ശ്രീമദ്വാല്മീകീയ രാമായണേ അരണ്യകാംഡമ് ।
അഥ ഏകോനവിംശസ്സര്ഗഃ ।
താം തഥാ പതിതാം ദൃഷ്ട്വാ വിരൂപാം ശോണിതോക്ഷിതാമ് ।
ഭഗിനീം ക്രോധസംതപ്തഃ ഖരഃ പപ്രച്ഛ രാക്ഷസഃ ॥ 1 ॥
ഉത്തിഷ്ഠ താവദാഖ്യാഹി പ്രമോഹം ജഹി സംഭ്രമമ് ।
വ്യക്തമാഖ്യാഹി കേന ത്വമേവം രൂപാ വിരൂപിതാ ॥ 2 ॥
കഃ കൃഷ്ണസര്പമാസീനമാശീവിഷമനാഗസമ് ।
തുദത്യഭിസമാപന്നമംഗുല്യഗ്രേണ ലീലയാ ॥ 3 ॥
കഃ കാലപാശം സമാസജ്യ കംഠേ മോഹാന്ന ബുധ്യതേ ।
യസ്ത്വാമദ്യ സമാസാദ്യ പീതവാന്വിഷമുത്തമമ് ॥ 4 ॥
ബലവിക്രമസംപന്നാ കാമഗാ കാമരൂപിണീ ।
ഇമാമവസ്ഥാം നീതാ ത്വം കേനാംതകസമാഗതാ ॥ 5 ॥
ദേവഗംധർവഭൂതാനാമൃഷീണാം ച മഹാത്മനാമ് ।
കോഽയമേവം വിരൂപാം ത്വാം മഹാവീര്യശ്ചകാര ഹ ॥ 6 ॥
ന ഹി പശ്യാമ്യഹം ലോകേ യഃ കുര്യാന്മമ വിപ്രിയമ് ।
അമരേഷു സഹസ്രാക്ഷം മഹേംദ്രം പാകശാസനമ് ॥ 7 ॥
അദ്യാഹം മാര്ഗണൈഃ പ്രാണാനാദാസ്യേ ജീവിതാംതകൈഃ ।
സലിലേ ക്ഷീരമാസക്തം നിഷ്പിബന്നിവ സാരസഃ ॥ 8 ॥
നിഹതസ്യ മയാ സംഖ്യേ ശരസംകൃത്തമര്മണഃ ।
സഫേനം രുധിരം രക്തം മേദിനീ കസ്യ പാസ്യതി ॥ 9 ॥
കസ്യ പത്രരഥാഃ കായാന്മാംസമുത്കൃത്യ സംഗതാഃ ।
പ്രഹൃഷ്ടാ ഭക്ഷയിഷ്യംതി നിഹതസ്യ മയാ രണേ ॥ 10 ॥
തം ന ദേവാ ന ഗംധർവാ ന പിശാചാ ന രാക്ഷസാഃ ।
മയാപകൃഷ്ടം കൃപണം ശക്താസ്ത്രാതും മഹാഹവേ ॥ 11 ॥
ഉപലഭ്യ ശനൈസ്സംജ്ഞാം തം മേ ശംസിതുമര്ഹസി ।
യേന ത്വം ദുർവിനീതേന വനേ വിക്രമ്യ നിര്ജിതാ ॥ 12 ॥
ഇതി ഭ്രാതുർവചശ്ശ്രുത്വാ ക്രുദ്ധസ്യ ച വിശേഷതഃ ।
തതശ്ശൂര്പണഖാ വാക്യം സബാഷ്പമിദമബ്രവീത് ॥ 13 ॥
തരുണൌ രൂപസംപന്നൌ സുകുമാരൌ മഹാബലൌ ।
പുംഡരീകവിശാലാക്ഷൌ ചീരകൃഷ്ണാജിനാംബരൌ ॥ 14 ॥
ഫലമൂലാശനൌ ദാംതൌ താപസൌ ധര്മചാരിണൌ ।
പുത്രൌ ദശരഥസ്യാസ്താം ഭ്രാതരൌ രാമലക്ഷ്മണൌ ॥ 15 ॥
ഗംധർവരാജപ്രതിമൌ പാര്ഥിവവ്യംജനാന്വിതൌ ।
ദേവൌ വാ മാനുഷൌ വാ തൌ ന തര്കയിതുമുത്സഹേ ॥ 16 ॥
തരുണീ രൂപസംപന്നാ സർവാഭരണഭൂഷിതാ ।
ദൃഷ്ടാ തത്ര മയാ നാരീ തയോര്മധ്യേ സുമധ്യമാ ॥ 17 ॥
താഭ്യാമുഭാഭ്യാം സംഭൂയ പ്രമദാമധികൃത്യ താമ് ।
ഇമാമവസ്ഥാം നീതാഹം യഥാനാഥാസതീ തഥാ ॥ 18 ॥
തസ്യാശ്ചാനൃജുവൃത്തായാസ്തയോശ്ച ഹതയോരഹമ് ।
സഫേനം പാതുമിച്ഛാമി രുധിരം രണമൂര്ധനി ॥ 19 ॥
ഏഷ മേ പ്രഥമഃ കാമഃ കൃതസ്താത ത്വയാ ഭവേത് ।
തസ്യാസ്തയോശ്ച രുധിരം പിബേയമഹമാഹവേ ॥ 20 ॥
ഇതി തസ്യാം ബ്രുവാണായാം ചതുര്ദശ മഹാബലാന് ।
വ്യാദിദേശ ഖരഃ ക്രുദ്ധോ രാക്ഷസാനംതകോപമാന് ॥ 21 ॥
മാനുഷൌ ശസ്ത്രസംപന്നൌ ചീരകൃഷ്ണാജിനാംബരൌ ।
പ്രവിഷ്ടൌ ദംഡകാരണ്യം ഘോരം പ്രമദയാ സഹ ॥ 22 ॥
തൌ ഹത്വാ താം ച ദുർവൃത്താമപാവര്തിതുമര്ഹഥ ।
ഇയം ച രുധിരം തേഷാം ഭഗിനീ മമ പാസ്യതി ॥ 23 ॥
മനോരഥോഽയമിഷ്ടോഽസ്യാ ഭഗിന്യാ മമ രാക്ഷസാഃ ।
ശീഘ്രം സംപാദ്യതാം തൌ ച പ്രമഥ്യ സ്വേന തേജസാ ॥ 24 ॥
ഇതി പ്രതിസമാദിഷ്ടാ രാക്ഷസാസ്തേ ചതുര്ദശ ।
തത്ര ജഗ്മുസ്തയാ സാര്ധം ഘനാ വാതേരിതാ യഥാ ॥ 25 ॥
തതസ്തു തേ തം സമുദഗ്രതേജസം തഥാപിഽതീക്ഷ്ണപ്രദരാ നിശാചരാഃ ।
ന ശേകുരേനം സഹസാ പ്രമര്ദിതും വനദ്വിപാ ദീപ്തമിവാഗ്നിമുത്ഥിതമ് ॥ 26 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ അരണ്യകാംഡേ ഏകോനവിംശസ്സര്ഗഃ ॥
