શ્રીમદ્વાલ્મીકીય રામાયણે અરણ્યકાંડમ્ ।
અથ એકોનવિંશસ્સર્ગઃ ।
તાં તથા પતિતાં દૃષ્ટ્વા વિરૂપાં શોણિતોક્ષિતામ્ ।
ભગિનીં ક્રોધસંતપ્તઃ ખરઃ પપ્રચ્છ રાક્ષસઃ ॥ 1 ॥
ઉત્તિષ્ઠ તાવદાખ્યાહિ પ્રમોહં જહિ સંભ્રમમ્ ।
વ્યક્તમાખ્યાહિ કેન ત્વમેવં રૂપા વિરૂપિતા ॥ 2 ॥
કઃ કૃષ્ણસર્પમાસીનમાશીવિષમનાગસમ્ ।
તુદત્યભિસમાપન્નમંગુલ્યગ્રેણ લીલયા ॥ 3 ॥
કઃ કાલપાશં સમાસજ્ય કંઠે મોહાન્ન બુધ્યતે ।
યસ્ત્વામદ્ય સમાસાદ્ય પીતવાન્વિષમુત્તમમ્ ॥ 4 ॥
બલવિક્રમસંપન્ના કામગા કામરૂપિણી ।
ઇમામવસ્થાં નીતા ત્વં કેનાંતકસમાગતા ॥ 5 ॥
દેવગંધર્વભૂતાનામૃષીણાં ચ મહાત્મનામ્ ।
કોઽયમેવં વિરૂપાં ત્વાં મહાવીર્યશ્ચકાર હ ॥ 6 ॥
ન હિ પશ્યામ્યહં લોકે યઃ કુર્યાન્મમ વિપ્રિયમ્ ।
અમરેષુ સહસ્રાક્ષં મહેંદ્રં પાકશાસનમ્ ॥ 7 ॥
અદ્યાહં માર્ગણૈઃ પ્રાણાનાદાસ્યે જીવિતાંતકૈઃ ।
સલિલે ક્ષીરમાસક્તં નિષ્પિબન્નિવ સારસઃ ॥ 8 ॥
નિહતસ્ય મયા સંખ્યે શરસંકૃત્તમર્મણઃ ।
સફેનં રુધિરં રક્તં મેદિની કસ્ય પાસ્યતિ ॥ 9 ॥
કસ્ય પત્રરથાઃ કાયાન્માંસમુત્કૃત્ય સંગતાઃ ।
પ્રહૃષ્ટા ભક્ષયિષ્યંતિ નિહતસ્ય મયા રણે ॥ 10 ॥
તં ન દેવા ન ગંધર્વા ન પિશાચા ન રાક્ષસાઃ ।
મયાપકૃષ્ટં કૃપણં શક્તાસ્ત્રાતું મહાહવે ॥ 11 ॥
ઉપલભ્ય શનૈસ્સંજ્ઞાં તં મે શંસિતુમર્હસિ ।
યેન ત્વં દુર્વિનીતેન વને વિક્રમ્ય નિર્જિતા ॥ 12 ॥
ઇતિ ભ્રાતુર્વચશ્શ્રુત્વા ક્રુદ્ધસ્ય ચ વિશેષતઃ ।
તતશ્શૂર્પણખા વાક્યં સબાષ્પમિદમબ્રવીત્ ॥ 13 ॥
તરુણૌ રૂપસંપન્નૌ સુકુમારૌ મહાબલૌ ।
પુંડરીકવિશાલાક્ષૌ ચીરકૃષ્ણાજિનાંબરૌ ॥ 14 ॥
ફલમૂલાશનૌ દાંતૌ તાપસૌ ધર્મચારિણૌ ।
પુત્રૌ દશરથસ્યાસ્તાં ભ્રાતરૌ રામલક્ષ્મણૌ ॥ 15 ॥
ગંધર્વરાજપ્રતિમૌ પાર્થિવવ્યંજનાન્વિતૌ ।
દેવૌ વા માનુષૌ વા તૌ ન તર્કયિતુમુત્સહે ॥ 16 ॥
તરુણી રૂપસંપન્ના સર્વાભરણભૂષિતા ।
દૃષ્ટા તત્ર મયા નારી તયોર્મધ્યે સુમધ્યમા ॥ 17 ॥
તાભ્યામુભાભ્યાં સંભૂય પ્રમદામધિકૃત્ય તામ્ ।
ઇમામવસ્થાં નીતાહં યથાનાથાસતી તથા ॥ 18 ॥
તસ્યાશ્ચાનૃજુવૃત્તાયાસ્તયોશ્ચ હતયોરહમ્ ।
સફેનં પાતુમિચ્છામિ રુધિરં રણમૂર્ધનિ ॥ 19 ॥
એષ મે પ્રથમઃ કામઃ કૃતસ્તાત ત્વયા ભવેત્ ।
તસ્યાસ્તયોશ્ચ રુધિરં પિબેયમહમાહવે ॥ 20 ॥
ઇતિ તસ્યાં બ્રુવાણાયાં ચતુર્દશ મહાબલાન્ ।
વ્યાદિદેશ ખરઃ ક્રુદ્ધો રાક્ષસાનંતકોપમાન્ ॥ 21 ॥
માનુષૌ શસ્ત્રસંપન્નૌ ચીરકૃષ્ણાજિનાંબરૌ ।
પ્રવિષ્ટૌ દંડકારણ્યં ઘોરં પ્રમદયા સહ ॥ 22 ॥
તૌ હત્વા તાં ચ દુર્વૃત્તામપાવર્તિતુમર્હથ ।
ઇયં ચ રુધિરં તેષાં ભગિની મમ પાસ્યતિ ॥ 23 ॥
મનોરથોઽયમિષ્ટોઽસ્યા ભગિન્યા મમ રાક્ષસાઃ ।
શીઘ્રં સંપાદ્યતાં તૌ ચ પ્રમથ્ય સ્વેન તેજસા ॥ 24 ॥
ઇતિ પ્રતિસમાદિષ્ટા રાક્ષસાસ્તે ચતુર્દશ ।
તત્ર જગ્મુસ્તયા સાર્ધં ઘના વાતેરિતા યથા ॥ 25 ॥
તતસ્તુ તે તં સમુદગ્રતેજસં તથાપિઽતીક્ષ્ણપ્રદરા નિશાચરાઃ ।
ન શેકુરેનં સહસા પ્રમર્દિતું વનદ્વિપા દીપ્તમિવાગ્નિમુત્થિતમ્ ॥ 26 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે અરણ્યકાંડે એકોનવિંશસ્સર્ગઃ ॥
