ශ්රීමද්වාල්මීකීය රාමායණේ අයෝධ්යාකාංඩම් ।
අථ ෂෂ්ඨස්සර්ගඃ ।
ගතේ පුරෝහිතේ රාමඃ ස්නාතෝ නියතමානසඃ ।
සහ පත්න්යා විශාලාක්ෂ්යා නාරායණමුපාගමත් ॥ 1 ॥
ප්රගෘහ්ය ශිරසා පාත්රීං හවිෂෝ විධිවත්තදා ।
මහතේ දෛවතායාජ්යං ජුහාව ජ්වලිතේऽනලේ ॥ 2 ॥
ශේෂං ච හවිෂස්තස්ය ප්රාශ්යාශාස්යාත්මනඃ ප්රියම් ।
ධ්යායන්නාරායණං දේවං ස්වාස්තීර්ණේ කුශසංස්තරේ ॥ 3 ॥
වාග්යත ස්සහ වෛදේහ්යා භූත්වා නියතමානසඃ ।
ශ්රීමත්යායතනේ විෂ්ණෝ ශ්ශිශ්යේ නරවරාත්මජඃ ॥ 4 ॥
ඒකයාමාවශිෂ්ටායාං රාත්ර්යාං ප්රතිවිබුද්ධ්ය සඃ ।
අලංකාරවිධිං කෘත්ස්නං කාරයාමාස වේශ්මනඃ ॥ 5 ॥
තත්ර ශ්රෘණ්වන්සුඛා වාච ස්සූතමාගධවංදිනාම් ।
පූර්වාං සධ්යාමුපාසීනෝ ජජාප යතමානසඃ ॥ 6 ॥
තුෂ්ටාව ප්රණතශ්චෛව ශිරසා මධුසූදනම් ।
විමලක්ෂෞමසංවීතෝ වාචයාමාස ස ද්විජාන් ॥ 7 ॥
තේෂාං පුණ්යාහඝෝෂෝऽථ ගංභීරමධුරස්තදා ।
අයෝධ්යාං පූරයාමාස තූර්යඝෝෂානුනාදිතඃ ॥ 8 ॥
කෘතෝපවාසං තු තදා වෛදේහ්යා සහ රාඝවම් ।
අයෝධ්යානිලයශ්ශ්රුත්වා සර්වඃ ප්රමුදිතෝ ජනඃ ॥ 9 ॥
තතඃ පෞරජනස්සර්වශ්ශ්රුත්වා රාමාභිෂේචනම් ।
ප්රභාතාං රජනීං දෘෂ්ට්වා චක්රේ ශෝභයිතුං පුරීම් ॥ 10 ॥
සිතාභ්රශිඛරාභේෂු දේවතායතනේෂු ච ।
චතුෂ්පථේෂු රථ්යාසු චෛත්යේෂ්වට්ටාලකේෂු ච ॥ 11 ॥
නානාපණ්යසමෘද්ධේෂු වණිජාමාපණේෂු ච ।
කුටුංබිනාං සමෘද්ධේෂු ශ්රීමත්සු භවනේෂු ච ॥ 12 ॥
සභාසු චෛව සර්වාසු වෘක්ෂේෂ්වාලක්ෂිතේෂු ච ।
ධ්වජා ස්සමුච්ඡ්රිතාශ්චිත්රාඃ පතාකාශ්චාභවංස්තදා ॥ 13 ॥
නටනර්තකසංඝානාං ගායකානාං ච ගායතාම් ।
මනඃ කර්ණසුඛා වාච ශ්ශුශෘවුශ්ච තතස්තතඃ ॥ 14 ॥
රාමාභිෂේකයුක්තාශ්ච කථාශ්චක්රුර්මිථෝ ජනාඃ ।
රාමාභිෂේකේ සංප්රාප්තේ චත්වරේෂු ගෘහේෂු ච ॥ 15 ॥
බාලා අපි ක්රීඩමානා ගෘහද්වාරේෂු සංඝශඃ ।
රාමාභිෂවසංයුක්තාශ්චක්රුරේවං මිථඃ කථාඃ ॥ 16 ॥
කෘතපුෂ්පෝපහාරශ්ච ධූපගංධාධිවාසිතඃ ।
රාජමාර්ගඃ කෘතඃ ශ්රීමාන්පෞරෛ රාමාභිෂේචනේ ॥ 17 ॥
ප්රකාශකරණාර්ථං ච නිශාගමනශංකයා ।
දීපවෘක්ෂාං ස්තථා චක්රුරනු රථ්යාසු සර්වශඃ ॥ 18 ॥
අලංකාරං පුරස්යෛවං කෘත්වා තත්පුරවාසිනඃ ।
ආකාංක්ෂමාණා රාමස්ය යෞවරාජ්යාභිෂේචනම් ॥ 19 ॥
සමේත්ය සංඝශස්සර්වේ චත්වරේෂු සභාසු ච ।
කථයංතෝ මිථස්තත්ර ප්රශශංසුර්ජනාධිපම් ॥ 20 ॥
අහෝ මහාත්මා රාජාऽයමික්ෂ්වාකුකුලනංදනඃ ।
ජ්ඤාත්වා යෝ වෘද්ධමාත්මානං රාමං රාජ්යේऽභිෂේක්ෂ්යති ॥ 21 ॥
සර්වේප්යනුගෘහීතා ස්මෝ යන්නෝ රාමෝ මහීපතිඃ ।
චිරාය භවිතා ගෝප්තා දෘෂ්ටලෝකපරාවරඃ ॥ 22 ॥
අනුද්ධතමනාඃ විද්වාංධර්මාත්මා භ්රාතෘවත්සලඃ ।
යථා ච භ්රාතෘෂු ස්නිග්ධස්තථාऽස්මාස්වපි රාඝවඃ ॥ 23 ॥
චිරං ජීවතු ධර්මාත්මා රාජා දශරථෝऽනඝඃ ।
යත්ප්රසාදෝනභිෂික්තං තු රාමං ද්රක්ෂ්යාමහේ වයම් ॥ 24 ॥
ඒවංවිධං කථයතාං පෞරාණාං ශුශ්රුවු ස්තදා ।
දිග්භ්යෝපි ශ්රුතවෘත්තාංතාඃ ප්රාප්තා ජානපදා ජනාඃ ॥ 25 ॥
තේ තු දිග්භ්යඃ පුරීං ප්රාප්තා ද්රෂ්ටුං රාමාභිෂේචනම් ।
රාමස්ය පූරයාමාසුඃ පුරීං ජානපදා ජනාඃ ॥ 26 ॥
ජනෞඝෛස්තෛර්විසර්පද්භිඃ ශුශ්රුවේ තත්ර නිස්වනඃ ।
පර්වසූදීර්ණවේගස්ය සාගරස්යේව නිස්වනඃ ॥ 27 ॥
තතස්තදිංද්රක්ෂයසන්නිභං පුරං දිදෘක්ෂුභිර්ජානපදෛරුපාගතෛඃ ।
සමංතත ස්සස්වනමාකුලං බභෞ සමුද්රයාදෝභිරිවාර්ණවෝදකම් ॥ 28 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අයෝධ්යාකාංඩේ ෂෂ්ඨස්සර්ගඃ ॥
