শ্রীমদ্বাল্মীকীয় রামাযণে অরণ্যকাংডম্ ।
অথ একোনবিংশস্সর্গঃ ।
তাং তথা পতিতাং দৃষ্ট্বা বিরূপাং শোণিতোক্ষিতাম্ ।
ভগিনীং ক্রোধসংতপ্তঃ খরঃ পপ্রচ্ছ রাক্ষসঃ ॥ 1 ॥
উত্তিষ্ঠ তাবদাখ্য়াহি প্রমোহং জহি সংভ্রমম্ ।
ব্যক্তমাখ্য়াহি কেন ত্বমেবং রূপা বিরূপিতা ॥ 2 ॥
কঃ কৃষ্ণসর্পমাসীনমাশীবিষমনাগসম্ ।
তুদত্যভিসমাপন্নমংগুল্যগ্রেণ লীলয়া ॥ 3 ॥
কঃ কালপাশং সমাসজ্য় কংঠে মোহান্ন বুধ্যতে ।
যস্ত্বামদ্য় সমাসাদ্য় পীতবান্বিষমুত্তমম্ ॥ 4 ॥
বলবিক্রমসংপন্না কামগা কামরূপিণী ।
ইমামবস্থাং নীতা ত্বং কেনাংতকসমাগতা ॥ 5 ॥
দেবগংধর্বভূতানামৃষীণাং চ মহাত্মনাম্ ।
কোঽযমেবং বিরূপাং ত্বাং মহাবীর্যশ্চকার হ ॥ 6 ॥
ন হি পশ্য়াম্যহং লোকে যঃ কুর্য়ান্মম বিপ্রিযম্ ।
অমরেষু সহস্রাক্ষং মহেংদ্রং পাকশাসনম্ ॥ 7 ॥
অদ্য়াহং মার্গণৈঃ প্রাণানাদাস্য়ে জীবিতাংতকৈঃ ।
সলিলে ক্ষীরমাসক্তং নিষ্পিবন্নিব সারসঃ ॥ 8 ॥
নিহতস্য় ময়া সংখ্য়ে শরসংকৃত্তমর্মণঃ ।
সফেনং রুধিরং রক্তং মেদিনী কস্য় পাস্যতি ॥ 9 ॥
কস্য় পত্ররথাঃ কায়ান্মাংসমুত্কৃত্য় সংগতাঃ ।
প্রহৃষ্টা ভক্ষয়িষ্য়ংতি নিহতস্য় ময়া রণে ॥ 10 ॥
তং ন দেবা ন গংধর্বা ন পিশাচা ন রাক্ষসাঃ ।
ময়াপকৃষ্টং কৃপণং শক্তাস্ত্রাতুং মহাহবে ॥ 11 ॥
উপলভ্য় শনৈস্সংজ্ঞাং তং মে শংসিতুমর্হসি ।
যেন ত্বং দুর্বিনীতেন বনে বিক্রম্য় নির্জিতা ॥ 12 ॥
ইতি ভ্রাতুর্বচশ্শ্রুত্বা ক্রুদ্ধস্য় চ বিশেষতঃ ।
ততশ্শূর্পণখা বাক্য়ং সবাষ্পমিদমব্রবীত্ ॥ 13 ॥
তরুণৌ রূপসংপন্নৌ সুকুমারৌ মহাবলৌ ।
পুংডরীকবিশালাক্ষৌ চীরকৃষ্ণাজিনাংবরৌ ॥ 14 ॥
ফলমূলাশনৌ দাংতৌ তাপসৌ ধর্মচারিণৌ ।
পুত্রৌ দশরথস্য়াস্তাং ভ্রাতরৌ রামলক্ষ্মণৌ ॥ 15 ॥
গংধর্বরাজপ্রতিমৌ পার্থিবব্য়ংজনান্বিতৌ ।
দেবৌ বা মানুষৌ বা তৌ ন তর্কয়িতুমুত্সহে ॥ 16 ॥
তরুণী রূপসংপন্না সর্বাভরণভূষিতা ।
দৃষ্টা তত্র ময়া নারী তয়োর্মধ্য়ে সুমধ্যমা ॥ 17 ॥
তাভ্য়ামুভাভ্য়াং সংভূয় প্রমদামধিকৃত্য় তাম্ ।
ইমামবস্থাং নীতাহং যথানাথাসতী তথা ॥ 18 ॥
তস্য়াশ্চানৃজুবৃত্তায়াস্তয়োশ্চ হতয়োরহম্ ।
সফেনং পাতুমিচ্ছামি রুধিরং রণমূর্ধনি ॥ 19 ॥
এষ মে প্রথমঃ কামঃ কৃতস্তাত ত্বয়া ভবেত্ ।
তস্য়াস্তয়োশ্চ রুধিরং পিবেযমহমাহবে ॥ 20 ॥
ইতি তস্য়াং ব্রুবাণায়াং চতুর্দশ মহাবলান্ ।
ব্য়াদিদেশ খরঃ ক্রুদ্ধো রাক্ষসানংতকোপমান্ ॥ 21 ॥
মানুষৌ শস্ত্রসংপন্নৌ চীরকৃষ্ণাজিনাংবরৌ ।
প্রবিষ্টৌ দংডকারণ্য়ং ঘোরং প্রমদয়া সহ ॥ 22 ॥
তৌ হত্বা তাং চ দুর্বৃত্তামপাবর্তিতুমর্হথ ।
ইয়ং চ রুধিরং তেষাং ভগিনী মম পাস্যতি ॥ 23 ॥
মনোরথোঽযমিষ্টোঽস্য়া ভগিন্য়া মম রাক্ষসাঃ ।
শীঘ্রং সংপাদ্যতাং তৌ চ প্রমথ্য় স্বেন তেজসা ॥ 24 ॥
ইতি প্রতিসমাদিষ্টা রাক্ষসাস্তে চতুর্দশ ।
তত্র জগ্মুস্তয়া সার্ধং ঘনা বাতেরিতা যথা ॥ 25 ॥
ততস্তু তে তং সমুদগ্রতেজসং তথাপিঽতীক্ষ্ণপ্রদরা নিশাচরাঃ ।
ন শেকুরেনং সহসা প্রমর্দিতুং বনদ্বিপা দীপ্তমিবাগ্নিমুত্থিতম্ ॥ 26 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে অরণ্যকাংডে একোনবিংশস্সর্গঃ ॥
