శిరసా మధుసూదనమ్ ।
విమలక్షౌమసంవీతో వాచయామాస స ద్విజాన్ ॥ 7 ॥
తేషాం పుణ్యాహఘోషోఽథ గంభీరమధురస్తదా ।
అయోధ్యాం పూరయామాస తూర్యఘోషానునాదితః ॥ 8 ॥
కృతోపవాసం తు తదా వైదేహ్యా సహ రాఘవమ్ ।
అయోధ్యానిలయశ్శ్రుత్వా సర్వః ప్రముదితో జనః ॥ 9 ॥
తతః పౌరజనస్సర్వశ్శ్రుత్వా రామాభిషేచనమ్ ।
ప్రభాతాం రజనీం దృష్ట్వా చక్రే శోభయితుం పురీమ్ ॥ 10 ॥
సితాభ్రశిఖరాభేషు దేవతాయతనేషు చ ।
చతుష్పథేషు రథ్యాసు చైత్యేష్వట్టాలకేషు చ ॥ 11 ॥
నానాపణ్యసమృద్ధేషు వణిజామాపణేషు చ ।
కుటుంబినాం సమృద్ధేషు శ్రీమత్సు భవనేషు చ ॥ 12 ॥
సభాసు చైవ సర్వాసు వృక్షేష్వాలక్షితేషు చ ।
ధ్వజా స్సముచ్ఛ్రితాశ్చిత్రాః పతాకాశ్చాభవంస్తదా ॥ 13 ॥
నటనర్తకసంఘానాం గాయకానాం చ గాయతామ్ ।
మనః కర్ణసుఖా వాచ శ్శుశృవుశ్చ తతస్తతః ॥ 14 ॥
రామాభిషేకయుక్తాశ్చ కథాశ్చక్రుర్మిథో జనాః ।
రామాభిషేకే సంప్రాప్తే చత్వరేషు గృహేషు చ ॥ 15 ॥
బాలా అపి క్రీడమానా గృహద్వారేషు సంఘశః ।
రామాభిషవసంయుక్తాశ్చక్రురేవం మిథః కథాః ॥ 16 ॥
కృతపుష్పోపహారశ్చ ధూపగంధాధివాసితః ।
రాజమార్గః కృతః శ్రీమాన్పౌరై రామాభిషేచనే ॥ 17 ॥
ప్రకాశకరణార్థం చ నిశాగమనశంకయా ।
దీపవృక్షాం స్తథా చక్రురను రథ్యాసు సర్వశః ॥ 18 ॥
అలంకారం పురస్యైవం కృత్వా తత్పురవాసినః ।
ఆకాంక్షమాణా రామస్య యౌవరాజ్యాభిషేచనమ్ ॥ 19 ॥
సమేత్య సంఘశస్సర్వే చత్వరేషు సభాసు చ ।
కథయంతో మిథస్తత్ర ప్రశశంసుర్జనాధిపమ్ ॥ 20 ॥
అహో మహాత్మా రాజాఽయమిక్ష్వాకుకులనందనః ।
జ్ఞాత్వా యో వృద్ధమాత్మానం రామం రాజ్యేఽభిషేక్ష్యతి ॥ 21 ॥
సర్వేప్యనుగృహీతా స్మో యన్నో రామో మహీపతిః ।
చిరాయ భవితా గోప్తా దృష్టలోకపరావరః ॥ 22 ॥
అనుద్ధతమనాః విద్వాంధర్మాత్మా భ్రాతృవత్సలః ।
యథా చ భ్రాతృషు స్నిగ్ధస్తథాఽస్మాస్వపి రాఘవః ॥ 23 ॥
చిరం జీవతు ధర్మాత్మా రాజా దశరథోఽనఘః ।
యత్ప్రసాదోనభిషిక్తం తు రామం ద్రక్ష్యామహే వయమ్ ॥ 24 ॥
ఏవంవిధం కథయతాం పౌరాణాం శుశ్రువు స్తదా ।
దిగ్భ్యోపి శ్రుతవృత్తాంతాః ప్రాప్తా జానపదా జనాః ॥ 25 ॥
తే తు దిగ్భ్యః పురీం ప్రాప్తా ద్రష్టుం రామాభిషేచనమ్ ।
రామస్య పూరయామాసుః పురీం జానపదా జనాః ॥ 26 ॥
జనౌఘైస్తైర్విసర్పద్భిః శుశ్రువే తత్ర నిస్వనః ।
పర్వసూదీర్ణవేగస్య సాగరస్యేవ నిస్వనః ॥ 27 ॥
తతస్తదింద్రక్షయసన్నిభం పురం దిదృక్షుభిర్జానపదైరుపాగతైః ।
సమంతత స్సస్వనమాకులం బభౌ సముద్రయాదోభిరివార్ణవోదకమ్ ॥ 28 ॥
ఇత్యార్షే శ్రీమద్రామాయణే వాల్మీకీయ ఆదికావ్యే అయోధ్యాకాండే షష్ఠస్సర్గః ॥
