শ্রীমদ্বাল্মীকীয় রামাযণে অরণ্যকাংডম্ ।
অথ পংচদশস্সর্গঃ ।
ততঃ পংচবটীং গত্বা নানাব্য়ালমৃগায়ুতাম্ ।
উবাচ ভ্রাতরং রামস্সৌমিত্রিং দীপ্ততেজসম্ ॥ 1 ॥
আগতাঃ স্ম যথোদ্দিষ্টমমুং দেশং মহর্ষিণা ।
অয়ং পংচবটীদেশস্সৌম্য় পুষ্পিতপাদপঃ ॥ 2 ॥
সর্বতশ্চার্যতাং দৃষ্টিঃ কাননে নিপুণোহ্যসি ।
আশ্রমঃ কতরস্মিন্নো দেশে ভবতি সম্মতঃ ॥ 3 ॥
রমতে যত্র বৈদেহী ত্বমহং চৈব লক্ষ্মণ ।
তাদৃশো দৃশ্যতাং দেশস্সন্নিকৃষ্টজলাশয়ঃ ॥ 4 ॥
বনরামণ্যকং যত্র স্থলরামণ্যকং তথা ।
সন্নিকৃষ্টং চ যত্র স্য়াত্সমিত্পুষ্পকুশোদকম্ ॥ 5 ॥
এবমুক্তস্তু রামেণ লক্ষ্মণ সংযতাংজলিঃ ।
সীতাসমক্ষং কাকুত্স্থমিদং বচনমব্রবীত্ ॥ 6 ॥
পরবানস্মি কাকুত্স্থ ত্বয়ি বর্ষশতং স্থিতে ।
স্বয়ং তু রুচিরে দেশে ক্রিযতামিতি মাং বদ ॥ 7 ॥
সুপ্রীতস্তেন বাক্য়েন লক্ষ্মণস্য় মহাত্মনঃ ।
বিমৃশন্রোচয়ামাস দেশং সর্বগুণান্বিতম্ ॥ 8 ॥
স তং রুচিরমাক্রম্য় দেশমাশ্রমকর্মণি ।
হস্তৌ গৃহীত্বা হস্তেন রামস্সৌমিত্রিমব্রবীত্ ॥ 9 ॥
অয়ং দেশস্সমশ্রীমান্ পুষ্পিতৈস্তরুভির্বৃতঃ ।
ইহাঽশ্রমপদং সৌম্য় যথাবত্কর্তুমর্হসি ॥ 10 ॥
ইযমাদিত্যসংকাশৈঃ পদ্মৈস্সুরভিগংধিভিঃ ।
অদূরে দৃশ্যতে রম্য়া পদ্মিনী পদ্মশোভিতা ॥ 11 ॥
যথাতখ্য়াতমগস্ত্য়েন মুনিনা ভাবিতাত্মনা ।
ইয়ং গোদাবরী রম্য়া পুষ্পিতৈস্তরুভির্বৃতা ॥ 12 ॥
হংসকারংডবাকীর্ণা চক্রবাকোপশোভিতা ।
নাতিদূরে ন চাসন্নে মৃগয়ূথপিপীডিতাঃ ॥ 13 ॥
ময়ূরনাদিতা রম্য়াঃ প্রাংশবো বহুকংদরাঃ ।
দৃশ্য়ংতে গিরয়ঃ সৌম্য় ফুল্লৈস্তরুভিরাবৃতাঃ ॥ 14 ॥
সৌবর্ণৈরাজতৈস্তাম্রৈর্দেশে দেশে চ ধাতুভিঃ ।
গবাক্ষিতা ইবাভাংতি গজাঃ পরমভক্তিভিঃ ॥ 15 ॥
সালৈস্তালৈস্তমালৈশ্চ খর্জূরপনসাম্রকৈঃ ।
নীবারৈস্তিমিশৈশ্চৈব পুন্নাগৈশ্চোপশোভিতাঃ ॥ 16 ॥
চূতৈরশোকৈস্তিলকৈশ্চংপকৈঃ কেতকৈরপি ।
পুষ্পগুল্মলতোপেতৈস্তৈস্তৈস্তরুভিরাবৃতাঃ ॥ 17 ॥
চংদনৈস্পংদনৈর্নীপৈঃ পর্ণাসৈর্লিকুচৈরপি ।
ধবাশ্বকর্ণখদিরৈঃ শমীকিংশুকপাটলৈঃ ॥ 18 ॥
ইদং পুণ্যমিদং মেধ্যমিদং বহুমৃগদ্বিজম্ ।
ইহ বত্স্য়াম সৌমিত্রে সার্ধমেতেন পক্ষিণা ॥ 19 ॥
এবমুক্তস্তু রামেণ লক্ষ্মণঃ পরবীরহা ।
অচিরেণাঽশ্রমং ভ্রাতুশ্চকার সুমহাবলঃ ॥ 20 ॥
পর্ণশালাং সুবিপুলাং তত্র সংখাতমৃত্তিকাম্ ।
সুস্তংভাং মস্করৈর্দীর্ঘৈঃ কৃতবংশাং সুশোভনাম্ ॥ 21 ॥
শমীশাখাভিরাস্তীর্য় দৃঢপাশাবপাশিতাম্ ।
কুশকাশশরৈঃ পর্ণৈস্সুপরিচ্ছাদিতাং তথা ॥ 22 ॥
সমীকৃততলাং রম্য়াং চকার লঘুবিক্রমঃ ।
নিবাসং রাঘবস্য়ার্থে প্রেক্ষণীযমনুত্তমম্ ॥ 23 ॥
সহসা লক্ষ্মণঃ শ্রীমান্ নদীং গোদাবরীং তদা ।
স্নাত্বা পদ্মানি চাদায় সফলঃ পুনরাগতঃ ॥ 24 ॥
ততঃ পুষ্পবলিং কৃত্বা শাংতিং চ স যথাবিধি ।
দর্শয়ামাস রামায় তদাশ্রমপদং কৃতম্ ॥ 25 ॥
স তং দৃষ্ট্বা কৃতং সৌম্যমাশ্রমং সীতয়া সহ ।
রাঘবঃ পর্ণশালায়াং হর্ষমাহারযত্পরম্ ॥ 26 ॥
সুসংহৃষ্টঃ পরিষ্বজ্য় বাহুভ্য়াং লক্ষ্মণং তদা ।
অতিস্নিগ্ধং চ গাঢং চ বচনং চেদমব্রবীত্ ॥ 27 ॥
প্রীতোঽস্মি তে মহত্কর্ম ত্বয়া কৃতমিদং প্রভো ।
প্রদেয়ো যন্নিমিত্তং তে পরিষ্বংগো ময়া কৃতঃ ॥ 28 ॥
ভাবজ্ঞেন কৃতজ্ঞেন ধর্মজ্ঞেন চ লক্ষ্মণ ।
ত্বয়া পুত্রেণ ধর্মাত্মা ন সংবৃত্তঃ পিতা মম ॥ 29 ॥
এবং লক্ষ্মণমুক্ত্বা তু রাঘবো লক্ষ্মিবর্ধনঃ ।
তস্মিন্ দেশে বহুফলে ন্যবসত্সুসুখং বশী ॥ 30 ॥
কংচিত্কালং স ধর্মাত্মা সীতয়া লক্ষ্মণেন চ ।
অন্বাস্যমানো ন্যবসত্স্বর্গলোকে যথামরঃ ॥ 31 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে অরণ্যকাংডে পংচদশস্সর্গঃ ॥
