śrīmadvālmīkīya rāmāyaṇē araṇyakāṇḍam ।
atha ēkōnaviṃśassargaḥ ।
tāṃ tathā patitāṃ dṛṣṭvā virūpāṃ śōṇitōkṣitām ।
bhaginīṃ krōdhasantaptaḥ kharaḥ paprachCha rākṣasaḥ ॥ 1 ॥
uttiṣṭha tāvadākhyāhi pramōhaṃ jahi sambhramam ।
vyaktamākhyāhi kēna tvamēvaṃ rūpā virūpitā ॥ 2 ॥
kaḥ kṛṣṇasarpamāsīnamāśīviṣamanāgasam ।
tudatyabhisamāpannamaṅgulyagrēṇa līlayā ॥ 3 ॥
kaḥ kālapāśaṃ samāsajya kaṇṭhē mōhānna budhyatē ।
yastvāmadya samāsādya pītavānviṣamuttamam ॥ 4 ॥
balavikramasampannā kāmagā kāmarūpiṇī ।
imāmavasthāṃ nītā tvaṃ kēnāntakasamāgatā ॥ 5 ॥
dēvagandharvabhūtānāmṛṣīṇāṃ cha mahātmanām ।
kō'yamēvaṃ virūpāṃ tvāṃ mahāvīryaśchakāra ha ॥ 6 ॥
na hi paśyāmyahaṃ lōkē yaḥ kuryānmama vipriyam ।
amarēṣu sahasrākṣaṃ mahēndraṃ pākaśāsanam ॥ 7 ॥
adyāhaṃ mārgaṇaiḥ prāṇānādāsyē jīvitāntakaiḥ ।
salilē kṣīramāsaktaṃ niṣpibanniva sārasaḥ ॥ 8 ॥
nihatasya mayā saṅkhyē śarasaṅkṛttamarmaṇaḥ ।
saphēnaṃ rudhiraṃ raktaṃ mēdinī kasya pāsyati ॥ 9 ॥
kasya patrarathāḥ kāyānmāṃsamutkṛtya saṅgatāḥ ।
prahṛṣṭā bhakṣayiṣyanti nihatasya mayā raṇē ॥ 10 ॥
taṃ na dēvā na gandharvā na piśāchā na rākṣasāḥ ।
mayāpakṛṣṭaṃ kṛpaṇaṃ śaktāstrātuṃ mahāhavē ॥ 11 ॥
upalabhya śanaissañjñāṃ taṃ mē śaṃsitumarhasi ।
yēna tvaṃ durvinītēna vanē vikramya nirjitā ॥ 12 ॥
iti bhrāturvachaśśrutvā kruddhasya cha viśēṣataḥ ।
tataśśūrpaṇakhā vākyaṃ sabāṣpamidamabravīt ॥ 13 ॥
taruṇau rūpasampannau sukumārau mahābalau ।
puṇḍarīkaviśālākṣau chīrakṛṣṇājināmbarau ॥ 14 ॥
phalamūlāśanau dāntau tāpasau dharmachāriṇau ।
putrau daśarathasyāstāṃ bhrātarau rāmalakṣmaṇau ॥ 15 ॥
gandharvarājapratimau pārthivavyañjanānvitau ।
dēvau vā mānuṣau vā tau na tarkayitumutsahē ॥ 16 ॥
taruṇī rūpasampannā sarvābharaṇabhūṣitā ।
dṛṣṭā tatra mayā nārī tayōrmadhyē sumadhyamā ॥ 17 ॥
tābhyāmubhābhyāṃ sambhūya pramadāmadhikṛtya tām ।
imāmavasthāṃ nītāhaṃ yathānāthāsatī tathā ॥ 18 ॥
tasyāśchānṛjuvṛttāyāstayōścha hatayōraham ।
saphēnaṃ pātumichChāmi rudhiraṃ raṇamūrdhani ॥ 19 ॥
ēṣa mē prathamaḥ kāmaḥ kṛtastāta tvayā bhavēt ।
tasyāstayōścha rudhiraṃ pibēyamahamāhavē ॥ 20 ॥
iti tasyāṃ bruvāṇāyāṃ chaturdaśa mahābalān ।
vyādidēśa kharaḥ kruddhō rākṣasānantakōpamān ॥ 21 ॥
mānuṣau śastrasampannau chīrakṛṣṇājināmbarau ।
praviṣṭau daṇḍakāraṇyaṃ ghōraṃ pramadayā saha ॥ 22 ॥
tau hatvā tāṃ cha durvṛttāmapāvartitumarhatha ।
iyaṃ cha rudhiraṃ tēṣāṃ bhaginī mama pāsyati ॥ 23 ॥
manōrathō'yamiṣṭō'syā bhaginyā mama rākṣasāḥ ।
śīghraṃ sampādyatāṃ tau cha pramathya svēna tējasā ॥ 24 ॥
iti pratisamādiṣṭā rākṣasāstē chaturdaśa ।
tatra jagmustayā sārdhaṃ ghanā vātēritā yathā ॥ 25 ॥
tatastu tē taṃ samudagratējasaṃ tathāpi'tīkṣṇapradarā niśācharāḥ ।
na śēkurēnaṃ sahasā pramardituṃ vanadvipā dīptamivāgnimutthitam ॥ 26 ॥
ityārṣē śrīmadrāmāyaṇē vālmīkīya ādikāvyē araṇyakāṇḍē ēkōnaviṃśassargaḥ ॥
