ଶ୍ରୀମଦ୍ଵାଲ୍ମୀକୀୟ ରାମାୟଣେ ଅରଣ୍ୟକାଂଡମ୍ ।
ଅଥ ପଂଚଦଶସ୍ସର୍ଗଃ ।
ତତଃ ପଂଚଵଟୀଂ ଗତ୍ଵା ନାନାଵ୍ୟାଲମୃଗାୟୁତାମ୍ ।
ଉଵାଚ ଭ୍ରାତରଂ ରାମସ୍ସୌମିତ୍ରିଂ ଦୀପ୍ତତେଜସମ୍ ॥ 1 ॥
ଆଗତାଃ ସ୍ମ ୟଥୋଦ୍ଦିଷ୍ଟମମୁଂ ଦେଶଂ ମହର୍ଷିଣା ।
ଅୟଂ ପଂଚଵଟୀଦେଶସ୍ସୌମ୍ୟ ପୁଷ୍ପିତପାଦପଃ ॥ 2 ॥
ସର୍ଵତଶ୍ଚାର୍ୟତାଂ ଦୃଷ୍ଟିଃ କାନନେ ନିପୁଣୋହ୍ୟସି ।
ଆଶ୍ରମଃ କତରସ୍ମିନ୍ନୋ ଦେଶେ ଭଵତି ସମ୍ମତଃ ॥ 3 ॥
ରମତେ ୟତ୍ର ଵୈଦେହୀ ତ୍ଵମହଂ ଚୈଵ ଲକ୍ଷ୍ମଣ ।
ତାଦୃଶୋ ଦୃଶ୍ୟତାଂ ଦେଶସ୍ସନ୍ନିକୃଷ୍ଟଜଲାଶୟଃ ॥ 4 ॥
ଵନରାମଣ୍ୟକଂ ୟତ୍ର ସ୍ଥଲରାମଣ୍ୟକଂ ତଥା ।
ସନ୍ନିକୃଷ୍ଟଂ ଚ ୟତ୍ର ସ୍ୟାତ୍ସମିତ୍ପୁଷ୍ପକୁଶୋଦକମ୍ ॥ 5 ॥
ଏଵମୁକ୍ତସ୍ତୁ ରାମେଣ ଲକ୍ଷ୍ମଣ ସଂୟତାଂଜଲିଃ ।
ସୀତାସମକ୍ଷଂ କାକୁତ୍ସ୍ଥମିଦଂ ଵଚନମବ୍ରଵୀତ୍ ॥ 6 ॥
ପରଵାନସ୍ମି କାକୁତ୍ସ୍ଥ ତ୍ଵୟି ଵର୍ଷଶତଂ ସ୍ଥିତେ ।
ସ୍ଵୟଂ ତୁ ରୁଚିରେ ଦେଶେ କ୍ରିୟତାମିତି ମାଂ ଵଦ ॥ 7 ॥
ସୁପ୍ରୀତସ୍ତେନ ଵାକ୍ୟେନ ଲକ୍ଷ୍ମଣସ୍ୟ ମହାତ୍ମନଃ ।
ଵିମୃଶନ୍ରୋଚୟାମାସ ଦେଶଂ ସର୍ଵଗୁଣାନ୍ଵିତମ୍ ॥ 8 ॥
ସ ତଂ ରୁଚିରମାକ୍ରମ୍ୟ ଦେଶମାଶ୍ରମକର୍ମଣି ।
ହସ୍ତୌ ଗୃହୀତ୍ଵା ହସ୍ତେନ ରାମସ୍ସୌମିତ୍ରିମବ୍ରଵୀତ୍ ॥ 9 ॥
ଅୟଂ ଦେଶସ୍ସମଶ୍ରୀମାନ୍ ପୁଷ୍ପିତୈସ୍ତରୁଭିର୍ଵୃତଃ ।
ଇହାଽଶ୍ରମପଦଂ ସୌମ୍ୟ ୟଥାଵତ୍କର୍ତୁମର୍ହସି ॥ 10 ॥
ଇୟମାଦିତ୍ୟସଂକାଶୈଃ ପଦ୍ମୈସ୍ସୁରଭିଗଂଧିଭିଃ ।
ଅଦୂରେ ଦୃଶ୍ୟତେ ରମ୍ୟା ପଦ୍ମିନୀ ପଦ୍ମଶୋଭିତା ॥ 11 ॥
ୟଥାତଖ୍ୟାତମଗସ୍ତ୍ୟେନ ମୁନିନା ଭାଵିତାତ୍ମନା ।
ଇୟଂ ଗୋଦାଵରୀ ରମ୍ୟା ପୁଷ୍ପିତୈସ୍ତରୁଭିର୍ଵୃତା ॥ 12 ॥
ହଂସକାରଂଡଵାକୀର୍ଣା ଚକ୍ରଵାକୋପଶୋଭିତା ।
ନାତିଦୂରେ ନ ଚାସନ୍ନେ ମୃଗୟୂଥପିପୀଡିତାଃ ॥ 13 ॥
ମୟୂରନାଦିତା ରମ୍ୟାଃ ପ୍ରାଂଶଵୋ ବହୁକଂଦରାଃ ।
ଦୃଶ୍ୟଂତେ ଗିରୟଃ ସୌମ୍ୟ ଫୁଲ୍ଲୈସ୍ତରୁଭିରାଵୃତାଃ ॥ 14 ॥
ସୌଵର୍ଣୈରାଜତୈସ୍ତାମ୍ରୈର୍ଦେଶେ ଦେଶେ ଚ ଧାତୁଭିଃ ।
ଗଵାକ୍ଷିତା ଇଵାଭାଂତି ଗଜାଃ ପରମଭକ୍ତିଭିଃ ॥ 15 ॥
ସାଲୈସ୍ତାଲୈସ୍ତମାଲୈଶ୍ଚ ଖର୍ଜୂରପନସାମ୍ରକୈଃ ।
ନୀଵାରୈସ୍ତିମିଶୈଶ୍ଚୈଵ ପୁନ୍ନାଗୈଶ୍ଚୋପଶୋଭିତାଃ ॥ 16 ॥
ଚୂତୈରଶୋକୈସ୍ତିଲକୈଶ୍ଚଂପକୈଃ କେତକୈରପି ।
ପୁଷ୍ପଗୁଲ୍ମଲତୋପେତୈସ୍ତୈସ୍ତୈସ୍ତରୁଭିରାଵୃତାଃ ॥ 17 ॥
ଚଂଦନୈସ୍ପଂଦନୈର୍ନୀପୈଃ ପର୍ଣାସୈର୍ଲିକୁଚୈରପି ।
ଧଵାଶ୍ଵକର୍ଣଖଦିରୈଃ ଶମୀକିଂଶୁକପାଟଲୈଃ ॥ 18 ॥
ଇଦଂ ପୁଣ୍ୟମିଦଂ ମେଧ୍ୟମିଦଂ ବହୁମୃଗଦ୍ଵିଜମ୍ ।
ଇହ ଵତ୍ସ୍ୟାମ ସୌମିତ୍ରେ ସାର୍ଧମେତେନ ପକ୍ଷିଣା ॥ 19 ॥
ଏଵମୁକ୍ତସ୍ତୁ ରାମେଣ ଲକ୍ଷ୍ମଣଃ ପରଵୀରହା ।
ଅଚିରେଣାଽଶ୍ରମଂ ଭ୍ରାତୁଶ୍ଚକାର ସୁମହାବଲଃ ॥ 20 ॥
ପର୍ଣଶାଲାଂ ସୁଵିପୁଲାଂ ତତ୍ର ସଂଖାତମୃତ୍ତିକାମ୍ ।
ସୁସ୍ତଂଭାଂ ମସ୍କରୈର୍ଦୀର୍ଘୈଃ କୃତଵଂଶାଂ ସୁଶୋଭନାମ୍ ॥ 21 ॥
ଶମୀଶାଖାଭିରାସ୍ତୀର୍ୟ ଦୃଢପାଶାଵପାଶିତାମ୍ ।
କୁଶକାଶଶରୈଃ ପର୍ଣୈସ୍ସୁପରିଚ୍ଛାଦିତାଂ ତଥା ॥ 22 ॥
ସମୀକୃତତଲାଂ ରମ୍ୟାଂ ଚକାର ଲଘୁଵିକ୍ରମଃ ।
ନିଵାସଂ ରାଘଵସ୍ୟାର୍ଥେ ପ୍ରେକ୍ଷଣୀୟମନୁତ୍ତମମ୍ ॥ 23 ॥
ସହସା ଲକ୍ଷ୍ମଣଃ ଶ୍ରୀମାନ୍ ନଦୀଂ ଗୋଦାଵରୀଂ ତଦା ।
ସ୍ନାତ୍ଵା ପଦ୍ମାନି ଚାଦାୟ ସଫଲଃ ପୁନରାଗତଃ ॥ 24 ॥
ତତଃ ପୁଷ୍ପବଲିଂ କୃତ୍ଵା ଶାଂତିଂ ଚ ସ ୟଥାଵିଧି ।
ଦର୍ଶୟାମାସ ରାମାୟ ତଦାଶ୍ରମପଦଂ କୃତମ୍ ॥ 25 ॥
ସ ତଂ ଦୃଷ୍ଟ୍ଵା କୃତଂ ସୌମ୍ୟମାଶ୍ରମଂ ସୀତୟା ସହ ।
ରାଘଵଃ ପର୍ଣଶାଲାୟାଂ ହର୍ଷମାହାରୟତ୍ପରମ୍ ॥ 26 ॥
ସୁସଂହୃଷ୍ଟଃ ପରିଷ୍ଵଜ୍ୟ ବାହୁଭ୍ୟାଂ ଲକ୍ଷ୍ମଣଂ ତଦା ।
ଅତିସ୍ନିଗ୍ଧଂ ଚ ଗାଢଂ ଚ ଵଚନଂ ଚେଦମବ୍ରଵୀତ୍ ॥ 27 ॥
ପ୍ରୀତୋଽସ୍ମି ତେ ମହତ୍କର୍ମ ତ୍ଵୟା କୃତମିଦଂ ପ୍ରଭୋ ।
ପ୍ରଦେୟୋ ୟନ୍ନିମିତ୍ତଂ ତେ ପରିଷ୍ଵଂଗୋ ମୟା କୃତଃ ॥ 28 ॥
ଭାଵଜ୍ଞେନ କୃତଜ୍ଞେନ ଧର୍ମଜ୍ଞେନ ଚ ଲକ୍ଷ୍ମଣ ।
ତ୍ଵୟା ପୁତ୍ରେଣ ଧର୍ମାତ୍ମା ନ ସଂଵୃତ୍ତଃ ପିତା ମମ ॥ 29 ॥
ଏଵଂ ଲକ୍ଷ୍ମଣମୁକ୍ତ୍ଵା ତୁ ରାଘଵୋ ଲକ୍ଷ୍ମିଵର୍ଧନଃ ।
ତସ୍ମିନ୍ ଦେଶେ ବହୁଫଲେ ନ୍ୟଵସତ୍ସୁସୁଖଂ ଵଶୀ ॥ 30 ॥
କଂଚିତ୍କାଲଂ ସ ଧର୍ମାତ୍ମା ସୀତୟା ଲକ୍ଷ୍ମଣେନ ଚ ।
ଅନ୍ଵାସ୍ୟମାନୋ ନ୍ୟଵସତ୍ସ୍ଵର୍ଗଲୋକେ ୟଥାମରଃ ॥ 31 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ଅରଣ୍ୟକାଂଡେ ପଂଚଦଶସ୍ସର୍ଗଃ ॥
