ශ්රීමද්වාල්මීකීය රාමායණේ අරණ්යකාංඩම් ।
අථ ඒකෝනවිංශස්සර්ගඃ ।
තාං තථා පතිතාං දෘෂ්ට්වා විරූපාං ශෝණිතෝක්ෂිතාම් ।
භගිනීං ක්රෝධසංතප්තඃ ඛරඃ පප්රච්ඡ රාක්ෂසඃ ॥ 1 ॥
උත්තිෂ්ඨ තාවදාඛ්යාහි ප්රමෝහං ජහි සංභ්රමම් ।
ව්යක්තමාඛ්යාහි කේන ත්වමේවං රූපා විරූපිතා ॥ 2 ॥
කඃ කෘෂ්ණසර්පමාසීනමාශීවිෂමනාගසම් ।
තුදත්යභිසමාපන්නමංගුල්යග්රේණ ලීලයා ॥ 3 ॥
කඃ කාලපාශං සමාසජ්ය කංඨේ මෝහාන්න බුධ්යතේ ।
යස්ත්වාමද්ය සමාසාද්ය පීතවාන්විෂමුත්තමම් ॥ 4 ॥
බලවික්රමසංපන්නා කාමගා කාමරූපිණී ।
ඉමාමවස්ථාං නීතා ත්වං කේනාංතකසමාගතා ॥ 5 ॥
දේවගංධර්වභූතානාමෘෂීණාං ච මහාත්මනාම් ।
කෝऽයමේවං විරූපාං ත්වාං මහාවීර්යශ්චකාර හ ॥ 6 ॥
න හි පශ්යාම්යහං ලෝකේ යඃ කුර්යාන්මම විප්රියම් ।
අමරේෂු සහස්රාක්ෂං මහේංද්රං පාකශාසනම් ॥ 7 ॥
අද්යාහං මාර්ගණෛඃ ප්රාණානාදාස්යේ ජීවිතාංතකෛඃ ।
සලිලේ ක්ෂීරමාසක්තං නිෂ්පිබන්නිව සාරසඃ ॥ 8 ॥
නිහතස්ය මයා සංඛ්යේ ශරසංකෘත්තමර්මණඃ ।
සඵේනං රුධිරං රක්තං මේදිනී කස්ය පාස්යති ॥ 9 ॥
කස්ය පත්රරථාඃ කායාන්මාංසමුත්කෘත්ය සංගතාඃ ।
ප්රහෘෂ්ටා භක්ෂයිෂ්යංති නිහතස්ය මයා රණේ ॥ 10 ॥
තං න දේවා න ගංධර්වා න පිශාචා න රාක්ෂසාඃ ।
මයාපකෘෂ්ටං කෘපණං ශක්තාස්ත්රාතුං මහාහවේ ॥ 11 ॥
උපලභ්ය ශනෛස්සංජ්ඤාං තං මේ ශංසිතුමර්හසි ।
යේන ත්වං දුර්විනීතේන වනේ වික්රම්ය නිර්ජිතා ॥ 12 ॥
ඉති භ්රාතුර්වචශ්ශ්රුත්වා ක්රුද්ධස්ය ච විශේෂතඃ ।
තතශ්ශූර්පණඛා වාක්යං සබාෂ්පමිදමබ්රවීත් ॥ 13 ॥
තරුණෞ රූපසංපන්නෞ සුකුමාරෞ මහාබලෞ ।
පුංඩරීකවිශාලාක්ෂෞ චීරකෘෂ්ණාජිනාංබරෞ ॥ 14 ॥
ඵලමූලාශනෞ දාංතෞ තාපසෞ ධර්මචාරිණෞ ।
පුත්රෞ දශරථස්යාස්තාං භ්රාතරෞ රාමලක්ෂ්මණෞ ॥ 15 ॥
ගංධර්වරාජප්රතිමෞ පාර්ථිවව්යංජනාන්විතෞ ।
දේවෞ වා මානුෂෞ වා තෞ න තර්කයිතුමුත්සහේ ॥ 16 ॥
තරුණී රූපසංපන්නා සර්වාභරණභූෂිතා ।
දෘෂ්ටා තත්ර මයා නාරී තයෝර්මධ්යේ සුමධ්යමා ॥ 17 ॥
තාභ්යාමුභාභ්යාං සංභූය ප්රමදාමධිකෘත්ය තාම් ।
ඉමාමවස්ථාං නීතාහං යථානාථාසතී තථා ॥ 18 ॥
තස්යාශ්චානෘජුවෘත්තායාස්තයෝශ්ච හතයෝරහම් ।
සඵේනං පාතුමිච්ඡාමි රුධිරං රණමූර්ධනි ॥ 19 ॥
ඒෂ මේ ප්රථමඃ කාමඃ කෘතස්තාත ත්වයා භවේත් ।
තස්යාස්තයෝශ්ච රුධිරං පිබේයමහමාහවේ ॥ 20 ॥
ඉති තස්යාං බ්රුවාණායාං චතුර්දශ මහාබලාන් ।
ව්යාදිදේශ ඛරඃ ක්රුද්ධෝ රාක්ෂසානංතකෝපමාන් ॥ 21 ॥
මානුෂෞ ශස්ත්රසංපන්නෞ චීරකෘෂ්ණාජිනාංබරෞ ।
ප්රවිෂ්ටෞ දංඩකාරණ්යං ඝෝරං ප්රමදයා සහ ॥ 22 ॥
තෞ හත්වා තාං ච දුර්වෘත්තාමපාවර්තිතුමර්හථ ।
ඉයං ච රුධිරං තේෂාං භගිනී මම පාස්යති ॥ 23 ॥
මනෝරථෝऽයමිෂ්ටෝऽස්යා භගින්යා මම රාක්ෂසාඃ ।
ශීඝ්රං සංපාද්යතාං තෞ ච ප්රමථ්ය ස්වේන තේජසා ॥ 24 ॥
ඉති ප්රතිසමාදිෂ්ටා රාක්ෂසාස්තේ චතුර්දශ ।
තත්ර ජග්මුස්තයා සාර්ධං ඝනා වාතේරිතා යථා ॥ 25 ॥
තතස්තු තේ තං සමුදග්රතේජසං තථාපිऽතීක්ෂ්ණප්රදරා නිශාචරාඃ ।
න ශේකුරේනං සහසා ප්රමර්දිතුං වනද්විපා දීප්තමිවාග්නිමුත්ථිතම් ॥ 26 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අරණ්යකාංඩේ ඒකෝනවිංශස්සර්ගඃ ॥
