ശ്രീമദ്വാല്മീകീയ രാമായണേ അയോധ്യാകാംഡമ് ।
അഥ ഷഷ്ഠസ്സര്ഗഃ ।
ഗതേ പുരോഹിതേ രാമഃ സ്നാതോ നിയതമാനസഃ ।
സഹ പത്ന്യാ വിശാലാക്ഷ്യാ നാരായണമുപാഗമത് ॥ 1 ॥
പ്രഗൃഹ്യ ശിരസാ പാത്രീം ഹവിഷോ വിധിവത്തദാ ।
മഹതേ ദൈവതായാജ്യം ജുഹാവ ജ്വലിതേഽനലേ ॥ 2 ॥
ശേഷം ച ഹവിഷസ്തസ്യ പ്രാശ്യാശാസ്യാത്മനഃ പ്രിയമ് ।
ധ്യായന്നാരായണം ദേവം സ്വാസ്തീര്ണേ കുശസംസ്തരേ ॥ 3 ॥
വാഗ്യത സ്സഹ വൈദേഹ്യാ ഭൂത്വാ നിയതമാനസഃ ।
ശ്രീമത്യായതനേ വിഷ്ണോ ശ്ശിശ്യേ നരവരാത്മജഃ ॥ 4 ॥
ഏകയാമാവശിഷ്ടായാം രാത്ര്യാം പ്രതിവിബുദ്ധ്യ സഃ ।
അലംകാരവിധിം കൃത്സ്നം കാരയാമാസ വേശ്മനഃ ॥ 5 ॥
തത്ര ശ്രൃണ്വന്സുഖാ വാച സ്സൂതമാഗധവംദിനാമ് ।
പൂർവാം സധ്യാമുപാസീനോ ജജാപ യതമാനസഃ ॥ 6 ॥
തുഷ്ടാവ പ്രണതശ്ചൈവ ശിരസാ മധുസൂദനമ് ।
വിമലക്ഷൌമസംവീതോ വാചയാമാസ സ ദ്വിജാന് ॥ 7 ॥
തേഷാം പുണ്യാഹഘോഷോഽഥ ഗംഭീരമധുരസ്തദാ ।
അയോധ്യാം പൂരയാമാസ തൂര്യഘോഷാനുനാദിതഃ ॥ 8 ॥
കൃതോപവാസം തു തദാ വൈദേഹ്യാ സഹ രാഘവമ് ।
അയോധ്യാനിലയശ്ശ്രുത്വാ സർവഃ പ്രമുദിതോ ജനഃ ॥ 9 ॥
തതഃ പൌരജനസ്സർവശ്ശ്രുത്വാ രാമാഭിഷേചനമ് ।
പ്രഭാതാം രജനീം ദൃഷ്ട്വാ ചക്രേ ശോഭയിതും പുരീമ് ॥ 10 ॥
സിതാഭ്രശിഖരാഭേഷു ദേവതായതനേഷു ച ।
ചതുഷ്പഥേഷു രഥ്യാസു ചൈത്യേഷ്വട്ടാലകേഷു ച ॥ 11 ॥
നാനാപണ്യസമൃദ്ധേഷു വണിജാമാപണേഷു ച ।
കുടുംബിനാം സമൃദ്ധേഷു ശ്രീമത്സു ഭവനേഷു ച ॥ 12 ॥
സഭാസു ചൈവ സർവാസു വൃക്ഷേഷ്വാലക്ഷിതേഷു ച ।
ധ്വജാ സ്സമുച്ഛ്രിതാശ്ചിത്രാഃ പതാകാശ്ചാഭവംസ്തദാ ॥ 13 ॥
നടനര്തകസംഘാനാം ഗായകാനാം ച ഗായതാമ് ।
മനഃ കര്ണസുഖാ വാച ശ്ശുശൃവുശ്ച തതസ്തതഃ ॥ 14 ॥
രാമാഭിഷേകയുക്താശ്ച കഥാശ്ചക്രുര്മിഥോ ജനാഃ ।
രാമാഭിഷേകേ സംപ്രാപ്തേ ചത്വരേഷു ഗൃഹേഷു ച ॥ 15 ॥
ബാലാ അപി ക്രീഡമാനാ ഗൃഹദ്വാരേഷു സംഘശഃ ।
രാമാഭിഷവസംയുക്താശ്ചക്രുരേവം മിഥഃ കഥാഃ ॥ 16 ॥
കൃതപുഷ്പോപഹാരശ്ച ധൂപഗംധാധിവാസിതഃ ।
രാജമാര്ഗഃ കൃതഃ ശ്രീമാന്പൌരൈ രാമാഭിഷേചനേ ॥ 17 ॥
പ്രകാശകരണാര്ഥം ച നിശാഗമനശംകയാ ।
ദീപവൃക്ഷാം സ്തഥാ ചക്രുരനു രഥ്യാസു സർവശഃ ॥ 18 ॥
അലംകാരം പുരസ്യൈവം കൃത്വാ തത്പുരവാസിനഃ ।
ആകാംക്ഷമാണാ രാമസ്യ യൌവരാജ്യാഭിഷേചനമ് ॥ 19 ॥
സമേത്യ സംഘശസ്സർവേ ചത്വരേഷു സഭാസു ച ।
കഥയംതോ മിഥസ്തത്ര പ്രശശംസുര്ജനാധിപമ് ॥ 20 ॥
അഹോ മഹാത്മാ രാജാഽയമിക്ഷ്വാകുകുലനംദനഃ ।
ജ്ഞാത്വാ യോ വൃദ്ധമാത്മാനം രാമം രാജ്യേഽഭിഷേക്ഷ്യതി ॥ 21 ॥
സർവേപ്യനുഗൃഹീതാ സ്മോ യന്നോ രാമോ മഹീപതിഃ ।
ചിരായ ഭവിതാ ഗോപ്താ ദൃഷ്ടലോകപരാവരഃ ॥ 22 ॥
അനുദ്ധതമനാഃ വിദ്വാംധര്മാത്മാ ഭ്രാതൃവത്സലഃ ।
യഥാ ച ഭ്രാതൃഷു സ്നിഗ്ധസ്തഥാഽസ്മാസ്വപി രാഘവഃ ॥ 23 ॥
ചിരം ജീവതു ധര്മാത്മാ രാജാ ദശരഥോഽനഘഃ ।
യത്പ്രസാദോനഭിഷിക്തം തു രാമം ദ്രക്ഷ്യാമഹേ വയമ് ॥ 24 ॥
ഏവംവിധം കഥയതാം പൌരാണാം ശുശ്രുവു സ്തദാ ।
ദിഗ്ഭ്യോപി ശ്രുതവൃത്താംതാഃ പ്രാപ്താ ജാനപദാ ജനാഃ ॥ 25 ॥
തേ തു ദിഗ്ഭ്യഃ പുരീം പ്രാപ്താ ദ്രഷ്ടും രാമാഭിഷേചനമ് ।
രാമസ്യ പൂരയാമാസുഃ പുരീം ജാനപദാ ജനാഃ ॥ 26 ॥
ജനൌഘൈസ്തൈർവിസര്പദ്ഭിഃ ശുശ്രുവേ തത്ര നിസ്വനഃ ।
പർവസൂദീര്ണവേഗസ്യ സാഗരസ്യേവ നിസ്വനഃ ॥ 27 ॥
തതസ്തദിംദ്രക്ഷയസന്നിഭം പുരം ദിദൃക്ഷുഭിര്ജാനപദൈരുപാഗതൈഃ ।
സമംതത സ്സസ്വനമാകുലം ബഭൌ സമുദ്രയാദോഭിരിവാര്ണവോദകമ് ॥ 28 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ അയോധ്യാകാംഡേ ഷഷ്ഠസ്സര്ഗഃ ॥
