ଶ୍ରୀମଦ୍ଵାଲ୍ମୀକୀୟ ରାମାୟଣେ ଅରଣ୍ୟକାଂଡମ୍ ।
ଅଥ ଏକୋନଵିଂଶସ୍ସର୍ଗଃ ।
ତାଂ ତଥା ପତିତାଂ ଦୃଷ୍ଟ୍ଵା ଵିରୂପାଂ ଶୋଣିତୋକ୍ଷିତାମ୍ ।
ଭଗିନୀଂ କ୍ରୋଧସଂତପ୍ତଃ ଖରଃ ପପ୍ରଚ୍ଛ ରାକ୍ଷସଃ ॥ 1 ॥
ଉତ୍ତିଷ୍ଠ ତାଵଦାଖ୍ୟାହି ପ୍ରମୋହଂ ଜହି ସଂଭ୍ରମମ୍ ।
ଵ୍ୟକ୍ତମାଖ୍ୟାହି କେନ ତ୍ଵମେଵଂ ରୂପା ଵିରୂପିତା ॥ 2 ॥
କଃ କୃଷ୍ଣସର୍ପମାସୀନମାଶୀଵିଷମନାଗସମ୍ ।
ତୁଦତ୍ୟଭିସମାପନ୍ନମଂଗୁଲ୍ୟଗ୍ରେଣ ଲୀଲୟା ॥ 3 ॥
କଃ କାଲପାଶଂ ସମାସଜ୍ୟ କଂଠେ ମୋହାନ୍ନ ବୁଧ୍ୟତେ ।
ୟସ୍ତ୍ଵାମଦ୍ୟ ସମାସାଦ୍ୟ ପୀତଵାନ୍ଵିଷମୁତ୍ତମମ୍ ॥ 4 ॥
ବଲଵିକ୍ରମସଂପନ୍ନା କାମଗା କାମରୂପିଣୀ ।
ଇମାମଵସ୍ଥାଂ ନୀତା ତ୍ଵଂ କେନାଂତକସମାଗତା ॥ 5 ॥
ଦେଵଗଂଧର୍ଵଭୂତାନାମୃଷୀଣାଂ ଚ ମହାତ୍ମନାମ୍ ।
କୋଽୟମେଵଂ ଵିରୂପାଂ ତ୍ଵାଂ ମହାଵୀର୍ୟଶ୍ଚକାର ହ ॥ 6 ॥
ନ ହି ପଶ୍ୟାମ୍ୟହଂ ଲୋକେ ୟଃ କୁର୍ୟାନ୍ମମ ଵିପ୍ରିୟମ୍ ।
ଅମରେଷୁ ସହସ୍ରାକ୍ଷଂ ମହେଂଦ୍ରଂ ପାକଶାସନମ୍ ॥ 7 ॥
ଅଦ୍ୟାହଂ ମାର୍ଗଣୈଃ ପ୍ରାଣାନାଦାସ୍ୟେ ଜୀଵିତାଂତକୈଃ ।
ସଲିଲେ କ୍ଷୀରମାସକ୍ତଂ ନିଷ୍ପିବନ୍ନିଵ ସାରସଃ ॥ 8 ॥
ନିହତସ୍ୟ ମୟା ସଂଖ୍ୟେ ଶରସଂକୃତ୍ତମର୍ମଣଃ ।
ସଫେନଂ ରୁଧିରଂ ରକ୍ତଂ ମେଦିନୀ କସ୍ୟ ପାସ୍ୟତି ॥ 9 ॥
କସ୍ୟ ପତ୍ରରଥାଃ କାୟାନ୍ମାଂସମୁତ୍କୃତ୍ୟ ସଂଗତାଃ ।
ପ୍ରହୃଷ୍ଟା ଭକ୍ଷୟିଷ୍ୟଂତି ନିହତସ୍ୟ ମୟା ରଣେ ॥ 10 ॥
ତଂ ନ ଦେଵା ନ ଗଂଧର୍ଵା ନ ପିଶାଚା ନ ରାକ୍ଷସାଃ ।
ମୟାପକୃଷ୍ଟଂ କୃପଣଂ ଶକ୍ତାସ୍ତ୍ରାତୁଂ ମହାହଵେ ॥ 11 ॥
ଉପଲଭ୍ୟ ଶନୈସ୍ସଂଜ୍ଞାଂ ତଂ ମେ ଶଂସିତୁମର୍ହସି ।
ୟେନ ତ୍ଵଂ ଦୁର୍ଵିନୀତେନ ଵନେ ଵିକ୍ରମ୍ୟ ନିର୍ଜିତା ॥ 12 ॥
ଇତି ଭ୍ରାତୁର୍ଵଚଶ୍ଶ୍ରୁତ୍ଵା କ୍ରୁଦ୍ଧସ୍ୟ ଚ ଵିଶେଷତଃ ।
ତତଶ୍ଶୂର୍ପଣଖା ଵାକ୍ୟଂ ସବାଷ୍ପମିଦମବ୍ରଵୀତ୍ ॥ 13 ॥
ତରୁଣୌ ରୂପସଂପନ୍ନୌ ସୁକୁମାରୌ ମହାବଲୌ ।
ପୁଂଡରୀକଵିଶାଲାକ୍ଷୌ ଚୀରକୃଷ୍ଣାଜିନାଂବରୌ ॥ 14 ॥
ଫଲମୂଲାଶନୌ ଦାଂତୌ ତାପସୌ ଧର୍ମଚାରିଣୌ ।
ପୁତ୍ରୌ ଦଶରଥସ୍ୟାସ୍ତାଂ ଭ୍ରାତରୌ ରାମଲକ୍ଷ୍ମଣୌ ॥ 15 ॥
ଗଂଧର୍ଵରାଜପ୍ରତିମୌ ପାର୍ଥିଵଵ୍ୟଂଜନାନ୍ଵିତୌ ।
ଦେଵୌ ଵା ମାନୁଷୌ ଵା ତୌ ନ ତର୍କୟିତୁମୁତ୍ସହେ ॥ 16 ॥
ତରୁଣୀ ରୂପସଂପନ୍ନା ସର୍ଵାଭରଣଭୂଷିତା ।
ଦୃଷ୍ଟା ତତ୍ର ମୟା ନାରୀ ତୟୋର୍ମଧ୍ୟେ ସୁମଧ୍ୟମା ॥ 17 ॥
ତାଭ୍ୟାମୁଭାଭ୍ୟାଂ ସଂଭୂୟ ପ୍ରମଦାମଧିକୃତ୍ୟ ତାମ୍ ।
ଇମାମଵସ୍ଥାଂ ନୀତାହଂ ୟଥାନାଥାସତୀ ତଥା ॥ 18 ॥
ତସ୍ୟାଶ୍ଚାନୃଜୁଵୃତ୍ତାୟାସ୍ତୟୋଶ୍ଚ ହତୟୋରହମ୍ ।
ସଫେନଂ ପାତୁମିଚ୍ଛାମି ରୁଧିରଂ ରଣମୂର୍ଧନି ॥ 19 ॥
ଏଷ ମେ ପ୍ରଥମଃ କାମଃ କୃତସ୍ତାତ ତ୍ଵୟା ଭଵେତ୍ ।
ତସ୍ୟାସ୍ତୟୋଶ୍ଚ ରୁଧିରଂ ପିବେୟମହମାହଵେ ॥ 20 ॥
ଇତି ତସ୍ୟାଂ ବ୍ରୁଵାଣାୟାଂ ଚତୁର୍ଦଶ ମହାବଲାନ୍ ।
ଵ୍ୟାଦିଦେଶ ଖରଃ କ୍ରୁଦ୍ଧୋ ରାକ୍ଷସାନଂତକୋପମାନ୍ ॥ 21 ॥
ମାନୁଷୌ ଶସ୍ତ୍ରସଂପନ୍ନୌ ଚୀରକୃଷ୍ଣାଜିନାଂବରୌ ।
ପ୍ରଵିଷ୍ଟୌ ଦଂଡକାରଣ୍ୟଂ ଘୋରଂ ପ୍ରମଦୟା ସହ ॥ 22 ॥
ତୌ ହତ୍ଵା ତାଂ ଚ ଦୁର୍ଵୃତ୍ତାମପାଵର୍ତିତୁମର୍ହଥ ।
ଇୟଂ ଚ ରୁଧିରଂ ତେଷାଂ ଭଗିନୀ ମମ ପାସ୍ୟତି ॥ 23 ॥
ମନୋରଥୋଽୟମିଷ୍ଟୋଽସ୍ୟା ଭଗିନ୍ୟା ମମ ରାକ୍ଷସାଃ ।
ଶୀଘ୍ରଂ ସଂପାଦ୍ୟତାଂ ତୌ ଚ ପ୍ରମଥ୍ୟ ସ୍ଵେନ ତେଜସା ॥ 24 ॥
ଇତି ପ୍ରତିସମାଦିଷ୍ଟା ରାକ୍ଷସାସ୍ତେ ଚତୁର୍ଦଶ ।
ତତ୍ର ଜଗ୍ମୁସ୍ତୟା ସାର୍ଧଂ ଘନା ଵାତେରିତା ୟଥା ॥ 25 ॥
ତତସ୍ତୁ ତେ ତଂ ସମୁଦଗ୍ରତେଜସଂ ତଥାପିଽତୀକ୍ଷ୍ଣପ୍ରଦରା ନିଶାଚରାଃ ।
ନ ଶେକୁରେନଂ ସହସା ପ୍ରମର୍ଦିତୁଂ ଵନଦ୍ଵିପା ଦୀପ୍ତମିଵାଗ୍ନିମୁତ୍ଥିତମ୍ ॥ 26 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ଅରଣ୍ୟକାଂଡେ ଏକୋନଵିଂଶସ୍ସର୍ଗଃ ॥
