ශ්රීමද්වාල්මීකීය රාමායණේ අරණ්යකාංඩම් ।
අථ පංචදශස්සර්ගඃ ।
තතඃ පංචවටීං ගත්වා නානාව්යාලමෘගායුතාම් ।
උවාච භ්රාතරං රාමස්සෞමිත්රිං දීප්තතේජසම් ॥ 1 ॥
ආගතාඃ ස්ම යථෝද්දිෂ්ටමමුං දේශං මහර්ෂිණා ।
අයං පංචවටීදේශස්සෞම්ය පුෂ්පිතපාදපඃ ॥ 2 ॥
සර්වතශ්චාර්යතාං දෘෂ්ටිඃ කානනේ නිපුණෝහ්යසි ।
ආශ්රමඃ කතරස්මින්නෝ දේශේ භවති සම්මතඃ ॥ 3 ॥
රමතේ යත්ර වෛදේහී ත්වමහං චෛව ලක්ෂ්මණ ।
තාදෘශෝ දෘශ්යතාං දේශස්සන්නිකෘෂ්ටජලාශයඃ ॥ 4 ॥
වනරාමණ්යකං යත්ර ස්ථලරාමණ්යකං තථා ।
සන්නිකෘෂ්ටං ච යත්ර ස්යාත්සමිත්පුෂ්පකුශෝදකම් ॥ 5 ॥
ඒවමුක්තස්තු රාමේණ ලක්ෂ්මණ සංයතාංජලිඃ ।
සීතාසමක්ෂං කාකුත්ස්ථමිදං වචනමබ්රවීත් ॥ 6 ॥
පරවානස්මි කාකුත්ස්ථ ත්වයි වර්ෂශතං ස්ථිතේ ।
ස්වයං තු රුචිරේ දේශේ ක්රියතාමිති මාං වද ॥ 7 ॥
සුප්රීතස්තේන වාක්යේන ලක්ෂ්මණස්ය මහාත්මනඃ ।
විමෘශන්රෝචයාමාස දේශං සර්වගුණාන්විතම් ॥ 8 ॥
ස තං රුචිරමාක්රම්ය දේශමාශ්රමකර්මණි ।
හස්තෞ ගෘහීත්වා හස්තේන රාමස්සෞමිත්රිමබ්රවීත් ॥ 9 ॥
අයං දේශස්සමශ්රීමාන් පුෂ්පිතෛස්තරුභිර්වෘතඃ ।
ඉහාऽශ්රමපදං සෞම්ය යථාවත්කර්තුමර්හසි ॥ 10 ॥
ඉයමාදිත්යසංකාශෛඃ පද්මෛස්සුරභිගංධිභිඃ ।
අදූරේ දෘශ්යතේ රම්යා පද්මිනී පද්මශෝභිතා ॥ 11 ॥
යථාතඛ්යාතමගස්ත්යේන මුනිනා භාවිතාත්මනා ।
ඉයං ගෝදාවරී රම්යා පුෂ්පිතෛස්තරුභිර්වෘතා ॥ 12 ॥
හංසකාරංඩවාකීර්ණා චක්රවාකෝපශෝභිතා ।
නාතිදූරේ න චාසන්නේ මෘගයූථපිපීඩිතාඃ ॥ 13 ॥
මයූරනාදිතා රම්යාඃ ප්රාංශවෝ බහුකංදරාඃ ।
දෘශ්යංතේ ගිරයඃ සෞම්ය ඵුල්ලෛස්තරුභිරාවෘතාඃ ॥ 14 ॥
සෞවර්ණෛරාජතෛස්තාම්රෛර්දේශේ දේශේ ච ධාතුභිඃ ।
ගවාක්ෂිතා ඉවාභාංති ගජාඃ පරමභක්තිභිඃ ॥ 15 ॥
සාලෛස්තාලෛස්තමාලෛශ්ච ඛර්ජූරපනසාම්රකෛඃ ।
නීවාරෛස්තිමිශෛශ්චෛව පුන්නාගෛශ්චෝපශෝභිතාඃ ॥ 16 ॥
චූතෛරශෝකෛස්තිලකෛශ්චංපකෛඃ කේතකෛරපි ।
පුෂ්පගුල්මලතෝපේතෛස්තෛස්තෛස්තරුභිරාවෘතාඃ ॥ 17 ॥
චංදනෛස්පංදනෛර්නීපෛඃ පර්ණාසෛර්ලිකුචෛරපි ।
ධවාශ්වකර්ණඛදිරෛඃ ශමීකිංශුකපාටලෛඃ ॥ 18 ॥
ඉදං පුණ්යමිදං මේධ්යමිදං බහුමෘගද්විජම් ।
ඉහ වත්ස්යාම සෞමිත්රේ සාර්ධමේතේන පක්ෂිණා ॥ 19 ॥
ඒවමුක්තස්තු රාමේණ ලක්ෂ්මණඃ පරවීරහා ।
අචිරේණාऽශ්රමං භ්රාතුශ්චකාර සුමහාබලඃ ॥ 20 ॥
පර්ණශාලාං සුවිපුලාං තත්ර සංඛාතමෘත්තිකාම් ।
සුස්තංභාං මස්කරෛර්දීර්ඝෛඃ කෘතවංශාං සුශෝභනාම් ॥ 21 ॥
ශමීශාඛාභිරාස්තීර්ය දෘඪපාශාවපාශිතාම් ।
කුශකාශශරෛඃ පර්ණෛස්සුපරිච්ඡාදිතාං තථා ॥ 22 ॥
සමීකෘතතලාං රම්යාං චකාර ලඝුවික්රමඃ ।
නිවාසං රාඝවස්යාර්ථේ ප්රේක්ෂණීයමනුත්තමම් ॥ 23 ॥
සහසා ලක්ෂ්මණඃ ශ්රීමාන් නදීං ගෝදාවරීං තදා ।
ස්නාත්වා පද්මානි චාදාය සඵලඃ පුනරාගතඃ ॥ 24 ॥
තතඃ පුෂ්පබලිං කෘත්වා ශාංතිං ච ස යථාවිධි ।
දර්ශයාමාස රාමාය තදාශ්රමපදං කෘතම් ॥ 25 ॥
ස තං දෘෂ්ට්වා කෘතං සෞම්යමාශ්රමං සීතයා සහ ।
රාඝවඃ පර්ණශාලායාං හර්ෂමාහාරයත්පරම් ॥ 26 ॥
සුසංහෘෂ්ටඃ පරිෂ්වජ්ය බාහුභ්යාං ලක්ෂ්මණං තදා ।
අතිස්නිග්ධං ච ගාඪං ච වචනං චේදමබ්රවීත් ॥ 27 ॥
ප්රීතෝऽස්මි තේ මහත්කර්ම ත්වයා කෘතමිදං ප්රභෝ ।
ප්රදේයෝ යන්නිමිත්තං තේ පරිෂ්වංගෝ මයා කෘතඃ ॥ 28 ॥
භාවජ්ඤේන කෘතජ්ඤේන ධර්මජ්ඤේන ච ලක්ෂ්මණ ।
ත්වයා පුත්රේණ ධර්මාත්මා න සංවෘත්තඃ පිතා මම ॥ 29 ॥
ඒවං ලක්ෂ්මණමුක්ත්වා තු රාඝවෝ ලක්ෂ්මිවර්ධනඃ ।
තස්මින් දේශේ බහුඵලේ න්යවසත්සුසුඛං වශී ॥ 30 ॥
කංචිත්කාලං ස ධර්මාත්මා සීතයා ලක්ෂ්මණේන ච ।
අන්වාස්යමානෝ න්යවසත්ස්වර්ගලෝකේ යථාමරඃ ॥ 31 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අරණ්යකාංඩේ පංචදශස්සර්ගඃ ॥
